له‌سه‌رهێل 78
دووشه‌مه‌‌ 27 گوڵان 2721
سازمانی خه‌باتی کوردستانی ئێران
خوێندنەوەیەك بۆ تۆمارە دەنگیەكەی وەزیری دەرەوەی رژیمی ئاخوندی!

عەلی بەهرامی
رۆژی یەكشەممە 5ی بانەمەڕ 1400ی ك خ، تەلەفزیونی ئێران ئینتەرناشیۆناڵ تۆمارێكی دەنگی محەممەد جەوادی زەریف وەزیری دەرەوەی رژیمی ئاخوندی بڵاو كردەوە كە ناوبراو ئەو قسانەی لە وتووێژێكدا لەگەڵ سەعید لیلاز كردووە
ئەوەی كە بۆچی لە ئێستادا تۆمارێكی دەنگی زەریف دزەی پێ دەكرێ و لە تەلەفزیۆنێكی پڕ بینەردا بڵاو دەكرێتەوە بۆخۆی قسە زۆر هەڵدەگرێ. بەڵام بە گوێگرتن لەو تۆمارە دەنگیە چەند راستی روون دەبێتەوە كە پێویستە پەنجەیان لەسەر داندرێ.
لە كاتێكدا رژیم بە تەمایە كەمتر لە دوو مانگی داهاتوودا شانۆگەری هەڵبژاردنی سەرەككۆماری و شۆراكانی شار و دێ بەرێوەبەرێت، هەر لە دەستپێك و لە كاتی تۆمار كردنی پاڵێوراوان بۆ ئەو شانۆگەریە رژیم تووشی كورتهێنان هات و بە رێژەیەكی یەكجار كەم ئامادەبوون خۆ بپاڵێون. رژیم كە بینی خەڵكی ئێران پێشوازیەكی ئەوتۆیان لەو شانۆگەریە نەكرد و ئەوجارە هەڵبژاردنی شۆراكانی شار و دێیش ناتوانێ كورەی هەڵبژاردنی بۆ گەرم بكات چوونكە ئێرانیەكان لەو راستیە حاڵی بوون كە ئاخوندان لە شانۆگەری هەڵبژاردن تەنیا بۆ مەشروعیەتدان بە دەسەڵاتەكەیان و ریسكی سیاسی كەڵك وەردەگرن و بابەتی شۆراكانیش تەنیا بۆ گیرفان پڕكردنی ئەو كەسانەیە كە لە فیلتەری شۆرای نیگابانی وەلی فەقیهەوە دەردەچن و هیچیان بۆ خەڵك پێ نیە و رابردووی چەند دەورەی ئەو بەناو شۆرایانە سەلمێنەری ئەو راستیانەیە. هەر بۆیە رژیم ناچارە بە هەندێ شانۆسازی هەرچەند لەخۆدانیش بێ، بەڵام پێویستی بە دروستكردنی رقابەتی توندە بۆ ئەوەی سەرنجی خەڵكی پێ راكێشێ، ئەویش كێ لەوە باشتر قاسمی سلێمانی گەورە تیرۆریست كە بە لای توندئاژۆكانی دەسەڵاتەوە لەدوای وەلی فەقیە وەكوو هێڵی سوور دەبیندرێ و لە ئێستادا لە ژیاندا نەماوە تاوانبار بكرێ بەوەی كە داهات و سەرمایەی خەڵكی ئێرانی بۆ سوریە دەگوازتەوەو و خەرجی ئامانجە تیرۆریستیەكانی دەكرد. هەر بۆیە ئەمە رقابەتی باند و باڵەكانی دەسەڵات گەرم دەكا و بەو شێوە كڕیار بۆ شانۆگەری هەڵبژاردنەكانیان پەیدا بكەن.
لەلایەكی دیكە ئەو قسانەی زەریف سەلمێنەری ئەو راستیەیە كە لە دەسەڵاتی ئاخونداندا، حكومەت و دەزگای بەرێوەبەریی تەنیا كارتۆنە و لە راست پاسدار و بەیتی رێبەری هیچ دەسەڵاتێكیان نیە و تەنیا دەبێ ئەو خاڵ و داوایانەی ئەوان هەیانە جێبەجێ بكەن. بۆ وێنە زەریف دەڵێ لە سەفەرەكانیدا سلێمانی پێی وتووە كە چی بكا و چی باس بكات. هەروەها دەڵێ من نەمتوانیوە پێی بڵێم هێڵی فرۆكەوانی ئێران ئایر و ماهان بۆ كاری گواستنەوەی چەك و هێز بۆ سوریە بەكار نەهێنێ.
لە درێژەداو لەو پەیوەندەدا ناوبراو ئیشارە بەوە دەدات كە ئاگای لە سەردانی قاسمی سلێمانی بۆ مسكۆ، هێنانی بەشار ئەسەد بۆ لای خامنەیی نەبووە.
زەریف هەر لەو وتووێژەدا چەند راستی دیكە دەخاتەروو كە پێویستە لێی وردبینەوە ئەویش ئەوەیە دەڵێ: بۆ نیزام مەیدان (چالاكی خراپكارانەی سوپای پاسداران و سوپای قودس لە ناوچەكە) لە پێش بووە. من دیپلۆماسیم زیاتر بۆ مەیدان بەكار هێنا هەتا مەیدان بۆ خزمەتی دیپلۆماسی بەكار بهێندرێ.
ئەو قسە تەنها دەزگای دیپلۆماسی رژیم ناگرێتەوە، بەڵكوو لەو دەسەڵاتەدا هەموو وەزارەتەكان دەبێ لە خزمەت بەشی ئەمنیەتی و سەربازی رژیمدا بن. بۆ وێنە نیزامیەكان بەشی گەورەیان لە كەرتی وزە و نەوتی ئێراندا هەیە، بەشی بیناسازی و ئاوەدان كردنەوە و بەنداوەكان، بانكەكان و بۆرس هەمووی لە ژێر دەسەڵاتی بەشی سەربازی و بەدیاری كراوی سوپای پاسداراندایە.
لەو پێوەندەدا ئەوەی روونە ئەوەیە دەزگای دیپلۆماسی رژیم تەنیا لە ناوچەكەدا لە خزمەت سوپادا نەبووە، بەڵكوو دەزگای دیپلۆماسی رژیم ساڵانێكی زۆرە لە خزمەت دەزگای هەواڵگری و تیمە تیرۆریستیەكانی رژیمی ئاخوندیش دایە.
زەریف بە قسەكانی ئەو راستیەمان پێ دەڵێ كە ناوبراو و قاسم سلێمانی دوو رووی دراوێك بوون لەو خزمەتانەی بە بەرنامە تاوانكاریەكانی دەسەڵاتی ئاخوندی، هەردووكیان وەكوو یەك لەو تاوانانەی لە وەڵاتاندا كراوە تاوانبارن و بگرە زەریف زۆر زیاتر چوونكە ناوبراو چ ئەوكاتەی وەكوو سەفیر بووە و چ ئێستاش وەكوو وەزیری دەرەوە وەكوو دەڵقەك بە پێكەنین و درۆكانی هەوڵی داوە لە كۆر و كۆمەڵە نێونەتەوەییەكاندا روخساری شەرئەنگێزانە و رووی رەشی رژیمەكەی بە جۆرێكی دیكە نیشان بدا.
كۆتا قسە ئەوەیە كە كۆمەڵگەی نێونەتەوەیی پێویستە باش لەو راستیە تێبگەن كە وەزارەتی دەرەوە و باقی وەزارەت و دەزگا و ناوەندەكانی رژیمی ئاخوندی تەنیا خزمەت بە فكری دواكەوتووانەی وەلی فەقیهی رژیم دەكەن و لەلایەن بەیتی رێبەری و سپای پاسدارانەوە دەجوڵێندرێن. قسەكانی زەریف زیاتر روونكەرەوە و هاندەره بۆ ئەوەی كۆی بەرنامە و پێكهاتەی دەسەڵاتی ئاخوندی تووشی بێ متمانەیی زیاتر بێ و لەلایەن خەڵكی ئێرانەوە زیاتر بایكوت و تەحریم بكرێ و هەموو هەنگاوەكان لە ڕاستای ڕوخان و لەناوچوونی ئەو دەسەڵاتە چڕ بكرێتەوە.
ڕێکه‌وت: 2021-04-28 08:52:28
به‌شی ( سیاسی )





دیمانه

سیاسی