له‌سه‌رهێل 81
سێ‌شه‌مه 5 ره‌زبه‌ر 2722
سازمانی خه‌باتی کوردستانی ئێران
هێرشی ترۆریستی بۆ سەر سەلمان روشدی و بە كام بیانوو؟


عەلی بەهرامی
رۆژی هەینی 21ی گەلاوێژ، لە شاری نیۆیۆركی ئەمریكا ترۆریستێكی سەر بە رژیمی ئاخوندی ئێران بە چەقو پەلاماری سەلمان روشدی داو، ناوبراو بەهۆی ئەو كردەوەوە بە قورسی بریندار و رەوانەی نەخۆشخانە كرا. هێرش و پەلامارەكەی سەر سەلمان روشدی هەر زوو لە هەواڵدەریە جیهانیەكانەوە بڵاو كرایەوە و سەرنجی خەڵكێكی زۆری بۆ لای خۆیدا راكێشا و كاردانەوەی جۆراوجۆری لێ كەوتەوە.
بەپێی سەرچاوەكان و وتەی پۆلیسی نیۆیۆرك ئەو ترۆریستەی هێرشەكەی ئەنجام داوە ناوی "هادی مەتەر" دانیشتووی ئەیالەتی نیوجێرسی ئەمریكا و لایەنگری حیزبوڵای لوبنان و رژیمی ئاخوندی ئێرانە.
هەوڵی كوشتنی سەلمان روشدی لە دوای چاپ و بڵاوكردنەوەی كتێبی "ئایاتی شەیتانی" بە فتوایەكی خومەینی رێبەری رژیمی ئاخوندی لە ساڵی 1367ی هەتاویەوە دێ. خومەینی بە بیانووی ئەوەی نووسەری كتێبی ئایاتی شەیتانی لە دین وەرگراوە فەرمانی كوشتنی دا و پاداشی 3 ملوێن دولاریشی بۆ دیاری كرد. لە دوای مەرگی خومەینی، ئاخوند خامنەیی وەلی فەقیهی رژیم لە 25ی رێبەندانی 1371دا وتی: ئیمام تیرێكی بە رووی ئەو پیاوە تاوانبار و دەمپیسەدا هاویشتووە. ئەو تیرە لە كەوانەكە دەرچووەو نیشانەگرتنەكەیش میزان و رێك بووە، درەنگ یان زوو ئەو تیرە دەگاتە ئامانجی خۆی. بێ گومان دەبێ ئەو حوكمە جێبەجێ بكرێ و بەرێوەیش دەچێ. هەروەها لە 30ی رەزبەری 1394 لە وەڵامی ئەو پرسیارەی كە " ئایا فتوای كوشتنی سەلمان رۆشدی لە دین دەرچوو و درۆزن وەك خۆی ماوە؟ ئەركی موسڵمانان لە وەها كاتێكدا چیە؟ خامنەیی وتی: فەرمان هەر ئەوەیە كە ئیمام خومەینی فەرموویەتی.
بەپێی فتواكەی خومەینی و پێداگریەكانی خامنەیی هەوڵی كوشتنی سەلمان روشدی جوێ لە رژیمی ئاخوندی كاری كەسی دیكە نیە. رژیم بە بیانووی هەڵگەڕانەوە لە دین، بڕیاری كوشتنی سەلمان روشدی جێبەجێ كرد، ئەی بیانووی بۆ كوشتنی مرۆڤە بێتاوانەكانی دیكە چیە؟ ئایا خەڵكی كوردستان 28ی گەلاوێژی 1358 لە دین دەرچبوون كە خومەینی فتوای نارەوای جیهادی لە دژ دەركردن و هێزی پاسداری رەوانەی كوردستان كرد و بە هەزاران كەس لە خەڵكی بێ تاوانی كوردیان لە قاڕنە، قەڵاتان، وسووكەند، سارۆقامیش و ... بێ بەزەییانە تیرباران كرد؟ ئایا هەموو ئەو ئازادیخوازە كورد و ئێرانیانەی بە فەرمانی خومەینی لە دەیەی 60ی هەتاوی لە چاڵەرەشەكانی ئەو دەسەڵاتەدا لەسێدارە و تیریباران كران لە دین هەڵگەڕابوونەوە؟ یان ئەو ئازادیخواز و تێكۆشەرە ئێرانی و كوردانەی لە ئوروپا و كوردستانی عێراق لەلایەن رژیمەوە ترۆر كران، لە دین دەرچووبون؟. بێ گومان دین و مەزهەب بیانوویەكە بە دەست ئاخوندانەوە كە بەو بیانووەوە نەیاران و ئازادیخوازانی كورد و ئێران و كەسانی وەكوو سەلمان روشدی ترۆر بكەن.
حەقە ئەو پرسیارە بكەین ئاخۆ لە نێوان بیری ئازادیخوازان، نووسینەكانی سەلمان روشدی و كردەوەو تاوانەكانی رژیمی ئاخوندی بە ناوی دینەوە كامیان زیانی زیاتریان بۆ دینی ئیسلام هەبووە؟ ئاخوند خومەینی و خامنەیی وەلی فەقیهی رژیم لە كاتێدا خۆ بە خەمخۆری دینی ئیسلام و موسڵمانان دادەنێن كە بە ناوی دینەوە 43 ساڵە زوڵم و زۆر لە كورد و نەتەوە موسڵمانەكانی دیكەی ئێران دەكەن. 43 ساڵە ژن و منداڵ و پیر و لاوی ئەو وەڵاتە دەكەنە قوربانی مەرامە گڵاوەكانیان. زیاتر لە چوار دەیەیە سامانی ئێران و سەرمایەی خەڵكەكەی بە تاڵان دەبەن. بە ناوی دین و مەزهەبەوە ئەو هەموو فیتنە و ئاژاوەیان لە وەڵاتانی ناوچەكە ساز دەكەن و تەنیا موسڵمانانیش بە ئاگری فیتنەكانیان دەسووتێن و...
كۆتا قسە ئەوەیە كە رژیمی ئاخوندی ویروس و بەڵایەكی گەورەیە بۆ گیانی موسڵمانان، دینی ئیسلام، مەزهەبی شیعە و بە تێكڕا مرۆڤایەتی و دژە لەگەڵ هەر جۆرە بیر و هزرێكی ئازاد. رژیمی ئاخوندی بە بیانووی دین و مەزهەب بیر جیاوازان، نەیارانی خۆی و تێكۆشەرانی رێی ئازادی لەسێدارە و تیرباران و ترۆر دەكات و هەر جۆرە ناڕەزایەتیەكی خەڵكی كوردستان و ئێران بە ئاگر و ئاسن وەڵام دەداتەوە. بەڵام هەموو كردەوە و هەڵسووكەوتێكی خۆیان پێچەوانەی دەقە دینی و مەزهەبیەكانە. ئەگەر ئەو دەسەڵاتە بتوانێ‌ بە هێرش و پەلاماری ترۆریستی و كوشتن ترس و تۆقاندن و دڵەڕاوكێ بڵاوبكاتەوە، بەڵام هەموو ئەو كردەوانە لە ئەنجامدا بە سەری خۆیدا قڵپ دەبێتەوە و رۆژێك دێ بێزاری كۆمەڵگەی نێونەتەوەیی و رق و تووڕەیی گەلانی ئازار دیتووی ئێران لە راست كردەوە چەوتەكانی ئەو دەسەڵاتە كڵپە بكات و كۆی دەسەڵاتە چەوت و دواكەوتووەكەیان رابماڵێ و لە كۆڵ نەتەوەكانی ئێران و كۆمەڵگەی نێونەتەوەیشیان بكاتەوە.

ڕێکه‌وت: 2022-08-14 17:37:21
به‌شی ( سیاسی )






به‌شی : هه‌واڵی کوردستان
ڕێکه‌وت : 2022-09-19

به‌شی : هه‌واڵی ئێران
ڕێکه‌وت : 2022-09-16