له‌سه‌رهێل 80
شه‌ممه‌ 27 خه‌رمانان 2721
سازمانی خه‌باتی کوردستانی ئێران
41 ساڵ خەباتی پاك و بێگەرد!

بەختیار عەزیزی
بەرە بەرە بەرەوپیری پێنجی خەرمانان 41مین ساڵرۆژی دامەزرانی سازمانی خەبات ی كوردستانی ئێرانەوە دەچین. 41 ساڵ خەبات لەبەرامبەر رژیمێكی دیكتاتۆر و چەوسێنەر و تیرۆریستپەروەر، هەڵگری سەدان داستان و بڕینی دەیان رێگەی هەوراز و نشێوە، هەر بۆیە پێویست و بەجێیە تاك بە تاكی كۆمەڵگەی كوردستان بە وردی بەدواداچوونی بۆ بكەن و مێژووکەی بیخوێننەوە.
سازمانی خەبات ی كوردستانی ئێران كە لە 5ی خەرمانان (شهریور)ی 1359 لەلایەن مامۆستا شێخ جەلالی حوسەینیەوە دامەزرا، بووە قوتابخانەیەك بۆ بارهێنانی رۆڵەی تێكۆشەر و فیداكاری نەتەوەو نیشتمان. ئەو قوتابیانەی لە مامۆستا و رێبەرەكەیانەوە فێری وانەكانی نیشتمان خۆشەویستی، كوردایەتی پاك و رەفتاری گەل پەسەند كران.
دامەزرانی سازمانی خەبات كارێكی بە رێكەوت و لەناكاو نەبوو، بەڵكوو دێڕ بە دێڕی بەرنامە و هەنگاو بە هەنگاوی تێكۆشەرەكانی هێما و نیشانەی بوونی ئەزموون و تەجروبە و حیكمەتی رێبەر و پێشەنگێكی تێدا دەبیندرا كە ساڵانێك بوو بە ئاواتی ڕزگاری خاك و گەلەكەی لە بەرامبەر حكومەتە داگیركەرەكان چالاكی هەبوو و دەیان قۆناخ و داستانی زوڵم و چەوسانەوەی نەتەوەكەی و زوڵم و ستەمی داگیركەرانی نیشتمانەكەی ببووە هۆی بێچم و شكڵ گرتنی بیری ئازادیخوازی، و لەو پێناوەشدا ئامادەبوو لە پێش هەمووانەوە گیان و ماڵ و هەست و نیستی خۆی فیدای خاك و نیشتمانەكەی بكات.
سازمانی خەبات قوتابخانەی ئەو مامۆستا و سەركردە بوو كە بەوپەڕی سەخاوەتەوە رۆڵەكانی بۆ مەیدانی بەرەوڕووبوونەوەی داگیركەران وەپێش دەدا، هەر بۆیە لەو سەنگەرەدا هەمووان بەبێ من من و تۆ تۆیی و هەمووان یەك دڵ و یەك بڕوا بۆ جەنگی تاریكپەرەستانی خومەینی و ئازادی نیشتمانەكەیان گیان لەسەر دەست و بێ دوو دڵی دەچوونە مەیدانی نەبەردی و تیایدا دەیان داستانی دژمن شكێنیان تۆمار دەكرد.
5ی خەرمانان، یادكردنەوەی هەموو ئەو ڕۆڵە تێكۆشەر و خەباتكارانەی كوردە كە تەنیا ئامانجیان وەدەرنانی هێزی داگیركەر و ئازادی نیشتمانەكەیان بوو و بۆ ئەوەش بە خوێنی گەشیان مێژوویەكی زێرینیان بۆ نەتەوەكەیان و بزوتنەوەی رزگاریخوازانەی نووسیەوە.
5ی خەرمانان، یادی ئەو سوارچاكانەی مەیدانی كوردایەتیە كە بە خوێن و ڕەنج و فیداكاری پارێزگاریان لە قوتابخانەكەیان و سەربەرزی و سەروەریەكانی كرد و رێ و رێبازی شەهیدان و سەروەرانی گەلیان بە ئاوەدانی هێشتەوە.
5ی خەرمانان، كۆكەرەوەی رۆڵە بەبیر و باوەرەكانی كوردستانە لە مەتەرێزی پارێزگاری لە كوردستان و نەتەوەی كورد و تا دوا دڵۆپی خوێنیان لەسەر ئەو ئامانجانەیان بەبێ هەدادان دەمێننەوە.
5ی خەرمانان، یادێكە بۆ پێداچوونەوەو هەڵدانەوەی مێژووی پڕ لە سەروەری سازمانی خەبات ی كوردستانی ئێران، مێژوویەك كە لە ئاوی شەو پاكتر و زوڵاڵترە و تا ئێستا هیچ دژمنێك نەیتوانیوە عەیب و هەڵەیەكی سیاسی لێ بگرێ، بەڵكوو دۆست و دژمن شاهیدن كە سازمانی خەبات لە تێكڕای قۆناغەكانی خەباتدا رووسوورانە و سەربەرزانە تێپەریوە و ئێستاش بە هەوڵ و كاری بەردەوام لە پێناو ئامانجە بەرزەكانی گەل و نیشتمان تێدەكۆشێ.
ڕێکه‌وت: 2021-08-16 09:34:18
به‌شی ( سیاسی )





دیمانه

سیاسی