له‌سه‌رهێل 99
پێنچ شه‌مه‌ 26 خاکه‌لێوه‌ 2721
سازمانی خه‌باتی کوردستانی ئێران
پەیامی پیرۆزبایی سكرتێری گشتی سازمانی خەبات بە بۆنەی یادی لە دایك بوونی پێشەواو پێغەمبەری ئیسلام حەزرەتی موحەممەد (ص)

بە بۆنەی یادی لە دایك بوونی پێغەمبەری مەزن و پێشەوای ئیسلام حەزرەتی موحەممەد، گەرمترین پیرۆزبایی بە موسوڵمانانی كوردستان، ئێران و جیهان پێشكەش دەكەم.
حەزرەتی موحەممەد لە گەڵ ئەوەی پێغەمبەری دینی ئیسلام بوو لە هەمانكاتدا ڕێبەرێكی كەم وێنە لە مێژووی مرۆفایەتیدا بوو. پێغەمبەری ئیسلام توانی لەماوەی پێغەمبەرایەتیەکەی دا پێشکەوتنی بەرچاو لە مێژووی شارستانیەتی مرۆڤایەتی بە لایەنی ئەرێنی پێک بێنێ و هەموو كات لەگەڵ لایەنگرانی دین و باوەڕەكانی دیكە بە ڕێزەوە هەڵسوكەوتی كردوەو لە ئیدارەكردنی ووڵاتیشدا خاوەن باوەڕانی دیكەی بەشدار كردووە.
بێگومان هەر جۆرە توندو تیژی و كردەوەێكی ترۆریستی و هەر هەڵوێستێكی نەشیاو لە لایەن هەر دەستەو گروپ و تاكە كەسێكەوە بە ناوی ئیسلام و بە ناوی لایەنگری لە پێغەمبەری ئیسلام،زیانبارو مەترسیدارەو پێچەوانەی ڕاسپاردەكانی دینی ئیسلام و حەزرەتی موحەممەدو ئاشتی و پێكەوە ژیانی مرۆفایەتی بە تێكڕاو، خاوەن دین و باوەڕەكانە بە تایبەت.
لە هەمانكاتیشدا بێ‌ ڕێزی بە حەزرەتی موحەممەد و دینی ئیسلام و هەر پێغەمبەرێك و هەر دینێك، كردەوەێكی نەشیاوەو، حەق وایە حكومەت و دەسەڵاتەكان و یاسادانەران لە سەرانسەری جیهان، بە شێوەی قانونی، بێ‌ ڕێزی و تەوهین بە هەموو دین و باوەڕەكان سنووردار بكەن.
بەو هومێدەی یادی لە دایك بوونی پێغەمبەری ئیسلام ببێتە هۆی ئاشتی و تەبایی كۆمەڵایەتی و هیچ كەس و لایەنێك ئەو مافە بە خۆی نەدا كە بە ناوی ئیسلام و بە ناوی دیفاع لە حەزرەتی موحەممەد، كردەوەی ترۆریستی و ئاژاوەگێڕی ئەنجام بدات، و ئەو دەستەو تاقمە ترۆریستیانەی بە ناو ئیسلام جینایەت دەكەن و موسڵمان و غەیرە موسڵمان دەكوژن و ئاژاوەو بشێوی لە ووڵاتان ئەنجام دەدەن و ئامانج و مەبەستیان دژایەتی ئینسانیەتە، ریسواو سەرشۆڕبن و ئاسەواریان نەمێنێ‌. 
جارێكی دیكە یادی لە دایك بوونی حەزرەتی موحەممەد لە موسڵمانانی كوردستان و ئێران و جیهان پێرۆز بێ‌.
سازمانی خەبات ی كوردستانی ئێران
سكرتێری گشتی
بابەشێخ حوسەینی
8 ی خەزەڵوەری 1399 ی كۆچی خۆری
ڕێکه‌وت: 2020-10-29 11:57:53
به‌شی ( سکرتێری گشتی )





دیمانه

سیاسی