له‌سه‌رهێل 83
دووشه‌مه‌‌ 5 ره‌زبه‌ر 2721
سازمانی خه‌باتی کوردستانی ئێران
یادی یەكەم رۆژنامەی كوردی و یادێك لە رۆژنامەی تێكۆشان!

یەحیا رەسووڵی
22ی ئاوڕیلی 1989لە شاری قاهیرەی وەڵاتی میسر یەکەمین ڕۆژنامەی كوردی بە ناوی "کوردستان" بەدەست و هەوڵی زانا و بیرمەندی کورد بەڕێز میقداد محەمەد بەدرخان چاپ و بڵاوكرایەوە. لەو ڕۆژەوە هەموو ساڵێک بە نووسین و چالاكی جۆراوجۆر لە بەشەكانی کوردستان ئەو یادە دەکرێتەوە و ڕێز لەو ڕۆژە دەگیرێت بۆ یەكەم جار رۆژنامەی كوردی ئەویش لە دوور وڵات بوونی خۆی سەلماند و چووە بەردیدەی خوێنەرانی. ئەویش لە قۆناغێكدا كە لە کوردستاندا ئیمکان و كەرەستەی چاپ و بڵاوكردنەوەی رۆژنامە لەبەر دەست دا نەبوو و زۆربەی خەڵکی کوردستان نەخوێندەوار بوون و لە بارێکی زۆر ئاڵۆز دا دەژیان و ڕۆشنبیران و تێکۆشەرانی کورد دەرفەتی لە چاپدان و بڵاو کردنەوەی بیر وبۆچوونەکانیان نەبوو. هەوڵەكانی میقداد بەدرخان ئەو دەرفەتەی گەشەکردنی ڕۆژنامە و گۆڤارە کوردیەکان، ئەگەر لە کاتی هەڵگیرسانی شۆڕشەكانیشدا بووبێ، بۆ وێنە لە سەردەمی شۆڕش و حکومەتداری شێخ مەحموود و کۆماری کوردستان چاپخانە لە شارەكان دامەزرا و درێژەیان بە خەباتی رۆشنگەری و بڵاوكردنەوەی بیری نەتەوەیی دا.
ئەو قۆناغانە بۆ رۆژنامەی كوردی سەردەمێكی زێرین بوو كە بتوانێ بە ئازادی چاپەمەنی و بڵاوکراوە کوردیەکان رەونەقیان پێ بدرێ، هەروەها لە ساڵەکانی پەنجا و شەستەکانی سەدەی رابردوو ڕۆژنامەکانی خەبات، ئازادی، دەنگی کورد، ڕۆژی نوێ و ڕوناهی دەورێکی کاریگەریان گێڕا لە ڕۆشنبیرکردنی کۆمەڵگەی کوردی هەروەها کەسایەتییە کوردی و خارجییەکان بە نووسین و چاپ کردنی کتێب و وتار ئەم ڕەوتە ڕۆشنبیریەیان بۆ پێشەوە برد. بۆ نموونە کریس کۆچێرا، علاالدین سەجادی، ئیبراهیم ئەحمەد، مامۆستا هەژار، مامۆستا هێمن، كاكەی فەلاح، گیوی موكریانی، عەبدولكەریم ئەفەندی، پیرەمێرد، حوسێن حوزنی موكریانی و دەیان و سەدان کەسایەتی ڕۆشنبیری کورد بە زمانەکانی کوردی، فارسی، عەرەبی و ئینگلیزی و فەڕانسەوی کتێب و نامیلکەیان لە چاپ دا بۆ وشیارکردنەوە و دەرخستنی ڕاستیەکانی کۆمەڵگەی کوردی لەسەر واقعی ژیان، خەبات و تێكۆشان بۆ پاراستنی زمان و ئەدەبی کوردی.
ئەم ڕەوتی ڕۆشنیرییە تا بە ئەمڕۆ درێژەی هەیە، بەڵام بەبیانووی جۆراوجۆری وەك بە حیزبی كردن، تاشینی كەلیمات و ... کەوتۆتە بەر ڕەخنە و گلەیی خوێنەران، و پێیان وایە رۆژنامە و راگەیاندنی كوردی لە ڕێگەی ڕاستەقینەی خۆی لای داوە، هەر ئەوەش كاریگەری كردووەتە سەر ئەوەی خوێندنەوە و بەکارهێنانی ڕۆژنامە لە كۆمەڵگەی كوردستاندا بە ڕێژەیەکی زۆر ڕوو لە دابەزین بكات. هەروەها فەزای مەجازی بێ کۆنتڕۆڵ و بێ سەروبەرە، رۆژنامەی كوردی و پەرەپێدانی ڕۆشنبیری و بەرزكردنەوەی هۆشیاری کۆمەڵگەی دواخستووە و تووشی پاشەکشەی كردووە.
وێڕای ئەو خاڵە لاوازانەی لە ئێستادا لە سەر رۆژنامە و بڵاوكراوەی كوردی باس دەكرێ بەڵام مێژووی رۆژنامە كوردیەكان و خەبات و شەونخونی نووسەران و كادری چاپەمەنی و گەیاندنیان بە دەستی خوێنەران، هەر دەبێ بەرێز و پێزانینەوە یاد بكرێتەوە. من بۆ خۆم چەندین ساڵ لە ئینتشاراتی سازمانی خەباتی كوردستانی ئێران و بە دیاری كراوی لە ڕۆژنامەی تێكۆشان كارم كردووەو لە نزیكەوە شاهێدی ئەو راستیەم كە نووسەرانی ئەو رۆژنامە بەتایبەت مامۆستا سەید جەلالی حوسەینی و كادرەكانی چاپ و بڵاوكردنەوە چەندە ماندوویی نەناسانە خزمەتیان بە ئامانجە سیاسی، نەتەوەیی، ئەدەبی و زمانەوانیەكان دەكرد.
لەم یادە پیرۆزەدا سەری ڕێز و وەفا بۆ هەموو ئەو ڕۆشنبیر و نووسەرە بوێر و ئازایانە کە بێ ترس و بوێرانە بە قەڵەمەکانیان گیانی خۆیان خستە مەترسییەوە و تووشی کوشتن و زیندان و ئەشکەنجە و دەربەدەری بوونەوە کە بەم ئەرکە ئەخلاقی و ئینسانیەی خۆیان نەیانهێشت بواری ڕۆشنبیری و ڕۆژنامەگەری کوردی دوابکەوێ، جێگای خۆیەتی لەم یادە پیرۆزەدا یادێک لە هاوڕێی شەهید حوسەین کەریمی بکرێتەوە کە یەکەمین پێشمەرگەی شەهیدی مانگانە تێکۆشانی ئۆرگانی سازمانی خەبات ی كوردستانی ئێران، کە لە ئەرکی گەیاندنی بڵاوکراوەکان و بیری سیاسی و نەتەوەیی سازمانی خەبات بۆ نێو كۆمەڵانی خەڵكی كوردستان لە شەڕێکی قارەمانانە و خۆڕاگریدا گیانی سپارد و چووە ڕیزی شەهیدان.
یادی هەموو ئەو مرۆڤە رەنج دیتوو ماندوو نەناسانەی رۆژنامەگەری كورد بەتایبەت رۆژنامەی تێكۆشان، لە ناویاندا هاوڕێی شەهید حوسەین كەریمی بەرز و بەرێز بێ.
ڕێکه‌وت: 2021-04-25 10:35:26
به‌شی ( سیاسی )





دیمانه

سیاسی