دوانیوەرۆی رۆژی دووشەممە 31ی جۆزەردانی 1400، كاك مەحمودی یوسفی بەرپرسی پێوەندی كومیتەی نۆروێژی سازمانی خەبات، لە شاری ئوسلۆ بەشداری لە كۆبوونەوەیەكی سیاسی كرد كە لەلایەن پارتی سوسیالیستی چەپی نۆروێژەوە بۆ پارت و سازمانە سیاسیەكانی كوردستان رێكخرابوو.
ئەوكۆبوونەوەیە لەلایەن هاتیام ئەندامی پەیوەندیە نێو نەتەوەییەكانی ئێس ڤێ، مەسعود ناسری ئەندامی رێبەری ئێس ڤێ لە هەرێمی راڵینگێن و هاوكاری بەشی پێوەندیە نێونەتەوەییەكان و بەرپرسی بەشی پێوەندی ئەو پارتە لەگەڵ هێز و لایەنە كوردیەكان و خاتوو لێنە هۆنس هاوس ئەندامی كادری رێبەری ئێی ڤێ لە هەرێمی رالینگن و ئاكەشهوس، لە بارەگای پارتی دیموكراتی كوردستان لە شاری ئوسلۆ بەرێوەچوو.
كۆبوونەوەكە بە مەبەستی ئاشنا بوون بە دید و بۆچوونی سازمانە سیاسیەكانی كوردستان لە مەڕ هەڵبژاردنی داهاتووی ئەو وەڵاتە و چاوەروانیەكانی كوردانی نیشتەجێی نۆروێژ ئەنجام درا.
لە دانیشتنەكەدا كاك مەحمودی یوسفی روو لە پارتی ناوبراو وتی پێویستە ئێوە زیاتر لەوەی هەیە گرینگی بە پرسی نەتەوەی كورد و ئازادیخوازانی ئێرانی بدەن بۆ ئەوەی كە كوردانی نیشتەجێی نۆروێژ لە رووی كارنامەی كاریتانەوە پشتیوانیتان بكەن. تا ئێستا ئێوە لەو هەموو كارەستان و تاوانەی بەرامبەر بە كوردی كوردستانی ئێران دەكرێ هەڵوێستان نەبووە.
شایانی گوتنە SV یەكێك لە پارتەكانی نۆروێژە كە دۆستایەتیەكی زۆری پرسی نەتەوەی كورد دەكات و كرانەوەیەكی زۆری بۆ پرسی پەنابەران بە گشتی هەیە.
ڕێکه‌وت: 2021-06-22 17:10:42
به‌شی ( چالاکیه‌کان )