له‌سه‌رهێل 79
شه‌ممه‌ 27 خه‌رمانان 2721
سازمانی خه‌باتی کوردستانی ئێران
ســــــازمــــــــــانی خــــــــەبــــــات و گـــــــــۆرانـكارییە پـێویسـتەكـــان

 
لە 5 ی خەرمانانی ساڵی 1394 كۆچی خۆری 27 ی ئوتی 2015 زایینی سازمانی خەبات ی كوردستانی ئێران پێی نایە 36 مین ساڵی تێكۆشانی سیاسی و شۆڕشگێرانەی. ئەم بابەتە بە كورتی ئەو گۆرانكارییە پێویستانەی كە سازمانی خەبات لە ماوەی كارو چالاكی سیاسی و شۆڕشگێرانەی ئەنجامی داوە لە خۆ دەگرێ. وەك ئاشكرایە سازمانی خەبات لە سەرەتای دامەزرانیەوە ناوی رێكخراوی خەباتی نەتەوایەتی و ئیسلامی كوردستانی ئێران بوو. هەڵبژاردنی ناوی سازمانی خەبات وەك رێكخراوێكی نەتەوەیی و ئیسلامی چەندین ئامانج و مەبەستی لە پشتەوە بوو.
1- لە كوردستانی ئێراندا تەشكیلاتێكی سیاسی كە خاوەن باوەری نەتەوەیی و ئیسلامی بێ،لە جولانەوەى ئازادیخوازی كورد لە كوردستانی ئێران بوونی نەبوو. 
 
2- رژیمی ئاخوندی ئێران بە ناوی ئیسلام هێرشی كردە سەر خەڵكی كوردستان و جولانەوەی كوردی بە دژمن بە ئیسلام دەناساند.
3- وزە و تواناییەكی بەرچاو و تەیار بە فكری نەتەوەیی و دینی و سیاسی لە ساحەی جولانەوەی كوردستاندا بوونی هەبوو و دەور و نەخشی بەرچاوی دەگێرا ، بۆ یەكخستنی هەموو ئەو هێز و تواناییانە پێكهێنانی رێكخراوێكی نەتەوەیی و ئیسلامی وەك زەرورەتێك خۆی دەنواند.
لە گەڵ ئەو سێ خاڵە گرینگەدا كە لە سەرەوە ئاماژەم پێدا،چەند هۆیەكی دیكەش هەبوو بۆ پێكهێنانی سازمانی خەباتی نەتەوایەتی وئیسلامی كوردستانی ئێران. بێگومان ‌ دەستەی دامەزرێنەرانی سازمان زۆربەیان مامۆستای ئایینی بوون كە مامۆستا سەید جەلال حوسەینی وەك پێشرەو و مامۆستایەكی دیارو زانای ئایینی و تێكۆشەرێكی نیشتمان خۆشەویست و نەتەوەیی دەوری هەبوو، كە بە شاهیدی زۆربەی شارەزایانی كاروباری سیاسی كوردستان مامۆستا بە واقیع وەك شۆرَشگێرێكی نەتەوەیی و پێشەوایەكی ئایینی دەورێكی گرینگی هەبوو لە خەباتی رزگاریخوازانە هەر لە سەرەتای لاویەوە تا رێبەرایەتی كردنی بەشێك لەراپەرینی خەڵكی كوردستان لە بەرانبەر رژیمی شاهەنشایی ئێران. لە دوای هاتنە سەر كاری رژیمی ئاخوندی و فەرمانی جیهادی خومەینی بۆ سەر خەڵكی كوردستان دەوری سازمانی خەبات و رێبەرایەتیەكەی بە تایبەت دەوری مامۆستا سەید جەلال حوسەینی گەلێك دیارو بەرچاو بوو. 
لە درێژەی كار و هەڵسوورانی سیاسی بەشێكی بەرچاو لە ئامانج و مەبەستەكانی سازمانی خەباتی نەتەوەیی و ئیسلامی ئاڵوگۆری بەسەر داهات و بە تایبەتی لەدوای كۆنگرەی سێهەمەوە بە نەخشەرێگەیێكی تر سازمانی خەبات خۆی نیشان دایەوە. ئەوەی گرینگە باسی بكەین و مەبەستی سەرەكی بابه تەكەیە، تاوتوێ‌ كردنی ئەو گۆرانكاریانەیە كە لە سازمانی خەبات هاتوونە دی و چی بوون و ئایا گرینگ و پێویست بوون؟ پرسیارێكی دیكە لێرەدا ئەوەیە ئەو گۆرانكاریانە ئایا لە هەستێكی كاتی و بەراوەردێكی خێراوەوە بوون؟ وەلامەكەی بە كورتی ئەوەیە كە سازمانی خەبات بە بەراورد و لێكدانەوەیەكی دروست هەم لە ناوخۆیدا و هەم بە راوێژ لە گەڵ شارەزایانی سیاسی دۆست و تەنانەت مامۆستایانی ئایینی لە ناوخۆی كوردستانی ئێرانیش گەیشتە سەر ئەو بڕوایەی كە پێویستە گۆرانكاری لە پەیڕەوپرۆگرام و بەشێك لە بەرنامەی كاری سیاسیدا بكات. لە پێش كۆنگرەی سێهەمی سازمانی خەبات و هەر لە ساڵی 1989 زایینی بە دواوە باس لە پێویستی گۆران لە ‌كاری سیاسی و رێكخراوەیی و لە بەرنامەو پەیرەوی ناوخۆیی بوو بە جێگەی باس. لە ساڵەكانی دواییدا و لە 1999 تا 2002 زایینی ئەو باسە بە شێوەیەكی گەرمترو بابەتیانەتر لە كۆبونەوەكاندا و هەروەها لەگەل ئەو دڵسۆزانەی سازمان كە لە ناوخۆی كوردستانی ئێران سەردانیان دەكرد باسی لە سەر دەكرا. ئەو باسە بە شێوەیەكی بەرچاو هەم لە لایەن جەنابی مامۆستا سەید جەلال حوسەینی و هەروەها بەر پرسانی دیكەی سازمان زۆر بە وردی قسەی لە سەر دەكرا و باس لە میكانیزم و شێوەی ئەو ئاڵوگۆرانە لە سازماندا دەكرا كە بێگومان ئەو ئاڵوگۆرانە دەبوو لە كۆنگرەدا باسی لە سەر بكرایە و لە كۆنگرە بڕیاری لە سەر بدرێ. لە بەر هەلومەرجی نالەبارو نەبوونی هەلی پێویست بۆ پێك هاتنی كۆنگره،‌ سازمانی خەبات نەیتوانیبوو كۆنگرە ببەستی، هەر لەو پێوەندیەدا سەركردایەتی سازمانی خەبات بە جیددی بۆ بەستنی كۆنگرە، هەنگاوی هەڵگرت و كومیتەی ناوەندی سازمان بە ئامادەبوونی مامۆستا سەید جەلال دوایین پلۆنۆمی خۆی لە بەهاری ساڵی 2006 بەست و لەو پلۆنۆمەدا كە بە دوایین پلۆنومی كومیتەی ناوەندی هەڵبژێردراوی كۆنگرەی دووهەم دەژمێردرێ‌، كومیتەیەك لە ئەندامانی سەركردایەتی بۆ ئامادەكاری بەستنی كۆنگرەی سێهەمی سازمان پێك هێندرا و هەروەها ئەو كومیتەیە راسپێردرا كە لە ئورگانەكانی سازمان كۆنفرانس ببەستی و چاودێری هەڵبژاردنی نۆێنەرانی كۆنگرە بكات. لە رۆژی سێ شەممە 21 ی رەشەممەی 1384 بەرانبەر بە 12 ی فوریە ی مانگی دووی زایینی 2006 كۆنگرەی سێهەمی سازمان بەسترا. لە دوای ماندوو بونێكی زۆر، كۆنگرەی سێهەمی سازمانی خەبات بە ئامانجی زۆر گەورە و بە مەبەستی پێداچوونەوە بە ئەرك و كارەكانی چەندین ساڵی رابردوو و زانینی هۆكان بۆ نەبەستنی كۆنگرە لە كاتی خۆیداو هەروەها باس لە سەر ئامانج و بەرنامەی داهاتوو و پەیرەو پرۆگرامی سازمان، لە بنكەی سەركردایەتی لە شارۆچكەی تۆبزاوا لە نزیك شاری هەولێر بە ئامادەبوونی زیاتر لە 40 كەس لە نۆێنەرانی ئورگان و بەشەكانی سازمان لە ناوخۆی كوردستان و نۆێنەرانی كومیتەكانی ئوروپا دەستی بە كارەكانی كردو ئێوارەی سێ شەممە 23 ی رەشەممە كۆتایی پێهات. لە كۆنگرەی سێهەمدا روداوە سیاسیەكانی جیهان و ناوچەی خۆرهەلاتی ناوەراست و هەروەها هەلومەرجی سیاسی كوردستان و ئەو ئاڵوگۆرە سیاسیانەی كە جولانەوەی ئازادیخوازی خەڵكی ئێران وخەباتی ماف خوازانەی گەلی كورد لە كوردستانی ئێران، بە وردی كەوتنە بەر باس و لێدوان. لەگەڵ ئەو باسە گرینگانە،باسی هەلومەرجی سیاسی سازمانی خەبات و داهاتووی بە وردی و زۆر بە گەرمی كەوتە بەر هەڵسەنگاندن و باسی ئەندامانی كۆنگرە،بە تایبەت باسی خەتی سیاسی سازمان و گۆران لە بەندو خاڵەكانی پەیرە و پرۆگرام و ناوی سازمانی خەبات، وەك سەرەكی ترین و بابەتی جێگەی سەرنج و زۆر پێویست بووە باسی گەرمی كۆنگرەی سیهەمی سازمانی خەبات و ئەو پێشنهادو بۆچوونانەی كە سازمانی خەبات لە پێش كۆنگرەو لە كۆنفرانس و كۆبوونەوەكان قسەى لە سەر كرابوو كە سازمانی خەبات درێژە بە ئەركی شۆڕشگێرانەی لە چوارچێوەی تەشكیلاتێكی نەتەوەیی و نیشتمانی كه لە پەیرەو پرۆگرامی نوێداو وەك هێزێكی دور لە هەر جۆرە گرژی فكری و مەزهەبی و بە رێز گرتن لە تێكرای باوەرو بۆچونەكان و بەتایبەت ئایینی پیرۆزی ئیسلام كاری باشتر لە پێناو گەل و نیشتمان درێژە پێ بدات. دیارە نووسەری ئەم دێڕانە گەلاڵە دارێژەر و هاندەری سەرەكی ئەو بەرنامە نوێیە بووم كە سازمانی خەبات بۆ سەردەمی نۆێی خەباتی ماف خوازانە پێویستە ئاڵوگۆر لە بەرنامەی سیاسی خۆیدا ئەنجام بدات،بەلام پێویستە ئەو راستیەش بخەمە بەر چاو كە بەرێز و تێكۆشەر جەنابی مامۆستا سەید جەلال حوسەینی، لەسەرەتادا چەندین تێ بینی لە سەر پێشنهادەكان لە مەڕ بەرنامەو پرۆگرامی نوێی سازمانی خەبات هەبوو بەلام لە ماوە كاری كۆنگرەی سێهەمدا بە هیچ شێوەیەك موخالیفی بەرنامەی نوێی سیاسی و فكری سازمان نەبوو، بەڵكو پێشوازی لێكرد. ووتە بە نرخەكانی بەرێزیان لە كۆنگرەی سیهەم و چوارەمی سازمان شاهیدی ئەو راستیەن كە مامۆستای گەورە و بە نرخ پشتیوانی گەورە بوو، بۆ پەسەند كردن و جێ بە جێ كردن بەرنامەی سیاسی نوێ لە سازمانی خەبات. بە دوای 10 ساڵ بە سەر ئەو گۆرانكاریە گرینگ و گەلێك پێویستانەدا كە لە سازمانی خەبات هاتە ئاراوە بە پێویستی دەزانم ئەو راستیە بۆ هۆگرانی رێبازی پیرۆزی سازمانی خەبات دوبارە بكەمەوە كە سازمانی خەبات سەربەرزانە توانیویە درێژە پێدەری رێبازی دامەزرێنەران و خوێنی شەهیدە قارەمانەكان بێ.بێگومان پەیرەوی سیاسی سازمانی خەبات لە ئێستادا وەك یەكێك لە شیاوترین ‌ رێبازی سیاسی گۆرەپانی خەباتی ماف خوازانەیەو‌ نرخێكی زۆر بەرزی هەیە. بەڵی سازمانی خەبات هەر وەك چۆن لە رابردوودا، سەرەڕای كێشەو كەندو كۆسپی زۆر توانی سەر بەرزانە لە مەیدانی خەباتی مافخوازنەی كوردستاندا بەردەوام بێ. لە دوای ئاڵوگۆرەكانی كۆنگرەی سیهەمدا باشترو گەشەسەندووتر لە رابردوو چالاكتر و شێلگیرانە تێكۆشاوە و رێبازی رابردوی لەگەل بۆچوون و خەتی نۆی پێكەوە گرێداوەو لە تێكۆشان و شۆرشی مەزن و رەوا بەرەو پێش دەچێ و لە ماوەی چەندین ساڵی رابردودا دەورو جیگەی دیارتری لە كۆری جولانەوی ماف خوازانەدا بە رەنجی بێ ووچان و مانەوە لە سەر ئوسوڵی سیاسی بە دەست هێناوە.سازمانی خەبات و رێبوارانی كارێكیان كردوە رۆحی شەهیدانی سەربەرز و رۆحی مامۆستای دامەزرێنەر بە كارو چالاكیان شاد بێ و دۆستان دڵخۆش و دوژمنان غەمبار بن. لەم ساڵدا كە سازمانی خەبات پێی ناوەتە 36 مین ساڵی تێكۆشانی بێ ووچانی، پێویستە ئەو راستیە بخەینەوە بەرچاو كە سازمانی خەبات هەمیشە لە باری فكری و كاركردەوە بەرەو پێش چووە و بەردەوامە لە پێش كەوتنی زیاتر و لە داهاتوشدا بە راگرتن و پاراستنی چەندین بنەماو ئەسڵی سەرەكی و نەگۆر كە بریتین لە سوور بوون لە سەر رێبازی ئێستای سازمان و هەروەها شێلگیرانەتر لە پێناو شاد كردنی رۆحی شەهیدان و رۆحی مامۆستا سەید جەلال حوسەینی بەردەوام دەبێ، و بە زانینی ئەو گرینگیەی مامۆستای سەروەرمان هەم لە جولانەوەی ماف خوازانەو هەم لە سازمانی خەباتدا دەوری بەرچاوی هەبوە و هەروەها گرینگیدان بە رۆژە مێژووییەكانی سازمان داوا لە تێكرای هۆگرانی رێبازی پیرۆزی سازمان دەكەین بە شێوەی جيديتر لە پێناو بردنە پێشی خەباتی ماف خوازانەو گەشە پێدانی سازمانی خەبات زیاتر تێبكۆشن.
 
ڕێکه‌وت: 2015-10-01 17:18:57
به‌شی ( وتاری سیاسی )





دیمانه

سیاسی