له‌سه‌رهێل -1
چوارشه‌مه‌ 15 پووشپه‌ڕ 2722
سازمانی خه‌باتی کوردستانی ئێران
ئاوڕێك لە هەل و مەرج و كێشە كۆمەڵایەتی و سیاسیەكانی لاوان لە كوردستانی ئێران!

 

11ی بانەمەڕ یادی دامەزرانی رێكخراوی لاوانی خەباتی كوردستانی ئێرانە، بەوبۆنەوە بەپێویستم زانی ئاوڕێك لە هەل و مەرجی لاوانی كوردستانی ئێران بدەینەوە، وە هەل و مەرجی لاوان بخەینە بەرباس و لێكۆڵینەوە.

لاوان سەرەكیترین و كاریگەرترین توێژی هەر كۆمەڵگەیەكن. لەو سۆنگەوە، لاوانی كورد بەتایبەت بەرپرسایەتی زۆرگەورە و گرینگیان كەوتۆتە ئەستۆ، جیا لە ئەركی ئاڵوگۆر و پێشخستنی كۆمەڵگە، شانیان داوەتە بەرباری گرانی خەبات و شۆرش دژ بە داگیركەرانی كوردستان. بە درێژایی مێژووی سەرهەڵدانی نەتەوەیی لە كوردستاندا لاوان ئەركی سەرەكیان كەوتۆتە ئەستۆو بە گیان و جەستە بۆ سەرخستنی بزوتنەوە نەتەوایەتیەكان قوربانیان داوە. لەبەرامبەردا داگیركەرانیش نووكی نێزەیان هەمیشە رووی لە لاوانی كورد بووەو بەردەوام دژی ئەو تووێژە پیلانیان گێڕاوە.

ئەو پیلانگێڕی و بەرنامە چەپەڵانەی داگیركەرانی كوردستان لە سەردەمی رژێمی ئێستای ئێراندا هەموو سنوورێكی تێپەڕاندووەو وەك راپۆرتە فەرمی و نافەرمیەكان پێمان دەڵێن لە ئێستادا بۆ ئەوەی لاوانی كورد بیر لە ئەركە سەرەكیەكانی خۆیان نەكەنەوەو ئەو بەرپرسایەتیە مێژوویەی لەئەستۆیانە بەجێ نەگەێنن، تووشی دەیان دەرد و دیاردەو قەیرانی كردوون. هەرچەند بەشێوەی جۆراوجۆر هەوڵ بۆ كەم كردنەوەی و هۆشیاری چین و توێژەكانی كوردستان بەتایبەت لاوان دەدرێ بەڵام دەسەڵاتداران بە بیانووی جیاجیا بەربەو هەنگاوانە دەگرن. یەكێك لە كۆسپەكانی بەردەم چالاكانی كۆمەڵی مەدەنی و رۆژنامەنووسان و چالاكانی سیاسی ناروون بوونی ئامار و رێژەی خەسارەتەكانی ئەو كێشەو قەیرانانەیە كە رژێمی ئێران تووشی ئەو توێژەی كۆمەڵی كوردستانی كردوە. مەبەست لەو نهێنی كاریەی رژێم بۆ ئەوە دەگەرێتەوە كە هەتا بە دەقیقی رێژەی ئەو قەیران و دیاردانە روون و ئاشكرا نەكرێن حەستەمە لە راستای چارەسەردا هەنگاوی كاریگەر هەڵگیرێ.

 قەیرانەكە ئەوندە گەورە و مەترسیدارە كە هەندێ جار كاربەدەستانی رژێم لە كوردستان ناتوانن خۆ لە باسكردنی ببوێرن و بەشێوەی سەرەپێیش بووە ئیشارە بە هەندێ ئامار و داتای خودساختە دەكەن. هەرچەند ئەو ئامارانەی رژێم بڵاویان دەكاتەوە ئاماری واقعی و راست نین، بەوەشەوە ئامارەكان ئەوندە بەرزن و پەرەسەندنی ئەو دیاردانە ئەوندە بەربڵاوە كە مرۆڤ تووشی شۆك و راچڵەكان دەكاو وامان لێدەكا لە مەترسیەكان وردبینەوە و لە سەریان برۆین و یەك بە یەك ئیشارەیان بدەینێ.

سەرەكیترین پرس و كێشەی لاوانی كورد لە كوردستانی ئێران پرسی سیاسی و نەتەوەییە، بەڵام لەگەڵ ئەوەدا لاوانی ئێمە بەدەست چەندین كێشە و دیاردەی دیكەی وەك پەروەردە، بێكاری، مادە سڕكەرو هۆشبەرەكان و دیاردەی خۆكوژی گیرۆدەبوون و تا دێ زیاتر پەرەدەستێنن.

پەروەردە: بۆ پەروەردە كردن و دروست بوونی كەسایەتی مرۆڤەكان، سێ بەش دەوری سەرەكی دەبینن (خانەوادە، قوتابخانە و كۆمەڵگە). وەك روونە لە كۆمەڵگەی كوردستاندا خانەوادەكان لە میكانیزمە كلاسیكەكان بۆ پەروەردەی منداڵ كەڵك وەردەگرن، لە كاتێكدا پەروەردەكردنی منداڵ پێویستی بە سیستەمێكی زانستیانە و دروست هەیە كە لە قۆناغەكانی دوایی دا منداڵەكان بتوانن رێگە دروستەكان بۆ ژیان و خزمەتی كۆمەڵگە هەڵبژێرن. هەروەها بەچوونە قوتابخانە منداڵی كورد دەچێتە دونیایەكی تەواو جیاواز لە خانەوادە، منداڵی كورد لە ئێراندا یەكێك لە كێشەگەورەكانی خوێندن بە زمانی بێگانەیە. خوێندن و فێربوونی زمانێكی لاوەكی و نامۆ وەك پسپۆران ئیشارەی پێدەكەن، كاردانەوەی خراپی رۆحی دەبێ لەسەر منداڵ. هاوكات نەوعی دەرس و توندوتیژی مامۆستا و سیستەمی خوێندن بەربەستی دیكەن بۆ پەروەردە و فێركردنی دروستی منداڵەكان. یەكێك لە كەموكوڕیەكانی سیستەمی خوێندن لە ئێران، تەنها كاركردنە لەسەر فێركردن و مەسەلەی پەروەردە لە قوتابخانە و زانستگاكاندا گرینگی پێ نادرێ، غافڵ بوون پەروەردە ئەوندە كاریگەری نێگەتیڤی هەیە، كە زۆربەی هەرە زۆری تاوانبارەكانی كۆمەڵگە دەرچووی زانستگەكانن و پلەی بەرزی خوێندنیان هەیە. پیلانە فەرهەنگی و كەلتووریەكانی رژێمی ئێران و داب و نەریتە چەوتەكانی كۆمەڵگە، بوونە هۆی بەلارێدا بردن لاوان و پەرسەندنی دەیان حاڵەت و دیاردەی كۆمەڵایەتی كە كاردەكەنە سەر شكلگرتنی كەسایەتیەكی نەگەتیڤ. كۆمەڵگە لە چەشنی بەحرێكە بۆ لاوان، گەر بەباشی لەسەر رێ و شوێنی مەلەوانی ڕانەهێنرابن بێ گومان زوو تێیدا دەخنكێن و ناتوانن خۆیان بگەیەننە كەنارێكی ئارام.

 بێكاری: یەكێك لە سەرەكیترین كێشە و موشكیلاتی لاوان بێكاری و نەبوونی و سەرچاوەی داهاتوو و بژیوە. دیارە قەیرانی بێكاری لە كوردستانی ئێران ئەوندە بەرزبۆتەوە كە بۆتە هەڕەشەو مەترسیەكی گەورەو بەدوای خۆیدا دەیان كێشە و دیاردەی كۆمەڵایەتی دیكەی هێناوە. بەهۆی سیاسەتەكانی رژێم لە كوردستان، ئەو ناوچەیە لە چاو ناوچەكانی دیكەی ئێران هەموو ساڵێك پلەی بەرزی بێكاری تۆمار دەكا. كێشەی بێكاری بۆ لاوانی كورد بۆتە سەرچاوەی سەرهەڵدانی دەیان حاڵەت و دیاردەی مەترسیداری كۆمەڵایەتی. لێرەدا بە بەڵگە رێژەی بێكاری لە پارێزگاكانی كوردستان یەكبە یەك دەخرێنەڕوو. 

پارێزگای ئیلام: هەواڵدەری حكومەتی تەنسیم 16ی بەفرانباری 1394 ك خ بڵاوی كردەوە كە لە ئیلام دۆزینەوەی كار  كێشەیەكی گەورەی لاوانەو ئەوەش بۆتە هۆی سەرهەڵدانی دەیان دیاردەی كۆمەڵایەتی لە نێو ئەو توێژەدا، پارێزگای ئیلام ساڵانە لە باری بێكاریەوە پلەی بەرز بەدەست دێنێ و لە ئێستادا ئاماری بێكاری لە نێو لاوانی ئەو پارێزگایەدا 40 لەسەدە.

پارێزگای كرماشان: لەباری پێشەسازی و سەرچاوەكانزاییەكان و بەخێوكردنی مەڕوماڵات و بەرهەمهێنانی شیروماست و جوتیاری و گەشتیاریەوە تواناو دەرفەتی باش هەیە لە كرماشان، بەڵام بەهۆی سیاسەتی پشتگوێ خستنی ناوچە كوردستانیەكان لەلایەن دەسەڵاتدارانی رژێمەوە، بێكاری لەو پارێزگایەش لە پلەیەكی بەرزدایە. بە پێی هەواڵدەری حكومەتی مێهر 23ی پووشپەڕی 1393، پارێزگای كرماشان بە بێكارترین پارێزگای ئێران ناوی هاتووە. پارێزگاری رژێم لە كرماشان (ئیبراهیم رەزایی بابادی) دەڵێ: رێژەی بێكاری لە كرماشان 35 لەسەدە. بەڵام عەلی جەلیلیان نوێنەری شاری ئیسلام ئابادی غەرب و داڵاهو لە مەجلیسی پێشووی رژێم لەو بارەوە دەڵێ: ئامارەكانی بێكاری لە پارێزگای كرماشان زۆر لەو ئامارە زیاترە كە راگەیەندراوە.

پارێزگای كوردستان: پارێزگای كوردستان لە باری پیشەسازی و جوتیاری و مەڕوماڵات و بەرهەمهێنانی شیر و ماست و گەشتیاری دەرفەتی باشی هەیە. بەڵام هەر لە سەرەتای هاتنەسەركاری رژێمی ئاخوندانەوە رێگە بە پێشكەوتنی نەدراو بەبەرنامە كەڵك لەو دەرفەتانە نەبینرا. بەپێی دەزگای ئاماری رژێم ئاماری دانیشتوانی پارێزگای كوردستان 500 هەزار كەسە. نوێنەری پێشووی سنە لە مەجلیسی رژێم (ئەحسەن عەلەوی) ساڵی 1393راگەیاند لە پارێزگای كوردستان 150 هەزار كەس بێكارن، بەو پێیە بێ رێژەی بێكاری لەو پارێزگایە 40 لەسەدە. بێگومان كاربەدەستانی رژێم هەم لە رێژەی دانیشتوان ئاماری ناراست بڵاودەكەنەوە، هەم لە رێژەی بێكاری لەو پارێزگایەی كوردستان. هەر لە بارەی بێكاریەوە یەكێك لە جێگرانی پارێزگار بەناوی حسینی فیروزی رایدەگەیەنێ كە لە زانستگاكانی كوردستاندا 73 هەزار كەس لە خوێندكاران لە داهاتوویەكی نزیكدا خوێندن تەواو دەكەن و دەچنە ریزی بێكارانەوە.

بەو پێ یە رێژەیەكی بەرچاو لە لاوان و دانیشتوانی چالاكی ئەو پارێزگایە بێكارن و ئەگەر بەرنامەیەكی تۆكمە بۆ چالاك كردنی چەرخەی پیشەسازی و جوتیاری و گەشتیاری لەو پارێزگایەدا هەبێ بێ شك رێژەی بێكاری بەشێوەیەكی زۆر دادەبەزێ، بەڵام وەك لە پێشدا ئیشارەی پێدرا دەسەڵاتدارانی رژێم بە بەرنامەیەكی سیاسی و لە بەرچاونەگرتنی دەرفەتەكانی كار، پیلانیان بەهەژار هێشتنەوەی دانیشتوانی كوردستان و بەتایبەت لاوانە.

پارێزگای ورمێ: پێكهاتەی پارێزگای ورمێ زۆر جیاوازە لە پارێزگاكانی دیكەی كوردستانی ئێران، پێكهاتەی ئەو پارێزگایە لە نەتەوەی كوردو ئازەری و ئەرمەنی پێكدێ. سیاسەتی جیاوازی دانان لە نێوان پێكهاتەكانی ئەو پارێزگایەدا بە جۆرێكە كە ناوچە كوردیەكان لە چاو ناوچەكانی دیكە بێ بەش كراون و پشتگوێ خراون، بەڵام ئەو ناوچە و گەرەكانەی ئازەرینشینن لەلایەن رژێمەوە گرینگی زۆری پێ دراوە. ئەو جیاكاریەی كاربەدەستانی رژێم كارێكی كردوە كە رێژەیەكی زۆر لە كوردانی دانیشتووی ئەو شارانە روو لە ناوچە و شارەكانی دیكەی كوردستان یان ئێران بكەن. هاوكات لە باری راگەیاندنی ئاماری دیاردە كۆمەڵایەتیەكان چەواشەكاریەكی زۆر دەكرێ، بۆیە دۆزینەوەی ئاماری دروستی رێژەی بێكاری زۆر حەستەمە. ئەوەی دیارە هەندێ لە دەزگاكانی رژێم ساڵانە لەو بارەوە ئامارگەلێك دەخەنەڕوو كە لەگەڵ راستی و وەزعی كۆمەڵگە ناتەبایە. بەپێی ئاماری دەزگاكانی رژێم رێژەی بێكاری لەو پارێزگایە 10لەسەدە.

وەك لە راپۆرتە نافەرمیەكاندا ئیشارەی پێدەدرێ دامودەزگاكانی رژێم بۆ ئەوەی ئاماری بێكاری لە ئێران و كوردستاندا كەم نیشان بدەن هەندێ كاری وەك دەستفرۆشی و كۆڵبەری و كاركردنی سەرسنوور، بە پێشە حیساب دەكەن. هەندێ ئاماری نافەرمی باس لەوە دەكەن كە بێكاری لە نێو لاواندا نزیك بە 50 لەسەدە و رژێم بە هەموو شێوەیەك هەوڵی شاردنەوەی ئەو راستیە دەدا.

بەرزبوونەوەی رێژەی بێكاری، برسیەتی و هەژاری بەدوای خۆیدا دێنێ، بێ شك برسیەتیش سەبەب و سەرچاوەی فەساد و ناهەنجاری دیكە لە كۆمڵگەدایە.

یەكێكی دیكە لەو دیاردە مەترسیدارانەی بەرەورووی لاوانی كورد بووەتەوە، مەسەلەی مادەی هۆشبەر و خوداربوونە بەو مادانە. بەداخەوە رێژەیەكی یەكجار زۆر لە لاوان تووشی ئەو دیاردە بوون و وەك هەندێ لە پسپۆران دەڵێن پەرەسەندنی مەوادی هۆشبەر لە كوردستان و بەتایبەت لە نێو توێژی لاوان بۆتە مەترسیەك بۆ ئاسایشی نەتەوەیی كورد لە كوردستانی ئێران. هۆكانی پەرەسەندنی مادە سڕكەرەكان لە نێو لاوان دەگەرێتەوە بۆ بێكاری، وەدەست هێنانی خێرای ئەو مادانە كە كەمترە لە پێنج دەقیقە، بێ هیوایی و هاوڕێی خراپ و...  دیارە لەسەر مەسەلەی مادەی هۆشبەر و پەرەسەندنی لە كوردستان راپۆرتی جۆراوجۆر هەیە، ئەوە راستیەی لەو راپۆرتانە پشتراست دەكرێنەوە دەوری دامودەزگا ئەمنیەتی و سەركوتگەرەكانی رژێمە لە بڵاوكردنەوەی ئەو پەتایە لە نێو لاوانی كوردستاندا. ئەوەی روونە بلاوكردنەوەی مەوادی هۆشبەر بۆ هێزە سەركوتگەرەكانی رژێم لە كوردستان دوو هۆی سەرەكی هەیە، یەكەم ئەوەی كە بەلارێدا بردنی لاوانی كوردە بۆئەوەی بیر لە مەسەلە گرینگ و سیاسیەكان نەكەنەوە و لە مرۆڤگەلێكی بەتوانای چارەنووس سازی نەتەوەیەكەوە ببنە كەسانێكی بێ توانای نەخۆشی خوودار بەو مەوادە، كە تا دێ بەو مەبەستە مەوادی نوێ و مەترسیدار دەخرێتە بازارەوەو ئەو مادانە دەبنە مەترسیەكی جیددی بۆ سەرگیانی لاوان. لایەنێكی دیكەی ئەو سیاسەتەی رژێم تجارەتە بەو مادانە كە لە ژێرچاودێری هێزەكانی سوپاس پاسداراندا جێبەجێ دەكرێ. بێ شك تجارەت بە مادەی هۆشبەر ئەورۆكە بۆتە سەرچاوەی داهاتێكی سەرسوورهێنەر بۆ سپای پاسداران. سوپای پاسداران بە شێوەیەكی مافیایی لەو بارەدا كاردەكاو بەدەر لە دابین كردنی مەوادی هۆشبەر لە ناوخۆی ئێران و كوردستان، بە شێوەی ترانزیت ئەو مادانە لە رێگەی توركیەوە دەگەیەنێتە وەڵاتانی ئوروپایی. بەدڵنیاییەوە سەركردەكانی سوپای سەركوتگەری پاسداران جیاواز لەوەی بەو داهاتە زۆرە گیرفانی خۆیان پڕ دەكەن، بەشێكی ئەو داهاتەش خەرجی هاپەیمانە ترۆریستەكانیان لە رۆژهەڵاتی ناوەراست و ئەفریقا دەكرێ.

ئاماری لاوانی تووشبوو بە مەوادی هۆشبەر لە كوردستانی ئێران كە لەلایەن دامودەزگاكانی رژێمەوە بڵاودەكرێتەوە بەو شێوە:

پارێزگای ئیلام: بەپێی ئامارێك كە هەواڵدەری حكومەتی مێهر 4ی سەرماوەزی 1393 بڵاوی كردۆتەوە، لەگەڵ ئەوەی بە دروستی نازانرێ رێژەی موعتاد لە ئوستانی ئیلام چەندە بەڵام دەزگای بەناو (شۆرای هاوئاهەنگی خەبات دژ بە مەوادی موخەدیر) لە پارێزگای ئیلام رایگەیاندوە كە موعتادەكانی ئەو پارێزگایە بۆ 25 هەزار كەس مەزەندە دەكرێ. هاوكات هەندێ راپۆرتی دیكە ئەوە روون دەكەنەوە كە لە 102 هەزار لاوی ئەو پارێزگایە 25 لەسەدیان موعتادن. هەروەها ئامارێكی دیكە ئیشارە بەوە دەكا كە 66 لەسەدی قوتابیانی پارێزگای ئیلام تووشی مەوادی هۆشبەر بوون، ئەوەش زەنگێكی مەترسیە بۆ سەرلاوانی ئەو پارێزگایە.

پارێزگای كرماشان: سەرنووسەری رۆژنامەی جەوان لە پارێزگای كرماشان مەسعود محەمەدی سەبارەت بە دیاردەی ئیعتیاد و مەوادی هۆشبەر دەڵێ: زیاتر لە 50 هەزار تووشبووی مەوادی هۆشبەر لەو پارێزگایەدا هەیە. هەروەها گەورترین كێشەی ئەو موعتادانە لەو چەندساڵەی دواییدا بەكارهێنانی مەوادی سەنعەتی و پیشەسازیە. 

بەڵام بەرێوەبەری شۆرای بەناو هاوئاهەنگی خەبات دژبە مەوادی هۆشبەر 20ی ژوئەنی 2012 گوتوویەتی: لە پارێزگای كرماشان 55 هەزار موعتاد بوونی هەیە. هەواڵدەری حكومەتی خەبەر ئانلاینیش 6ی بەفرانباری 1391 بڵاوی كردۆتەوە كە 45 لەسەدی تووشبووانی 12 پارێزگای ئێران تەمەنیان كەمتر لە 30 ساڵە، كە یەكێك لەو پارێزگایانە پارێزگای كرماشانە.

پارێزگای كوردستان: سەبارەت بە ئاماری لاوانی  موعتاد و رێژەی خوداربوان لە پارێزگای سنە ئامارێكی دەقیق و تەواو نیە. جەفعەری ئارژەنگ جێگری فەرماندەی هێزە سەركوتگەرەكانی ئینتزامی رژێم لە پارێزگای كوردستان 2ی پووشپەڕی 1393 رایگەیاند كە لەو پارێزگایەدا بەكارهێنانی مەوادی هۆشبەر بۆ ژێر 18 ساڵ دابەزیوە و ئاماری موعتاد لە پارێزگای كوردستان 21 هەزار كەس مەزەندە كراوە. 

پارێزگای ورمێ: هەواڵدەری حكومەتی فارس 19ی سەرماوەزی 1388 بڵاوی كردەوە كە ژمارەی موعتادانی پارێزگای ورمێ 15 هەزار كەسن. هەر لەو بارەوە هەواڵدەری فەرارو بڵاوی كردەوە كە 58 لەسەدی موعتادەكانی ئەو پارێزگایە لە لاون و پلەی خوێندەواریان بەرزە. بەرێوەبەری دەبیرخانەی ئەنجومەنی بەناو هاوئاهەنگی خەبات دژبە مەوادی هۆشبەر لەو ئوستانە دەڵێ: 49 لەسەدی ژنانی تووشبوو بە مەوادی هۆشبەر تەمەنیان كەمتر لە 35 ساڵە. هەروەها 26لەسەدی تێكرای موعتادانی ئەو پارێزگایە لە ژنان پێكدێ.

بێ شك پەرەسندنی مادە سڕكەرەكان لە نێو كۆمەڵگەو بەتایبەت لاوان بۆتە سەرهەڵدانی دەیان كێشەی كۆمەڵایەتی دیكەی وەك هەڵوەشانەوەی خانەوادە، زیادبوونی رێژەیی دزی و چەتەیی و فساد و دەیان حاڵەت و دیاردەی دیكە.

یەكێك لە دیاردە ناخۆش و دڵتەزێنەكانی نێو توێژی لاوان پەرەسەندنی دیاردەی خۆكوژیە، بەپێی لێكۆڵینەوەیەكی زانستگای تاران لە نێو ژناندا داب و نەریت و كەلتووری كۆمەڵگەو لە نێو پیاواندا قەیران و كێشەكانی كۆمەڵگە بەهۆی سەرەكی خۆكوژی لاوان لە كوردستان دادەنرێ. 

لە پارێزگای ئیلام خۆكوژی بۆتە قەیرانێكی مەترسیدار، ئەو پارێزگا لە ئاستی دونیادا لە پلەی یەكەمدایە بۆ خۆكوژی. لە جیهاندا بەشێوەی مامناوەند لە هەر 100 هەزار كەس 11 كەس خۆی دەكوژێ، بەڵام لە پارێزگای ئیلام ئەو رێژەیە لە هەر 100 هەزار كەس زیاتر لە 71 كەس راگەیەندراوە.

بەشێوەی گشتی لە ئێراندا بە پێچەوانەی وەلاتانی دیكە لاوانی 15 بۆ 24 ساڵ 70 لەسەد زیاتر لە بەتەمەنەكان هەوڵی خۆكوشتن دەدەن.

پارێزگای كرماشان: پارێزگای كرماشان بەهۆی ئەوەی یەكێكە لە ناوچە بێ بەش و پشتگوێ خراوەو هەژارەكانی ئێران، رێژەی خۆكوژی لە ئاستێكی بەرزدایە. موجتەبا قوبادی بەرێوەبەری كاروباری كۆمەڵایەتی پارێزگاكە رایگەیاندوە كە ساڵی1391، 3600 كەس هەوڵی خۆكوشتنیان داوە.

پارێزگای كوردستان: ئاماری خۆكوژی لاوان لەم پارێزگایە كەمتر نیە لە پارێزگاكانی دیكەی كوردستان، بە پێی ئامارەكان لەم چەند ساڵەی دوایی دا رێژەی خۆكوژی بەتایبەت لە نێو لاواندا بەشێوەیەكی بەرچاو زیادی كردوە. بەپێی وتەی یەكێك لە ئوستادانی زانستگای زانستی پزیشكی كوردستان، بەپێی ئامارەكان 9.2 لەسەدی ئەوانەی دەگەیەندرێنە نەخۆشخانەكان خۆیان كوشتووە.

هەر بە پێی ئامارەكان، لە 4 مانگی یەكەمی ساڵی 1394 ژمارەی خۆكوشتن لەو پارێزگایە زیاتر لە 30 كەس تۆمار كراوە.

پارێزگای ورمێ: لە بارەی دیاردەی خۆكوژی لەم پارێزگایە چەند ساڵە زەنگی مەترسی لێدراوە بەڵام كاربەدەستانی رژێم كار بۆ شاردنەوەی راستی مەسەلەكە و رێژەی بەرزی ئەو دیاردەیە دەكەن. بە پێی ئامارێك كە دامودەزگاكانی رژێم بڵاویان كردۆتەوە، ساڵی رابردوو تەنیا لە ماوەی 2 مانگدا 20 كەس لەو پارێزگایەدا خۆیان كوشتووە كە لەو ژمارەیە بەشێكی زۆری لە ناوچە كوردنشینەكاندا رووی داوەو تەمەنیان لە نێوان 18 بۆ 30 ساڵ بووە.

بە پێی ئەو ئامار و داتایانەو ئەو راپۆرتانەی رۆژانە لەلایەن رۆژنامەنووسان و چالاكانی ناوخۆوە بلاودەكرێنەوە، لاوانی كورد لە ناوخۆدا لە هەل و مەرجێكی مەترسیداردان و ئەوەی لەو وەزعەی لاوان سود دەبینێ تەنها رژێمی داگیركەری ئێرانە. بەبەردەوامی ئەو وەزعە كۆمەڵگەی كوردستان زیاتر لەوە دەبزركێ و لە داهاتووشدا چارەسەر كردن زۆر قورس و حەستەم دەبێ.

خەمخۆرانی گەلەكەمان بەتایبەت هێز و لایەنە سیاسیەكان و رێكخراوە سێنفی و مەدەنیەكان، دەبێ لە هەموو رێگەیەك بۆ هۆشیاركردنەوەی كۆمەڵگە و بەتایبەت لاوان سود وەرگرن چوونكە تاكە رێگەی راگرتن و كەمكردنەوەی ئەو كێشانە هۆشیاری سیاسی و فەرهەنگی و نەتەوەیی لاوانە.
ڕێکه‌وت: 2016-05-03 17:16:05
به‌شی ( لاوان )






  به‌شی : هه‌واڵی کوردستان   کات : 2022-07-06 08:15:48
به‌شی : هه‌واڵی ئێران
ڕێکه‌وت : 2022-07-02

به‌شی : هه‌واڵی ئێران
ڕێکه‌وت : 2022-06-30


سیاسی