بە داخەوە رۆژی چوارشەممە 18ی رەشەممەی 1400ی ك خ، كەسایەتی دیار و نیشتمانپەروەر "حاجی مەحمودی ئەمین پوور" خەڵكی گوندی بڵەسەنی ناوچەی بانە كۆچی دوایی كرد.
خواڵێخۆش بوو حاجی مەحمودی ئەمین پوور مرۆڤێكی نیشتمانپەروەر و شۆرشگێڕ و كوردپەروەر بوو كە هەر لە سەرەتای راپەرینی گەلانی ئێرانەوە بە بەشداری لە راپەرین و كۆڕ و كۆبوونەوەكان دژ بە رژیمی پاشایەتی و پشتیوانی لە سەركردەی دیاری راپەرین مامۆستا سەید جەلال حوسەینی دەكرد.
حاجی مەحمودی بڵەسەن لە دوای سەركەوتنی راپەرین وەكوو سەدان كەسی شۆرشگێڕی دیكەی ناوچەی بانە چەكی هێزی بەرگری لە شان كرد و لە زۆرێك لە هەڵسوڕان و چالاكیەكانی ناوچەی بانە، سەردەشت و سنە بەشێوەیەكی شێلگیر و لێبڕاو ئامادە دەبوو.
خوالێخۆش بوو یەكێك لە دڵسۆزانی سازمانی خەبات و ڕیزەكانی هێزی بەرگری و وەكوو ئەندامێکی چالاك درێژەی بە كار و چالاكی تەشكیلاتی خۆی داوەو درێغی نەكردوە لە خزمەت بە رێبازی سازمانی خەبات و بزوتنەوەی رزگاریخوازی كوردستان و بەرەوڕووبوونەوەی هێزە داگیركەرەكانی رژیمی ئاخوندی.
حاجی مەحمودی ئەمین پوور تا دوا هەناسە یاری وەفاداری رێبازی سازمانی خەبات و مامۆستا سەید جەلالی حوسەینی مایەوە و ئاواتی سەركەوتن و گەشەی زیاتری سازمان بوو.
بە بۆنەی كۆچی دوایی حاجی مەحمود، كاك بابەشێخی حوسەینی سكرتێری گشتی سازمانی خەبات پرسە و ماتەمینی خۆی بە خانەوادەی حاجی مەحمود و خزم و كەس كار و خەڵكی گوندی بڵەسەن و ناوچەی بڵۆ و شاری بانە رادەگەێنێ‌ و لەم خەمەیاندا خۆی بە شەریك و هاوبەش دەزانێ و لە خوای گەورە داواكارە حاجی مەحمودی ئەمین پوور بخاتە بەر رحمەت و بەزەیی خۆی و بە بەهەشتی بەرینی شاد بكات.

سازمانی خه‌باتی کوردستانی ئێران / ده‌بیرخانه‌

18ی رەشەممەی 1400ی ك خ 

 
ڕێکه‌وت: 2022-03-10 08:13:21
به‌شی ( سکرتێری گشتی )