له‌سه‌رهێل 57
سێ‌شه‌مه 4 سه‌رماوه‌ز 2720
سازمانی خه‌باتی کوردستانی ئێران
كورد لە نێوان گۆڕانکاریە سیاسیەکانی وڵاتە زلهێزەکان دا!

شیلان محەممەدی
باڵادەست بوونی هەستە نەرێنیەکانی مرۆڤ، تا دێ بنەماکانی پێوەندی کۆمەڵایەتی بەرەو هەڵدێر ئەبا و مخابن ئەمرۆکە نەزمی نوێی جیهانی بەرەو ڕەهەندێکی ناشارستانی ودوور لەبنەما بەرزە ئەخلاقیەکانی مرۆڤایەتی بردووە، و تەوەری بەرژەوەندی تاک لایەنە و لەبەرچاو نەگرتنی بەرژەوەندی گشتی سیاسەتی جیهانی لەسەر دارێژراوە.
خاوەن هێزەکان بێ هێزەکانیان دوور خستۆتەوە و یاسای گشتی کارپێکراوی نێونەتەوەیی، زۆر جار لە یاسای دارستان دەچێ و لەگەڵ پێکهاتنی زۆر قەوارە و ناوەند بۆ بەرگرتن لەو ڕەوتە نەشیاوە، بەداخەوە زۆرجار لایەنی براوە تەنیا بە شوێن بەرژەوەندی تاکلایەنەوەیە.
لە مێژوودا، بە سەدان و هەزاران دەسەڵاتدار و سیستمی دیکتاتۆری و .... حكومەتیان کردووە و لەسایەی ئەو دەسەڵاتانەوە، نەتەوە گەلێکی زۆری سەر گۆی زەوی کراونەتە ژێر چەپۆکە و داپڵۆسێندراون.
یەکێک لەو نەتەوە غەدر لێکراوانەش نەتەوەی کوردە. ئەو نەتەوەیە لەدوای شەڕی چاڵدێرانەوە دابەش كراو و بەردەوام هەوڵی لەناو بردن و ئاسمیلای درا....
ئەو نەتەوە غەدر لێكراوە هەر لەوكاتەوە تا ئێستا لەلایەن دەسەڵات و سیستم و ڕژیمەكانی دەسەڵاتدار، لەگەڵ ستەم و سەركوت و بێ مافی بەرەوڕوو بونەوە.
لەو سەردەمەوە تا ئێستا، نەتەوەی کورد بۆتە خۆراکی ئەو دەسەڵاتە دیکتاتۆر و دژە کوردانەی کە كوردستانیان بەسەریان دا دابەش کراوە، لەهیچکام لەو پارچەكانی كوردستان، دانیشتوانی چەوساونەتەوەو تەنانەت شێوازی ژیانیشی ئاسایی بەدەست خۆی نەبووە.
هەر ڕاپەڕینێکیش دا لەبەرانبەر ئەو ستەم و زوڵمانەدا کە لێی کراوە، سەركردە و ڕێبەرانی شۆڕشەكانی ترۆر و لەدار دراون و گەنج و لاوانی قەتڵ و عام كراون، و شۆڕش و ڕاپەڕینەكانی كپ كراونەوە...
زۆربەی كاتەكان ئەم هۆكارانە کوردی ناچار کردووە کە لەپێناو ئازادی و ڕزگاربوون لەدەست چەوسانەوە، چاوی لە دەستێ‌ بێ بۆ نەجات دانی لەو بارودۆخە دا،کە بە داخەوە ئەوەش دیسان زەربەیەکی گەورەی لەکورد داوە و وای کردووە کە ڕژیمە گەندەڵ و دیکتاتۆرەکان بتوانن بە سود وەرگرتن لە خودی كورد، کورد بەرەو لەناوچوون بەرن.
مێژوو شاهێدی ئەو ڕاستیانەیە کە کورد تا ئێستا هیچ بەرژەوەندیەکی نەبووە لەناو ئەو کایە سیاسیەی کە دەسەڵاتە زلهێزەکانی جیهان تا ئەمڕۆ کردویانە و دەیکەن، کورد لەناو هیچکام لە هەلومەرج و كێشە سیاسیانە شۆێن دانەر نەبۆتەوە و هەوڵی سڕینەوەی دراوە.
کورد کە تا ئەم قۆناغەی ئێستا هاتووە، تەنیا بە تێکۆشان و قوربانی دانی خۆی بووە، و هیچ دەسەڵات و گەورە هێزێكی جیهانی هاوكاری كوردی نەكردوە لەماوەی خەبات و بزوتنەوە پیرۆز و حەقەکەیدا.
بۆیە دیسانەوە هیوا هەڵچنین و پشت بەستن بە دەسەڵاتە زلهێزەكان و چاوەڕێی ڕەحم و بەزەیی ئەوان، جگە لە بێ هیوایی و سەرلێشێواوی، هیچی بۆ كورد تێدا نیە.
لەنێو ئەوكایە سیاسیەی كە دەسەڵاتە زلهێزەكان دەیكەن، پشكی كورد تەنیا ئەوكاتە دەردەكەوێ‌ كە قازانج و مەسڵەحەتیان لە كوردستانە.
ئەوەی ئاشكراو ڕوونە و تا ئێستا بەپێی مێژووش سەلماوە، ئەو ڕاستیە بەكورد دەڵێ كە ئەو ڕەوتەی كورد تا ئێستا گرتویەتیە بەر لەناو دونیای سیاسەت و كایە سیاسیەكاندا، هەڵەیە و پێویستە كە كورد هەموو هەوڵ و تێكۆشانەكانی لەپێناو پاراستن و بەزیندوو هێشتنەوەی سەروەری و دەسكەوتەكانی دا بخاتە گەڕ.
نەتەوەی كورد هۆكار و دەسكەوتی گرنگ و مێژووی زۆری هەیە بۆ ئەوەی بتوانێ‌ خودموختار بێ و بە دەرس وەرگرتن لەهەڵەكانی مێژوو، خەبات و بزوتنەوەكەی بەرەو ئاقاری پێشکەوتن و سەركەوتنی زیاتر بەرێ‌.
ڕێکه‌وت: 2020-11-21 20:12:37
به‌شی ( سیاسی )





دیمانه

سیاسی