پەرلەمانی ئەورووپا ئەمڕۆ پێنجشەممە لە بڕیارنامەیەکدا پێشێلکردنی مافەکانی مرۆڤ لە ئێرانی مەحکووم کرد و هێرشی شیمیایی بۆ سەر قوتابخانەکانی کچان, کە بوەتە هۆی تێکچوونی باری تەندروستی هەزاران کچی قوتابی ئەو وڵاتە ، بە "هەوڵێکی دڕندانە بۆ ڕێگریکردن لە ڕۆیشتنیان بۆ خوێندنگاکان و بێدەنگکردنی ژنان و کچان ناو برد. لەم بەیاننامەی پەرلەمانی ئەوروپا، کە ئەمڕۆ پێنجشەممە ٢٥ی ڕەشەمەی ۱۴۰۱ لە ماڵپەڕی ئەم دامەزراوە ئەوروپایە بڵاوکرایەوە، ئاماژە بەوە کراوە کە نوێنەرانی پەرلەمانی ئەوروپا، "داوا لە دەسەڵاتدارانی ڕژیمی ئاخوندی ئێران دەکەن کە پێش به هەڵاواردنی ڕەگەزایەتی لەو وڵاتەدا بگرن و ئاسانکاری بۆ دەستڕاگەیشتن بە خوێندن بۆ کچان بکەن و هەر یاسایەک کە جیاکاری لە دژی کچان و ژنان بکات هەڵیبوەشێننەوە.هەروەها پەرلەمانی ئەوروپا داوای لە ئەنجومەنی مافی مرۆڤی نەتەوە یەکگرتووەکان کرد کە کۆمیسیۆنی سەربەخۆی نێودەوڵەتیی دۆزینەوەی ڕاستییەکان کە لە کۆتایی مانگی ڕابردوودا پێکهێنرا، پێبەند بکات بە ئەنجامدانی لێکۆڵینەوەیەکی سەربەخۆ سەبارەت بەو هێرشە بایولوژیکیانەی کە کراوەته سەر کچە خوێندکارەکان.