رێناس فەلەکی

ماوەی چەند سالێكە گەڵاڵەێكی سەركوتكەرانە لە لایەن دەزگا ئەمنیەتی و بە ناو دەزگای یاسا دانانی رژیمی ئاخوندی و تەنانەت لە بەرزترین ئاستی هێز، واتە لە لایەن خامنەییەوە موناقەشە و قسەی لەسەر ئەكرێ‌ وبە هاتنی رەئیسی سەرۆك كۆماری ناسراو بە جەلادی مێژوو باسەكان لە سەر ئەو گەڵاڵەیە دووبارە گەرم بۆتەوە و لە ماوەی رۆژانی رابردوو لەسەر هێنانەوی ئەو گەڵاڵەیە بۆ ناو مەجلیس دەنگدان كرا و بە زۆرینەی دەنگ بڕیار درا گەڵاڵەی بەربەست دروست كردنی سەر ئینتەرنێت لە مەجلیس قسەی لەسەر بكرێ‌، ئەوە لە كاتێكدا بوو كە پێشتر لە سەحنی مەجلیس رادەستی كۆمیسیۆنی ئەمنییەتی مەجلیس كرابوو و بریار بوو ئەوان لە پاش هەلسەنگاندن بریاری لەسەر بدەن.ئەو سەر لێشێواوی و ئاڵۆزیە لە بریار و ساخنەبوونەوە لەسەر پەسەندكردن یان رەت كردنەوەی گەڵاڵەكە پێوەندی بە هەستیاری و لێكەوتەكانی دوایی هەیە و دەسەڵات لە دوو رێیانی قازانج و زەرەرەكانی بە جیددی گیری خواردووە و هاوكات كە ئەزانن بوونی ئینتەرنیت و ئاڵ و گۆڕی ئازادانەی زانیاری چەند كاریگەری نەرێنی هەیە بۆ سەر دەسەلات لە بەرانبەریشدا ئاوا ئاگادارن لە نەبوونی ئینتەرنیت چەندە زەرەرمەند ئەبن.لەكاتیكدا دا لە ئاستی نیونەتەوەیی و لە وەڵاتە دیمۆكراتییكەكان بوونی ئینتەرنیت خێرا و بێ بەرانبەر وەك مافێكی سەرەتایی هاووڵاتیان تەماشا ئەكرێ‌ و دەوڵەت خۆی بە ئەركدار ئەزانێ‌ لە هەمبەر ئاسانكاریی لەو خزمەتگوزاریە دا، ئەبینین دەسەلاتی دیكتاتۆری ئاخوندی ئینتەرنێتی لێ بۆتە مۆتەكە و بە دژمنی سەرەكی خۆی ئەزانێ‌. بێ گومان سرۆشتی هەموو نیزامێكی دیكتاتۆر بەمجۆرەیە كە مانەوە و بەردەوامی خویان لە كەشی توندی ئەمنیەتی و سەركوت و پێشگرتن لە جوڵەی زانیاریی و ئازادی ئەندێشە و بیركردنەوە و زانین و فێر بوون ئەبینن و ئەوەندە بێ متمانەن بە سیستەم و دەسەڵاتەكەیان و لە ئاستی بەرزی نامەشروع بوونی خویان ئەوەندە دڵنیان كە دەیانهەوێ‌ لە رێگەی ئەو بەربەست دروست كردنانە پێش بە تەقینەوەی ناڕەزایەتی جەماوەری وەزاڵە هاتوو بگرن . نابێ لە بیرمان بچێ بەشێكی بەرچاو لە چوونە پیشەوەی ناڕەزایەتییەكانی بەهاری عەرەبی لە رێگەی ئینتەرنیت و ئاڵوگۆڕی زانیاری ناو دونیای مەجازیی بوو و ئەوە ئەو راستیەیە خەوی لە چاوی خامنەیی و باقی دەسەڵاتدارە دیكتاتۆرەكانی رژیمی ئاخوندی  زڕاندووە.گەڵاڵەی بەربەست كردنی ئینتەرنێت بە عەمەلی دوو بەرەی موافق و ناڕازی لە ناو خودی دەسەڵاتدا دروست كردووە و لایەنگرانی پەسەند كردنی ئەو گەڵاڵەیە بە هەست كردن بە مەترسیەكانی ئازادی ئالوگۆری زانیاریی و بیر و ئەندیشە ترسی ئەوەیان هەیە ناڕەزایەتییەكانی ناو كومەڵگا بەرەو تەقینەوەی زیاتر بچی و جوڵانەوەێكی ناڕەزایەتی بەربەرین دروست بكات و لە رەهەندی ئەمنیەتی و ترسی نەمانی دەسەڵاتیان خوێندنەوەی بۆ ئەكەن و لەبەرانبەریش دا بەرەی ناڕازی باس لەوە ئەكەن كە بەشێكی بەرچاو لە كار و كاسبی خەڵك لە ڕێگەی ئینتەرنێتەوەیە و ئەو گەڵاڵەیە خوی زیاتر كەلێنەكان بەرفراوان ئەكاتەوە و دۆخی خەڵك بەرەو خراپی زیاتر ئەچێ و لە ئاكامدا ناڕەزایەتی ناو كۆمەڵگا پەرە پێ ئەدا. لە لایێكی ترەوە بەشێك لە زیانەكانی ئەو گەڵاڵەیە خودی دەسەلاتیش دەگریتەو و بە پێی خودی سەرچاوەكانی دەسەڵات لە ناڕەزایەتیەكانی خەزڵوەری 1398 كە ئینتەرنێت لە لایەن دەسەڵاتەوە  بچرا زیاتر لە 1 میلیارد زیانی ئابووری بەدەسەلات گەیاند.ئەوەی كە ئێستا دەیبینین ڕژیم بە شاراوە و شێنەیی وا خەریكە ئەو گەڵاڵەیە لە ڕێگەی بەرزكردنەوەی نرخی ئینتەرنێت لە ئیران بۆ دووبەرانبەر و دابەزاندنی خێرایی ئینتەرنیت بەڕێوە ئەبات و گومان ئەكرێ‌ كە ئەوە وەك تاقیكاری و زانینی دژكردەوەی خەڵك لە ڕاست ئەو پرۆژە سەركووتكارییە ئەكەن و لە نەبوونی هیچ دژكردەوەیكی ئەوتۆ لە داهاتوو دا پرۆژەكە ئاشكرا و عەمەلی ئەكەن. ئەوەی راستی بێ ئەو جۆرە پرۆژانە ناتوانێ‌ رێگەی زانین و تێگەیشتنی كۆمەڵگا بگرێت و خەڵكی ئێران هەموو راستییە تاڵەكانیان بۆ ئاشكرا بووە و بە جوانی لەوە ئەگەن هەر رۆژیك ئەو دەسەڵاتە لەسەر كار بمینێتەوە خەسارەتی قەرەبوونەكراوە لە خەڵك ئەكەوێ‌ و ئەو ڕژیمە لەو پەڕی نەزانینەوە ئەیهەوێ‌ لەسەردەمی پێشكەوتن و پێوەندییەكان و زانست دا گەڵاڵەێكی لەم چەشنە جێبەجێ‌ بكات و ئەگەر ئینتەرنێتی ئازادیش نەمینێ‌ لە ئیران ئەوە بێگومان رێگەی تر و یەك لەوان  ئینتەرنێتی ماهوارەیی كە لە ئێستادا لە وەڵاتی ئۆكراین جێبەجێ‌ ئەبێ، ئەتوانێ‌ ئەو پرۆژەیەی دەسەڵات پووچەڵ بكاتەوە.بۆیە هیچ گومانی تێدا نییە دەسەڵاتی ئاخوندی ناتوانێ لە ڕێگەی ئەو بەربەست و پرۆژە سەركوتكەرانەیە پێش بە جوڵەی زانیاری و پێش كەوتن و زانست و ئازادییەكانی مرۆڤ بگرێت و دواجار مەحكوومە بە پێمل بوونی ئیرادەی لەشكان نەهاتووی كۆمەڵانی خەڵك و كۆتایی هاتن بە دەسەلاتی دیكتاتۆرانەی.