له‌سه‌رهێل 68
چوارشه‌مه‌ 26 جۆزه‌ردان 2721
سازمانی خه‌باتی کوردستانی ئێران
سەرنجێک لەسەر شەری غەزە و ئیسراییل!

عەلی بەهرامی

دوانیوەڕۆی دووشەممە 20ی بانەمەڕی 1400ی هەتاوی، بۆ جارێكی دیكە پەلاماری مووشەكی حەماس و جیهادی ئیسلامی بۆ سەر خاكی ئیسراییل دەستی پێ كردەوە، لە بەرامبەریشدا ئیسراییل هێرشی كردە سەر نەواری غەزە و بۆردومانی ئەو شوێنانەی كرد كە حەماس و جیهادی ئیسلامی لێی جێگیرن. لە ئەنجامی ئەو هێرشانەدا تا ئێستا 56 كوژراو 350 بریندار لە غەزەییەكان و كوژراوێك و چەند ئیسراییلیش بەهۆی مووشەكەكانەوە بریندار بوون.
پرسی فەلەستین یەكێك لە پرسە جیهانیەكانە و ساڵانێكە بێ چارەسەر ماوەتەوە، سەرنەكەوتنی پرسی فەلەستینیەكان هۆی زۆری هەیە بەڵام ئەوەی لە ئێستادا پێویستە زیاتر پەنجەی لەسەر داندرێ ئەوەیە كە وێڕای ئەوەی فەلەستینیەكان مافی خۆیانە وەڵاتیان هەبێ و ڕازیبوونێكی نێونەتەوەیی بۆ دوو دەوڵەتی ئیسراییل و فەلەستین بوونی هەیە و لە كۆری گشتی نەتەوە یەكگرتووەكانیشدا دیانی پێدانراوە. بەڵام لایەنی فەلەستینی لە كۆنەوە بەو قەرارە رازی نەبوون، بەتایبەت حەماس و جیهادی ئیسلامی بە دەسیسەی دەرەكی زیاتر كێشەیان بۆ ئاشتی و سەرخستنی پرسی فەلەستین ساز كردووە و هەتا هاتووە هەل و دەرفەتی زۆریان لە دەست داوەو بەدرێژەدانی کێشەکەش بەشی زۆری زیانەکانیش بەشی خەڵكی سڤیلی غەزە بووە.
یەكێ لەو هۆیانەی بوونە هۆی لەدەست دانی دەرفەتەكان، پشتبەستنی حەماس و جیهادی ئیسلامی بە لایەنی دەرەكی و بەتایبەت رژیمی ئاخوندی ئێران بووە. ئەو رژیمەش تەنیا بۆ قازانجی خۆی بە كاری هێناون و پشتیوانی لە فەلەستین تەنیا ڕووكەشێك بووە بۆ گێرەشێوێنی و ئاژاوەنانەوە، بۆ ئەو مەبەستەش رژیمی ئێران بە دابین كردنی پووڵ و چەكوچۆڵ بۆ حەماس و جیهادی ئیسلامی، هەر كات بە پێویستی زانی بێ بەكاری هێناون و ئاگری شەڕ پێ خۆش كردوون، لە ئاكامدا پاشەكشەی زیاتری پرسی فەلەستینی لێ كەوتووەتەوە.
لە بەرامبەریشدا ئیسراییل وێڕای دیفاع لە خۆی لە بەرامبەر حەماس و جیهادی ئیسلامی، هاوكات ئەوندەی رێ دەستی هەبووە پەلاماری فیتنە گەورەكەی داوەو زیانی جەرگبڕی لێداوە. ئیسراییل لە سوریە تەنگی بە هێزەكانی رژیمی ئاخوندی هەڵچنیوە و زیانێكی زۆری پێگەیاندوون. هاوكات ئیسراییل ڕۆڵی هەبووە لە كوشتنی گەورە تیرۆریست قاسمی سلێمانی، فەخریزادە، زانایانی ئەتۆمی رژیم، لەكار خستنی بنكەی ناوكەیی نەتەنز و هێرشی ئەلكترۆنی بە مەبەستی پەكخستنی بەرنامەی ناوكەیی رژیم، بوونە هۆی ئەوەی كە رژیم هەرەشەی تۆڵەكردنەوە بكات و كاردانەوەی هەبێ، ئەگەرچی رژیمی ئاخوندی توانای رووبەرووبوونەوەی ڕاستەوخۆی ئیسراییلی نیە، بەڵام بەناوی تۆڵەكردنەوە لە ئیسراییل بە رێگەی تاقم و گروپە تیرۆریستەكانەوە، لەدوای جەژنی ئورشەلیم و ڕۆژی قودس!
ئەم ئاگرەشی هەڵگیرساند و خەڵكی سڤیلی غەزەی تووشی نەهامەتی و كارەساتی زیاتر کرد.
ئەوەی لە غەزەی و ئیسراییل روو دەدا جێی داخی هەموو وێژدانێكی زیندووە، بەڵام خاڵی جێی سەرنج هەڵوێستی تاكی كوردە لە سەر رووداوەكانی فەلەستین و ئیسراییل! زۆر كەس تەنیا لە ڕووی تەعەسوبی دین یان هەندێ لە ڕووی نەیاریان بۆ دین، یان كەسانێك بە هۆی هەندێ هەڵوێستی سیاسی لایەنەکانی دەرگیر، بە گەرمی پشتیوانی دەكەن یان ئەوەی بەتوندی دژن. بە ڕای من فەلەستینیەكان مافی خۆیانە بەدوور لە دەستی دەرەکی بەشێوە رێگەپێدراوەكان خەبات بكەن بۆ هاتنەدیی مافەکانیان. بەڵام ئەوەی حەماس و جیهادی ئیسلامی دەیكەن نەك خەبات نیە بۆ چارەسەری پرسی فەلەستینیەكان، بەڵكوو بە كردەوە بوونەتەوە جێبەجێكاری بەرنامە و ئەجیندای رژیمی ئاخوندی، بەو شێوە كاركردنەشیان جوێ لە قوربانی مرۆیی و زیانە مادیەكان لە غەزە، هیچ ئاكام و نەتیجەیەكی سیاسی پۆزەتیڤ و ئەرێنیان بۆ پرسی فەلەستین وەدەست نەهێناوە، بە پێچەوانەوە پشتیوانی نێونەتەوەیی و ناوچەییان زیاتر لەدەست داوە و پشتیوانەكانی دوێنێی پرسی فەلەستین ئەورۆ دۆستی نزیكی ئیسراییلن و بوونەتە خاوەن بەرژەوەندی و قازانجی هاوبەش و فەلەستین ئەو سەنگ و قورساییەی لە ساتو سەودا سیاسیەكاندا نەماوە.
خۆ كردنە تەرەف لە ڕووداوێكی وەك شەڕ و تێكگیرانی ئیسراییل و فەلەستین كە هیچ قازانج و بەرژەوەندیەكی بۆ پرسی نەتەوەیی كورد و بزوتنەوەكەی نیە، لە لایەك فوکوسمان لەسەر پرس و خەباتە نەتەوەییەكەی خۆمان و دژایەتی رژیمی ئێران كەم دەكاتەوە و لەلایەكی دیكە هێزی مرۆییمان ئەوندەی دیكە دابەش دەبێ.
فەلەستینیەکان ئەگەر یەك دژمنیان هەیە ئێمەی كورد چوار حكومەت بە هەموو توانا و بە هەر شێوەیەك بۆیان دەست دەدا دژایەتیمان دەكەن. جا بۆیە كورد پێویستە بەو كەرەستە و توانایەی هەیەتی خۆی بۆ پرسەكەی خۆی تەرخان بكات، هاوكات نەك بەسەر دین و مەزهەب و ئەفكاردا دابەش نەبین، بەڵكوو لەگەڵ رێز بۆ دین و مەزهەب و ئەفکاری خەڵکەکەمان، قازانجە نەتەوەییەکان و بزوتنەوەی رزگاریخوازانەی كوردستان خاڵی هاوبەش و كۆكەرەوەمان بێ.
كۆتا خاڵ ئەوەیە كە پرسی فەلەستین دەتوانێ دەرسێكی گرینگمان بداتێ ئەویش ئەوەیە كە خەبات و شۆرشی هەر نەتەوەیەك پشتی بە لایەنی دەرەكی بەست، نەك هەر سەركەوتوو نابێ، بەڵكوو دەبێتە زیان بۆ خاك و خەڵكەكەی.


ڕێکه‌وت: 2021-05-14 08:25:11
به‌شی ( سیاسی )





دیمانه

سیاسی