له‌سه‌رهێل 91
دووشه‌مه‌‌ 27 گوڵان 2721
سازمانی خه‌باتی کوردستانی ئێران
پەیامی پیرۆزبایی سازمانی خەبات بە بۆنەی  یەكی مای رۆژی جیهانی كرێك

كرێكارانی ڕەنجكێش و به‌شخوراو!

جەماوەری وەزاڵەهاتوی ئێران!

خەڵكی تێكۆشەری كوردستان!

بە بۆنەی رۆژی جیهانی كریكار، گەرمترین پیرۆزبایی بە كرێكاران و زەحمەتكێشان لە كوردستان، ئێران و جیهان پێشكەش دەكەین. ڕۆژی جیهانی کرێکاران ،ده‌رفه‌تێکی گونجاوه‌ بۆ ده‌ربڕینی ویست و داخوازیه‌کانی کرێکاران و باسکردن لە مافە زەوت كراوەكانیان له‌ جیهاندا. گرنگترین ئامانجی ئه‌م یاده‌ بۆ پێڕاگه‌یشتنی زیاتری کرێکاران و باشترکردنی دۆخ و گوزه‌رانی ئەو چینە ڕەنجكێشەیە. كرێكاران، چینی ماندووی بەرهەم هێنەر و هۆی گەشەی ئابوری لە ووڵات و دابین كردنی ژیانی شیاو خۆش گوزەرانی خەڵك لە ووڵاتاندان. لە هەر ووڵاتێكدا ئه‌گەر دەسەڵات بایەخ بە رەنج و ماندوو بوونی كرێكاران نەدا و هەلومەرجی لە بار و شوێنی پیشەو كارخانەی سەردەمیانەو پێشكەوتوویان بۆ دابین نەکا، و هەروەها مافەكانی، وەك حەقی بیمە و حەقی كاركردن و زەحمەتەكانیان بۆ دەستەبەر نەكا، بێگومان ئه‌و كۆمەڵگەیە نه‌ پێش دەكەوێ‌ و نە ژیانیش تیایدا ئاسایی دەبێ‌.

دەسەڵاتداری و حكومەت لە هەر ووڵاتێكدا ئه‌رکی سەرەكی خزمەت بە جەماوەر و داڕشتنی بەرنامەی شیاو، وە بە كردەوە كردنی ئه‌و بەرنامە شیاوانەیە. ئه‌گەر هەر دەسەلاتێك ئه‌و دوو بنەما بنەڕەتی و ئاساییە پەیڕەو نەكا، بێگومان ووڵات دەكەوێتە قەیرانەوەو جەماوەر دەكەونە ژێرباری ژیانی سەخت و هەڵاوسان تەشەنە دەستێنێ‌ و پیشەسازی و كرێكاران و هێزی كار كە لە كۆڵەكە بنەڕەتیەكانی گەشەی ئابوورین لە كار دە‌وه‌ستن. لە ئێراندا حكومەتێكی ملهوڕو دیكتاتۆر و نەزان لە سەر دەسەڵاتە. ئه‌م ڕژیمه‌ هەر لە ڕۆژانی سەرەتادا، بە وتنی ئەو ڕستە نەزانانەی خومەینی كە ووتی ( اقتصاد مال خر است) واتە  ئابووری بۆ كەر دەبێ‌، هەروەها ڕایگەیاند كە دەبێ‌ زانستگاكان دابخرێن، هەر ئه‌وكات دیار بوو چارەنوسی جەماوەری کوردستان و ئێران چی‌ بەسەر دێ‌ و بە دیاری كراوی تر كرێكاران و كارخانەكان و پیشەسازی لە ئێراندا، تووشی چ قەیران و كێشەیه‌ک دەبنه‌وه‌.

لە ماوەی چەندین ساڵ دەسەلاتی ئاخوندی دا، بارودۆخی کرێکاران ڕۆژ له‌دوای ڕۆژ خراپتر بوه‌ و کرێکاران كەوتونەته‌ بەر قورس ترین جۆرەكانی ستەم و لە هەلومەرجێكی نالەباردان و تانه‌نه‌ت له‌ مافه‌ سه‌ره‌تایه‌کانیشیان بێبه‌ش کراون. کرێکاران سەرەڕای نەبوونی ئەمنییەت و ئاسایش یان، له‌ زەمانەتی ئابووری و کۆمەڵایەتی و شوغڵی، وەک بیمەی بێکاری و دابینکردنی مافی کۆمەڵایەتی و ئەمنییەتی شوێنی کارو گەلێک کێشە و گرفتیتر بێبه‌شن و به‌ حه‌ق ده‌ستێکی زۆر که‌م، به‌ ناچاری کار ده‌که‌ن و ئه‌گه‌ر داوای مافەكانیان بكەن و ناڕەزایەتی لە سیاسەت و بەرنامەی حكومەت نیشان بدەن، لە لایەن هێزە سەركوتگەرەكانی ڕژیمەوه دەكەونە بەرهێرش و زیندانی و شكەنجە دەكرێن و تەنانەت لێ‌ یان ئیعدام دەكرێ‌.

لە ئێستادا زیاتر لە ٩٠٠٠ كارخانەو شۆێنی پیشەسازی و بەرهەم هێنان كە كرێكاران دەیانتوانی دوور لە هژمونی دەسەڵات و بە شێوەی ئاسایی كاری تێدا بكەن، داخراون. بەڵام لە بەرانبەردا سپای پاسدارانی ڕژیم لە ڕێگەی قەرارگای (خاتەمولیٔەنبیا )و چەند ناوەندی لەو شێوە، دەستی بەسەر سەرچاوەكانی ئابووریەكانی، وەك فڕۆكەو فڕۆكەخانەكان، كەشتیە بازرگانیەكان، تەلەفون و موخابەرات دا گرتوە كە داهاتی سەدان ملیارد دۆلاریان هەیە.

ڕێژەی هەژاری لە ئێراندا بە شێوەیه‌کی سەرسوڕهێنەر پەرەدەستێنێ‌ و تا دێت لە نرخی پوڵی ئێران لە بەرانبەر دراوەجیهانیەكان كەم دەبێتەوە. ئابووری و هەڵاوسان بە ڕادەێك مەترسیدارە كە ئه‌گه‌ر هەر خانەوادەیەك مانگانە زیاتر لە ١٠ ملیون تمەن داهاتی نەبێ‌ لە ژێر هێڵی هەژاریدایە. ئه‌و ڕژیمە هەلومەرجێكی دروست كردوە كە زۆربەی خەڵك تەنانەت توانای كڕینی هێلكەو تەماتەو ڕۆنی چێشت دروست كردنیان نیە.

كرێكارانی ستەم لێكراوی کوردستان!

هاونیشتمانیانی تێكۆشەر!

ئەو دۆخە  لەکوردستاندا  دوو ئەوەندە کارەساتاوی ترە، ئەویش لەئاکامی سیاسەتی ئامانجداری دەسەڵات بۆ خراپ كردنی باری ئابووری. لە کوردستان نەک مافەسەرەتاییەکانی کرێکاران و رەنجکێشان بوونی نییە، تەنانەت هیچ جۆرە دەرفەتێکی شیاوی کاریش بوونی نییە و کۆڵبەری لە ئێستادا دەرووێکە کە بەشێكی خەڵکی هەژاری کوردستان بتوانێ رووی تێ بکا كە بە داخەوە كۆڵبەران لەلایەن دەسەڵاتەوە رۆژانە کۆڵبەران دەدرێنە،بەر دەسترێژی گولە و شەهید دەکرێن.

ئاشكرایە لە کوردستاندا كرێكاران زیاتر دەچەوسێندرێنەوەو مافەکانیان پێشێل دەکرێ و لەنەبوونی دەرفەتی کار بەناچاری یان روو لەشارەکانی تری ئێران یان هەرێمی کوردستانی عێراق دەكەن و بە ناچاری هەڵ ومەرجێ داسەپاو خراپ لەلایەن خاوەنکارانەوە قەبوڵ دەکەن.

 لەگەڵ ئه‌و ڕاستیە تاڵانەی كە باس كران و بە لە بەر چاوگرتنی هەلومەرجی خراپی كار، و سەختی ژیانی كریكاران و هەڵاوسانی ئابووری لە ئێران و ئه‌و مەترسیانه‌ی که‌ لە سەر تێكڕای خەڵكی ئێران و کوردستان هەیەو كرێكاران و چینی ڕەنج كێش زیاتر ئازار دەبینن.ئه‌و ڕاستیە حاشاهەڵنەگرانە جارێكی دیكە ئه‌وه‌مان پێ ڕادەگەێنێ‌ كە پێویستە خەبات بۆ گەیشتن بە ئازادی زیاتر پەرەی پێ بدرێ‌ و كرێكارانی تێكۆشەر وەك یەكێك لە چینە سەرەكیەكانی پێشڕەوی خەباتی ئازادیخوازی، زیاتر لە ڕابردوو لە پێناو وەدی هێنانی مافەكانی خۆیان و مافی تێكڕای خەڵكی ئێران و کوردستان بۆ ڕووخانی یەكجاری ڕژیمی دژی ئینسانی و دژی كرێكاری چالاكیەكانیان پەرە پێ بدەن.

بێگومان بە ڕوخانی ئه‌و ڕژیمە دیكتاتۆرو دژی ئینسانیه،‌ ئاسوده‌یی و سەقامگیری ئابووری و سیاسی و پیشەسازی لە ئێران و کوردستان دا جێگیر دەبێ‌ و كرێكاران وێڕای باقی چین و توێژەکان بە مافەكانیان دەگەن.

لە گەڵ پیرۆزبایی دووبارەمان بە بۆنەی رۆژی كرێكارانی جیهان.

بڕوخێ‌ ڕژیمی دیكتاتۆری ئاخوندی. سەركەوێ‌ خەباتی مافویستانەی چینی كرێكاران

سازمانی خەبات ی كوردستانی ئێران/ كومیتەی ناوەندی

 ١ ی مای ٢٠٢١ زایینی
ڕێکه‌وت: 2021-05-01 11:58:51
به‌شی ( به‌یاننامه‌کان )





دیمانه

سیاسی