له‌سه‌رهێل 81
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
گـــەنــدەڵـــی حــكـوومەت و داڕمـــانی ئــــابــــووریـــی

 

لەكاتێكدا كە لەدوای رێكەوتننامەی 14ی ژوئیەی نیوان وەڵاتانی 1+5 و رژیمی ئاخوندی خەڵك چاوەروانی كرانەوە و باش بوونی دۆخی ئابووری بە گشتی دەكرد، بەڵگەكان باس لە خەراپتر بوونی دۆخی ئابووری و پەرەسەندنی كێشە ئابوورییەكان دەكات. لە رۆژانی رابردوو لە زمانی خودی بەرپرسانی رژیم  و لە زمان 4 وەزیر و لەوان وەزیرەكانی ئابووری و پیشەسازیی باس لە داڕمانی ئابووری ئەو رژیمە و خەراپتر بوونی دۆخی ئابووری دەكرێ‌. لەنامەكەی ئەو 4 وەزیرە دا هاتووە كە لەماوەی 19 مانگی رابردوو بازاری سەرمایە 42 لەسەد دارووخاوە و مس و پۆڵا بە ریز 53% و 31 % كەمی كردووە. قازانجی بانكەكان بە رێژەیێك دابەزییوە كە تا 5 ساڵی تر چاوەروانی بۆ چاكبوونەوەی ئەو دۆخە حەستەمە و پیشەسازی ماشین دروست كردنی لەبەرەبەری داخراندایە، بە جۆرێك كە عەنباری بەرهەمەكانی ماشین گەیشتۆتە  زیاتر لە100 هەزار ماشین. بابەتێكی تر كە لە نامەكەی وەزیرانی رژیم باسی لێوە كراوە بابەتی سیاسەتی ناهەماهەنگ لە نێو دام و دەزگای نێوخۆی وەڵاتە كە ئاماژەیە بە دەسەڵاتی بێ ئەملا و ئەو لای دەفتەری خامنەیی و سپای پاسداران بەسەر بەشێكی بەرچاو لە ئابووری ئێران كە بە هۆیەوە دەسەڵاتی تەواوی لە كاروباری ئابووری 

لە كابینەی روحانی  سەندۆتەوە. هەروەها سەبارەت بە هاتنی كۆمپانیا دەرەوەییەكان بۆ بازاری ئێران نیگەرانی دەربڕدراوە و ئەوە بە زیانی بەرهەمهێنەرانی ناوخۆیی زاندراوە. ئەوان نووسیویانە كە سەرمایەی دەرەكی نەتەنیا برینەكان سارێژ ناكات بەڵكو بە توندی قەیرانەكان پەرە پێدەدات. بە پێی ووتەی وەزیرەكانی كابینەی رۆحانی رێكەوتننامە ناوكەییەكە بۆتە هۆی  دابەزینی داواكاریی لە بازار بە هۆی چاوەروانی بۆ كەمبوونەوەی نرخی كاڵاكان و ئەو مەترسیە بوونی هەیە كە بازاری بورسی تاران لە داهاتووێكی نزیك دا لە نێوان 1000 تا 1500 یەكە دابەزێ‌. بە ووتەی كارناسێكی ئابووری رژیم  ئابووری ئێران وەك نەخۆشێك وایە كە بە جۆرها ژەهری پێكهاتوو لە سیاسەتە هەڵەكانی ئابووری پیس بووبێ و هاندەر و بڕوای بە دكتۆری خۆی واتە نیزامی دەسەڵاتدار نەمابێ.  

ئەو دۆخە كارەساتبارە و دان پێدانان و وریایی دانی لە لایەن بەشێك لە مۆرەكانی ئەو نیزامە لە كاتێكدایە كە هاوكات دەنگ و باسی دزی و تاڵانی میلیاردی لە لایەن دەسەڵاتدارانی رژیمەوە لە سەردێری هەواڵەكاندایە. بەرێوەبردنی دادگایی بابەكی زەنجانی كە دیمەنێكی تر لە ئاشكرابوونی گەندەڵی حكوومەتی و تێكگیرانی باڵەكانی رژیم لەپێوەند بە دزی مالی گشتیە، نمونەگەلێك لە بە تاڵان بردنە میلیارد دۆلارییەكانی پوڵی فرۆشتنی نەوت لە لایەن دەست و پێوەندەكانی رژیم ئاشكرا دەكات و رۆژنامەی حكوومەتی ریسالەتیش ئاشكرای دەكات:  5 شیركەتی سەر بە رێكخراوی وزەی ناوكەیی بە میلیارد دۆلار لە بووجەی گشتیان بۆ تەرخان كراوە، ئوكسیدەكردنی ئۆرانیۆمی 20 لەسەدی زەرەری نزیك بە 18 میلیارد دۆلارمان لێدەدات.  لە لایێكی ترەوە ئاشكرا كردنی ئەو گەندەڵی و تاڵان و بروویانە لە لایەن باڵی رۆحانی كێشە سیاسیەكان لە نێو باڵەكانیشی پەرە پێداوە و لە بەرانبەر ئەو ئاشكراكردنەی دزییەكانی باڵی خامنەیی و سپای پاسداران لە لایەن 4 وەزیری كابینەی رۆحانی  رۆژنامەی سپای پاسداران سەبارەت بە قەیرانی ئابووری نووسی:  بە راستی ئەگەر دەوڵەت تیمێكی یەكگرتووی ئابووری هەبووایە و قەرارە لە دوای تێپەرین لە دابەزین و ئامادەبوون بۆ بەرێوەبردنی بەرجام جووڵەیێكی خێرا بەرەو گەشانەوەی ئابووری دەست پێبكرێ‌، چۆناوچۆنە لەماوەێكی كەم دا باس لە هەنگاو نان بەرەو قەیران دەكرێ‌ . ئایا جامی ژەهرێكی تر بەرێوەیە؟  میهردادی بەزرپاش ئەندامی شاندی سەرۆكایەتی مەجلیسیش لەبارەی نامەی 4 وەزیرەكەی ئاخوند رۆحانی ووتی: دەوڵەت ئەوەندە چاوی بریوەتە ئیمامزادە بەرجام كە ئاگای لەوە نەماوە ئەو ئیمامزادەیە ئابووری ئێران شیفا نادا. راوێژكاری وەزیری پیشەسازیش دەڵێ: خاڵی كۆتایی ئەو دۆخە بە مردنی ئابووری و بەتایبەتی بەشی تایبەتی كۆتایی دێ‌. بارودۆخ بە رێژەیێك مەترسیدارە كە 20 هەزار یەكەی دارووخاو لە ماوەی یەكساڵی رابردوو هیچ جوولەیێكیان نەبووە. 

بێگومان هەموو ئەو  ئیعترافاتە كە لە ئاكامی شەری نێوان باڵەكان ئاشكرا دەبن تەنیا نمونەیێكی زۆر كەمی بارودۆخی كارەساتباری ئابووری لە ئێران وێنا دەكەن و سەرەرای هەموو ئەو گەندەڵیانەی ئاشكرا دەبن بە سەدان نمونەی تر لە دزی و بە تالان بردن و بە فیرۆ دان و بەخشین بەو لا و ئەولا دێزە بەدەرخۆنە دەكرێن و ئاشكرا نابن. 

 
ڕێکه‌وت: 2015-10-25 16:50:43
به‌شی ( وتاری سیاسی )





دیمانه

سیاسی