له‌سه‌رهێل 141
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
لاوازی و لێکترازانی زیاتری دەسەڵاتدارانی رژێم

ئاخوند عەلی خامنەیی رۆژی پێنج شەممە 16ی بانەمەڕ بە بیانووی جەژنی مێعراجەوە هاتەوە مەیدان و قسەی کرد. جیا لەوەی وەک هەمیشە بەشێوەیەکی گشتگیر قسەی کرد، دەکرێ وتارەکەی ئەو جارەی بە سێ بەش دابەش بکرێ.

ئاە و ناڵە لە فشارە جیهانیەکان و ئەگەری ئابڵوقەی زیاترو، بێ دەسەڵاتی و دەست و پێ بەستراوی لەبەرامبەر بەرجامەکانی دوایی بەتایبەت ژارخواردنێکی دیی و پاشەکشە لە ناوچەکە.

پاشەکشەی ناراستەوخۆ و نەرمی نواندن لەچاو هاشوهووشەکانی پێشووی سەبارەت بە جموجوڵەکانی رژێم لە کەنداوی فارس و  هەڕەشەکانی پاسدار سەلامی جێگری فەرماندەی سوپای پاسداران.

بەروڕووبوونەوەی توندو دەم بە دەمێ لەگەڵ ئاخوند حەسەنی رۆحانی، بەجۆرێک کە وەلی فەقیهی رژێم نەبێ.

14ی بانەمەڕ، پاسدار حسەینی سەلامی جێگری فەرماندەی سوپای پاسداران لە ووتووێژ لەگەڵ تەلەفزیۆنی رژێمدا گووتبووی: بە ئەمریکاو شەریک و هاوپەیمانەکانی لە ناوچەکە وریایی دەدەین کە ئەگەر بیانەوێ زمانی خەڕەشە بکار بێنن، رێگەی هاتووچۆ بە هیچ کەشتیەکیان نادەین. هەر لە دوای ئەو قسانە، مارک تونێر وتوبێژی وەزارەتی دەرەوەی ئەمریکا کاردانەوەی نیشان داو هەڕەشەی ئابڵوقەی زیاتر و گۆشەگیرکردنی زیاتری لە رژێم کرد. بۆیە ئاخوند عەلی خامنەیی لە قسەکانیدا ئیشارەی بەو هەڵوێستەی ئەمریکا کرد و گووتی: وتەبێژانی ئەمریکایی رایانگەیاندوە کە دژایەتی ئێران لەگەڵ سیاسەتەکانی ئەمریکا لە رۆژهەڵاتی ناوین، دەبێتە هۆی ئەوەی ئێمە ئابڵوقەی زیاتر بخەینە سەر ئێران یان رووبەرووی دەبینەوە. بەپێچەوانەی رابردوو خۆی لە قسەی توند و زبر بواردو گوتی: ئەو قسانە لە رووی نەزانیەوەیە کە لە ئێستادا ئەو نەزانینە لە ئارادایە، ناوبراو دوای ئەوەی کە هیچ کەلێنێک بۆ خراپ حاڵیبوون نەهێڵێتەوە گووتی: جمهوری ئیسلامی لە سەرەتای دەست بەکار بوونیەوە هیچ شەڕێکی دەست پێ نەکردوە و هیچ هێرشێکی سەربازی دژ بە هیچ وەلاتێک ئەنجام نەداوە. ئەو قسانە نیگەرانی و بەروونی ترس و پاشەکشەی وەلی فەقیهی رژێم نیشان دەدا.

عەلی خامنەیی هەروەها بەبێ ئیشارە بە قسەکانی رۆحانی، لە رووی لاوازیەوە کەوتە دەمبەدمێ لەگەڵی. خامنەیی لە وتارێکدا کە رۆژی 13ی بانەمەڕ دابووی سەبارەت بە پەرەسەندنی زمانی ئینگلیسی ئیگەرانی دەربڕیبوو، گوتبووی دەبێ بەربەو مەسەلەیە بگیردرێ. بەڵام دوو رۆژ دوای ئەو قسانە، ئاخوند رۆحانی لە رۆژی 15ی بانەمەڕدا بەبێ روودەربایسی وەلامی خامنەیی دایەوە و گووتی: لە شەبە قارەی هیندا بە هۆی ئەوەی توانای بەکار هێنانی زمانی ئینگلیسیان هەیە، دەبینن کە لە باری IT دا چەندە پێش کەوتوون و چ پیشەیەکی گەورەیان بەدەست هێناوە. ئەو جار خامنەیی لە جوابی قسەکانی حەسەنی رۆحانیدا گووتی: پێش ئەوەی کە بریتانیاییەکان هێند داگیر بکەن، هێند خاوەن شارستانیەتێکی پێشکەوتوو بوو، پێشەسازی پێشکەوتووی هەبوو، ئینگلیسیەکان چوونە ئەوێ، دەسەڵاتی ئەو وەلاتە گەورە و پان و بەرینەیان وەدەست گرت و ئەو وەڵاتەیان بۆ پاشەوە برد، بۆ ئەوەی کە خۆیان پێش بکەون. دەوڵەتی بچوک و دووری ئینگلیس بەهۆی دزینی سەرچاوەکانی وەلاتێکی گەورەی وەکوو هیند بەو هێزە گەیشت و ئەو وەڵاتەشی تووشی رۆژەڕەشی کرد.

بە تێڕوانینێک بۆ قسەکانی عەلی خامنەیی ئەو راستیەمان بۆ روون دەبێتەوە کە جێگەو پێگەی وەلی فەقیە لە ناودەسەڵاتەکەی خۆیشیدا وەک رابردوو نەماوەو وەلی فەقیە کەشتیەکەی لە گڵ نیشتووەو تابۆی شکاوە. ئەو هەلومەرجەی عەلی خامنەیی تێکەوتووە دەرخەری وەزعی خراپی رژێمەکەیەتی. ئەو راستیەش لە راگەیەن و ئورگانەکانی دیکەی رژێمدا رەنگی داوەتەوە. بۆنمونە ئاخوند سەدیقی لە شانۆی نوێژی هەینی 17ی بانەمەڕ، سەبارەت بە وەزعیەت و پێگەی خامنەیی نیگەرانی دەربڕی و گووتی: ئاسایش و سەربەخۆیی و .... ئێمە لە گرەوی بەیداخی ویلایەتی فەقیەدایە، دەبێ بزانین ئەو مەسەلە گرینگە وەکوو ئاوی رەوان دەرخواردی منداڵەکانمان بدەین. هەروەها رۆژنامەی حکومەتی ئیعتیماد 18ی بانەمەڕ، نووسی: نابێ گوومانمان هەبێ کە مەسیری ئەو جەریانە لە شوێنێکدا کۆتایی دێ و دوکەڵی ئەو کێشەسازکردنانە با چاوی هەمووماندا دەچێتەوە. ئەو رۆژنامەی بە ئیشارە بە بەروڕووبوونەوەی رۆحانی و خامنەیی وریایی دا: پەرەسەندنی کێشە و دوودەستەیی لە بەرزترین خاڵ و هەرەمی نیزام، داهاتوویەکی ناڕوونمان نیشان دەدا. ئەو مەیدانە بۆ یاری کردن نابێ و دەبێ لەو یاری کردنانە دووری بکەین.
ڕێکه‌وت: 2016-05-11 18:49:26
به‌شی ( وتاری سیاسی )





دیمانه

سیاسی