رۆژی 6 و 7 ی بەفرانباری ساڵی 1400 كۆچی خۆری بە سەرۆكایەتی بەرێز خانم مریەم رەجەوی سەرۆك كۆماری هەڵبژێردراوی شۆرای ملی مقاومەت،كۆبونەوەی دەورەیی شوڕای میللی مقاومەت بە بەشداری ئەندامانی شۆرا و ژمارەیەك كەسایەتی تێكۆشەری ئێرانی و بەشداری بەرێز كاك بابەشێخی حوسەینی سكرتێری گشتی سازمانی خەباتی كوردستانی ئێران بەرێوەچوو.
كاك بابەشێخی حوسەینی بە شێوەی ئانلاین لەو كۆبوونەوەی شۆرادا وتارێكی لەسەر دۆخی كوردستان، ئێران و بزوتنەوەی ئازادیخوازی پێشكەش كرد.
لەوتەكانیدا سڵاوی پێشكەش بە خانمی رەجەوی و برادەر مەسعود سپاسی و ئامادە بوان پێشكەش كردو سپاسی دەبیرخانەی شۆرای كرد بەبۆنەی باگهێشتنی بۆ كۆبونەوەی شوڕای میللی مقاومەت.بەرێزیان لە بەشێكی وتارەكەیدا روو بە بەشدارانی كۆبوونەوەكە وتی: دۆستان رژیمی ئاخوندی روو لە روخان و لەناوچوونە. ئەو رژیمەی لەم دواییانەدا حەیدەر قوربانی لەسێدارەدا، جینایەتەكانی لە كوردستانی ئێران روو لە زیادبوونە، بەڵام لە بەرامبەر ئەو هەموو تاوانەی رژیم ئێمە شاهیدی خۆراگری و پێداگری خەڵكی كوردستان لەبەرامبەر ئەو دەسەڵاتە و هێزە سەركوتگەرەكانین. هەر وەك ئاشكرایە لە دوای لەسێدارەدانی حەیدەری قوربانی خەڵكی زۆربەی شارەكانی كوردستان وەك نارەزایەتی بەو تاوانەی ڕژیمی ئاخوندی مانگرتنی گشتیان بەرێوەبرد و ئەو پەیامەیان بە رژیم دا كە دەبێ‌ بڕوخێ‌ . لە درێژەی وتەكانیدا بەرێز سكرتێری گشتی سازمانی خەبات وتی: ئێمە لە كاتێكدا كە شاهیدی فشارەكانی رژیم و شكەنجەی خەڵك و ئازادیخەاوان لە كوردستان و سەرتاسەری ئێرانین بەداخەوە گوێمان لێ دەبێ و دەبینین هەندێ لایەنی سیاسی لەگەڵ ئەو دەسەڵاتە دڕندە خەریكی وتووێژن و پێشنیاری دانووستان دەدەن كە ئەگەر تەنیا گوێ لە پەیامی حەیدەری قوربانی بگرن كە لەو كاتەدا لە بەندیخانەی سنە و لە ژێر شكەنجەدا بوو تێدەگەن كە خەڵكی كوردستان تەنیا رێی خەبات و خۆراگریان لەبەرامبەر ئەو دەسەڵاتەدا هەڵبژاردووە، نەك رێی وتووێژ و بەناو وتووێژ، كە ئەوە تەنیا خۆبەدەستەوەدانەو ڕوونە رژیم تەنیا ئەوەی دەوێ. لە رابردوویشدا دیومانە كە هەر لایەن و دەستەیەك لە رژیم نزیك بووەتەوە لەلایەن ئەو دەسەڵاتەوە زەربەی وێكەوتووە.
ئێمە وەكوو سازمانی خەباتی كوردستانی ئێران كە زیاتر لە 25 ساڵە لەگەڵ سازمانی موجاهیدینی خەڵكی ئێران و شۆرای ملی مقاومەتی ئێران هاوپەمانین و تا روخانی رژیمی ئاخوندی و جێگیربوونی ئازادی و دیموكراسی لە ئێران دابین كرانی مافی هەموو نەتەوەكانی ئێران پێبەند و پێداگری هاوپەیمانیەكەمان دەبین. داوا لە هەموو لایەنە سیاسیەكانی كوردستانی ئێران دەكەین كە سازمانی خەبات بكەنە نمونە و لەگەڵ شێخ و شا وتووێژ نەكەن و ئەوە بزانن كە هەر جۆرە دانووستانێك لەگەڵ شاو شێخ بە زیانی خەڵكی كوردستان و خودی ئەو لایەنانە تەواو دەبێ.