له‌سه‌رهێل 128
دووشه‌مه‌‌ 5 ره‌زبه‌ر 2721
سازمانی خه‌باتی کوردستانی ئێران
سەروەرانی گەل: شەهیدان محەممەد خالیدی و محەممەد ڕەسوڵی ( شێنانی)



یادی سەروەران

سەروەرانی گەل: شەهیدان محەممەد خالیدی و محەممەد ڕەسوڵی ( شێنانی)

دەفتەری سەروەران پەڕتوكێكی زێڕینە كە هەزاران داستانی شیرین وتاڵ و كارەساتی ڕۆژانی هەور و ساماڵی لە ناو ماڵی لاپەڕە پڕ لە كارەساتە سەر سووڕهەێنەرەكانی خۆی تۆمار كردووە كە هەر وشەیەكی یادی شۆڕە سوارێكە و هەر پێستێكی دیمەنی دەردی هەژارێكە. دێرەكانی پێنووسیان لێنەدراوە و بە پەنجەی هیچ نووسەرێك نە نەخشاوە. بەڵكو لە ناخی دەریای تاریكی شەوی رەشی بێ بەشدا بە دەستی بەهێز و پیرۆزی خەبات. لە بەر شەبەقی ئاگری ڕوناكی شۆڕشدا پیت بە پیت دێڕبە دێڕ بە نوكی فیشەک گەرمی خەباتگێڕان نووسراوە و لە سەر رووپەڕی دڵی خاوێنی خاوە هەستان چاپ كراوە. گەرماو سەرماو با و باران و دەستی نەگبەتی زۆرداران ناتوانێ پیتێك كاڵ وەکا. وشەكانی بڵێسەی ئاگری فیداكارین، فیداكاری بۆ ڕزگارین پیتەكانی سكاڵای دیلی و هەژارین. ڕستەكانی بە گڕی شۆڕش داڕژاون، بە خوێنی شەهید سوور كراون، نوختەكانی ئەسرینی گەشی خوێنن. پەڕەكانی گەلێك ڕازاوە و ڕەنگینن، ئەو پەڕتووكە قەت كۆن نابێ، هەر تازەیەو تا دنیا بێ تێ گەیشتن و پێگەیشتن و خەبات لە پێناو سەربەستی و نەبەزی و ڕانا ناوەستێ، هەمووی مانای ئەو پەرتوكەن، پەرتووكی یادی سەروەران، یادی سەربەرزی نەمردوو، یان بڵێن بە مردوو زیندوو... با وەك هەموو جارەكانی پێشوو یادی دوو شەهیدی كوردستان بكەینەوە.یادی كردەوەكانیان، یادی بیروباوەڕ و بڕیاریان، یادی لە خۆبردووییان، یادیان زیندوو بكەینەوە بە درێژایی ڕێگایان، بە دەرس وەرگرتن لە كردەوەیان. با یادیان زیندوو بكەینەوە هەر وەك بۆ خۆیان زیندوون و جێگەیان ناو دڵی نەتەوەكەمانە. چونكە شاعیری كورد دەڵێ:

پێی ناوێ بۆ شەهیدی وەتن شیوەن و گرین، نامرن ئەوانە وا لە دڵی میللەتا دەژین.

دەزانین لە كۆڕی یادی سەروەراندا هەمووتان لە گەڵمانن، هەموو ئەوانەی خاوەن باوەرن، خاوەن هەستی نیشتمان پەروەرین، هەموو ئەوانەی ئەوینداری ئازادی و سەر بە خۆیین. چونكە یادی سەروەران یادی ئەوانەیە كە لە حەستەمترین هەل و مەرجدا شەرەفی نەتەوەكەیان پاراستووە و تاپۆی بوون و مافی نەتەوەكەیان بە خوێن نووسیوە. بە داگیركەرانی كوردستانیان سەلماندووە كە پارێزەری ئەو ئاو و خاكەن و هەموو ئاكامێكی تاڵ و هەموو چەرمەسەرییەك لە پێناو ویستی گەل و ئامانجەكەیاندا وە خۆدەگرن. هەر سەربەرز دەمێنن و هەر سەربەرز دەمرن. فیداكاری لە پێناو ویستی نەتەوایەتیدا تایبەت نەبووە بۆ چینێكی جیا لە كوردستاندا. بەڵكو هەموو چینەكانی خەڵكی كوردستان بێ بەشی و هەژاری خۆیان لە پێشێل بوونی مافی نەتەوایەتیدا دیوە و دەبینن و هەموو تێكڕا خەباتیان بۆ كردووە. شەهید محەممەد خالیدی و شەهید محەممەد ڕەسوڵی ( شێنانی ) دوو فیداكاری ڕێی ڕزگاری و ئاوەدانی كورد و كوردستان بوون كە وێڕای 5 هاوباوەڕیان لە ڕۆژی 16ی خاكەلێوەدا لە ( یەكشەوە ) مەلی سركی ڕۆحی پاكیان لە قەفەزەی سینەی ساف و بێ كینەیان هەڵفڕی، لە گوڵزاری باغی بەهەشتی شەهیدان دا لە سەر چڵە پۆپەی شەرەف و شانازی نیشتنەوە.

هەزران سڵاو لە یادو ناوی هەردوو شەهید و سەرجەم شەهیدانی کوردستان
ڕێکه‌وت: 2021-04-05 08:28:19
به‌شی ( شه‌هیدان )





دیمانه

سیاسی