له‌سه‌رهێل 139
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
یادی سەروەران

سەروەری گەل حامید قادری ناسراو بە ( حامیدبڵەسەنی) و (عومەر فەرەجی) 


لە كوردستان نیشتمانی كورد خۆشەویستان خۆ فیداكردن باوی هەیە و قارەمانی و قارەمانەتی ناوی هەیە. لەو ئاسمانی پڕ تەم و غەمەدا كە شەبەقی خوێنی شەهیدان تاوی هەیە و دوژمنی نابەكار بە هەموو بار پیلان دەگێڕێ و خۆفرۆش و دژمن بەگەلیش هەن، سەركەوتن بۆ ئەوانە دەبێ كە ئاڵای بژی كوردستان بەرزدەكەنەوە و سەر شۆڕی بۆ ئەوانەیە كە خۆ لەگەل جیا دەكەنەوە. بەرەی ڕاستی كە وێستگەی ئاشتی گەلانە و لە فەرهەنگی ژیانیدا بە سەدان جار وشەی كوردستان و فیداكاری مانا دەكرێ سەرە ئەنجام بەرەی بێ ورەیی و ناپاكی و ستەم كە ویست و خواستی دەست درێژی بۆ هەموو مافەكانی ژێر چەپۆكانە و لە تۆماری ڕەشی ژیانیدا تاوان وەك پاوان دەبیندرێ، سیایی هەڵە و تاوان و لە خۆبایی بوون و ڕوو ڕەشی لەبەر ڕەشی نازاندرێ و سەری لێ دەرناكرێ ،تێك دەرووخێن و هیوای بەشخوراوانی جیهان گوڵ دەكا، ئیتر داگیركەر لە شان و پیلی زەحمەتكێشان دەترسێ و سڵ دەكا. لە كوردستان ڕووبار بە خوێنی لاوان دەخوسێن و خەتەكانی دەوران دەوری كوردستان بە خوێن دەكشێن. گۆمی خوێن، خوێن ڕێژان دەخنكێنێ و گڕی جەرگی سووتاوی دایكان، تاوانباران دەسووتێنێ و چەكی تۆڵەی لاوەكانی كوردستان هەروا بەگڕ لە دەست تۆڵە ئەستێناندا دەمێنێ و ناوی پێشمەرگەی كوردستان هەروا بەرز و بەڕێز دەبێ و ناوی جاشی خۆفرۆش لە دەفتەری ژیان و ئینساندا ڕەش دەبێتەوە و نامێنێ. ئەوانەی ئەمڕۆ لە نیشتمانی ئێمە، كە گوڵی هیوا بە سەركەوتنی شۆڕشی كوردستان لە پشكۆتن دایە و زەرەری ڕۆژی سەربەخۆیی لە سایەی ڕەنجی خەباتگێرانی كوردستان لە ئەنگوتن دایە، هەموو بوون و نەبوونیان لە پێناو دەسەڵاتی پڕ لە تاوانی ڕژێم دایە. ئەوانەی چەکی خۆفرۆشیان لەشان کردووە و بەرەو چیا و شاخ و ڕەهۆڵەكان بۆ سەر شوێنی حەسانەوە و كاری پێشمەرگە كوێر كێشان ئەكەن، دەبێ بزانین هەر ڕۆژێك دێت شۆڕش بە سزای خۆیانیان لە گەڵدا دەكات. ئەوانە دەبێ بزانن چی ئەكەن و لەگەڵ چ هێزێكن و لە بەرانبەر چ هێزێكدان. دەبێ بزانن هێزی پێشمەرگەی كوردستان بێ بڕانەوەیە و لەو دەستانەی كە كوردی پێ دەكوژرێن و كوردستانی پێ وێران دەركرێ هەرگیز نابوورن و خۆش نابن. ئەو دەستانە كە ئاڵای بژی كورد و كوردستانی پێ بەرز دەكرێتەوە قایمترو بە هێزتر لە هەموو دەستێكی ناپاكی جاش و بەكرێگیراوانی ناوخۆیە و تێكیان دەشكێنن.
ڕۆژی 18ی ڕەزبەری 1365 دەستەیەك لە پێشمەرگەكانی سازمانی خەبات بۆ چالاکی و ئەرکی پێشمەرگەیی چوو بوون بۆ ناوچەی بانە. لە درێژەی ئەو گەڕانەدا ڕێیان دەکەوێتە نزیك گوندی بڵەسەن و شەو دەمێننەوە. جاش و خۆفرۆشەكان پێیان دەزانن و بە هاوكاری جاشەكان كە بە سەر چاوەی هەموو خەیانەت و جینایەتێك دەناسرێن دژمن بۆیان دەچێ و دەورەیان دەگرن. كاتێك پێشمەرگەكان پێیان دەزانن هەوڵ ئەدەن خۆیان بگەیەنە بەرزاییەكان. دوژمن بە هێزی زۆرەوە لە هەموو لاوە تەقەیان لێ دەكا و پێشمەرگەكان بە توندی بەگژیاندا دەچن و دژمنی زۆردار دەدەنە بەر ئاگری چەكەكانیان. بەڵام بەداخی گرانەوە هەر زوو چەند پێشمەرگە بریندار دەبن و ناتوانن بگەنە بەرزاییەكان. دوژمنی داگیركەر گەمارۆكە توندتر دەكا. بریندارەكان پاش نیو ساعەت شەڕو خۆڕاگری لە ساعەت 1ی دوای نیوەڕۆدا شەهید دەبن. ئەو پێشمەرگانەی كە بۆ هەمیشە لە دڵماندا زیندوو دەمێننەوە بریتی بوون لە:
شەهید حامید قادری كوڕی مەحموود فەرەج قادر خەڵكی بڵەسەن کە ساڵی 1361هاتە ناو ڕیزی پێشمەرگەكانی سازمانەوە و وەك زۆربەی لاوەكانی كوردستان ئەركی پیرۆزی پێشمەرگایەتی وەئەستۆگرت. چالاكانە لە هەموو مەیدانەكانی سیاسی و نیزامی خەبات تێدەكۆشا. شەهید حامید لە هێز و پەلەكاندا زۆربەی كارەكانی تەداروكاتی جێ بەجێ ئەكرد. ساڵی 1364 بوو بە ئەندامی كومیتەی سەروە مەڵبەندی یەك تا لە ڕۆژی 18ی ڕەزبەری 1365دا ئەو گیانەی كە بە گەل و نیشتمان دەیندار بوو پێشكەشی كرد. 

دووهەم: شەهید عومەر فەرەجی كوڕی خالید فەرەج خەڵكی بڵەسەن قارەمانی مەیدانی شەڕو تێكۆشان ساڵی 1341 لە دایك بووە. هەر لە سەرەتای دەستپێكردنی شۆڕشی ئەمجارەوە هاتە ناو ڕیزی شۆڕش و چەكی شەرەفی كردە شان. ئازایەتی لە تایبەتمەندیەكانی شەهید عومەر بوو. لە شەڕەكانی لاجان و پیرانشار و سەردەشت و بانەدا بەو پەڕی لە خۆبردوویەوە بەشداری كرد. لە بەهاری 1362هاتە ناو ڕیزی پێشمەرگەكانی سازمانی خەبات. هەڵسووڕاوانە ئەركی پێشمەرگایەتی جێ بەجێ دەكرد. لە ماوەی 3ساڵ پێشمەرگایەتیدا زیاتر لە 3 جار بریندار بوو، بەڵام جار بە جار ئازاتر بە گژ دوژمنیدا دەچۆوە و پەلاماری شێرانەی دەبرد. خوێنی شەهیدانی گوندی بڵەسەن شەهید حامید قادری و شەهید ڕەحمان و شەهید عومەر و باوەڕی ڕزگاریخوازیمان پتەوتر دەكا و ڕێگای سەربەستیمان چاكتر بۆ ڕاست و ڕوون دەكا. 

هەزاران سڵاو لە گیانی پاكی شەهیدانی ڕێگای گەیشتن بە مافی گەل
ڕێکه‌وت: 2020-10-11 07:40:44
به‌شی ( شه‌هیدان )





دیمانه

سیاسی