له‌سه‌رهێل 109
دووشه‌مه‌‌ 27 گوڵان 2721
سازمانی خه‌باتی کوردستانی ئێران
هەواڵەكانی كوردستان، ئێران و جیهان 24ی بەفرانباری 1394

گواستنەوەی زیندانیێكی سیاسی كورد بۆ ژوری تاكەكەسی

زیندانیێكی سیاسی كورد لە زیندانی ورمێ بۆ ژوری تاكەكەسی ئەو زیندانە راگوێزرا.بە پێی راپۆرتی هەواڵدەرییەكان، مۆستەفا سەبزی زیندانی سیاسی كورد لە زیندانی ورمێ، كە لە نارەزایەتی بە جیانەكردنەوەی زیندانیان مانی لە خواردن گراتبوو ئەمرۆ چوارشەممە 23ی بەفرانباری 1394، بۆ ژوری تاكەكەسی زیندانی ورمێ گوازرایەوە. بە پێی ئەم راپۆرتە، موستەفا سەبزی، زیندانی سیاسی كورد لە مانگی جۆزەردانی 1393 لە لایەن هێزە ئەمنییەتییەكانەوە دەستبەسەر كرا و دواتر بە تۆمەتی ئەندامیەتی لە یەكێك لە حیزبە كوردییەكان بە 15 ساڵ زیندان مەحكووم كرا.

 

 

 

 

 

 

 

 

هونه‌رمه‌ند کەریم کابان کۆچی دوایی کرد 

بەرەبەیانی ئەمڕۆ پێنجشه‌ممه‌ 24 به‌فرانباری 1394 هونەرمەند کەریم کابان لە یەکێک لە نەخۆشخانەکانی شاری سلێمانی لە تەمەنی (89) ساڵیدا کۆچیی دوایی کرد. بە پێی راپۆرتی هەواڵدەرییەكان، کاروان شێخ عوسمان، کەسی نزیک لە بنەماڵەی کەریم کابان، رایگەیاند: بەرەبەیانی ئەمڕۆ کەریم کابان لە یەکێک لە نەخۆشخانەکانی شاری سلێمانی کۆچیی دوایی کردوە. کەریم کابان ناوی تەواوەتی (عەبدولکەریم جەلال مەحمود عەزیز کابان)ە لە ساڵی (١٩٢٧) لە گەڕەکی شێخانی شاری سلێمانی لەدایکبووە، دواتر قۆناخی سەرەتایی لە قوتابخانەی فەیسەڵ تەواو کردووە، لە ساڵی (١٩٤١) یەکەمین گۆرانی وتووە، لەساڵی (١٩٤٥)دا لە بەغدا دەبێتە بەڕێوەبەری بەشی کوردی لەرادیۆی بەغدا، هەر لەو ساڵەشدا یەکەم بەرھەمی خۆی بڵاوکردەوە کەبریتی بوو لە (٨) گۆرانی.

 

 

 

 

 

 

 

 

کتێبی سڵ و ترس لە سەقز بە چاپی دووهەم گەیشت 

کتێبی "وحشت در سقز" (سڵ و ترس لە سەقز) لە نووسینی خوالێخۆشبوو حاجی مستەفا تەیمورزادە، نووسەری خەڵکی شاری سەقز بە چاپی دووهەم گەیشت. بە پێی راپۆرتی هەواڵدەرییەكان، ئەم کتێبە بیرەوەری و ڕووداوەکانی سەردەمی ژیانی نووسەر لە پەیوەندی لە گەڵ ڕووداو و گۆڕانکاریەکانی سەقز و کوردستان لە مەودای نێوان شەڕی جیهانی یەکەم تا زاڵ بوونی دەسەڵاتی حکومەتی ناوەندی لە خۆ دەگرێت. حاجی مستەفا تەیمورزادە نووسەری ئەم کتێبە لە بازاڕیە خۆشناو و خوێنەوارەکانی شاری سەقز و کەسایەتیەکی بە ناوبانگی فەرهەنگی و جێگەی متمانە لە ناوچەکە بووە و لە ساڵی ١٣٧٠ی هەتاوی لە تەمەنی ١٠٤ ساڵیدا کۆچی دوایی کردوە. کتێبی "سڵ و ترس لە سەقز" یەکێک لە باشترین ڕۆژمێر و دەستنووسەکانی مێژووی کوردستان لە سەردەمی شەڕی جیهانی یەکەمە، ئەو کاتەی کە کوردستان لە لایەن هێزە بیانییەکانەوە (بەریتانیا، ڕووسیا و عوسمانی) داگیر کرابوو و زۆربەی شەڕ و ڕووداوەکان لەم ناوچە ڕوویان دا و بەو هۆیەوە خەڵک زەرەر و زیانێکی زۆریان بەرکەوت. ئەم کتێبە بۆ یەکەم جار لە ساڵی ١٣٣٢ لە ژێر ناوی "سامی سەقز" بڵاوکرایەوە. کتێبەکە پیویستی بە پێداچوونەوەیەکی جیدی بوو کە ئەم کارە بە هەوڵی دوکتۆر شەهباز موحسێنی مامۆستا و نووسەری ناسراوەی سەقزی ئەنجام درا و بە شێوەیەکی نوێ لە ساڵی ١٣٨٠ داڕێژرایەوە جێگەی ئاماژەیە کە ئەم بەرهەمە بە قەڵەمی خوالێخۆشبوو، نافع مەزهەر، بۆ سەر زمانی کوردی وەرگێڕدراوەتەوە و لە ژێر ناوی "سڵ و ترسی سەقز" بڵاو کراوەتەوە.

 

 

 

 

 

 

 

 

لە شاری مەریوان ڕێز لە هونەرمەندی کورد عەینەدین گیرا

بەشێک لە چالاکانی مەدەنی و فەرهەنگیی شاری مەریوان، ڕێزیان لە پێگەی هونەریی هونەرمەندی گەورەی کورد، مامۆستا "عەینەدین ئەلیاسی " گرت. بەپێی هەواڵی هەواڵدەریی کوردپا، ڕۆژی چوارشەممە ڕێکەوتی ٢٣ی بەفرانباری ١٣٩٤ی هەتاوی، بەشێک لە چالاکانی مەدەنی و فەرهەنگیی شاری مەریوان، دوو خەڵاتیان بە نیشانەی ڕێزدانان، بە هونەرمەندی گەورەی کورد مامۆستا "عەینەدین ئەلیاسی" پێشکەش کرد. ئەو دوو خەڵاتە لە لایەن ئەنجومەنی موسیقا و کۆمیسیونی فەرهەنگیی شوورای شاری مەریوانەوە، پێشکەش بەو هەنەرمەندە کوردە کرا. مامۆستا عەینەدین وێڕای دەستخۆشی لە چالاکانی مەدەنیی شاری مەریوان، هیوای خواست ئەو جۆرە بەرنامانە درێژەی هەبێ و خەڵک، بە تایبەتی توێژی فەرهەنگیی کۆمەڵگا، هەتا هونەرمەندان لە ژیاندا ماوەن، ڕێزیان لێ‏ بگرن.مامۆستا عەینەدین لە کۆتایی وتەکانیدا ڕاگەیاند؛ ئەو ئامادەیە لە داهاتوودا، لەگەڵ توێژی فەرهەنگیی شاری مەریوان، لە ڕێوڕەسمی ڕێزگرتن لە هونەرمەنداندا بەشدار بێت و هەروەها پێشنیاری کرد؛ لە ساڵدا ڕۆژێک وەکوو ڕۆژی ڕێزگرتن لە هونەرمەندانی کورد دیاری بکرێت.

 

 

 

 

 

 

 

 

پەسەندكردنی تەرحی كەمكردنەوەی دەسەڵاتی ئۆباما بۆ لابردنی گەمارۆكان

مەجلیسی نوێنەرانی ئەمریکا گەڵاڵە

یەکی پەسند کردووە کە بەپێی ئەو گەڵاڵەیە، زیاتر بەسەر بەرجام‌دا چاوەدێری دەکات. بە پێی راپۆرتی هەواڵدەرییەكان، ڕۆژی چوارشەممە ڕێکەوتی ٢٣ی بەفرانباری ١٣٩٤ی هەتاوی، کۆنگرەی ئەمریکا یاسایەکی پەسند کرد کە بەپێی ئەو یاسایە، باراک ئۆباما سەرکۆماری ئەمریکا ناتوانێت بەئاسانی گەمارۆ ئابوورییەکانی سەر ئێران لابەرێت و بەربەست بۆ ئۆباما دروست دەکات. بەپێی ئەو گەڵاڵەیە، ئەو کەس و دامەزراوانەی کە هاوکاریی بەرنامەی مووشەکە بالستیکەکان و هەوڵە تیرۆریستییەکان دەکەن، گەمارۆی ئابوورییان لەسەر لانابردرێت. هەواڵدەریی "ڕۆیتێرز" بڵاوی کردەوە، یاسای هەڵوەشانەوەی ڕێککەوتنی ناوکی لەگەڵ ئێران، لە کۆنگرەدا بە ١٩٢ دەنگی ئەرێنی لەبەرانبەر ١٠٦ دەنگی نەرێنی‌دا، پەسند کرا. ئەو یاسایە لە کاتێکدا پەسند دەکرێت کە پێشتر کۆشکی سپی ڕایگەیاندبوو؛ ئەگەر وەها یاسایەک پەسند بکرێت وێتۆی دەکات.

 

 

 

 

 

 

 

 

33 لەسەدی خەڵكی ئێران لە ژێر هێڵی هەژاریەوەن

سەرۆكی ناوەندی لێكۆڵینەوەی مەجلیسی رژێم لە نوێترین وتەیخۆیدا هێڵی هەژاری بە 2 میلیۆن و 300 هەزار تمەن ناو لێ برد. بە پێی راپۆرتی هەواڵدەرییەكان، هەژاری لە ئێران ساڵ بە ساڵ كەسانی زیاتر لە خۆ دەگرێت و لە ساڵی 1384 بە دواوە رێژەی هەژاری لە ئێران بە شێوەی سەرسوورهێنەر زیادی كردووە. بە پێی ئەم راپۆرتە، بە لە بەر چاو گرتنی رێژەی 77 میلیۆن كەسی خەڵكی ئێران لە كۆتایی ساڵی 93، دەگەینە ئەم كۆبەندییە كە زیاتر لە 30 میلیۆن كەس لە ئێران لە ژێر هێڵی هەژاریەوەن. جێگەی باسە كە كازم جەلالی بە ئاماژە بە حەقدەستی كرێكاران لە ساڵی 94،( 700) هەزار تمەن، وتی، هێڵی هەژاری یانێ حەقدەستی 2 میلیۆن و 300 هەزار تمەن و بە حەقدەستی ئێستا ئەگەری ژیان زۆر سەختە.

 

 

 

 

 

 

 

 

 

شەش تەقینەوە لە ئەندۆنزی روویاندا

شەش تەقینەوە لە جاكارتا پایتەختی ئەندۆنزی سەر لە بەیانی ئەمرۆ روویاندا. بە پێی راپۆرتی هەواڵدەرییەكان، میدیاكانی ئەو وڵاتە بڵاویانكردەوە، تەقینەوەكان لە سەنتەری شاری جاكارتای پایتەخت ئەنجامدراون، كە بەهۆیانەوە كوژراو و بریندار هەن. بەپێی زانیارییە سەرەتاییەكان لە تەقینەوەكاندا چوار كەس كوژراون و كە پۆلیسیان تێدایە. بەگوتەی پۆلیس 14 چەكدار بەشداریان لە تەقینەوەكاندا كردووە.بەگوێرەی زانیارییە سەرەتاییە، تەقینەوەکان سەنتەری بازرگانی جاکارتا و نزیک نووسینگەی نەتەوە یەکگرتووەکانیان  کردووەتە ئامانج. لە تەقینەوەكاندا خۆكوژ هەبووە، بەڵام نازانرێت هەموویان خۆكوژی بوو یان نا، بەڵام بەگوێرەی زانیارییەكان لانی كەم یەكێك لە تەقینەوەكان خۆكوژی بووە.
ڕێکه‌وت: 2016-01-14 16:13:48
به‌شی ( هه‌واڵی کوردستان )





دیمانه

سیاسی