له‌سه‌رهێل 101
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
پیشەسازی و وەبەرهێنانی ناوخۆ، مرۆڤ دڵگران دەكا!

 رۆژی 29ی جۆزەردانی 1395 هەوڵی وەرشكستەبوونی كارخانەی قەندی وەرامین بەڵاو كرایەوە، ئەگەر لە سەر نەقسە چاو لێبكەین كەمێ دوورتر لە شوێنی ئەو كارخانەیە، شوێنێكی دیكە دەدۆزینەوە كە ناوی كەهریزەكە و بەندیخانەیەكی ناوداری رژێمە. بەڵام هەر ئەو كەهریزەكە لە سەردەمی ناسردین شادا شوێنی دامەزرانی یەكەم كارخانەی وەرهێنانی ناوخۆیی بوو بەناوی كارخانەی قەندی كەهریزەك.

كارخانەیەك كە بە بازاركردنی وەجبەی یەكەمی قەندەكەی و مەترسی خستنەسەر بازاری فرۆشتنی قەندی هاوردەكراوی روسی ( كە ئەو سەردەمە تەنیا قەندێك بوو لە بازارەكانی ئێراندا)، لەگەڵ رقی دەوڵەت و بازرگانە روسەكان بەرەوروو بوو وە لە ماوەیەكی كەمدا وەرشكست بوو و داخرا. روسەكان بە هاوردەكردنی قەندێكی زۆر و هەرزان، كارێكیان كرد كە قەندی كارخانەی كەهریزەك ئەوندە لە ئەنباردا بمێنیتەوە هەتا خاوەنەكەی ناچار بوو كارخانەكە دابخا. لە داخرانی كارخانەی كەهریزەك هەندێ لە ئاخوندان دەوریان هەبوو، بە دانی فتوای تەحریمی قەندی كەهریزەك خزمەتی گەورەیان بە روسەكان كرد. روسەكان هەر ئەو كارەیان لەگەڵ كارخانەكانی شەمچەی (شقارتە) تاران و تەورێزیشدا كرد.

ئەگەر چاوێك لە كتێبەكانی تایبەت لەو بارە بكەین، دەتوانین كارگەلێكی  زۆری لە چەشنە ببینین كە بە زمانی ئابووری ئێستا پێی دەوترێ (دامپینگ). ئەوەی زۆر جێگەی داخ و كەسەرە ئەوەیە كە ئێستاش لە دوا دوو سەدە، دیسان ئاخوندەكان و دەوڵەتە دەرەكیكان بۆ وێران كردنی وەبەرهێنانی ناوخۆ وەها تێدەكۆشن  كە هیچ رێگەی دەربازبوونێكیان بۆ وەبەرهێنانی نەتەوەیی نەهێشتۆتەوە. لەو نێوەندەدا، ئەوەی زۆرتر لە هەموو شتێك وەبەر چاو دەكەوێ دەوری خائینانەی ئاخوندەكانە كە هەر خۆیان لەم یاریەدا دەوری خەیانەتكارانەیان لە ناوخۆ وەئەستۆ گرتووە و هەم دەوری دەوڵەتە ئیستعمارگەرەكان.

سەبارەت بەم كارەساتە لە ماوەی رۆژەكانی 21 بۆ 24ی جۆزەردانی 1395 لە راگەیاندنەكاندا لیستی ناوی ژمارەیەك لەو كارخانانە بڵاوكرایەوە كە لە ئێراندا داخراون كە خوێندنەوەی ئەو راپۆرتانە قرچە لە جەرگی هەر هاووەڵاتیێكەوە دێنێ. راپۆرتێك كە نیشان دەدا لەناوبردنی وەبەرهێنانی ناوخۆ و داخرانی كارخانەكان، بەرنامەیەكی رێك و دارێژراوە كە بە سەریعی بۆ پێشەوە دەچێ. كارەساتێك كە ئەگەر لە سەردەمی ناسردین شادا گوناحەكەی لە سەر ئیستعمار و دواكەوتوویی نێوخۆ نووسی، بەڵام ئەوەی ئێستا روودەدا خەیانەتێكە كە تەنیاو تەنیا دەبێ لە سەر نیزامی ویلایەتی فەقیە و دەسەڵاتی ئاخوندان بنووسرێ.

لە كۆتایی دا بۆ ئەوەی دەسەڵاتێك كە هۆی لەناوبردنی وەبەرهێنانی ناوخۆیە باشتر بناسن دوو قسە لە دوو كەسی سەربەو دەسەڵاتە دەخەینەروو.

یەكەم قسەی پاسدار عەزیز جەعفەری سەركردەی جینایەتكاری سوپایە كە باس لە دەوری ئەو سوپایە لە ئابووری وەڵاتدا دەكا.

دووهەم قسەی یەكێك لە سەركردەكانی باندی ناسراو بە ریسالەتە كە نزیكە لە خامنەیی رێبەری رژێم.

پاسدار عزیزی جەعفەری فەرماندەی سوپا رۆژی 25ی سەرماوەزی 1393 لە ووتووێژیكدا لەگەڵ بڵاوكراوەیەكی حكومەتی بەناوی هەواڵدەری دانا، ئیشارە بە چەند خالێك لە چالاكیە ئابووریەكانی سوپا دەكا كە بیرهێنانەوەی ئەو قسانە لە ئێستادا مانای تایبەتی خۆی هەیە. چەند رستە لە قسەكانی بژاردە دەكەین كە بەم شێوەیە:

لەبەر ئەوەی 10 گروپی موهەندیسی و هەزاران دەزگاو ماشین لە ماوەی شەڕدا بە سوپا درابوو، نەدەكرا بۆ دروست كردنەوەی ژێربینای وەڵات لەو توانا گەورەیە كەڵك وەر نەگیرێ و لە ئەنبارەكاندا خۆڵی لێ بنیشێ. بۆیە لە مەیدانی جۆراوجۆری ئابووریدا دەستمان پێ كرد. هەندێ لە هاوردەكاران موخالیفی سوپا بوون. بەڵام ئێمە بەشی خسوسیمان بە كارهێناو یەك جێ چوار هەزار شیركەتی خسوسیمان گرتەدەست.

ئێستا بەدوای جێ بەجێ كردنی بەرنامەگەلێك لە وەڵاتانی دیكەوەین.

قسەی دووهەم لەسەر ئەسەدوڵا عەسگەرئەولادیە كە یەكێكە لە سەرانی باندی بازاردزی ناسراو بە ریسالەت. كە هەواڵدەری حكومەتی ئافتاب 15ی رەشەممەی 1393 بەم جۆرەی لەسەر نووسی: ئەم پیاوە هیویندا سوارە بە حەوتەمین دەوڵەمەندی ئێران ناوی دەركردوە. ئەسەدوڵا عەسگەرئەولادی ماوەیەك لەوە پێش لە دیمانەیەكدا رایگەیاندبوو كە 5 بۆ 6 كەس لەو دەوڵەمەندتریش هەیە! ناوبراو ساڵی 89 لە كۆبوونەوەی هەیئەتی نوێنەرانی ژووری بازرگانی تاران وتبووی: ئەگەر هەیئەت رەئیسە رێگەم پێ بدا ئەم وردە بازرگانە! یەكجێ چەكی كرینی نمایشگای نێودەوڵەتی تاران دەكێشم ...! ناوبراو پێشتر سواری بێنز دەبوو!.
ڕێکه‌وت: 2016-06-18 18:07:59
به‌شی ( وتاری سیاسی )





دیمانه

سیاسی