له‌سه‌رهێل 71
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
بەڵێنەكانی رۆحانی و تووڕەیی جەماوەر!

 رێكەوتی 27ی پووشپەر، ئاخوند رۆحانی لە كاتێكدا سەردانی ئوستانی كرماشانی كرد كە ئەسەدوڵا رازانی یەكێك لە دەسەڵاتداران لەو پارێزگایە پێشتر ووتبووی لە كرماشان زیاتر لە 140 هەزار كەس بێكارن و ساڵانە 7 هەزار كەس لەو ئامارە زیاد دەبێ و بەپێی ئەو ئامارانەی لەلایەن رژێمەوە بڵاودەكرێنەوە ئەو ئوستانە بە رێژەی 23و 1 دەیەمی درسەد لە پلەی یەكەمی جەدوەلی بێكارانی وەڵاتدا جێگەی گرتووە. بۆیە ئاخوند رۆحانیش بەڵێنەكانی بەو پێی یە رێكخستبوو: 

چارەسەری كێشەی بێكاری لەو وەڵاتەدا بە دەست و بازوی خەڵكی بەهێزی ئێمە دەكرێ. دەبێ هەلی كار و ئابووری پەرە پێبدەین، لاوانی ئازیزی ئێمە، لاوانی زانستگایی ئێمە بزانن! رێگەیەك جوێ لە پەرەسەندنی ئابووری بۆ بردنەپێشی وەڵاتمان بەدەستەوە نیە، رێگەیەكمان جوێ لە ئابووری بەرگری نیە، ئێمە هەلومەرج بۆ كار و چالاكی دەبێ برەخسێنین، ئەو كارە بەدەستی خەڵكی ئێران و پشتیوانی خودا دەكرێ. 

دیسان وەك هەمیشە باسی گشتی و دیسان بەڵێنی سەر خەرمان، ئیتر لە دوای بەرجام، بەڵێنەكانی بە بەرجامەوە گرێ ناداو بەردەوام گرێ یان دەدا بە "حەول و قوەتی ئیلاهی" و "هێزی خەڵك". لە درێژەدا ئەوندە لە سەر ئەو بەڵینانە رۆیی تا ئەو جێگەی ئەو جەماوەرە كەمەی بە جۆرەها فشار و زۆر هێنرابوونە شوێنی وتاردانی ناوبرا، لە ناڕەزایەتیدا دەستیان دایە شیعاردان بە جۆرێك رۆحانی مەجبوور بوو بێتە جواب و بڵێ بە شیعر و شیعار هیچێك ناگۆڕێ.

هەر چەند ئاخوند رۆحانی دەگاتە باسی موچەی زۆری دەست و پێوەندەكانی، ناڵێ چ پێوەندیەك لە نێوان ئەو دزیانەو بێكاری لاوەكانی وەڵات بەتایبەت لاوەكانی كرماشاندا هەیە، تەنیا هەوڵ دەدات لە بەرامبەر تووڕەیی جەماوەردا خۆی لە باسەكە بشارێتەوەو تاوانەكان بخاتە ئەستۆی باندی بەرامبەر و بڵێ: ئەگەر سەرپێچیەك رووی داوە بەو مانایە نیە كە دزیەكانی پێشتر لە یاد بكەین. ئەگەر بەرێز گەڵێك لێرەو لەوێ دەیانەوێ مەسەلەی فیشی موچەكان درێژە پێبدەن بۆ ئەوەی دزیەكانی پێشتر لە یاد بكرێن، بزانن كە خەڵك لە یادی ناكەن  و دەیانەوێ مەسەلەی دزیەكانی رابردوو لە دادگا روون بكرێتەوە. خەڵك دزیە 3 هەزار ملیاردی و 12 هەزار ملیاردیەكان لە بیر ناكەن. ئەمریكا 2 ملیارد دولار پووڵی خەڵكی لەبەر كەمتەر خەمیەكانی پێشتر بریوە. خەڵكی ئێمە ئەو كەكاریانە لە بیرناكەن.

بەڵام ئەوە كێ یە كە نەزانێ، لە سەركوت و دزینی مافی خەڵكی ئێران، ئەو تاقم و ئەو تاقم بوونی نیەو تێكڕای دەسەڵاتداران تێ یدا بەشدارن، درێژەی ئەو شەڕ و جەنگە تەنیا بۆ چرینی بەشی زیاترە لە سەرمایەی خەڵكی ئێران كە لەم نێوەدا بەشی جەماوەر تەنیا بێكاری و هەژاری و چەوساوەییە.

با ئاخوند رۆحانی هەوڵ بدا بە قسەو بەڵێنەكانی تاوانەكان لە ملی خۆی و تاقمەكەی لابدات، وە سەرپۆش بەسەر دیارەكان كە لاوانی بێكار و دەرچووی زانستگا بەتایبەت لەم پارێزگا سنووریە دا بكێشێ، بەڵام ئایا ئەو بەڵێن و ریاكاریانە دەتوانێ‌ بەر بە تەقینەوەو كڵپەی تووڕەیی جەماوەر و لاوان بەتایبەت بگرێ؟!
ڕێکه‌وت: 2016-07-19 18:57:41
به‌شی ( وتاری سیاسی )





دیمانه

سیاسی