له‌سه‌رهێل 73
شه‌ممه‌ 27 خه‌رمانان 2721
سازمانی خه‌باتی کوردستانی ئێران
شــــەری زێــــریـنگەری یــان رووبــــەرووبـــــوونـــەوەی جــــیددی بـاڵەكــانی رژیم

بەو ئەگەرە كە ئەگەر دەوڵەتی رۆحانی سەركەوتوو بێ خامنەیی و سپاش لاواز بكات هەمدیسان پێكهاتەی گەندەڵ و دژە مرۆڤانەی رژیمی ئاخوندی ناتوانێ‌ لەگەڵ خەڵكی تێگەیشتوو و كۆمەڵگای جیهانی سازان بكات، وێرای ئەوەش قەیرانی ئابووری كۆمەڵایەتی و ژینگەیی بەو ساكارییانە چارەسەر نابن و خەڵكی ئێران ئیتر ئامادەی قبوڵ كردنی ئەو پەڵە شەرمەزارییە لەسەر چارەنووسی خۆیان و وەلاتەكەیان نابن. 

رەوتی رەفسەنجانی ـ رۆحانی دەیانهەوێ‌ بە پشتیوانی رۆژئاوا، سیاسەتی دەورانی خاتەمی سەرلەنوێ‌ بەرێوە ببەن. هەروەك ساڵی 2003 كە رژیم ئیمتیازی زۆر سەرنج راكێشی ئابووری و تەكەنەلۆژی و زانستی بە ئورووپا و ئەمریكا لە راست راگرتنی پالاوتەكردنی ئۆرانیۆم و چاكسازیی لە سیاسەتی ناوچەیی وەرگرت.  ئێستا هیوای دەوڵەتی رۆحانیش بەستراوەتەوە بەو خاڵە كە بە ووتووێژی راستەوخۆ لەگەڵ ئەمریكا و دروشمی دیپلۆماتیك و پێداگری لەسەر گەشەی ئابووری بەرنامەی خۆی دەباتە پێشەوە. ئەندامانی دەوڵەتی رۆحانی ـ رەفسەنجانی دەزانن كە گەشەی ئابووری بە بێ گەشەی سیاسی بوونی نییە، واتە وەلاتێك كە بە قورسی تێكەڵاو بە شەرێكی نیزامیە لەناوچەكە و لە ژێر باری تەحریم دایە و بە بوونی سپاێك كە شارەزاییان لە بەرێوەبەری وەلات و سیاسەتی نوێی نێودەوڵەتی و ئابووری جیهانی نییە، بەڵام لەسەرووی دەسەڵاتەوەن، وەلات ناتواندرێ‌ بگەێندرێتە دامەزراوەیی سیاسی و پێش كەوتنی ئابووری. دەوڵەتی رۆحانی بەو ئاكامە گەیشتووە كە دەبێ ئەمریكا لە ئێران سەرمایە دابنێ‌، چوونكە لە ماوەی 36 ساڵی رابردوو چین و روسیا نە لە ئێران سەرمایەیان داناوە و نە بۆ ئابووری وەڵات جگە لە زەربە لێدان كارێكی تریان كردووە. وەرگرتنی دۆلار لە ئێران و پێدانی كەل و پەلی بی نرخ، روسیا و چینی رازی و ئابووری ئێرانیشی تێكرماندووە. ئێستاش لە دوای 36 ساڵ وێزگەی بووشەهر بە یارمەتی روسیا  نەكەوتۆتە كار. دەوڵ‌تی رۆحانی كوێر نییە دەبینێ‌ تەنیا رێگەی مانەوەی رژیم پەنابردن بۆ رۆژئاوایە تا لە باج پێدانە قورس و بێ كۆتاییەكان بە روسیا و چین رزگارییان ببێ.

 بەو حاڵەش رەوتی روحانی  لەسەر فریوكاریی و سیاسەت بازییەكانی لەگەڵ باڵی بەرانبەر بەردەوامە. جێگەی باسە كە هەر دوو باڵی رژیم لە ئاخوند و پاسدار ستیان پێیە لە دژی یەك.  واتە بە جێگەی ئیمتیازە لە ژمارنەهاتووەكان و كرینە میلاردییەكان كە لە لایەن رەوتی خامنەیی بە روسیا و چین دراوە، ئێستا باڵی رەفسەنجانی هەر ئەو ئیمتبازانە دەبەخشن بە ئەمریكا و یەكێتی ئورووپا و بە دانووستانلەگەڵ و ئەمریكا بانگهێشتی شیركەتەكانی ئەمریكایی بۆ چالاكی ئابووری لە ناوخۆ و هەوڵ دان بۆ چارەسەری قەیرانی سوریا و یەمەن لە رێگەی ووتووێژ لەگەڵ وەڵاتانی ناوچەكە بەردەوامن. لەو لاشەوە سیاسەتە رووخێنەرەكانی سپا و خامنەیی وەك كرینی چەك لە روسیا و  یارمەتی نیزامی و مادی بە بەشار ئەسەد، حوسیەكان و حەشدی شەعبی و حیزبوڵلای لوبنانیش بەردەوامە. 

سیاسەتی یەك بان و دوهەوای رژیم كە تا ئەو كات و ساتەش هەموو باڵەكانی ناوخۆیی لەسەری رێككەوتوون ئێستا گەیشتۆتە قۆناغێك  كە درێژە پێدانی سەرجەم بوونی رژیم دەخاتە ژێر پرسیار و خودی وەلی وەقیح دەبێ خۆی یەكلایی بكاتەوە كە دەیهەوێ‌ لەگەڵ ئیسلاح تەلەبەكان و رەفسەنجانی رژیم بپارێزێ‌ یان خود سپا و توندرەوەكان كە خۆی پشتیوانی ئەوان بووە برواتە ناو قوڵایی شەرێكی ناوچەیی. خامنەیی دەزانێ‌ هاوكاریی و هاورێی لەگەڵ سپا چیتر بە قازانجی نابێ، بەڵام لە رێگەی سیاسەتی لە ناڵ و لە بزمار لە پەیامە تەلەویزیۆنەكان تاریفی سپا دەكات و پێیان هەڵدەڵێ و بە شاراوەیش  لە بەرێوەبردنی رێكەوتننامەی ناوكەیی یارمەتی رۆحانی و زەریف دەدات و تەنانەت لە بابەتی سوریاش لەگەڵیانە. ئەگەر خامنەیی بیهەوێ‌ لەگەڵ رەوتی رەفسەنجانی پرۆژەی رۆژئاوا كە هاتنی ئێرانە بۆ ناو سیستەمی سەرمایەداری رۆژئاوا و چاكسازیی لەسیاسەتەكانی ناوچەیە بەرێوە ببات، ئەوە بە مانای رووبەرووبوونەوەی جیددی ناوبراو لەگەڵ سپایە و ترس یان موژدەی ئەوە هەیە كە سپا لە كۆی هێندێ: كردەوەی چاروەروانی نەكراو رووداو و پێشهاتەكان بە قازانجی خۆی بباتە پێش و  پێش بە كراەكانی پێوەندیدار بە بەرجام بگرێ‌. دروست كردنی كێشەی جیددی بۆ بەرجام لە لایەن سپای پاسداران بە مانای ئەوەیە كە یەكەم گەڕانەوەی تەحریمەكانی قبووڵ كردووە و دووهەم دەبێ چاوەروانی هێرشی نیزامی سیهەم دەبێ  بەرەوپیری توندبوونی راپەرینەكانی سەرانسەری خەڵكی ئێران دژی رژیم بێ. 

رۆژئاوا و بە تایبەتی دیموكراتەكانی ئورووپا و ئەمریكا دەیانهەوێ‌ دەوڵەتی روحانی رەفسەنجانی بە هێز بكەن تا بەخت بگەرێتەوە بۆ دەوڵەتی روحانی و سپا بەرەو لاوازیی بچێت، لە بەرانبەریشدا كۆماریخوازەكان نایانهەوێ‌ دووبارە و چەندبارە باوەر بە سیاسەتە پڕ لە چەواشەكارییەكان و یەك یان و دووهەوای رژیم بكەن و لەسەر ئەو باوەرن كە درەنگ یان زوو دەبێ كۆتایی بەو رژیمە بهێندرێ‌. 

رژیم ئێستا بۆ مانەوە و درێژە دان بە ژیانی سیاسی خۆی پێویستی بە چاكسازی هەیە بۆ دەرباز بوون لەو گێژاو و قوڕاوەی تێی كەوتووە. بەڵام لەگەڵ ئەوەشدا كارێكی یەكجار دژوار دەبێ چوونكە متمانە بەو رژیمە لە لای كۆمەڵگای جیهانی و خەڵكی ناوخۆی ئێران بە تەواوی وەرگیراوەتەوە. 

هەڵبەت سپا لە بەرانبەر نیەتی روحانی و باڵی رەفسەنجانی  بێكار دانەنیشتووە، بەڵكو  بە هێنانەناوەوەی روسیا بۆ ناو شەری سوریا و ناردنی هێزی زیاتر بۆ مانەوەی بەشار ئەسەد ، شەری خۆی لەگەڵ عەرەبەكانی سووننی ناوچەكە خێرایی پێداوە و لە لایێكی ترەوە بە تاقیكردنەوەی مووشەكی دوورهاوێژ كە پێچەوانەی رێكەوتننامەكانی شۆرای ئەمنیەتە لە سەر هەوڵەكانی بەردەوامە و لەناوخۆشدا بە شانۆی مانۆری نیزامی و پیشاندانی هێزی مووشەكی و هاوكات هەرەشە كردن و دەستبەسەر كردنی نزیكانی رۆحانی بەربەرەكانێ‌ لەگەڵ رەوتی بەرانبەر درێژّە پێدەدا. سپا بە باشی دەزانێ‌ كە بە بەرێوەبردنی هەموو بەرجام رۆژئاوا و رەوتی رەفسەنجانی بە دوای برینەوەی دەستی سپا و خامنەیی لە وەلاتە و جێگرتنەوی ئەرتەش و ئیسلاح تەلەبان لە ناوخۆ و پێدانی كەرتی ئابووری بە شیركەتەكانی دەرەوەیی لە بەرنامەیان دایە. 

 وەلاخستن و دزییە چەند هەزار میلیاردییەكان  لە دامەزراوە و بانكەكان لە لایەن سپای پاسداران و گەندەڵ و باج و جینایەت لە سیستەمی ئیداری و ئابووری، قاچاخی مادەی هۆشبەر و ناردنی ترۆریسم لە لایەن سپا كاتێك بە وردەكارییەوە ئاشكرا و دەبیتە قەیرانی مردن بۆیان كە هێزەكەیان بەرەو لاوازیی بچێت. 

دەست بەسەرداگرتنی سەرجەم شیركەتەكانی هەناردە و هێنانەژوورەوە و بەرهەم هێنان و ئاڵوگۆری پووڵی دەرەكی و تیجاریی و سەرچاوە نەتەوەییەكان و بانكەكان و سەرچاوەكانی نەوت و گاز و موخابەرات و دابین كردنی كۆمەلایەتی و ... هتد لە وەلاتدا لە لایەن سپای پاسداران كارێكی زۆر دژوار نەبووە بەڵام هێنانەدەرەوەی ئەو هێزانە كارێكی هەروا سادە و ساكار نابێ و بە سانایی ئامادە نابن ئەو گشتە هێز و سەرمایە و پێگەی سیاسی و ئابووری بدەنە دەست رەوتی بەرانبەریان، هەر بۆیەشە ئەو شانۆگەری مووشەكی و مانۆر و شەری مان و نەمان لە سوریا لەگەڵ دبەرانی ئەسەد و ... هەر لەو پێناوەدایە كە سپا دەیهەوێ‌ دۆخ و پێگەی خۆی بپارێزێ‌. 

دەبێ بزانین رووسیا كە سپا هەموو هێلكەكانی خستۆتە ناو سەوەتەكەی و دڵی بە هێزی ئاسمانیەكەی خۆش كردووە، هەر ئەو وەلاتەیە كە ژێر بریارنامەكانی شۆرای ئەمنیەتی واژوو كردووە كە بە پێی مەنشوری حەوتی رێكخراوی نەتەوە یەكگرتووەكان رێگە بە رووسیا و چین و ئەمیركا و ئینگلیس و فەرانسە دەدرێ‌ هەر كاتێك ئێران لە بریارنامەكانی لایدا ئەوە هێرشی نیزامی بكەنە سەر. هێشتاش مووشەكەكانی ئێس 300 كە تەنانەت گەیشتووەتە دەست  ئەردەنیش تەحویلی رژیمی ئێران نەدراوە و لە ئێستاش دا وادیارە كە لەگەڵ ەمریكا لەسەر جێگرەوەی ئەسەد خەریكی موعامەلە و سات و سەودایە. لەم نێوەدا سپا ژمارەیێكی زۆر كوژراو و بریندار و پوولێكی زۆری بۆ ئەو شەڕە لەدەست داوەكە تەنیا ئەو راستیە شكستێكی گەورەیە بۆ سپا و خامنەیی و سەرەتایێك دەبێ بۆ پاشەكشەی دیتر لە ناوخۆ دا. تەنیا بژاردەی سپا بۆ هەڵاتن لە بەرجام و لەدەست نەدانی پێگەی گرینگی سیاسی و ئابووری وەرێخستنی شەرێكی ناوچەیی و یان خود كودەتایێكی تەواو عەیار لە ئاستی ناوخۆیی دایە. لەكاتێكدا كە سپا كوژراوێكی زۆری لەسەری سووریا لەسەر دەست ماوە چۆن دەتوانێ‌ ئەوە قبووڵ بكات كە زەریف لە دانووستانەكاندا لەسەر رۆیشتنی ئەسەد رەزامەندی پیشان بدات. 

سپا بەو لێكدانەوەیە كە كە روسیا بە تەواوی هێزەوە ئەسەد دەپارێزێ و بە هێزی نیزامی و فرۆكە شەركەر و موشەك و پایۆرە شەركەرەكانی توانای رووبەرووبوونەوەی هەر جۆرە هێرشێكی رۆژئاوای بۆ سەر وەلاتەكەی هەیە زیاتر لەرابردوو دەستی داوەتە كردەوەی هاندەرانە و مەترسیدار لە ناوچەكە ، بەو لێكدانەوە هەڵەیە كە بە بوونی نیزامی روسیا بەرجام بەرێوە ناچێ‌. ئەوە لە كاتێكدایە روسیا ئەگەر بتوانێ‌ لە پێوەند بە بابەتی موشەكە دوورهاوێژەكانی لە ئورووپای رۆژهەلات ، ئۆكراین و ان خود كەم كردنەوەی بوونی نیزامی ئەمریكا لە رۆژهەلاتی روسیا و چین و یان لابردنی گەمارۆكانی ئورووپا و ئەمریكا، هێندێك ئیمتیاز لە رۆژئاوا وەربگرێ‌، سپا و ئەسەد بە تەنیا جێ دێڵێ‌ و ئەوكاتە عەلی دەمێنیتەوە و حەوزەكەی و لە كاتێكیش دا ئەگەر تا ئەو كاتە رژیم لە بەرێ,ە بردنی ریكەوتن و بریارنامەكانی شۆرای ئەمنیەت كارشكێنی دروست بكات، هەمدیسان رۆژئاوا وەدوای بەرنامەی لە پێش داریّژراوی لەراست ئێران دەكەوێ‌ كە لەراستی دا شكستی یەكجاریی پرۆسەی ووتوویژەكان لەگەڵ ئێران دەبێ. 

تا ئەو كاتە هەوڵ و ركابەری رەوتی روحانی ـ رەفسەنجانی لە لایێك و سپا و خامنەیی لە لایێكی ترەوە بۆ وەرگرتنی پێگەی سیاسی و ئابووری ناوخۆیی بە مەبەستی بە كارهێنانی لە سیاسەتی دەرەوەیی و ناوچەیی بە ریّژەیێك دەگات كە لە رووبەرووبوونەوەی سیاسی دەبێتە هێرش و پێكدادانی فیزیكی و هەر لە ئێستاوە لە سەرەتای هەڵبژاردنەكانی مەجلیسەكانی خوبرەگان و شۆرای ئیسلامی  دەست پێدەكات و لە پاشانیش دا ئەو شەر و ئاڵۆزییانە دەگاتە قۆناغی كودەتا و پێكدادنی نیزامی. 

 
ڕێکه‌وت: 2016-01-29 16:27:10
به‌شی ( وتاری سیاسی )





دیمانه

سیاسی