سیامەند
لە سەردەمی جەنگی 8 ساڵەی ئێران و عێراقدا، یەكێك لە دروشمە بنەڕەتیەكان و هەروەها یەكێك لە هۆكان بۆ هاندانی كەسانی ساویلكە لە ئێران، بۆ بەردەوام بوونی ئەو جەنگە پڕ لە زیان و ماڵوێرانكەرە، دروشمی ڕێبەرانی ڕژیمی ئێران، لە سەرویانە خومەینی، ئەوە بوو كە دەیان ووت لە ڕێگەی كەربەلاوە بەرەو قودس دەچین و ئیسرائیل لە ناو دەبەین.
هەر لە ڕۆژانی سەرەتاوە، یەكێك لە سیاسەت و ئامانجە سەرەكیەكانی ئەو دەسەڵاتە، ناردنی ئینقلابی خومەینی بوو بۆ ووڵاتانی دیكەو دروشمی لە ناوچوونی ئیسرائیل و بە دەست هێنانی مەككە و مەدینە لە عەرەبستانی سعودی و قودس لە فلستین و كەربەلاو نەجەف لە عێراق.
دەسەلاتدارانی ڕژیم لە ئێران بۆ هێنانەدی ئەو ئامانجە پاوانخوازو زیادەخوازانەو هەروەها بۆ وەدەست هێنانی دەسەڵات بە سەر شوێنە پیرۆزەكانی موسڵمانان 40 ساڵە سەرمایەو داهاتی نەتەوەیی خەڵكی ئێرانیان بە فیڕۆداوە.
سیاسەت و ئامانجی پاوانخوازانەی دەسەڵاتی دیكتاتۆری ئێران بۆ پێكەوە بەستنەوەی عێراق،سوریەو لوبنان و دەسەڵاتی ڕاستەوخۆ و ناڕاستەوخۆ بە سەر ئەوو ووڵاتانە، بە تێ‌ چووی ملیاردها دۆلار پووڵ بۆ رێكخراوی ترۆریستی حیزبوڵای لوبنان، حوسیەكانی یەمەن و ڕێكخراوەو دەستەو تاقمەكان لە ووڵاتانی بەحرەین و عەرەبستان و زۆربەی ووڵاتانی ئیسلامی و عەرەبی و ووڵاتانی ناوچەی خۆرهەڵاتی ناوەڕاست و بە شێوەێكی بەرینتر لە سەرانسەری جیهاندا لە ماوەی ساڵانی ڕابردوو، وە تەنانەت لەم هەلومەرجە نالەبارەی ئابووری لە ئێران و برسیەتی و هەژاری و بێكاری و داڕوخانی باری ئابووری لە ئێران، جێ‌ بە جێ‌ كراوە.
ئەوەی جێگەی سەرنج و تێ‌ ڕامانە ئەوەیە كە بە داخەوە كۆمەڵگەی جیهانی و وولاتانی ناوچەی خۆرهەڵاتی ناوەڕاست، لە حاست ئەو سیاسەت و پیلانە مەترسیدارەی دەسەڵاتی ئێران بە تایبەت و تێكڕای سیاسەت و كردەوەكانی دیكەی، بە شێوەی كاریگەر هەڵوێستیان نەگرتوەو مەیدانیان بە ڕژیمی ئێرانداوە تا لە ناوچەكەدا مانۆڕبدا. هەروەها ووڵاتانی خاوەن هێزی جیهان و ڕێكخراوە جیهانیەكانیش هەڵوێستەكانیان تەنیا لە چوارچێوەی ووتارو ڕاگەیاندندا بووە.
ئەگەر لە دەیەی هەشتاو و لە ساڵانی جەنگی ئێران ، عێراق ویستەكانی ڕژیم بۆ گەیشتنی بۆ قودس تەنیا لە سنوورەكانی عێراقدا بوون و دەزاندرا ناتوانێ‌ بگاتە قودس، بەڵام لە ئێستادا ئەگەر ووڵاتانی ناوچەكەو كۆمەڵگەی جیهانی فریا نەكەون، وێ‌ دەچێ‌ كە دروشمەكان بگەنە حاستی نزیك بوونەوەی مەترسی گەورەتر، چونكە ئەو ڕژیمە سەدان مووشەكی هێرشبەرو فڕۆكەی بێ فڕۆكەوان و دەیان دەستەو تاقمی لە ووڵاتی سوریەو لە نزیك ئیسرائیل جێگیر كردوەو مووشەكی جۆراوجۆرو فڕۆكەی بێ‌ فڕۆكەوانی بە حیزبوڵای لوبنان و حوسیەكان و گروپە تروریستیەكانی تەحویل داوون.
دەڵێن ئاخوندێكی سەر بە ڕژیم لە لوبنان ووتویە بەو نزیكانە لە گەڵ خامنەیی لە قودس یەك دەبینن، ئەگەرچی قسەی ئەو ئاخوندە زیاتر لە خەیاڵ دەچێ‌ و دوورە ئەوە ڕووبدا بەڵام ئەوە ڕاستێكی حاشاهەڵنەگرە كە ڕژیمی ئێران و دەست و پێوەندەكانی بوونە دراوسێی ئیسرائیل و ئەگەر لە ڕابردوو دروشمەكانیان لە كەربەلاوە بۆ قودس بوو، لە ئێستادا گەیشتوونە دیمەشق و بەرزاییەكانی جەولان و دەتوانن بلێن لە دیمەش و جەولانەوە بۆ قودس.

ڕێکه‌وت: 2021-01-23 07:43:23
به‌شی ( سیاسی )