له‌سه‌رهێل 91
شه‌ممه‌ 27 خه‌رمانان 2721
سازمانی خه‌باتی کوردستانی ئێران
كـــۆمەڵــكوژی زیــندانیانی سیــاسی لــە ساڵی 1367 لــە بــیر نـــاكــرێــت

گەلاوێژ وخەرمانان ورەزبەری ساڵی 1367بەرانبەر بە 1988ی زایینی ئەو رۆژ و مانگانەن كە زیندانیانی سیاسی بە فەرمانی خومەینی قەتڵی عام كران.خومینی جەلاد بۆ ئەو كارە ئەشراقی دادستانی تاران وموسەوی ئەردەبیڵی دادستانی گشتی راسپارد وئەوان  بە حوكمی حكومەتی فەرمانیان دەردەكرد وپاسدارانی تاوانكاری وەك لاجوەردی وداوودی حوكمەكانیان جێبە جێ دەكرد.ئاخوندان لەسەرووی هەموویانەوە خومەینی جەلاد وەك ساڵەكانی 1360-1361، كە دەیان لاوی وەڵاتیان گوللەباران كردلە 1367یش جارێكی دیكە دەستیان تا تا ئەنیشك بە خوێنی لاوانی شۆرشگێری وەڵات سور كردەوە ولاپەرەیێكی جینایەتكارانەی دیكەیان بە تۆماری مێژووی ڕەشیان زیادكرد.رژیمی كۆنەپەرستی ئاخوندی كە بۆ قایم كردنی دەسەڵاتی وهاووكات ترساندنی خەڵك لە سەرەتای بە دەسەڵات گەیشتنیەوە تاوی دایە ئێعدام ولەم رێگەوە گەرەكی بوو خۆی لە بەربەستەكان لابدا ودرێژە بەمانەوەی بدات، لە ساڵی 1367یش لە دووی شكستی لەبەرانبەر ئەرتەشی بەعسی عێراق وسەرهەڵدانی جامی ژار لەلایەن خومەینی بە مەبەستی ئاوڕبڕ لە نێوان ئەو دوو دەسەڵاتە دیكتاتۆرە، جارێكی دیكە پەنای بردوە بەر كوشتاری خەلكی ئازادیخواز وڕق وتۆڵەی شكستە یەك لەدواتی یەكەكانی لە زیندانیانی سیاسی كردەوە. رژیم كە سەرەتا ئامانجی كومەڵكوژی زیندانیانی سازمانی موجاهیدینی خەلكی ئێران بوو، گەركی بوو وەڵامێك بە فروغی جاویدان بداتەوە ،دواتر تاوانەكەی گشتگیرتر كردو دەیان كەسی سیاسی لایەنگری ئازادی و ئەحزاب وتەنانەت ڕەخنەگریشی بە جوخەی ئێعدام سپارد ولە نێو ئەو شەهیدانەشدا 5 رۆڵەی خەباتكارو تێكۆشەری هەرگیز لە بیر نەكراوی سازمانی خەبات ی كوردستانی ئێران، شەهیدان: عەبدوڵا هەمزە وشەهیدخەلیل رەشاش و شهید غەفور ئەحمەدی و شەهید تایر یاكوباوای وشەهید حەسەن سەلیمی ،   هەن كە تاهەتایە لەبیر ناچنەوە وخوێنی گەش وئاڵیان توێشوی درێژەدان بە كاروانە مەزن شكۆدارەكەی ڕێگەی تێكۆشانمانە. گوللەباران كردنی شەهیدانی سازمان لە كاتێكدا بوو كە ئەم 5رۆڵە قارەمانەی نەتەوەكەمان ماوەی 2ساڵ بوو لە چاڵە رەشەكانی رژیمدا ڕاگیرابوون. پێویست بە بیرهێنانەوەیە ئەم شەهیدانە بە پیلانێكی شومی بزووتنەوەی ئیسلامی و حیزبی دەعوە بە دیل گیران و تەسلیم بە رژیم كران، لەكاتێكدا بەدیل گیران كە بەكرێگیراوانی ئەم دوو لایەنە وەك سەربازی رژیمی بەعس خۆیان بە پێشمەرگەكانی سازمان ناساندبوو. بێگومان خیانەتی ئەوانە سەبارەت بە رۆڵە بە وەفاكانی كورد لە بیر ناچێت و ویژدانی مێژوو لێیان خۆش نابێت.هاووكات كوشتاری كەسانی جیابیرو شۆرشگێرانی گەل لە كاتێكدا بوو كە زۆرێك لە وان دەورانی مەحكومیەتی خۆیان تێپەراندبوو وخەونیان بە ئازادی خۆیانەوە دەبینی. دیارە زیندانیانی سیاسی لە پێشدا مەحكوم بە مەرگ كە لە سەرەتای بەهاری ئەو ساڵەوە رێگەی چاوپێكەوتنیان لەگەل كەس وكار لێگیرابوو،دەرخەری ئەو راستیەیە كە كوشتاری ئەوان لە پێشەوە بریاری لێدرابوو.ئەم كارەساتە پێوەندی بە لایەنی دیكەو هێرش بۆسەر مێهران وكرماشانەوە نەبوو ورژیم بۆ چارەسەری قەیران ولەبیر بردنەوەی داڕمانەكانی، ئەم رێكارەی بە گونجاو زانی و تا ئێستاش هەر لە لەناوو بردنی سیاسیەكان بەردەوامە. بە هۆی درێژەدان بە شەڕی 8ساڵەی نێوان ئەو دوو دەسەڵاتە، خەڵكی ئێران كە لە ئێستا زیاتر كەوتبونە قەیرانێكی قوڵی هەموولایەن وبەڵێنی ئەدا دوای شەڕ ئارامی وئوقرەیی وژیان دەگەڕێنیتەوە بۆ وەڵات، بە پێچەوانەوە ئاۆڕبڕی شەڕی كردە مزگێنێك بۆ كۆمەڵكوژی كەسانی ئازادیخوازو بیرجیاواز وكەس وكاری ئەو ئازیزانەی خەفەت بارو ماتەمبارتركرد. لە پێناو ڕق وعوقدەی خۆیان هەزاران كەسیان ڕەشپۆش كرد وبە ئێعدامی زیاتر لە 30هەزار زیندانی سیاسی كە زۆرێكیان تەمەنیان لەخوار 18ساڵەوە بوو،جینایەتی بێ وینەیان خولقاندەوە كە هەرلە دڕندەخوەكانی وەك خومەینی  و سەدام و بەشار و هیتلێر و موسولینی وئیستالین دەوەشێتەوە. خومینی وهاووتا جەلادەكانی وەك رەفسەنجانی وخامەنەیی بە خولقاندنی ئەو كارەساتە وایان دەزانی دەتوانن خەبات وشۆرشی جەماوەری لە ئێران لاوازدەكەن، بەڵام خوێنی ئەو شەهیدانە بە فیڕو نەچوە ورێچكەو رێبازیان رۆژلە دووی رۆژ ئاوەدانتر دەبێت وشوێنی تەرمە شاراوەكانیان بۆتە قیبلەگای شۆرشگێران  وئەو شوێنانەی وەك حەوشەی دادگای بەنێو شۆرشی سنە وخاوەرانی تاران و دارالرەحمەی شیراز وباغی رێزوانی ئیسفەهان، كە تەرمی پیرۆزیانی لێ شاردراوە  بۆتە شوێنی سەردانی كردنی هەزاران خەڵك و وەك نمادی گیانبازی چاو لێدەكەن وهەموو سالێك لە یادی ئەو كارەساتەدابەگوڵ دەڕازێنرێتەوە. ئەوكەسانەی كە وەك كومیسیونی مەرگ دەست نیشان كران وخوێنی ئەو رۆڵە تێكۆشەرانەیان ڕشت بیجگە لە ریسوای شتێكی دیكەیان بە نسیب نەبووە وئەمرۆكە شاهێدی ئەوەین كە بەشێكیان بوونەتە ئوپوزسیونی رژیم وتەنانەت لە دەستبەسەریدا ڕاگیراوون. بەشێك لەو جینایەتكارانەی مێژوو بەرگی ریفۆرمیان لەبەركردوە ودوای زیاتر لە سێ دەیە كوشتار وجینایەت لەدژی مرۆڤایەتی، بەشەرمەوە باسی كوشتاری زیندانیان دەكەن وبە جۆرێك لە جۆرەكان خۆی لێ دەدزنەوە.پێویستە خەڵكی ئێران وكومەڵگای جیهانی ئەو كارەسات وتاوانەی ئەو رژیمە لە یادنەكەن وبڕوا بەو كەسانەش نەهێنن كە بۆ درێژەدان بە حاكمیەتی دیكتاتۆركە بۆ خۆیان بەشێك بوون لە پرۆسەی كۆمەڵكوژی زیندانیان، ئەمرۆكە بەرگی بەنێوچاكە خوازیان لە بەر كردوە و بەچاوی رەخنەگرانە لەو سەردەمە دەروانن. بەو پێیەی كە رژیم وتەواویەتی رژیم بە هەموو باڵ ولاباڵ وریفۆرمیست وئۆسولگەرا، پێناسەییكیان تا ئێستا بۆ زیندانی سیاسی نیە ودژیەتی لەگەڵ نیزام دەبەستنەوە بە شەڕ لەگەڵ خودا، هەموویان لە بازنەی بەرنامەی رژیم كە خۆی لە بۆچوونی خومەینیدا دەبینیتەوە دەخولێنەوە.بێگومان ئەو رۆژە نێزیكە كە هەموو ئەو كەسانەی لەو جینایەتە وباقی تاوانەكانی دیكە سەبارەت بە خەڵكی ئێران وكوردستان بەشداربوون، بەسزای خۆیان دەگەن.

بەرزو بەرێزبێت یادی ئەو زیندانیەسیاسیانەی كە بە خوێنی گەشیان، رۆحی بەرخودانیان لە وەڵات بەهێزتر كرد

 
ڕێکه‌وت: 2015-09-29 17:29:33
به‌شی ( وتاری سیاسی )





دیمانه

سیاسی