له‌سه‌رهێل 62
سێ‌شه‌مه 4 سه‌رماوه‌ز 2720
سازمانی خه‌باتی کوردستانی ئێران
پێشمەرگە هێمای بزاڤی ڕزگاریخوازانەی نەتەوەیی

کامیل نورانی فەرد
لە یادی 10 ی خەزەڵوەر ڕۆژی پێشمەرگەی سازمانی خەبات
ڕەمزی مانەوەی هەر نەتەوەیێك، بوونی هێزیكی بەرگریكارە تا لە سەردەم و كاتی پێویست بەرەنگاری مەترسیەكان و ڕووبەڕووی ئەو تەعدا و ناحەقیانە ببێتەوە كە دەكرێتە سەر نەتەوەكەی. 
لەناو نەتەوەی كورد، ئەو هێزە پارێزەرە نازناوی پێشمەرگەی" پێ بەخشراوە و بە واتای ئەوە كە گیان و ڕۆحی خۆی فیدای میللەت و نیشتمان دەكات. دەور و بایەخی هێزی پێشمەرگە بە درێژایی مێژووی بەرەنگاربوونەوەو خەباتی نەتەوەكەمان لە بەرانبەر دژمنان، وای كردووە كە ناوی پێشمەرگە لە ڕیزی یەكەمین بایەخ و بەها نەتەوەییەكاندا بێ و جێگەی لەناو دڵی تاك بە تاكی هەر كوردێكی نیشتمانپەروەردا بێ. 
سازمانی خەبات ی كوردستانی ئێران یەكێك لەو هێزە تێكۆشەرانەیە كە لەسەرەتای تێكۆشانی خۆی، هێزێكی نەتەوەیی و گیان لەسەر دەستی پێكهێنا و لە ژێر ناوی هێزی پێشمەرگەی سازمانی خەبات خستیە خزمەت جوڵانەوەی مافخوازانەی گەلی كوردو، بۆ بەرەوپێشبردنی دۆزی ڕەوای گەلەكەمان لە كوردستانی ئێران و لەماوەی مێژووی 4 دەیەی خەبات و تێكۆشانی، بە دەیان داستانی پڕسەروەری و حەماسەی كەم وێنەی لەسەر دەستی ئەو پێشمەرگە چاونەترس و قارەمانانە پێكهێناوە و باشترین ڕۆڵەكانی نەتەوەكەمانی پێشكەش بە بارەگای بەرزی شەهیدانی كوردستان كردووە. وەك ڕێزێك بۆ خەبات و زەحمەتی هێزی پێشمەرگە، ڕۆژێك دیاری كراوە كە تێیدا ڕێز لە پێشمەرگە و خەبات و تێكۆشانی دەگیرێ‌ و ئەو ڕۆژە رۆژی 10ی خەزەڵوەرە، كە تێیدا حەماسەیەكی كەم وێنەی پێشمەرگانە تۆمار كراوە. 
ڕۆژی 10ی خەزەڵوەر، هەم لە ئاستی نێوخۆیی و سازمانی دا بایەخێكی تایبەتی هەیە و هەمیش لە ئاستی جوڵانەوەی ڕزگاریخوازانەی نەتەوەیی لە كوردستانی ئێران گرینگی تایبەتی خۆی هەیە. 
ڕۆژی 10ی خەزەڵوەری 1358، ئەو ڕۆژەیە كە هێزی پێشمەرگە بە ڕێبەری مامۆستای نەمر مامۆستا شێخ جەلالی حوسەینی دامەزرێنەری سازمانی خەبات، بەرەنگاری هێزی زۆر و پۆشتەی دژمن بوونەوە و وانەیێكی گەورەیان بە ڕژیمی تازە بەدەسەڵات گەیشتووی ئاخوندی دا. ئەو هێزەی كە هاتبوون كۆتایی بە مانەوەی پێشمەرگە لە شارەكانی كوردستان بێنن و لەزمانی خۆیانەوە غائیلەی كوردستان كۆتا پێ بێنن، لە شەڕێكی قارەمانانە دا لە جادەی هەژدە دۆڵانی نێوان سەردەشت و بانە ڕوبەڕووی هێڵی پۆڵایینی بەرەنگاری پێشمەرگە دەبنەوە و خەسارەتێكی گەورەیان لێ دەكەوێ‌ و ئەو ئەركە شوومەی پێیان سپێردرابوو، لە گۆر دەنرێ‌. 
لە ئاستی سازمانی دا بایەخی ئەو ڕۆژە لەوەدایە كە ئەو حەماسەتە مەزنە بوو بەهۆی گرێدانی دوو مێژووی پێش پێكهاتن و دوای پێكهاتنی سازمانی خەبات و ئەو قۆناغەی كردە قۆناغێكی گرینگ و لێكدانەبڕاوی سازمانی خەبات، و هەروەها ئەو شانازییە گەورەیەی بە هێزی پێشمەرگەی سازمانی خەبات بەخشی كە داستانێكی وەها گەورە بە پشت بەستن بە ئیمان و ئیرادەی نەتەوەییانەوە تۆمار بكات، و وەك لاپەریێكی زێڕینی نەتەوەیی لە مێژووی خۆڕاگری نەتەوەیی بە هەرمانی بمێنێتەوە و هەروەها ژیر و لێزانی مامۆستای نەمرمانی دەرخست كە توانی لەو ماوە كەمە دا بە سیاسەتێكی حەكیمانە هێزێكی وەها كاركوشتە و مونەزەم پێك بێنێ. لە ئاستی جوڵانەوەی ڕزگاریخوازانەش دا بایەخی ئەو رۆژە لەوەدایە كە خومەینی ناچار كرد ئاگر بڕِ لەگەڵ خەڵكی كوردستان ڕابگەێنێ‌، گەورەیی قەبارەی زیانەكە لە دژمن ئاستێكدا بوو كە خومەینی پەیامێكی دەنگی بڵاو كردەوە و وتی خەڵكی كوردستان من دەنگی ئێوەم بیست. 
ڕۆژی 10ی خەزەڵوەر، پیشاندەری سیمای ڕاستەقینەی هێزی پێشمەرگە بوو، ئەو هێزە گیان لەسەر دەستەی كە گەورەترین قارەمانەتی و لەخۆبردوویی لەخۆی پیشان دا و نەیهێشت پیلانی چەپەڵی ڕژیمی ئاخوندی و شەخسی خومەینی سەركەوتوو بێ و ورە و پێگەی جوڵانەوەی كوردی بەرز كردەوە.
ئەوەی جێگەی بایەخە پەرەسەندنی ئەو ئیرادە و ئیمان و باوەڕە لەناو هەموو جومگەكانی كۆمەڵگا و بەرپرسیاركردنی تاك بە تاكی كۆمەلگا بۆ بردنە پێشەوەی خەباتێكی سەرانسەری و لەخۆ بردووانەیە، بۆیە بۆ ئامانجێكی لەم چەشنە پێویستمان بە سەرلەنوێ پێناسە كردنەوەی پێشمەرگەیە و پێویستە لەو قاوخە بەرتەسكەی دەرباوێن. 
لەڕاستی دا ئەوەی ئەمڕۆش دەیبینین هەنگاو نان بەرەو ئەو مەسیرەیە و ئەو ناوە بەڕادەیێك گشتگیر و پیرۆزە كە لە هەموو ڕەهەندەكانی تریش كەڵك لەناوی پێشمەگە وەردەگیرێ و بە كەسێك ئامادەی خۆفیداكردن بێ لە پێناو گەل، نازناوی پێشمەرگەی پێ دەبەخشرێ، هەر وەك بینیمان لەدوا نمونە دا لە دوای هاتنی كۆرۆنا نازناوی پێشمەرگەی سپی پۆشیان بە دكتۆر و كادری دەرمانی بەخشی و لەرێگەی ئەو نازناوە لوتكەی ڕێز و پێزانینی گەل بەخشرایە پزیشكە فیداكارەكان. 
ئەگەر لە یەكەم وێنا بۆ پێشمەرگە مرۆڤێكی چەكدار و تەیار بە فكری ئازادی و هەوڵدان بۆ نیشتمانمان دێتە بەرچاو كە لەدەرەوەی كۆمەڵگای خۆی نیشتەجێیە، پێویستە ئەو وێنایە بگۆڕدرێ بۆ مرۆڤێكی وریای سیاسی كە لە پێناو ئازادی و بەختەوەری كۆمەڵگاكەی لە تێكۆشان دایە جیاواز لەوەی كە لە چ شوێنێك و لەكام بەشی كۆمەڵگا تێدەكۆشێ و چالاكی هەیە. 
بە گەشەسەندنێكی لەو چەشنە بێگومان هێز و پۆتانسیەلێكی زیاتر لەدەوری خەباتی ڕزگاریخوازانەی نەتەوەیی كۆدەبێتەوە و بەرپرسیارەتیەكان دابەش دەبێ بەسەر هەموو تاكەكانی كۆمەڵگا. 
بەو پێناسە نوێیە دەكرێ‌ دكتۆرێك، ژینگە پارێزێك و فێركارێكی زمانی كوردی و هتد .. پێشمەرگە بێ و پێشمەرگە ئاسا لە پێناو بەختەوەری كۆمەڵگاكەی تێبكۆشی.
پیرۆزبێ 10 ی خەزەڵوەر، ڕۆژی پێشمەرگەی سازمانی خەبات.
ڕێکه‌وت: 2020-10-26 19:41:31
به‌شی ( سیاسی )





دیمانه

سیاسی