له‌سه‌رهێل 100
دووشه‌مه‌‌ 27 گوڵان 2721
سازمانی خه‌باتی کوردستانی ئێران
بوجەی ساڵی ١٤٠٠، دەرفەتێك بۆ به‌ هەژاركردنی زیاتری خەڵكی ئێران!

عەلی بەهرامی

١٢ی سەرماوەزی ١٣٩٩ی هەتاوی حكومەتی ئاخوند رۆحانی پێشنووسی بوجەی ساڵی ١٤٠٠ی پێشكەش بە مەجلیس كرد كە بوجەی ئەو ساڵ بە ٢٤٣٦٠ ملیارد تمەن (٢١٢ ملیارد تمەن) خەمڵێندراوە.  پێشنووسی بوجەی حكومەتەكەی رۆحانی لە دوای مشتومڕێكی زۆر شەممە ٢٨ی رەشەممەی  ١٣٩٩ لەلایەن مەجلیسی رژیمەوە پەسەند كرا. لەكاتێكدا بوجەی پێشنیاركراوی حكومەتی رۆحانی لەلایەن مەجلیسی رژیمەوە پەسەند كرا كە بێكاری، هەڵاوسانی ئابووری و هەژاری هەموو كون و قوژبنێكی ئێرانی گرتووەو خەڵكی ئەو وەڵاتە بە هۆی هەڵاواردن و جیاكاری سیستەماتیكی دەسەلات تووشی دەیان دەرد و دیاردەی كۆمەڵایەتی بوونەتەوە، خەڵكی ئێران وەها دۆخێكیان لە سەردەمی قاتوقڕیەكانیشدا تەجروبە نەكردوە.

كابینەی ئاخوند رۆحانی لە بوجەی ئەو ساڵیشدا هاوشێوەی ساڵانی پێشوو ئەولەویەتی داوە بە هێزە سەربازی و ئەمنیەتیەكان، ناوەندەكانی بەسیج، حەوزەكان و چالاكیە دەرەكیەكانی سپای پاسداران و سپای قودس و گروپ و تاقمە تیرۆریستیەكانی سەر بە رژیمی ئاخوندی لە ناوچەكە. لە پاڵ ئەوەدا بەیتی رێبەری، كابینەی حكومەت، ئەنجومەنی ئاسایشی نەتەوەیی، شیركەت و بانكە حكومەتیەكان و زۆرێكی دیكە لە ناوەند و دەزگاكانی دەسەڵات گرینگی تایبەتیان پێدراوە. ئەوەی لە بوجەی پەسەندكراو ئەو ساڵی رژیمدا هیچ گرینگیەكی پێنەدراوە دۆخ و كێشەكانی خەڵكی ئێرانە  كە بە هۆی نەزانی، گەندەڵی بەرپرسان، فەسادی ئیداری، هەڵلوشین و بەتاڵ كردنی سەرمایەی خەڵكی وەزاڵەهاتوو لەلایەن بەرپرسانی ئەو رژیمەوە سەرچاوەی گرتووە. خاڵێكی جێی سەرنجی دیكە ئەوەیە كە ئەو بوجە پەسەندكراوەی مەجلیس كە پڕە لە ناحەقی لە راست خەڵک و هیچی بۆ دۆخی خەڵكی ئێران تێدا نیە وە هیچ ئاوڕێكی لە چارەسەری قەیرانەكانی تێدانیە، لە دوای نزیك بە ٤٠ رۆژ لە پەسەند كردنی، جارێكی دیكە دەستكاری كراوەتەوە بە مەبەستی تەرخان كردنی بەشە بوجەیەكی زیاتر بۆ ناوەندە ئەمنیەتی، نیزامی و حكومەتیەكان، كە ئەوە لوپی باسەكەی ئێمەیە و لێرەدا ئیشارەیان پێ دەكەین.

 رۆژی چوارشەممە ٨ی بانەمەڕ هەواڵدەری حكومەتی ئیرنا بڵاوكردەوە كە دەستكاری بوجەی ١٤٠٠ كراوە و رێژەی هەشت هەزار ملیارد تمەن بە بوجەكە زیاد كراوە و ئەو بڕە پارەیەیش بۆ ٢٠ ئورگان و ناوەندی دەسەڵات تەرخان كراوە و بەشە بوجەی ئەو ناوەند و ئورگانانە زیاد كراوە كە بریتین لە: بۆ بەسیج ٢٠٤٦ میارد تمەن، مەجلیس ٣٥٩ ملیارد، ئەنجومەنی بەرزی حەوزەكانی عیلمیە ١٠٢ ملیارد، زانستگای ئیمام حوسێنی سپا ٣٦١ ملیارد، سازمانی پروپاگەندەی ئیسلامی ٢٠٠ ملیارد و چالاكانی فەزای مەجازیی دەنگ و رەنگی رژیم ١٥٠٠ ملیارد تمەن تەرخان كراوە. لە كاتێكدا دەستكاریەكی لەو شێوەیە لە بوجەی پەسەندكراوی ١٤٠٠دا دەكرێ كە بەپێی ئیعترافی بەرپرسانی رژیم نزیك بە ٥٠ ملوێن ئێرانی لە بورسدا پووڵیان خواروەو ماڵیان بەتاڵان براوە، بە هەزاران كرێكار لە یەك دوو ساڵی رابردوودا حەقدەستیان پێ نەدراوە یان لەسەر كارەكانیان بەبێ قەرەبوو دەركراون، مامۆستایان، پەرستاران، خانەنشینان حەقدەسەتەكانیان پێ نادرێ و لە ژێر هێڵی هەژاردان و كۆڵبەران و كاسبكاران زیاتر هەژار دەكرێن و رێگە بە كاركردنیان نادرێ و هیچ جۆرە قەرەبوویەك بە خانەوادەكانیان بە رەوا نابیندرێ.

بە ملوێنان ئێرانی لەژێر چەتری رێكخراوی دابینی كۆمەلایەتی (تأمین اجتماعی)دان و بۆ پاروەنانێك موحتاجن و هیچ ئیمتیازێكی ئەوتۆیان پێ نادرێ، هەروەها بەشی تەندروستی تادێ زیاتر و زیاتر تووشی داڕمان دەبێ. هەروەها كەرتی پەروەردە و فێركردن هیچ ئاوڕێكی لێ نەدراوەتەوە لە كاتێكدا لە زۆر ناوچەی ئێران خەڵك لە بوونی قوتابخانەیەكی ستاندارد بێ بەشن و لە ناوچەگەلێكی وەكوو سیستان و بەلوچستان لە كەل و پەلی سەرەتایی كەپر و ژوور ساز دەكرێ و وەكوو قوتابخانە كەڵكیان لێ وەردەگیرێ. زۆر پارێزگا و ناوچەی ئێران كێشەی ئاوی خواردنەوەیان هەیە و چەندین ساڵە خەڵكەكەی بەدەست بێ ئاویەوە دەناڵێنن و ناوەند و دەزگا پێوەندیدارەكانی دەسەڵات هیچ ئاوڕێكیان لەو بابەتە نەداوەتەوە. ژینگەی ئێران بەتایبەت پانتایی دارستانەكان تا دێ زیاتر و زیاتر قەیراناویی و بچوك دەبێتەوە و دەشتاییەكان پەرە دەستێنن كە ئەوە مەترسیەكی دیكەیە بۆ سەر ژیانی خەڵك و دەسەڵاتیش نە بای دیوە و نە بۆران. ئاوڕدانەوەی رژیم و زیادكردنی بەشە بوجەی ئەو ناوەندانەی ناویان هاتووە لە كاتێكدایە، ئەو ناوەندانە نەك هەتا ئێستا گرێیەكیان لە كێشەكانی خەڵكی ئێران نەكردووەتەوە بەڵكوو بوونیان بووەتە بارگرانیەكی زۆر بەسەر ژیان و گوزەرانی خەڵكەوە. بۆ وێنە بوونی بەسیج و ئورگانەسەركوتگەرەكانی دیی، مەجلیس و شۆرای نیگابان و مەجلیسی خوبرەگان، شۆرای بەرزی حەوزەكانی عیلمیە و تێكڕای حەوزەكان، زانستگای ئیمام حوسێنی سپا و باقی ئورگانەكانی سپا، رێكخراوی پروپاگەندەی ئیسلامی باقی دامەزراوە بە ناو ئیسلامیەكان و چالاكانی فەزای مەجازیی دەنگ و رەونگی رژیم وتی: لاڕای دەزگای پروپاگەندای ئەو دەسەڵاتە چ سود و قازانجێكیان بۆ ئێران و ئێرانیەكان هەبووە جوێ لە سەركوت و بارگرانی زیاتر نەبێ؟.

لە راستیدا بەرنامەی بوجەی رژیم نەك هەر بۆ زیاتر هەژار كردنی خەڵكی ستەملێكراو و هەژاری ئێرانە بەڵكوو تایبەتە بە بەهێزكردنی ناوەندە ئەمنیەتی و سەربازیەكان و پۆشتە و دڕتر كردیان بۆ ئەوەی لە كاتی هەر راپەرینێكی برسی و هەژارانی وەڵاتدا رێگرن بن لە بڵێسەسەندنی ئاگری شۆرشی برسی و هەژاران و دەسەڵاتە گەندەڵ و دز و دواكەوتووەكەیان لە ئاگری رق و توورەیی خەڵك بپارێزێن.
ڕێکه‌وت: 2021-05-01 12:39:14
به‌شی ( سیاسی )





دیمانه

سیاسی