له‌سه‌رهێل 85
شه‌ممه‌ 27 خه‌رمانان 2721
سازمانی خه‌باتی کوردستانی ئێران
كوژرانی كەسی دووهەمی سپای قودس و بكوژی خەڵكی كوردستان

بەختیار عەزیزی

لەسەرەتای دەسپێكی راپەرینی خەڵكی سوریا لە دژی رژیمی بەشار ئەسەد ، دەسەڵاتدارانی ئێران بە هەموو تواناییانەوە تێكەڵ بەو شەرە بوون بۆ پاراستنی نیزامی ئەسەد و هەتا ئێستاش ژمارەیێكی زۆر لە پاسداران و فەرماندە بالاكانی رژیم لەو شەرە دا كوژراون و بەشێكی بەرچاویان لە بێدەنگی دا خراونە ژێر گڵ و هیچ باسێكیان لێوە نەكراوە، ئەوە لەو كاتە دابوو كە رژیم ئیدعای ئەوەی دەكرد كە ئەوان بەشدار نین لەو شەرە و تەنیا چەند تیمێكی راوێژكاریی و یارمەتی مرۆڤدۆستانە پێش كەش دەكەن و هەموو جارێكیش لەدوای بەدیل گیرانی دەست و پێوەندەكانی رژیم بە دەستی ئۆرپۆزسیۆنی رژیمی ئەسەد و ئاشكرابوونی بەڵگەی حاشاهەڵنەگر بۆ سەلماندنی ئەو دەستێوەردانە تێكدەرانە و یەك لایەنانه، دەسەڵاتدارانی رژیمی ئاخوندی حاشایان لێدەكرد و بە سیناریۆ و درۆیان لەقەڵەم دەدا.بەڵام لەدوای سەرهەڵدانی داعش و گۆرانكاریی هاوكێشەكان و هاتنی رووسیە بۆ ناو بابەتەكە رژیم بە ئاشكرا كوژرانی فەرماندەكانی رادەگەێنێ‌  و نایشارێتەوە، بەڵام ئەمجارە لە ژێر ناوی شەر لەدژی داعش هاوكاریی و پشتیوانیەكانی لە رژیمی بەشار ئەسەد پاساو دێنێتەوە. 

 هەر لەو پێوەندییەدا لە رۆژانی رابردوو دا دەسەڵاتی ئاخوندی لە مێدیاكانیەوە كوژرانی فەرماندەێكی باڵای خۆی راگەیاندووە بەناوی سەرتیپ حوسێنی هەمەدانی جێگری قاسمی سلێمانی بەرپرسی سپای قودسی سپای پاسداران كە یەكێك لە مۆرە گرینگەكانی دەسەڵات و بكوژێكی جینایەتكاری خەڵكی كوردستان بووە.

كوژرانی هەمەدانی كە لە مۆرە دیارەكانی ناو سیستەمی نیزامی رژیم بوو زیان و زەربەیێكی گەورە بوو بۆ رژیم، لەبەرئەوەی كە هەمەدانی بە درێژایی تەمەنی دەسەلاتداریەتی ئاخوندیی چەندین بەرپرسیارەتی گەورەی لە ئەستۆ بووە و كۆمەلێك جینایەت و كوشتاری گەورەش لە پێناو پاراستنی رژیمی ئاخوندی لەسەر دەستی ناوبراو بەرێوە چووە.  

لەسەر چۆنیەتی كوژرانی هەمەدانی تا ئێستا چەندین سناریۆ باس كراوە و لە ناویاندا لە زمان عەلی سابت فەرماندەێكی سپای پاسداران دەوترێ‌ كە رۆژی پێنج شەممە 16ی رەزبەر سەعات 3ی هەمان رۆژ لە كاتێكدا كە بۆ مەبەستی ناسینی ناوچەكە هەمەدانی لە ناوچەی حەڵەب بووە دەكەوێتە ناو كەمینی تەكفیرییەكان  و لە دوای تەقە هەمەدانی دەپێكرێ‌ و لەكاتی گواستنەوەی بو نەخۆشخانە سەعات 8 دەكوژرێ‌. زەربەی كوژرانی هەمەدانی بە رێژەیێك كاریگەر بووە كە خامنەیی  و رەفسەنجانی و پاسدار جەعفەری و رەزایی و شەمخانی  لە پەیامی جیا جیا ئاماژەیان بەو خەسارەتە كردووە و ئەویان بە پارێزەری قووڵایی ئیستراتیژی نیزام شوبهاندووە و بە پێی ووتەكانی ئەو پاسدارنە ناوبراو بۆیە لە سوریە بووە تا شەر لە تاران دوور بكاتەوە. 

بەرپرسیارەتیەكانی حوسێن هەمەدانی بریتی بوون لە :

1 ـ فەرماندەی لەشكری 32ی ئەنسارولحوسینی پارێزگای هەمەدان  

2 ـ فەرماندەی لەشكری 16ی ناسراو بە قودسی پارێزگای گیلان 

3 ـ  جێگری عەملیاتی قەرارگای قودس 

4 ـ   فەرماندەی قەرارگای نەجەف و فەرماندەی لەشكری 4ی بەعسەت 

5 ـ سەرۆكی ستادی هێزی زەمینی سپای پاسداران  

6 ـ جێگری فەرماندەی هێزی موقاومەتی بەسیجی سپا ( دوو دەورە) 

7 ـ راوێژكاری بەرزی فەرماندەی گشتی سپای پاسداران 

8 ـ  جێنشینی رێكخراوی بەسیج 

9 – فەرماندەی سپای محەممەد رەسوڵلای تاران  

هەروەها ناوبراو یەكێك لە بكوژانی خەڵكی كوردستان  و لەدەستەی دامەزرێنەرانی سپای پاسداران لە كوردستان بووە و لە ماوەی ساڵەكانی 58 تا 1360 یەكێك لە سەرەكیترین مۆرەكانی كوشتار و بەرێوەبەری فەرمانی جیهادی خومەینی لە كوردستان بووە. ناوبراو دەستی باڵای لە رووبەرووبوونەوەی هێزە ئازادیخوازەكانی كوردستان هەبووە و لە زمانی خۆیەوە گەورەترین شانازیی بەشداریی لە شەری دژی ئینقلابیەكان بووە و لەو بارەشەوە كتێبێكی بە ناوی مەهتابی خەیێن لە پاش بە جێ ماوە. هەمەدانی لە شەری 8 ساڵەی نیوان عێراق و ئێران فەرماندەی عەملیاتی كەربەلای 4 و 5 بوو كە تییدا بە مەبەستی پاككردنەوەی مەیدانەكانی مین لە سەربازەكان كەڵك وەردەگیرا و لەو جۆرە عەملیاتانە دا سەربازەكان دەچوونە سەر مینەكان و بە كوشتنی خۆیان مینەكان دەتەقاندەوە. هەروەها لە سەركووت كردنی راپەرینەكانی وەك 18ی پووشپەری 1388 گەورەترین دەوری هەبوو لە كوشتن و زیندانی كردن و هەروەها پرۆسەی شكەنجە و ئیعتراف وەرگرتن لە زیندانیان و بە ئیعترافی خوی لە ووتوویژێكدا لە جەریانی راپەرینەكە و سەركووتی رژیم نزیك بە 830  كەس قەتعی نوخاع بوونە و ئەوە دەرخەری ئەو راستیەیە كە لە جەیرانی پرۆسەی دانپێدانان سپای پاسداران چ جینایەتێكی بەرێوەبردووە. حوسێن هەمدانی لە ریزی ئەو 80 كەسە بوو كە كەوتە بەر ئابلۆقەی یەكێتی ئورووپا و تەحریمی لەسەر بوو بە هۆی پێشێلكردنی مافەكانی مرۆڤ و مافی خەڵكی ئێران. 

حوسێن هەمەدانی مەكینەیێكی كوشتار و جینایەت بوو كە لە ژێر فەرمانی ئاخوندەكانی تاران زیانی گەیاندبوو بە مرۆڤایەتی و نەك تەنیا بە كوشتاری ئازادیخوازانی گەلانی ئێران نەویستاوە بەڵكو لە رێگەی پشتیوانی لە رژیمی بەشار ئەسەد لە جینایەتەكانی رژیمی سوریاش بەرانبەر بە خەڵكی نارازیی بەشداریی كرد و دواجار لە رێكەوتی 16ی رەزبەری 1394 بە سزای تاوانەكانی گەیشت.  

حوسێن هەمەدانی كە بە كەسی ژمارەی ٢ی سپا ناسرابوو یەكێك لە باڵاترین ئەندامانی سپای پاسداران بوو كە دوای دەسپێكردنی شەڕ و تێكهەڵچوونە نێوخۆییەكانی سووریە نێردرایە ئەو وڵاتە و وەك جێگری قاسم سولەیمانی بەشداریی لە شەڕی دژی ئۆپۆزیسیۆنی سووری دەكرد. ناوبراو لە هیچ جینایەتێك سڵی نەكردۆتەوە و لە راپەڕینەكەی ساڵی ١٣٨٨ی خەڵكی ئێران‌دا وەك فەرماندەی سپای “محمد رسول اللە” دەورێكی سەرەكیی لە سەركوتی راپەڕینەكە و، كوشتن و برینداركردن و گرتنی ناڕازییان‌دا گێڕا.

حوسێن هەمەدانی لە لیستی ئەو بەرپرسانەی رێژیم‌دا بوو كە بەهۆی بەشداری لە سەركوتی خەڵك و پێشێلكردنی مافەكانی مرۆڤ رۆژی ١٣ی ئاوریلی ٢٠١١ لە لایەن یەكیەتیی ئورووپاوە گەمارۆیان بەسەردا سەپا. 

دوای راپەڕینەكەی خەڵكی سووریە لە دژی رێژیمی دیكتاتۆری بەشار ئەسەد، ئێران وەك هاوپەیمان و پشتیوانی بەشار ئەسەد بە كردەوە و بە هەموو تواناوە وێڕای سپای سووریە شەڕێكی تەواو عەیاری لەدژی خەڵكی راپەڕیوی ئەم وڵاتە دەست پێكرد كە تا ئێستا لەپێناو راگرتنی دەسەڵاتی ئەسەد و هەروەها پاراستنی باسكێكی تیرۆری رێژیمی تاران لە ناوچەكە، سەدان هەزار كەس لە خەڵكی سووریەی بە ژن و منداڵ و پیر و لاوەوە كردۆتە قوربانی و بەشی زۆری ئەم وڵاتەی وێران كردوە.

ئەم رەوتی كوژرانی فەرماندەكانی سپا لە سوریە لە كاتێكدا زیاد دەكا كە رووسیە بە شێوەیەكی راستەوخۆ هاتۆتە نێو شەڕەكە و بە وتەی خۆی هێرشی ئاسمانی دەكاتە سەر هێزەكانی داعیش، بەڵام نیگەرانیی ئەوە هەیە كە ئەو هێرشە بۆسەر هەموو ئۆپۆزیسیۆنی سووری بێ. دیارە بەشداریی راستەوخۆی رووسیە لە كێشەی سووریە وەك دژكردەوەیەك و سیاسەتێكی نوێی رووسیە لە بەرامبەر مەیداندارییە ناكارامەد و زۆرجار هەڵەكانی رۆژئاوا و بە تایبەت ئەمریكا لە ناوچەكەدا دەتوانێ ببێتە هۆی گەرمتركردنی ئاگری شەڕ و ئاڵوگۆڕ لە هاوكێشەكاندا.

دیارە ئەو رەوتە بە رواڵەت بەرەی لایەنگرانی بەشار ئەسەد بەهێزتر دەكا و شانسی درێژكردنەوەی خۆڕاگریی بەشار ئەسەد بۆ ماوەیەكی دیكە زیاد دەكا، بەڵام بێگومان جگە لە وێرانتركردنی ئەم وڵاتە و كوژرانی ژمارەیەكی زیاتر لە خەڵكەكەی، تێچوو و هەزینە ماددی و ئینسانییەكانی ئێرانیش وەك یەكێك لە بەشدارانی ئەم شەڕە زیاد دەكا.

هاوكات لەگەڵ ئەم رووداوانە كوژرانی فەرماندەكانی سپای پاسداران دەتوانێ تاكتیكی نوێی ئۆپۆزیسیۆنی سووریە بێ كە لە بەرامبەر هەڕەشەكانی لایەنگرانی ئەسەددا هەوڵ دەدەن بە لێدانی فەرماندە و سەركردە سەربازییەكانی ئێران زەبری كاریگەرتر لەم بەرەیە بدەن و لەمپەر لە بەرامبەر ئەو هێرشەدا دروست بكەن كە بڕیارە بەڕێوەبچێ.

بە گشتی ئەوەی رژیمی ئاخوندی بە پێی سیاسەتە دەستدرێژیكارانەكانی و بە هێزێكی وەك سپای پاسداران كە بە تایبەتی بۆ بەڕێوەبردنی سیاسەتە چەوتەكانی رێژیم پەروەردە كراوە، بەڕێوەی دەبا، بەفیڕۆدانی سەروەت و سەرمایەی ماددی و مرۆیی ئێرانە لەپێناو راگرتنی دەسەڵاتی دیكتاتۆریی رێژیم و هەموو ئەو هێز و لایەن و رێژیمە سەرەڕۆیانەی لە بازنەی بەرژەوەندكانی رێژیمی تاراندان و، هەربۆیە كوژرانی پاسدار و فەرماندەكانی سپای پاسداران لە سووریە و لوبنان و فەلەستین و هەر شوێنێكی دیكەی جیهان و بەفیڕۆدانی میلۆنان دۆڵار لە سەروەت و سامانی وڵات باجێكە كە خەڵكی ئێران بۆ سیاسەتە هەڵەكانی رژیمی ئاخوندی دەیدەن.

 

ئەو بابەتە لە تێكۆشان ژمارە 287 وەرگیراوە
ڕێکه‌وت: 2015-10-25 16:57:01
به‌شی ( وتاری سیاسی )





دیمانه

سیاسی