له‌سه‌رهێل 73
شه‌ممه‌ 27 خه‌رمانان 2721
سازمانی خه‌باتی کوردستانی ئێران
پەیامی کاک بابەشێخی حوسەینی سکرتێری گشتی سازمانی خەبات بۆ خه‌ڵکی کوردستان

هاونیشتمانیانی كوردستان!

تیكۆشەران و خەباتكارانی شۆڕشگێر!

ڕژیمی دیكتاتۆری ئاخوندی زیاتر لە 40 ساڵە قورسترين جینایەت و ستەم بەرانبەر بە گەلانی ئێران و بە تایبەتی گەلی كورد پەیڕەو دەكات. ڕادەی جینایەتكاری و ستەمگەریەكانی دەسەڵاتداران، نە تەنیا لە ئێران بەڵكو لە سەرانسەری جیهان دەنگی داوەتەوە. لە گەڵ جینایەت و ستەمگەری بێ‌ سنوری دەسەڵاتداران لە بەرانبەر گەلانی ئێران، لە لایەكی دیكەوە گەندەڵی و فەسادی ئابوری و ئەخلاقیەكانی دەسەڵاتداران، پەرەگرتنی بێكاری،دزینی سەرمایەی ووڵات، دابین كردنی خەرجی ڕێكخراوە ترۆریستیەكانی وەك ئەلقاعیدەو حیزبوڵای لوبنان، و لە ئێستاشدا زیاتر برسی و تونیی كردنی خەڵك و نەبونی خزمەتگوزاریە سەرەتاییەكان، ژیانی لە دانیشتوانی ئێرانی كردۆتە دۆزەخ.

ڕژیم و دەسەڵاتێك كە مەرگ و ماڵوێرانی، زیندان و ئێعدام، برسیەتی و تونیەتی و نەبونی برق و نەبونی خزمەتگوزاریە پزیشكیەكان و دەیان كێشەی بۆ خەڵكی ئێران بە دیاری هێناوە، بێگومان دەبێ‌ لە ناوبچێ‌ و بخرێتە زبڵدانی مێژووەوە. كاتێك ئاسۆیەكی ڕوون بۆ جەماوەر لە كوردستان و سەرانسەری ئێران نیەو هەموو كات و ساتێكی خەڵك بە حەستەم و بە ناخۆشی تێ‌ دەپەڕی، كاتێك مەرگ وشكەنجە بۆتە دیاردەیەكی ئاسایی و بەردەوام بە سەر گەلانی ئێراندا، تەنیا ڕێگەو چارەسەر بۆ نەهێشتنی ئەو گشتە ئازارە، ڕاپەڕین و بەگژداهاتنەوی دەسەڵاتی ئاخوندی و تێكۆشانی شێلگیر بۆ ڕوخان و لە ناوبردنی ئەو دەسەڵاتە دیكتاتۆرەیە.

داوا لە هەموو لایەك دەكەم هەوڵی بە پەلە بدەن بۆ ڕێكخستی ریزەكانی جەماوەری كوردستانی ئێران. داوا لە مامۆستایانی قوتابخانەكان، خۆێندكاران،مامۆستایانی ئایینی تێكۆشەر، ئەندامان و لایەنگرانی سازمانی خەبات دەكەم هەوڵی جیددی بدەن  بۆپێكهێنانی دەستەو گروپی پێشرەو بۆ ڕێنوێنی جەماوەری كورد لە تێكڕای شارەكانی كوردستاندا. لەم هەلومەرجە گرینگ و چارەنووس سازەدا كە جەماوەری بەشێكی بەرچاو لە شارو ناوچەجیاجیاكانی ئێران و چەندین شاری كوردستان لە بەرانبەر دەسەڵاتی دیكتاتۆری ئاخوندی لە ناڕەزایەتیدان، ئەركی نیشتمانی و نەتەوەیی و ئایینی دانیشتوانی كوردستانە،بە وریایی و بە بەرنامەی تۆكمە بۆ جۆشدانی زیاتری ڕاپەڕین و بە گژداهاتنەوەی دەسەڵاتی دیكتاتۆری ئاخوندی و شۆڕشی تێكڕایی ئامادەكاری و سازماندەیی بكەن.

لە گەڵ دلنیابوون بە سەركەوتنی خەباتی حەقخوازانەی گەلانی ئێران و ڕوخانی ڕژیمی دیكتاتۆری ئاخوندی

 بابەشێخ حوسەینی

سکرتێری گشتی سازمانی خه‌باتی کوردستانی ئێران

 6 ی گەلاوێژی 1400 كۆچی خۆری
ڕێکه‌وت: 2021-07-28 10:14:01
به‌شی ( سکرتێری گشتی )





دیمانه

سیاسی