له‌سه‌رهێل 85
یه‌ک شه‌مه‌ 13 سه‌رماوه‌ز 2722
سازمانی خه‌باتی کوردستانی ئێران
شۆڕشی ژینا ی کوردان(مەهسا)، قەڵای دیکتاتۆری ئاخوندانی هەژاند

لە دوای شەهیدكردنی ژینا ئەمینی لەلایەن هێزە سەركوتگەرەكانی رژیمی ئاخوندی، ناڕەوایی و دڕندەیی ئەم كردەوەی هێزەكانی رژیم ئەوندە هەژێنەر بوو كە كاریگەری لەسەر ویژدانی هەموو مرۆڤێكی بە ویژدان بەتایبەت ئێرانیەكان بە هەموو نەتەوەو ، دین و فكر و ئیدیۆلۆژیەكەوە دانا، بە جۆرێك كە هەر لە دوای ئەسپەردە كردنی ئەو شەهیدە بێ تاوانەی كوردستان، لاوانی سەقزی قەڵای مێرخاسان چوونە بەردەم فەرمانداری رژیم و لە ئاكامدا شەڕ و ئاڵۆزی لەو شارە دا دروست بوو.
ڕۆژی دووشەممە 28ی خەرمانانی 1401ی هەتاوی، لە دوای مانگرتنی گشتی لە كوردستان، ئێوارەی هەمان رۆژ لە زۆربەی شارەكان ناڕەزایەتی و راپەڕینی جەماوەری دەستی پێکرد.
شەهیدكرانی ژینا بەو مەزڵومیەتە و رووداو و كاردانەوەكانی شارەكانی كوردستانی ئێران، هەر زوو كاریگەری لەسەر شار و ناوچەكانی دیكەی ئێران دروست كرد و بینیمان لە باكور بۆ باشوور، رۆژهەڵات بۆ رۆژئاوای ئێران، ژینا بووە هێما و ڕەمزی راپەڕین و جەماوەر لە شارە گەورە و بچووکەکان رژانە سەر شەقامەكان و پشتیوانی خۆیان بۆ كوردستان، بەتایبەت شاری سەقز و خانەوادەی ئەمینی دەربڕی.
دەكرێ لە چەند بارەوە تایبەتمەندیە باشەكانی ئەم راپەرینە هەڵسەنگێنین و لە ناڕەزایەتی و راپەرینەكانی پێشووی دیكەی ئێران و کوردستانیان جیا بكەینەوە. یەكێك لە تایبەتمەندیە بەرچاوەكانی ئەم راپەڕینە ئەو خاڵە بوو كە بە پێچەوانەی پیلانی دژمنكارانەی دەسەڵات لە 44 ساڵی رابردوودا بۆ درز و كەلێن خستنە نێو نەتەوەكانی ئێران و سازكردنی كێشە لە نێوانیاندا، بەڵام وەكوو بینیمان لەم راپەڕینەدا فارس، ئازەری، بەلوچ، عەرەب و هەموو نەتەوەكانی دیكە پشتیوانیان لە كوردستان كرد و تەفرەقەو دابڕان و دووری نەتەوەكان لەم راپەڕینەدا گۆڕا بۆ یەكیەتی، تەبایی و هاوخەباتی ئەو نەتەوانە دژ بە رژیمی دیكتاتۆر و داپڵۆسێنەری ئاخوندی.
راپەرینی ژینا توانی هەموو نەتەوە، مەزهەب، چین و توێژە جیاجیاكانی ئێران لەسەر یەك ئامانجی هاوبەش كۆبكاتەوە و لە تێكڕای شار و ناوچەیەكی ئێرانەوە بۆ ئەو ئامانجە تێ بكۆشن. ئەویش مەرگ بۆ خامنەیی، نا بۆ رژیمی ئاخوندی و روخانی دەسەڵاتی ویلایەتی فەقیهە. كە ئەوەش تایبەتمەندیەكی دیكەی ئەم راپەرینانەیە.
خاڵێکی گرینگی دیکە، تاكتیك و هونەرەكانی بەرەورووبوونەوەی هێزە سەركوتگەرەكانی رژیمە لەلایەن خەڵكی تووڕە و بێزار لە دەسەڵاتی ئاخوندی. وەك لەو فیلمانەی دەنێردرێنە دەرەوە دەبینین لاوان چۆن و لە چەندین شار توانیویانە پەلاماری هێزەكانی رژیم بدەن و لە چەندین شار و ناوچەی ئێران زیانی زۆر و كاریگەریان لەو هێزانە داوە. هەر لەو پێوەندیەدا پێویستە ئەوە بوترێ كە هێزە سەركوتگەرەكانی رژیمی ئاخوندی 44 ساڵە بە زمانی كوتەك و گۆپاڵ لەگەڵ لاوان و خەڵكی كوردستان و ئێران قسە دەكەن، بەڵام ئێستا هێزەكانی ئەو رژیمەن كەوتوونە بەر هێرش و هەڵمەتی شێرانەی لاوان و لە شارەكاندا مەیدانی شەقی تۆڵە و سزایان بۆ دەگیرێ و تەمبێ دەکرێن.
خاڵێكی گرینگی دیكەی ئەم راپەرینە ئەوەیە كە راپەڕینی ژینا بە پێشەنگایەتی ئافرەتانی بوێری كوردستان و ئێران بە پشتیوانی براو باوكەكانیان دەچێتە پێش و ئەو پێشەنگایەتیەی ئافرەتان و كاریگەریەكانی لە پەرەسەندنی ناڕەزایەتیەكان، ترسی لە دڵی ئاخوندە دڵڕەش و دژە ئافرەت دا دروست كردوە.
لە شۆرشی ژینادا تایبەتمەندیەکی دیکە کە دەکرێ جێی بایەخ و سەرنج بێ ئەوەیە کە بەشێکی زۆر لە هونەرمەندان و سلیبریتیەکانی سەر بە دەسەڵاتیش لای جەماوەریان گرتووەو کەوتوونە لۆمەو مەحکوم کردنی دەسەڵات. هەروەها ناکۆکی لە نێو هێزەکانی رژیم یان ئامادەنەبوونی بەشێکی زۆر لەو هێزانە بۆ بەرەوڕووبوونەوەی جەماوەر لەو دیاردانەن کە پێشتر رووی نەداوە.
ئەوەی ماوە بوترێ ئەوەیە كە شۆرشی ژینا، شۆرشی كۆتایی هێنان بە نیزامی ویلایەتی فەقیه و شۆڕشی هەموو نەتەوەكان بۆ ماف و ئازادیەكانیانە لە ئێران، كۆتایی هێنانە بە جیاكاری و هەڵاواردن، بنبڕكردنی دەسەڵاتی گەندەڵی ئاخوندی و جێگیركردنی سیستەمێكی دێموكراتیك و پارڵەمانی كە مافی هەموو نەتەوە، دین، مەزهەب و چین و تووێژەكانی ئێران دابین بكات، كۆتایی هێنان بە نادادپەروەری و پێخوست كردنی مافی رەگەزی، كۆتایی هێنان بە پشتیوانی لە ترۆریزم و بەكارهێنانی داهات و سەرمایەی گشتی بۆ بەرنامەی ناوكەیی و چەك و تەقەمەنی و بنبڕ كردنی هەژاری و گێڕانەوەی ئەو سەرمایانەیە بۆ سەر سفرەی خەڵكی كوردستان و ئێران.

ڕێکه‌وت: 2022-09-25 18:09:10
به‌شی ( سیاسی )



خوێنه‌ر ده‌توانێ ئه‌و وتاره‌ له تۆڕه‌کۆمه‌ڵایه‌تیه‌کان بڵاوبکاته‌وه‌‌
ناونیشای وتار: شۆڕشی ژینا ی کوردان(مەهسا)، قەڵای دیکتاتۆری ئاخوندانی هەژاند