له‌سه‌رهێل 105
پێنچ شه‌مه‌ 26 خاکه‌لێوه‌ 2721
سازمانی خه‌باتی کوردستانی ئێران
پەیامی سكرتێری گشتی بەبۆنەی 10ی خەزەڵوەر، ڕۆژی پێشمەرگەی سازمانی خەبات

هاونیشتمانیانی كوردستان!
تێكۆشەران و خەباتكارانی شۆڕشگێر!
پێشمەرگە قارەمانەكانی كوردستان!
لە دوای فەرمانی جیهادی خومەینی بۆ سەر خەڵكی كوردستان و هێرشی هێزی بەكریگیراوی پاسدارو هێزەكانی دیكەی ڕژیمی ئاخوندی بۆ سەر شارو گوندو شەهیدو برینداركردنی هاونیشتمانیان و سوتانی ماڵ و جێگەی ژیانی دانیشتوانی كوردستان و ناچار كردنی خەڵكی كوردستان بۆ دیفاع لە خۆیان، لە هەمانكاتی هێرشی دژمن،هێزی پێشمەرگەی كوردستان پێكهات و كوڕان و كچانی خۆێن گەرم و زۆربەی ئەوانەی دەیانتوانی چەكی دیفاع لە نیشتمان و دانیشتوانانی هەڵگرن هاتنە ڕیزی پێشمەرگەوەو توانیان زەربەتی قورس لە هێزی پاسدارانی پارێزەری دەسەڵاتی دیكتاتۆری و جینایەتكار بدەن.
هێزی پێشمەرگەی نەبەزو قارەمانی كوردستان، ئەو پێشمەرگە گیانبازو خۆنەویستانەی كە لە ساڵی 1359 ی كۆچی خۆری لە ڕیزەكانی هێزی پێشمەرگەی كوردستان، كە بە پێكهاتنی سازمان لە ڕیزەكانی سازمانی خەبات سازماندران، شەڕێكی چارەنووس سازو كەم وێنەیان لە دژی هێزی قودسی ڕژیم لە 10ی خەزەڵوەری 1358 كۆچی خۆری بەڕێوەبرد. لەو جەنگەدا كە لە سەر لە بەیانی تا تاریكان و بە، بەرینایی نزیك بە 20 كیلومیتر، لە پێچەكانی هەژدە دۆڵانی جادەی سەردەشت بانە، تا ناو شاری بانە ڕویدا، زۆربەی هێزی دژمن و دەیان ئۆتۆمبیل و چەك و تەقەمەنیان لە ناوچوون. بە داخەوە لەو جەنگەدا 8 پێشمەرگەی قارەمانی سازمانی خەبات شەهید بوون و گیانی پاكیان فیدای ئازادی و ڕزگاری گەل و نیشتمان كرد. هەر بە دوای شكستی ڕژیم لەو جەنگەدا، خومەینی بە خەڵكی كوردستان ڕاگەیاند كە دەنگی ئێوەم بیست و بە ناچاری ئاگربڕی ڕاگەیاندو داوای ووت وێژی كرد.
ئەگەرچی خومەینی و ڕژیمە دیكتاتۆرەكەی بە فێڵ وبە مەبەستی كات كڕین و خۆ سازدانەوە بۆ دەست پێكردنەوەی دەورێكی نۆی لە جەنگ، ئاگربەستیان راگەیاند، ئەوە بوو دوایەش هێرشیان بۆ سەر كوردستان بەربڵاوتر دەست پێكردەوە. بەڵام سەرەڕای هێرشی بەربڵاوی دژمن و داگیركردنی كوردستان، داستانی 10ی خەزەڵوەرو سەركەوتنی هێزی پێشمەرگەی كوردستان وەك دەستكەوتێكی گەورە لە بزافی ڕزگاریخوازی گەلی كورد لە كوردستانی ئێراندا بە درەوشایەوەیی مایەوە.
ئەمرۆ لەم یادەدا جارێكی دیكە سازمانی خەبات ی كوردستانی ئێران ڕایدەگەێنێ‌ كە هێزی پێشمەرگەی كوردستان لە ڕیزەكانی سازمانی خەبات بڕیاریان بڕیاڕی تێكۆشان و گیانبازیە لە پێناو ئازادی گەل و ڕزگاری كوردستان و شۆرشی ڕەوا لە بەرانبەر ڕژیمی دیكتاتۆری ویلایەتی فقیە.
سازمانی خەبات هێزێكی نیشتمانی و نەتەوەییەو، لە گەڵ خەڵكی كوردستانەو بۆ ئازادی كورد تێدەكۆشێ‌، سازمانی خەبات ریشەی لە ناخی كوردستان داكوتاوەو هەروەك چیا، هەروەك لێڕەوارەكان و جەنگەڵەكان، هەروەك ڕوبارو، وەك هەناسەیە، سازمانی خەبات داری هەزار ڕیشەیە، خۆێنی شەهیدو ڕێبازی شەهیدان وكەس و كاری شەهیدان و هاونیشتمانیانی پاك و نیشتمان پەروەر پشتیوانین. ئەو كەسەی گەرەكیە لە ڕێبازی سازمانی خەبات حاڵی بێ‌، ئاوڕێكی كورت لە مێژووی خاوێن وبێگەردی، لەسیاسەت و كردەوەو هەڵۆێستە نیشتمانەكانی، لە نەبەزی و نەترسی لە بڕیاڕی نەتەوەیی و لێبڕاوی پێشمەرگەو لە كاروانی لە خۆێندا شەڵاڵی شەهیدانی و دەیان كاركردو هەڵۆێستی نەتەوەیی و شۆڕشگێڕانەی بڕوانێ‌، لە جەستەی برینداری تێكۆشەرانی، لە پەیمان و بەڵێن و وەفاداری، لە تەبایی و دوریی كردن لە ناوچەگەرایی و دەستە بەندی، و لە زۆر دیاردەی كەم وێنەی دیكەی بڕوانێ‌، جا ئەو كات بۆی دەردەكەوێ‌ كە سازمانی خەبات ڕەسەنترین تەشكیلات و سازمانی تێكۆشەرە.
كادرو پێشمەرگەو ئەندامەكانی لە هەر كۆڕێكدا،سەربەرزانەو بێ‌ سڵەمینەوە ئامادە دەبن و دڵخۆش دەبن كە لە ڕێزی سازمانێكی سیاسی و نەتەوەیی و تێكۆشەردان كە خاڵێكی لاوازی سیاسی لە ماوەی 41 ساڵ كارو تێكۆشانیدا نیە. بەڵێ‌ سازمانی خەبات داری هەزار ڕیشەیە، وەك چیا سەركەشەكان بە قوڵایی كوردستاندا ریشەی داكوتاوەو لە قوڵایی دڵی هەموو ئەوانەدایە كە سازمانی خەبات و پێشمەرگە پاك و دڵسۆزەكانی بە باشی دەناسن. بێگومان یەكێك لە پێناسەكانی سازمانی خەبات قارەمانی و نەبەردی 10 ی خەزەڵوەرو داستانە حەماسی و كەم وێنەكانی لە ڕوبەڕوبونەوە لە بەرانبەر هێزە بەكرێگیراوەكانی ڕژیمی ئاخوندیە. 
هۆگرانی ڕێگەی ئازادی!
هاوڕییانی سازمانی خەبات !
لە كاتێكدا یادی 10ی خەزەڵوەر بەرز ڕادەگرین كە بە داخەوە لە كوردستان و ئێران و لە سەرانسەری جیهاندا، نەخۆشی كۆڕۆنا زیاتر لە یەك ملۆێن مرۆفی كوشتوەو زیانێكی گەورەی بە ئابوری جیهان گەیاندوەو دەیان كێشەی كۆمەڵایەتی بە داوی خۆیدا هێناوە. ئاشكرایە ڕژیمی ئاخوندی هیچ هەنگاوێكی بەرچاوی بۆ هاوكاری خەڵك لە ئیران و كوردستان هەڵنەگرتوەو تەنانەت هەوڵیداوە لە كۆرۆنا، وەك قەیرانێك بۆ بەردەوامی دەسەڵات و شاردنەوەی كێشە بەربڵاوە، سیاسی و ئابوریەكان و پەرەپیدانی جینایەت و چەوسانەوەی خەلكی وەزاڵە هاتوی ئێران كەڵكی لێوەرگرێ‌.هەر وەك دەركەوت دەسەڵاتدارانی ڕژیمی ئاخوندی بەرپرس بوون لە بڵاوبونەوەی كۆڕۆنا هەروەها بەرپرس بوون لە شاردنەوەی، لە ماوە چەند مانگ تێ‌ پەڕین بە سەر بڵاو بونەوەی لە ئێراندا، كە ئەوە دەرخەری كەمتەرخەمی و دژمنایەتیانە لە گەڵ خەڵكی ئێران.بە بۆنەی كۆچی هاونیشتمانی كوردستان و ئێران بە هۆی نەخۆشی كۆڕۆنا، سەرەخۆشی بە خانەوادەكانیان و خەڵكی كوردستان ڕادەگەینین و لە غەم و پەژارەیاندا خۆمان بە شەریكیان دەزانین.
بێگومان ئاخوندە جینایەتكارەكانی دەسەڵاتدار لە ئێران بەرپرسن لە بڵاو بونەوەو پەرەسەندنی مەینەتی و كێشەی هەمەچەشنە بۆ خەڵكی ئێران، سیاسەتی شەڕخوازانەو ئاژاوەگێڕی لە ووڵاتانی جیهان و پشتیوانی لە ترۆر و تاقمەو دەستە ترۆریستیەكان و هەوڵ بۆ پەرەپێدانی چەكی هێرش بەرو دروست كردنی بۆمبێ‌ ئەتۆمی،ناردنی ئینقلابی خومەینی بۆ ووڵاتانی ناوچەكە، دزی و گەندەڵی دەسەلاتداران و دزینی سەرمایەی خەڵكی ئێران و دەیان كردەوەی دژی خەڵكی دیكە دەرخەری دژایەتی دەسەڵاتە لە گەڵ خەڵك.
سازمانی خەبات پێ‌ وایە دەسەڵاتی دیكتاتۆری ویلایەتی فقیه لە ماوەی 41 ساڵ دەسەڵاتیدا، ئەوەی بە باشی دەرخستوەو سەلماندویەتی كە بە هیچ شێوێك ئاڵوگۆڕی بە قازانجی خەڵكی ئێران و كوردستان لێ‌ ڕەچاو ناكرێ‌ و ئەو ڕژیمە هەر لە ڕۆژانی سەرەتای دەسەڵاتدارییەوە لە تەپڵی شەڕیداوەو دژی ئاشتی و ڕێگەی ئاشتیخوازانە بووە، هەر بۆیە سازمانی خەبات پێ‌ وایە هەر جۆرە هەوڵێك بۆ ووت وێژ لە گەڵ ئەو دەسەڵاتە دڕندەیە بە زیان بۆ خەڵكی كوردو جوڵانەوەی شۆڕگێڕانەی تەواو دەبێ‌ و لە بەرانبەریشدا ڕژیم لە شانۆكاری بە ناو ووت وێژ بە قازانجی دەسەڵاتی نامەشروعی كەڵك وەردەگرێ‌.
لەم یادە پیرۆزەدا داوا لە هێزەسیاسیەكانی كوردستانی ئێران دەكەم لە پێناو یەكخستنی هێزو تواناكان، بە جیددی هەوڵ بۆ كاری هاوبەش، لە سەر سێ‌ بنەمای خەبات و شۆڕش لە پێناو گەیشتنی گەلی كورد بە مافەكانی لە چوارچێوەی ئێران، ڕەد كردنەوەی ووت وێژ لە گەڵ دەسەڵاتی ئاخوندی لە چوارچێوەی كاری هاوبەشماندا، پێداگری لە سەر سیستم و دەسەڵاتی پاڕڵمانی و دیموكڕات كە مافی تێكڕای چین وتۆێژەكانی كۆمەڵگەی كوردەواری تێدا ڕەچاو بكرێ‌ و هیچ ئایین و باوەڕو مەزهەبێك لە بڕیاردان و ئیدارە كردنی ووڵات دەخیل نەبێ‌.
جارێكی دیكە دووپاتی دەكەمەوە كە سازمانی خەبات ی كوردستانی ئێران لە پێناو ئازادی و بەختەوەری خەڵكی كوردستان و خەڵكی ئێران و پەرەپێدانی هاوكاری و هاودەنگی تێكڕایی لە ئێراندا، پێداگری لە سەر هاوپەیمانی لە گەڵ سازمانی موجاهیدینی خەڵقی ئێران و شورای میلی مقاومەتی ئێران وەك ئالترناتیوی داهاتوو بۆ دەسەڵات لە ئێران دەكاتەوە كە زیاتر لە 25 ساڵە بێ‌ پسانەوە بەردەوامە.
بە پێویستی دەزانم لە بۆنەدا ئەو بڕیاو هەڵۆێستەی سازمانی خەبات دووپات بكەمەوە كە هەر جۆرە هەوڵێكی كوڕی شای جینایەتكار بۆ نزیكی لە لایەنە سیاسیەكان بە فریوكاری دەزانین و باوەڕمان وایە كە كوڕی شاو دەستو پێوەندەكانی، پێگەیان لە ئێراندا نیەو ناتوانن كاریك بە قازانجی خەڵكی ئێران و خەڵكی كوردستان بكەن،ئەوان دژمنی خەڵكی كوردن و سازمانی خەبات هەوڵەكانی كوڕی شا بە گاڵتەجاری و بێ‌ بنەما دەزانێ‌.
لە كۆتاییدا پێَداگری دەكەینەوە كە بە هاوكاری و هاودەنگی و بە كاری هاوبەش و بە پشتیوانی خەڵكی ئێران ڕژیمی ملهوری ئاخوندی لە ناو دەچێ‌ و خەڵكی كورد و خەڵكی ئێران بە تێكڕا، لە چوارچێوەی حكومەتی دیموكڕاتی و نیشتمانی بە سەقامگیر و بە ئازادی ریشەدار شاد دەبێ‌.
لە گەڵ پیرۆزبایی دوبارە بە بۆنەی 10 ی خەزەڵوەر ڕۆژی پێشمەرگەی سازمانی خەبات ی كوردستانی ئێران
سازمانی خەبات ی كوردستانی ئێران
سكرتێری گشتی
بابەشێخ حوسەینی
10ی خەزەڵوەری 1399 ی كۆچی خۆری
ڕێکه‌وت: 2020-10-31 07:54:03
به‌شی ( سکرتێری گشتی )





دیمانه

سیاسی