له‌سه‌رهێل 87
دووشه‌مه‌‌ 3 خه‌زه‌ڵوه‌ر 2721
سازمانی خه‌باتی کوردستانی ئێران
هەواڵەكانی كوردستان، ئێران و جیهان 17ی بەفرانباری 1394

 

 

بەرێوەچوونی چەندین كۆبوونەوەی نارەزایەتی لە شارەكانی كوردستان

رۆژی پێنجشەممە 17ی بەفرانباری 1394، چەندین كۆبوونەوەی نارەزایەتی لە شارەكانی سنە، قۆروە و كرماشان بەرێوە چوو. بە پێی راپۆرتی هەواڵدەرییەكان، كۆمەڵێك لە كارمەندان و كرێكارانی تەعاوەن رووستایی و شارەداری سنە لە نارەزایەتی بە پێنەدانی چەندین مانگ حەقدەستی دواكەوتوویان بۆ چەندەمین جار كۆبوونەوەی نارەزایەتییان وەرێخست. بە پێی ئەم راپۆرتە، كۆمەڵێك لە كرێكارانی قەراردادی كارگە بەرهەمهێنەرەكانی شاری قۆروە لە نارەزایەتی بە پێنەدانی مافەكانیان لە لایەن خاوەن كارەكانیانەوە لە بەرانبەر ئیدارەی كاری ئەو شارە دەستیان دایە نارەزایەتی نیشان دان. جێگەی باسە كە، كرێكارانی شیركەتی گازی كرماشان كە ماوەی سێ مانگە حەقدەستیان وەرنەگرتووە لە بەرانبەر شیركەت گازی كرماشان بە نیشانەی نارەزایەتی كۆبوونەوە و خوازیاری وەرگرتنی حەقدەستەكانیان بوون.

 

 

 

 

 

 

 

 

لە بنەماڵەیەکدا دوو کچ بوونە قوربانیی قەتڵی نامووسی

جارێکی دیکە شەڕ و ناکۆکی لە نێو بنەماڵەدا، بووە هۆی قەتڵی نامووسیی کچێک لە لایەن براکەیەوە. بەپێی هەواڵی هەواڵدەریی کوردپا، لە حەوتووی ڕابردوودا، لە یەکێک لە گەڕەکەکانی شاری سەردەشت سەر بە پارێزگای ئازەربایجانی ڕۆژئاوا، کچێک به ناوی "ئایشە ئیبراهیم پوور" بوو بە قوربانیی قەتڵی نامووسی.کوشتنی ئەو کچە بەهۆی کێشەی بنەماڵەیی و لە لایەن براکەیەوە بووە. "ئەو کچە دووهەمین قوربانیی "ژن کوژییە" لە بنەماڵەی "ئیبراهیم پوور" و ئەوان بە ڕەچەڵەک خەڵکی گوندی "مەلا شێخ"ی سەر بە بەشی ناوەندیی شاری سەردەشتن. ئەو ڕووداوە لەکاتێکدا ڕوویداوە کە ئایشە لەگەڵ براکەی تووشی کێشە و شەڕ دەبن و براکەی بە چەقۆ هێرشی کردووەتە سەر خوشکەکەی و کوشتوویەتی. هەر لەو ڕۆژەدا و لە شاری سەقز، کچێکی تەمەن ١٨ ساڵ، بە ناوی شیوا مەجیدی، لە هەوڵێکی خۆکوژی‏دا، کۆتایی بە ژیانی خۆی هێناوە. هەواڵی خۆکوژیی ئەو کچەش  بە هۆی کێشەی بنەماڵەییەوە بووە.

 

 

 

 

 

 

 

کرێکارێکی کورد لە ئەنباری سیڵۆ گیانی لەدەست دا

 کرێکارێکی کورد کە لە سیڵۆی نموونەی شاری مەهاباد دامەزرابوو، کەوتە ناو لوولەی ئەنبارەکە و خنکا. بەپێی هەواڵدەریی کوردپا، لە ڕووداوێکی کار لە سیڵۆی "مسرور"ی شاری مەهاباد، کریکارێکی کورد بە ناوی "سابیر. ب" تەمەن ٣٣ ساڵ، گیانی لەدەست دا. ناوبراو لە کاتی خاڵی کردنی گەنمدا، دەکەوێتە ناو لوولەی بەتاڵ کردنی گەنمی ئەنبارەکە و ئەو ڕاووداوە بووتە هۆی بڕینی هەناسەی و گیانی لەدەست دەدات.لەم رووداوەدا کرێکارێکی دیکەش بە تۆندی بریندار بووه. ئەو سیڵۆیە بڕی ٧٥ هەزار تەن گەنم دەگرێت و نزیکەی ٤٠ کرێکار تێیدا کار دەکەن. مردنی ئەو کرێکارەی سیڵۆ، ڕۆژی ڕابردوو، ١٦ی بەفرانبار، بە سێهەمین ڕووداوی کار لە کوردستانی ئێران لە ماوەی حەوتووی ڕابردوودا، دەژمێردرێت. پێشتریش کرێکارێکی کانزای بۆکان و کرێکارێکی شوێنی داڵدەدانی ئاژەڵەکانی زاگرۆس لە شاری کرماشان، بە هۆی ڕووداوی کارەوە گیانیان لەدەست دابوو.لە ساڵی ١٣٩٣ی هەتاوی‏دا، ١٩٩٤ کەس بە هۆی ڕووداوی کارەوە گیانیان لەدەست داوە، ئەو ژمارەیە بە بەراورد لەگەڵ ساڵی پێشوو کە ١٧٩٤ قوربانی بووە، ١١% بەرزبوونەوەی بە خۆیەوە بینیوە.

 

 

 

 

 

 

 

لە ناوچەی هەورامان گۆڕێکی سێ هەزار ساڵە دۆزرایەوە

لە گوندی "ڕەوار"ی سەر بە شاری سەوڵاوا، گۆڕێک دۆزراوەتەوە کە ئێسک و پرووسکی هەشت کەسی تێدا بووە و مێژووەکەی دەگەڕێتەوە بۆ سێ هەزار ساڵ پێش ئێستا.بە پێی راپۆرتی هەواڵدەرییەكان، باس لە دۆزینەوەی گۆڕێک لە نزیک گوندی ڕەوار سەر بە شاری سەوڵاوا دەکەن کە تەمەنی دەگەڕێتەوە بۆ سێ هەزار ساڵ پێش لە ئێستا و هەشت ئێسکە پەیکەری تێدابووە کە دەگەڕێنەوە بۆ دەورانی چاخی ئاسن. بە وتەی شوێنەوارناسان، لە ددانەکانی یەکێک لەو ٨ کەسەدا کە تەمەنی لە نێوان ١٦ هەتا ٢٠ ساڵان بووە، بەپیی بەڵگەکان نەخۆشینی "هایپوپلازی" کە تایبەت بە مینای ددانە، بەدی کراوە. یەکێک لە هۆکارە ژینگەییەکان کە کارێگەریی هەیە لەسەر سەرهەڵدانی ئەو نەخۆشینە، کەمبوونی دانەوێڵە لەسیستمی خۆراکدایە کە دەبێتە هۆی کەمبوونی ئامینۆئەسیدی چەوری پێویست، لە لەشی مرۆڤدا. بە وتەی کارناسانی دێرینەناسی، لەو گۆڕەدا بەشێکی زۆر ددانی مرۆڤ دۆزراوەتەوە کە بەپێی لێکۆڵینەوەکان سەبارەت بە تەندروستیی جیسمی و بارودۆخی خۆراک، خەڵکانی چاخی ئاسنی ناوچەی هەورامان نیشان دەدات. جێگەی باسە كە، لە چەند حەوتووی ڕابردووشدا، شوێنەوارناسان لە یەکێک لە ئەشکەوتەکانی دەورووبەری ڕووباری سیروان، چەند ئێسکێکی مرۆڤیان دۆزییەوە کە مێژووەکەی دەگەڕێتەوە بۆ ٧هەزار ساڵ بەر لە ئێستا.

 

 

 

 

 

 

 

 

لە سێدارەدانی 4 زیندانی لە ئەردەبێل و هەمەدان

سەر لە بەیانی ئەمرۆ پێنجشەممە 17ی بەفرانباری 1394، لانیكەم چوار زیندانی لە زیندانەكانی ئەردەبێل و هەمەدان لە لایەن رژێمی ئاخوندی ئێرانەوە لە سێدارە دراون. بە پێی راپۆرتی هەواڵدەرییەكان، سەر لە بەیانی ئەمرۆ لە زیندانی ناوەندی ئەردەبێل سێ زیندانی بە تۆمەتی مادەی هۆشبەر لە زیندانی ناوەندی ئەردەبێل لە سێدارە دران. بە پێی ئەم راپۆرتە، زیندانیێكیتر لە زیندانی هەمەدان لە لایەن رژێمی ئاخوندییەوە لە سێدارە دراوە. جێگەی باسە كە راپۆرتەكان باس لەوە دەكەن كە زیاتر لە یەك كەس لە زیندانی هەمەدان لە سێدارە دراوە كە نەتواندراوە پشتراست بكرێتەوە.

 

 

 

 

 

 

 

 

دەستبەسەر كردنی گرووپێكی تیرۆریستی سەر بە رژێمی ئاخوندی

گرووپێكی تیرۆریستی سەر بە رژێمی ئاخوندی لە بەحرەین دەستبەسەر كراون. بە پێی راپۆرتی هەواڵدەرییەكان، تەلەفزیۆنی ئەلعەرەبییە رۆژی چوارشەممە 16ی بەفرانباری 1394، رایگەیاند كە، بەرپرسانی ئەمنییەتی بەحرەین بڵاویان كردووەتەوە كە گرووپێكی تیرۆریستییان لەو وڵاتە دەستبەسەر كردووە كە بۆ بەرێوەبردنی چەندین عەمەلیاتی تیرۆریستی راهێنانیان پێ كراوە و بەرپرسانی ئەمنییەتی بەحرەین رایانگەیاندووە كە ئەو گرووپە تیرۆریستیە لەگەڵ سوپای پاسدارانی رژێمی ئاخوندی و حیزبۆڵای لۆبنان پەیوەندییان هەبووە. بە پێی ئەم راپۆرتە، یەكێك لە ئەندامانی ئەم گرووپە تیرۆریستیە چەند ساڵ لەمەوبەر بۆ وەرگرتنی پشتیوانی ماڵی و نیزامی بە مەبەستی بەرێوەبردنی عەمەڵیاتی تیرۆریستی لە بەحرەین سەردانی ئێرانی كردووە.

 

 

 

 

 

 

 

 

یەك لەسەر سێی دانیشتووانی ئێران كرێ نشینن

كارناسێكی نیشتەجێ بوون رایگەیاند كە یەك لە سەر سێی دانیشتووانی ئێران كرێ نشینن. بە پێی راپۆرتی هەواڵدەرییەكان، كارناسێكی نیشتەجێ بوون بە ناوی ئیرج رەهبەر رۆژی چوارشەممە 16ی بەفرانباری 1394، رایگەیاند كە، یەك لەسەر سێی دانیشتووانی ئێران كرێ نشینن. بە پێی ئەم راپۆرتە، ناوبراوو وتی، ئێران بە كەمبوونی 1.5 میلیۆن شوێنی نیشتەجێ بوون بەرەو روو بووەتەوە كە لە ماوەی 8 ساڵی رابردوو ئەم پێویستییە دابین نەكراوە. جێگەی باسە كە، ئەم كارناسەی رژێم وتی، بە پێی ئەو بەراوردەی كە لە ساڵی 1386 كراوە 16 میلیۆن شوێنی نیشتە جێ بوون لە ئێران بوونیان هەبوو لە كاتێكدا رێژەی بنەماڵەی ئێرانییەكان 17.5 میلیۆن بوو و لە ماوەی ئەم ساڵانەی دواییدا ئەم پێویستییە دابین نەكراوە.

 

 

 

 

 

 

 

 

واده‌ی‌ ده‌ستبه‌رداربوونی‌ ئه‌سه‌د له‌ ده‌سه‌ڵات دیاری‌ ده‌كرێت

دەوڵەتی ‌وەمریكا دیاریكردووە كە رژێمی بەشارئەسەد لە ساڵی 2017 كۆتایی پێ دێت.به‌پێی‌ به‌ڵگه‌نامه‌یه‌كی‌ دەوڵەتی‌ باراك ئۆباما كه‌ ئاژانسی‌ ئه‌سۆشه‌یتد پرێس بڵاویكردۆته‌وه‌، ئه‌و واده‌یه‌ی‌ كه‌ دانراوه‌ بۆ ئاگاداربوونی‌ ئه‌و به‌رپرسه‌ ئه‌مریكیانه‌یه‌ كه‌ سه‌رپه‌رشتی‌ دۆسێی‌ سوریا ده‌كه‌ن، به‌پێی‌ ئه‌و واده‌یه‌ش بێت، له‌كاتی‌ ده‌ستبه‌رداربوونی‌ ئه‌سه‌د و دارو ده‌سته‌كه‌ی‌ له‌ ده‌سه‌ڵات، دوو مانگ به‌سه‌ر كۆتایی‌ هاتنی‌ ویلایه‌تی‌ باراك ئۆبامادا تێپه‌ڕده‌بێت له‌كاتێكدا له‌ساڵی‌ 2012 دا ئۆباما داوای‌ كردبوو ئه‌سه‌د ده‌ستبه‌رداری‌ پۆسته‌كه‌ی‌ بێت. له‌لایه‌ن خۆشیه‌وه‌ جان كێرب وته‌بێژی‌ وه‌زاره‌تی‌ ده‌ره‌وه‌ی‌ ئه‌مریكا رایگه‌یاند، ئه‌و به‌ڵگه‌نامه‌یه‌ ته‌نها بیركردنه‌وه‌ی‌ ناوخۆییه‌و بۆ به‌رچاو روونی‌ جان كێری‌ و دیپلۆماته‌ ئه‌مریكییه‌كانه‌ كه‌ كار له‌سه‌ر دۆسێی‌ سوریا ده‌كه‌ن تا له‌سه‌ر ئه‌و بنه‌مایه‌ مامه‌ڵه‌ له‌گه‌ڵ دۆسێی‌ ئه‌و وڵاته‌دا بكه‌ن، ئه‌گه‌ر نا به‌ڵگه‌نامه‌كه‌ به‌ وته‌ی‌ كێرب‌ (هه‌ڵوێستێكی‌ فه‌رمی‌ نییه‌). به‌ڵام به‌پێی‌ شیكردنه‌وه‌كانی‌ ئه‌سۆشه‌یتد پرێس، ئاماژه‌كانی‌ نێو به‌ڵگه‌نامه‌كه‌ هاوشانی‌ بنه‌مای‌ ئه‌و پلانه‌یه‌ كه‌ رێكخراوی‌ نه‌ته‌وه‌یه‌كگرتووه‌كان بۆ ئاسایی‌ كردنه‌وه‌ی‌ بارودۆخی‌ سوریا دایڕشتووه‌.
ڕێکه‌وت: 2016-01-07 19:26:24
به‌شی ( هه‌واڵی کوردستان )





دیمانه

سیاسی