10ی خاكەلێوە یادی 75 مین ساڵرۆژی شەهادەتی پێشەوا قازی محەممەد و هاوڕێیانی بەڕێز بێ‌
دەیان ڕۆژی دیار لەمێژووی گەلی كورددا هەن كە دەرخەری كارەسات و دەخەری ستەمی دژمنی قین لە دڵو ناپەسەندو دزێو دڵڕەشە.ئەو ڕۆژانەی كە بیرهێنانەوەیان ئازار هێنەرو تاسەباری و لێوبەبارین.
بەڵێ‌ 10 ی خاكەلێوە یەكێكە لەو ڕۆژە پڕ له‌ ئازارانە بۆ نەتەوەی كورد،‌كە هەم دەرخەری دڕندەیی و حەق نەبیستی و شەڕەنگێزی و غەدداری دژمن و هەمیش دەرخەری خەیانەتی نیشتمان فرۆشی ژمارەیەك بە ناو كورد بوو، كە بە داخەوە تا ئێستاش و لە دوای 75 ساڵ خائینان و خۆفرۆشان بەردەوامن لە خەیانەتكاری لە ناو گەلی كۆمەڵگەی كوردەواریدا.
هەروەها ئیعدامی قازی محەممەد و هاوڕێیانی هەڵگری پەیامی خۆراگری و مل كەچ نەكردن بۆ دژمنی دڵ پڕ لە قین و دەرخەری ئازایەتی و نەبەردیی و كۆڵ نەدانە تا دوا هەناسە.
به‌ڵێ‌ 10ی خاكه‌لێوه‌ ئەو رۆژەیه‌ كە پێشەوا قازی محەممەد سەرۆك كۆماری كوردستان و حەمە حسین خانی سەیفی قازی و ئەبولقاسمی سەیفی قازی لەدوای بە ناڕەوایی مەحكوم بوونیان بە ئێعدام لە دوو جەلەسە و دانیشتنی دادگای فەرمایشی،تەنیا لە بەر كورد بوونیان،بە داخەوە بە دەستی دژمنانی كورد و حكومەتی حەمەڕەزا شا لە چوارچرای مەهاباد لە سێدارە دران. بە ئێعدامی سەرۆك كۆماری كورد قازی محەممەد، دوژمن بە خەیاڵی خاوی، كۆتایی بە هەوڵی گەلی كورد بۆ وەدەست هێنانی مافەكانی دەهێنێ، بەڵام لە حەقیقەت دا ئیعدامی ئەو سەروەرانە نەتەنیا گەلەكەمانی لە هەوڵدان بۆ گەیشتن بە مافە رەوا نەتەوەییەكانی چاوترسین و سارد نەكردەوە، بەڵكوو ئەو رووداوە لە قوڵایی زامی لە كیس چوونی پێشەوا و هاورێیانی پەیامێكی گرینگی گەیاندە خەڵكی كوردستان كە سەروەران لە بەرانبەر ستەم و شكەنجە سەریان نەوی نەكردو گیانبازی وشەهادەتیان هەڵبژارد.
بێگومان ناو و یاد و پەیامی ئەو تێكۆشەرانە بۆ هەتاهەتاییە بە زیندوویی ده‌مێنێتەوەو هەروەها وانەی خۆراگری و نەسرەوتنیان تا سەركەوتن بە گوێی نەتەوەكەماندا داو بە گیان بازیان و شەهادەتیان ئەو پەیامەیان پێداین كە بە بەڵێنی دژمنانی نیشتمان و دژمنانی گەل باوەڕ نەكەین. پەیامێك كە دەبێ‌ دەرسی لێ‌ وەرگرین و لێوەی فێر بین كە دڵخۆش كردن بە پێكەنینی دژمن و هەوڵ بۆ دانوستان لە گەڵ دەسەلاتی دیكتاتۆری ئاخوندی ئێران پێچەوانەی ڕێنۆێنی وانەو دەرسەكانە كە دەبێ‌ و دەبوو لە پێشەوای فێری بین.
بابەشێخ حوسەینی
10 ی خاكەلێوەی 1401 كۆچی خۆری
ڕێکه‌وت: 2022-03-30 10:51:45
به‌شی ( سکرتێری گشتی )