له‌سه‌رهێل 92
دووشه‌مه‌‌ 3 خه‌زه‌ڵوه‌ر 2721
سازمانی خه‌باتی کوردستانی ئێران
هەواڵەكانی كوردستان، ئێران و جیهان 12ی بەفرانباری 1394

 

 

 

هونەرمەندێکی کورد خەڵكی مەریوان کۆچی دوایی کرد

 هونەرمەندێکی دەنگخۆشی کورد لە خانەی بەساڵاچووانی شاری سنە بە هۆی نەخۆشی شێرپەنجەکۆچی دوایی کرد. بەپێی هەواڵی هەواڵدەریی کوردپا، ڕۆژی هەینی ڕێکەوتی ١١بەفرانباری ١٣٩٤ی هەتاوی، یەکێک لە هونەرمەندانی کورد بە ناوی "بەختیار ڕەوشەن" ناسراوە بە "بەختیار مینە چەقۆ" خەڵکی گوندی "کۆڵان" سەر بە شاری مەریوان لە خانەی بە ساڵاچووانی شاری سنە ماڵئاوایی لە کۆڕی هونەرمەندان و لایەنگەرانی هونەر کرد.مامۆستا بەختیار لە ساڵی ١٣٣٠ی هەتاوی لە گوندی کۆڵانە سەر بە شاری مەریوان لە دایک بووە و لە سەرەتای شۆڕشی گەلانی ئێران، چەند ساڵێک دەبێتە پێشمەرگە و ئەرکی پیرۆزی پێشمەرگایەتی بەڕێوە دەبات. ئەو هونەرمەندە کوردە لە سەرەتای تەمەنی گەنجەیەتیدا بە هۆی ناکام بوون لە خۆشەویستیدا، هەتا کۆتایی تەمەنی ژیانی هاوبەشی پێک نەهێنا وهەروەها بە هۆی هەژاری و دەسکورتی کۆتاییەکانی تەمەنی لە خانەی بەساڵاچووانی شاری سنە تێپەڕ کرد.سەر لە ئێوارەی دوێنی، تەرمی ئەو هونەرمەندە کوردە لە ناو ئاپۆڕای خەڵکی شاری مەریوان و هونەرمەندان و لایەنگەرانی هونەر، لە شوێنی لە دایکبوونی لە گوندی کۆڵانەی بە خاک ئەسپێردرا.

 

 

 

 

 

 

 

 

چارەنووسی خوشك و براێكی دەستبەسەركراوی كورد ناروونە

لە چارەنووسی خوشك و براێكی دەستبەسەركراوی كورد تاكوو ئێستا هیچ هەواڵێك لە بەردەستدا نیە. بە پێی راپۆرتی هەواڵدەرییەكان، ئەم خوشك و برایە بە ناوەكانی ئەمجەد سلێمانی، نەقاش و تەراحی بۆكانی و خوشكەكەی سووسەن سلێمانی كە لە رۆژی یەكی بەفرانباری 1394، لە لایەن هێزە ئەمنییەتییەكانی بۆكانەوە دەست بەسەر كران تاكوو ئێستا هیچ زانیاریێك لەمەر هۆكاری گرتن و شوێنی راگیرانیان لە بەر دەستدا نیە. بە پێی ئەم راپۆرتە، ئەمجەد سلێمانی رۆژی یەكی بەفرانبار لە شوێنی كارەكەی دەستبەسەر كراوە كە دەوترێت لە لایەن ئیتلاعاتی سوپاوە دەستبەسەر كراوە. هەروەها خوشكەكەشی سووسەن، موهەندسی پترۆشیمی، دوای گەرانەوەی لە هەرێمی كوردستان دەستبەسەر كراوە. جێگەی باسە كە پێشتر و لە ساڵی 1390 ئەمجەد بۆ جارێكیتر دەستبەسەر كراوە كە دواتر بە دانانی بارمتە ئازاد كراوە.

 

 

 

 

 

 

 

 

 

بارینی به‌فر و ساردی هه‌وا بووه‌هۆی پچڕانی کاره‌بای شاری پیرانشار 

به‌ بۆنه‌ی به‌فر و کڕیوه‌ی توند و ساردی بێ وێنه‌ی هه‌وا کاره‌بای شاری سنووری پیرانشار له‌ باشووری ئازه‌ربایجانی ڕۆژئاوا له‌ ڕۆژی ڕابردوو (هه‌ینی/11ی به‌فرانبار) پچڕاوه‌.بە پێی راپۆرتی هەواڵدەرییەكان، به‌ڕێوه‌به‌ری گشتی به‌ڕیوه‌به‌ری قه‌یرانی ئازه‌ربایجانی ڕۆژئاوا بۆ هه‌واڵنێری ئیرنای وت: ساردی هه‌وا و بارینی قورسی به‌فر و کڕیوه‌ له‌م شاره‌ که‌ له‌ ڕۆژی چوارشه‌ممه‌/ 9ی به‌فرانبار ئاسمانی ئه‌م شاره‌ی گرتووه‌ته‌وه‌ و هێشتاکه‌ به‌رده‌وامه‌، بووه‌ته‌هۆی پچڕینی کاره‌بای ئه‌م شاره‌ له‌ دوانیوه‌ڕۆی ڕۆژی ڕابردوو (هه‌ینی/ 11ی به‌فرانبار). ئه‌میرعه‌بباس جه‌عفه‌ری به‌ ئاماژه‌ به‌وه‌ی که‌ دابه‌زینی پله‌ی گه‌رما له‌م ناوچه‌یه‌ بۆ 15 پله‌ ژێر سیفر دابه‌زیبوو، جه‌عفه‌ری زیادیشی کرد: پچڕینی کاره‌با بووته‌هۆی پچڕینی ئاوی شاری پیرانشار‌ که‌ به‌ جێگیرکردنی ژێنراتۆره‌ گه‌ڕاوه‌کان، ئاوی خواردنی له‌سه‌دا 60ی خه‌ڵکی ئه‌م شاره‌ دابین کراوه‌. ناوبراو به‌رزایی به‌فر له‌م شاره‌ی زیاتر له‌ 80 سانتی مه‌تر ڕاگه‌یاند و جه‌ختی کرد: وێرای ساردی زۆری هه‌وا کێشه‌یه‌ک بۆ گازی سروشتی ئه‌م شاره‌ دروست نه‌بووه‌.

 

 

 

 

 

 

 

 

مردنی 4 زیندانی سوننە مەزهەب لە زیندانی ناوەندیی زاهیدان

چوار هاووڵاتی به‌لووچ لە زیندانی زاهیدان بەهۆی نەخۆشیی و كه‌مته‌رخه‌میی به‌رپرسان بۆ به‌ڕێكردنیان بۆ نەخۆشخانەگیانیان لە دەستدا.بە پێی راپۆرتی هەواڵدەرییەكان، لە ماوەی حەوتووی ڕابردوودا، چوار زیندانی لە زیندانی ناوەندیی زاهیدان گیانیان لە دەستداوە، شوناسی ئەو 4 زیندانییە بە ناوەکانی "عەلام ڕەبانی براهووی تەمەن 40 ساڵ" کوڕی کەریم، "محەممەد ناروئی " فەرزاد ناروویی تەمەن 40 ساڵ و ئیقباڵ ناروئی  تەمەن 23 ساڵ" ڕاگەیەنراوە. کەمپینی چالاکانی به‌لووچ لەوبارەیەوە بڵاوی کردوەتەوە، دوای مردنی ئەو چوار زیندانییە، بۆ بڵاونەبوونەوەی ئەو هەواڵە لە نێو زیندانییەکانی دیکەدا، هاتووچۆکردن لە بەندی نێو زیندانی زاهیدان بۆ ماوەی چەند ڕۆژێک لەلایەن بەرپرسانی زیندانەوە قەدەغە کرابوو.

 

 

 

 

 

 

 

 

رێژەی كوژراوانی رژێمی ئاخوندی لە سووریە گەیشتە 114 كەس

پاسدارێكیتری رژێمی ئاخوندی كە بۆ سەركوتی خەڵكی ئازادیخوازی سووریە و پشتیوانی لە مانەوەی دەسەڵاتە دیكتاتۆرەكەی بەشارئەسەد رۆیشتبووە ئەو وڵاتە كوژرا. بە پێی راپۆرتی هەواڵدەرییەكان، تەلەفزیۆنی ئەلجەزیرە رۆژی هەینی 11ی بەفرانباری 1394، رایگەیاند كە پاسدارێكیتری رژێمی ئاخوندی لە تێكهەڵچوون لەگەڵ هێزە ئازادیخوازەكانی گەلی سووریە لە نزیك شاری حەلەب بە ناوی رەزا پیرمۆراد كوژراوە. بە پێی ئەم راپۆرتە، لە كاتی دەستپێكی هێرشە ئاسمانییەكانی رووسیە لەو وڵاتە و زیاد بوونی ناردنی پاسدار و بەكرێگیراوی رژێمی ئاخوندی بۆ سووریە رێژە كوژرانیان لەو وڵاتە زیادی كردووە. جێگەی باسە كە تاكوو ئێستا و بە پێی ئەو هەواڵانەی كە بڵاو بوونەتەوە رێژەی كوژراوانی رژێم گەیشتووەتە 114 كەس.

 

 

 

 

 

 

 

 

رژێمی ئاخوندی هەڕەشەی تووند لە عەرەبستان دەکات

دوای بڵاوبوونەوەی هەواڵی جێبەجێکردنی سزای لەسێدارەدان بەسەر 47 کەسدا لە سعودیە کە یەکێکیان شیخ نەمر ئەل نەمر کەسایەتی دیاری شیعەکانی سعودیە بوو ، وەزارەتی دەرەوەی رژێمی ئاخوندی ئێران رەخنەی تووندی لەوکارەی عەرەبستان گرت و رایەگەیاند:"ئەوانەی بەناوی پەیوەندی بە تیرۆرەوە سزادراون تەنیا رکابەرەکانی دەسەڵاتی شاهانەی سعودیەن و سعودیە لەبەر ئەو کارەی باجێکی سەخت دەدات". بە پێی راپۆرتی هەواڵدەرییەكان، حوسێن جابری ئەنساری وتەبێژی وەزارەتی دەرەوەی رژێمی ئاخوندی ئێران بە هەواڵدەری حکومەتی ئێرانی راگەیاندووە:"حکومەتی عەرەبستان خۆی هاوکاری تیرۆر و بزووتنەوەی تەکفیرییە سوننیەکان دەکات لەناوچەکەدا، لەکاتێکدا سزای مەرگ بەسەر ئەوانەدا دەسەپێنێت کە رەخنە لەو وڵاتە دەگرن". بە پێی ئەم راپۆرتە، رۆژی شەممە وەزارەتی ناوخۆی عەرەبستان هەواڵی جێبەجێکردنی سزای لەسێدارەی بەسەر 47 کەسدا راگەیاند کە یەکێک لەوان نەمر ئەلنەمر بوو، کە پێشتر لە خۆپیشاندانەکانی ساڵی 2011ی سعودیەدا بەشداریکردووە و یەکێک بووە لەوانەی بەردەوام رەخنەی لە بنەماڵەی شاهانەی سعودیە گرتووە. هاوکات ئەحمەد خاتەمی ئەندامی دەستەی سەرۆکایەتی ئەنجوومەنی شارەزایانی رێبەریی رژێمی ئاخوندی لەوبارەیەوە ئاماژەی بەوە کردووە" ئەو کارەی سعودیە تاوانێکی ئاشکرایە و خوێنی ئەلنەمر دەبێتە سڕینەوەی بنەماڵەی ئالسعود لە مێژوودا". 
ڕێکه‌وت: 2016-01-02 14:52:18
به‌شی ( هه‌واڵی کوردستان )





دیمانه

سیاسی