له‌سه‌رهێل 78
دووشه‌مه‌‌ 5 ره‌زبه‌ر 2721
سازمانی خه‌باتی کوردستانی ئێران
په‌یامی سکرتێری گشتی سازمانی خه‌بات به‌بۆنه‌ی هاتنی جه‌ژنی ڕه‌مه‌زانی پیرۆز

خه‌باتمیدیا: کاک بابه‌شێخ سکرتێری گشتی سازمانی خه‌باتی کوردستانی ئێران به‌بۆنه‌ی هاتنه‌وه‌ی جه‌ژنی  ڕه‌مه‌زان په‌یامێکی پیرۆزبایی ئاڕاسته‌ی هاونیشتمانیانی موسڵمان لە كوردستان، ئێران و جیهان کردوه‌. سکرتێری گشتی وێڕای پیرۆزبایی له‌ موسوڵمانان به‌م بۆنه‌وه‌، ڕاده‌گه‌یه‌نێ که‌ لە زۆربەی ووڵاتانی ئیسلامی و بە تایبەتی لە ئێراندا، خەڵك  ژیانی سەخت بەڕێ‌ دەكەن و هەژاری وبێكاری و چەندین كێشەی دیكە ئازاریان دەدا. هاوكات دەسەڵاتدارانی ڕژیم بە توندترین شێوە خەڵك دەچەوسێننەوە تێكۆشەران و ئازادیخوازان زیندانی و شكەنجەو ئیعدام دەكەن. له‌ په‌یامی سکرتێری گشتی دا هاتوه‌ که‌:  بە دڵنیایی، بە خەبات و تێكۆشانی گەلانی ستەم لێكراو، كۆتایی بە دەسەڵاتە ستەمگەرو دیكتاتۆرەكان و دەستەو تاقمە ترۆریستیەكان دێ‌، بە تایبەت لە داهاتوێكی نزیكدا دەسەڵاتی دیكتاتۆرو دژی ئینسانی ئاخوندی، بە خەبات و ڕاپەڕینی خەڵكی ئێران و تێكۆشانی شۆڕشگێڕان و مقاومەتی سەرانسەری لە ناو دەچێ‌ و ئازادی باڵ بە سەر ئێران و كوردستان دا دەكێشێ‌.

ده‌قی په‌یامی کاک بابه‌شێخ حسینی سکرتێری گشتی سازمانی خه‌بات :

بە بۆنەی هاتنی جێژنی ڕەمەزان، پیرۆزبایی پێشكەش بە هاونیشتمانیانی موسڵمان لە كوردستان، ئێران و جیهان پێشكەش دەكەم.

 لە كاتێكدا كە موسڵمانان لە كوردستان و ئێران و تێكڕای ووڵاتانی ئیسلامی و لە سەرانسەری جیهان، بە هۆی هاتنی جێژنی ڕەمەزان شادی دەگێڕن، بە داخەوە لە زۆربەی ووڵاتانی ئیسلامی و بە تایبەتی لە ئێراندا، خەڵك  ژیانی سەخت بەڕێ‌ دەكەن و هەژاری وبێكاری و چەندین كێشەی دیكە ئازاریان دەدا.

دیارە هەلومەرجی ژیانی گەلانی ئێران لە زۆربەی ووڵاتانی دیكەی خۆرهەڵاتی ناوەڕاست نالەبارترە، كە سەرەڕای هەژاری و دەیان كێشەی كۆمەلایەتی و نەبوونی و بێكاری، هاوكات دەسەڵاتدارانی ڕژیم بە توندترین شێوە خەڵك دەچەوسێننەوە تێكۆشەران و ئازادیخوازان زیندانی و شكەنجەو ئیعدام دەكەن. خامنەیی و بەرپرسانی ئەو ڕژیمە دیكتاتۆرە، ژیان و داهاتووی گەلانی ئێران و ووڵاتیان بۆ گرینگ نیە، بەڵكو ئەوەی بۆ ئەوان گرینگە مانەوە لە سەر دەسەڵاتە بە هەر نرخێك و لە هەر ڕێگەێكەوە بێ‌. ئەو دەسەڵاتدارە بێ‌ بەزییانە زیاتر لە چل ساڵە بە حوكمی ناڕەوایان ژیانی ئاساییان لە دانیشتوانی ئێران هەڵگرتوەو بەشێكی داهاتی ووڵات، بۆ دەستەو تاقمە ترۆریستیەكان و ئاژاوەگێڕی لە ووڵاتان بەكار دێنن و بەشێكی دیكەی ئەو داهات و سەرمایانە بۆ پەرە پێدانی ماشینی جەنگی و دروست كردنی بۆمبی ئەتۆم بە فیڕۆ دەچێ‌ و ئەوی دیكەشی لایەن دەسەڵاتداران وهاوكارانیان دەدزرێ و بە تاڵان دەبرێ‌.

هاونیشتمانیانی هێژاو موسڵمان!

 لە ماوەی مانگی ڕەمەزندا لە چەندین ووڵاتی خۆرهەڵاتی ناوەڕاست و بە تایبەت لە ئەفغانستان و لە فلستین، خەڵكی بێ‌ تاوان بوونە قوربانی سیاسەت و كردەوەی دەسەڵات و گروپە چەكدارو ترۆریستیەكان كە بە داخەوە لە هێرشێكی ترۆریستی بۆ سەر مەدرەسەی" سید الشهدا" لە شاری كابول 85 خۆێندكار كوژران و بە هۆی كردەوەی ترۆریستی لە چەند شۆێنی دیكە لە ئەفغانستان چەندین كەسی دیكەش كوژراون.ئەو كردەوە ترۆریستیانە وكوژرانی خەڵكی بێ‌ تاوان لە لایەن دەستەو تاقمە ترۆریستیەكان بە توندی مەحكوم دەكەم. بە دڵنیایی، بە خەبات و تێكۆشانی گەلانی ستەم لێكراو، كۆتایی بە دەسەڵاتە ستەمگەرو دیكتاتۆرەكان و دەستەو تاقمە ترۆریستیەكان دێ‌، بە تایبەت لە داهاتوێكی نزیكدا دەسەڵاتی دیكتاتۆرو دژی ئینسانی ئاخوندی، بە خەبات و ڕاپەڕینی خەڵكی ئێران و تێكۆشانی شۆڕشگێڕان و مقاومەتی سەرانسەری لە ناو دەچێ‌ و ئازادی باڵ بە سەر ئێران و كوردستان دا دەكێشێ‌.

جارێكی دیكە پیرۆز بێ‌ جێژنی ڕەمەزان بە موسڵمانانی كوردستان و ئێران و جیهان.

بابەشێخ حوسەینی

 ٢٢ ی بانەمەڕی ١٤٠٠ ی كۆچی خۆری ١٢ی مانگی مەی ٢٠٢١ زایینی
ڕێکه‌وت: 2021-05-12 23:42:22
به‌شی ( سکرتێری گشتی )





دیمانه

سیاسی