له‌سه‌رهێل 115
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
ئەگەر بەسەر ترسدا زاڵ بین!

ڕێزان شەهیدی پەنا
ئەو کاتەی ترس بە سەر ناخ و دەرونی مرۆڤەکاندا زاڵ دەبێ كە هەست بە بوونی شتێکی نامۆ لە ژیانی تایبەت، یا لە دەورو بەریاندا بکەن. بەڵام ئەگەر لەو بارودۆخە نالەبارەو قەیراناویەی ئابوری وەڵاتی ئێران وردوەبین، ترس مانای نامێنێ چوونكە بەشی زۆری دانیشتوانی ژیانیان لەوپەڕی نالەباریدایە و شتێكی ئەوتۆ نەماوە بەدەستیانەوەو سەرمایەیان و تەنانەت سەرەتایی ترین هیواكانیان بە ژیانی ئاسایی لەدەست داوە. ڕۆژانە لە سەر تۆڕە کۆمەڵایەتیەکان دەبینین و دەبیستین كە گوزەرانی خەڵکی ئێران لە چ ئاستێكدایەو بە شێوەی كولەمەرگی ژیان بەسەر دەبەن.
ڕژیمی خۆسەپێنی ئاخوندی لە ماوەی چل ساڵ حکومەتی خۆیدا بێجگە لە تێكدانی بەها و نرخە جوانەكانی كۆمەڵگە، بە زوڵمو زۆرو نادادپەروەری كۆمەڵگەی بەرەو هەڵتەكان و لەناوچوون بردووە. 
لە وەڵاتێک کە هێندێك لە خەڵک لە برسا پەنا بۆ فرۆشتنی ئەندامی جەستەی خۆیان دەبەن، لە وەڵاتێک نرخ دانان لە سەر جەستەی مرۆڤ، فڕۆشتی ئەندامی جەستە، بووەتە دیاردە و بازاری تایبەت بە خۆی هەیە، لە وەڵاتێك نانی بەشێك لە دانیشتووانەكەی لەنێو پاشماوەو سەتڵی ئەشغاڵەكانەوە دابین دەكرێ، لە وەڵاتێک برسیەتی و هەژاری تەنگی بە مرۆڤەكان هەڵچنیوە و خەڵک ئازار دەكێشن و بە گیانیان گەیشتووە، و دیاردە كۆمەڵایەتیەكان تا دێ زیاتر و زیاتر بەرۆكی خەڵكی ئێران دەگرێ و بەشێكی بەرچاوی جەماوەر هیچ هەل و دەرفەتێك بۆ ژیان نابینن. لە ووڵاتێكدا كە كەسانی سەردەرچوو زانا، ووڵات بە جێ‌ دێڵن و لە لاێكی دیكەش لە ناو كۆمەڵگەدا، خۆكوژی و دەیان دیاردە و حاڵەتی دیكە بوونی هەیە، لە وەها دۆخێكدا دەبێ بپرسین شتێك ماوە لە دەستی بدەین و لێی بترسین؟
بێ شك لە دۆخی ئێستای ئێراندا ترس بێ مانایە و پێویستە لەسەر تاك بە تاكی دانیشتوانی ئەو وەڵاتە لە بیری داهاتووی خۆیان و نەوەی نوێ‌ بن و پێویستە لە بیری ئێستای خۆیان بن و نابێ‌ ترس زاڵ بێ‌ بە سەریاندا چونكە ترس سەرچاوەی نەهامەتیەكانی خۆیان و شار و وەڵاتەكەیانە .
بە ناسینی سەرچاوەی دەردەكان، هەموو ئازار دیتوانی وەڵات و چ ئەوانەی پشتیان لەژێر باری قورسی ژیان چەماوەوتەوەو چ ئەوانەی سەرمایەیان هەیە بەڵام بە هۆی ناكارامەیی دەسەڵاتدارانەوە داهاتویان روون نیە، باشتر وایە تا وەڵات وچارەنووسی جەماوەر ئەوەندەی دیكە نەكەوتۆتە هەڵدێر، هەموو پێكەوە ترس وەڵانێن و چەكی مەردایەتی بەلادا بكەین و وێكڕا دژ بە ئاخوندانی ستەمگەر، چەوسێنەر و خوێنمژ راپەرین و ئاسۆیەكی روون و داهاتوویەكی گەش بۆ منداڵەكانمان و نەوەكانی دواتر بونیاد بنێین.
ئەگەر بتوانین بەسەر ترسدا زاڵ بین ئەوە دەتوانین رەوتی ژیان بگۆرین، لە وەڵاتێكی داروخاو، كۆمەڵگەیەكی پر كێشە و قەیراناوی و لە دەسەڵات و سیستەمێكی داپڵۆسێنەر و دیكتاتۆر و گەندەڵەوە، وەڵاتێكی ئاوەدان، كۆمەڵگەیەكی ئارام، ئۆقرەگرتوو و شاد و سیستەمێكی دیموكراتیك و خەڵك پەسەند كە مافی هەموو نەتەوە، دین و مەزهەب، چین و تووێژێكی تێدا دەستەبەر كرابێ ، بنیاد بنێن.


 


 
ڕێکه‌وت: 2020-12-09 09:38:39
به‌شی ( کۆمه‌ڵایه‌تی )





دیمانه

سیاسی