له‌سه‌رهێل 134
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
با پێناسەیەكی دروست بدەین بە بزوتنەوەی كوردستان!

 

كوردستانی ئێران كۆمەڵگەیەكە كە پێكهاتووە لە بیر و مەزهەب و دینی جیاجیا، وە داگیركەران بە درێژایی مێژوو بەتایبەت لە دەسەڵاتداریی رژێمی خومەینی دا جیاوازیان نەكردوە لە نێوانیان و تێكڕایان زوڵم و ستەمیان لێكراوە و چەوساونەوە.  

لەبەرامبەر ئەو زوڵم و سەركوت و جینایەتانەی داگیركەراندا لە نێو ئەو كۆمەڵگەدا بزوتنەوەیەك  دروست بووە، كە لە پێناو كۆتایی هێنان داگیركاری و رزگاری نەتەوەی كورد و تێكڕای كوردستانیان خەبات دەكاو  قوربانیەكی زۆری داوە.

زۆر ئاساییە كە كاتێ بزوتنەوەیەكی شۆرشگێڕ لە هەناوی كۆمەڵگەیەكی وا فرە بیر و دین و مەزهەب سەر هەڵدەدا، فرە رەنگ بێ و بۆ راكێشانی رێژەیەكی زیاتر جەماوەر بۆ ریزی خۆی هەوڵ بدا دەستەواژەگەلێك بەكار بێنێ كە جەماوەر پەسەند بێ لەگەڵ بیر و هزری جەماوەردا بێتەوە، وە جەماوەر نامۆیی لێ نەكاو  تێكڕای جەماوەر و پێكهاتەكانی خۆی تێدا وەبینن و بە ئیی خۆیانی بزانن.

بەداخەوە بزوتنەوەی رزگاریخوازانەی كوردستان لە رابردوودا یان باگراوندێكی مەزهەبی تۆخی هەڵگرتووە، یان باگراوندێكی سێكۆلار، راستە ئامانجی هەردوو ئیدئۆلۆژیەكە رزگاری و وەدی هێنانی مافی گەلی كورد بووە بەڵام هیچ كات لە بزوتنەوەی كوردستاندا ئیدئۆلۆژی نەتەوەیی و نیشتمانی نەكراوەتە باگراوەندی خەباتەكە ئەوەش هۆیەك بووە كە هەمیشە بەشێك لە جەماوەر یان نامۆیی لە خەباتی ئەو بزوتنەوەیە بكەن یان بە دژ مەزهەب و دینی خۆیانی ببینن و دژایەتی بكەن.

ئەگەر چیی لە ئێستادا شیعارو دروشمە  نەتەوەییەكان لە هەڵوێستی تێكڕای بزوتنەوەی كوردستاندا دیارەو لە بارە فكریەكەدا ئەو زبریەی رابردوو بەدی ناكرێ و لە گەڵ یەك هەڵكردن و خوێندنەوەكان باشتر بووە،بەڵام دیسان مەسەلە فكرییەكان بەزۆری و لە كار و هەڵسوورانی هەڵسوڕاوانیدا بەدی دەكرێ و هەندێ جار حەساسیەتەكان زیاتر نیشاندەدرێن.

بۆ ئەوەی مەبەستەكەم بگەیێنم تازەترین نمونە وەبیر دێنمەوە، لە ماوەی رابردوودا ژومارەیەك لاوی كورد لە گرتووخانەكانی رژێمی ئێران بە تۆمەتی چالاكی عەقیدەیی لە سێدارە دران و ئەو كردارە قێزەونەی رژێم لەلایەن كۆڕ و كۆمەڵی نێودەوڵەتیەوە مەحكوم كراو بە پێشێلكاری مافی مەزهەبی و دینی لە قەڵەم درا.

ئەوە روونە كە زوڵمی سەرەكی لە ئێمەی كورد نەتەوەیی و داگیركردنی نیشتمانە، بەڵام نابێ لەو راستیە چاوبپۆشین كە باقی زوڵمەكانی وەك زوڵمی دینی و مەزهەبی و فكریش لە پێكهاتەكانی نەتەوەی كورد لە كوردستان دەكرێ. بۆیە چەند هەژێنەر و ئازار بەخشە چەوسانەوەی كوردێكی یارسانی، بە هەمان ئەندازەش چەوسانەوەی كوردێكی چەپ و كوردێكی شیعە و كوردێكی سونیش ئازار بەخشەو بزوتنەوەی كوردستان دەبێ خۆی بە داشداری هەموویان بزانێ‌.

بەڵام لە كاتی لە سێدارەدانەكانی ئەم دواییەی كوردانی سوننی مەزهەب و عەقیدەتی هەندێ كەوتنە خۆ و بزوتنەوەی كوردستانیان تەنها بە بزوتنەوەیەكی سێكۆلار و چەپ پێناسە كرد و بوونی چالاكانی مەزهەبیان لەو بزوتنەوەدا وەلاخست و شانیان لەبەر خاڵی كرد.

ئەو جۆرە هەڵوێستانە هەڵەكانی رابردوو وەبیر دێنێتەوەو ئەوەمان پێ دەڵێ كە هەندێ ژێستی دیموكراسی تەنها رووكەشەو پاوانخوازی ئیدئۆلۆژیخوازان ئێستاش لەجێی خۆی ماوە.

ئەوە لە حاڵێكدایە كە بزوتنەوەی كوردستان تەنها بزوتنەوەیەكی سێكۆلار و چەپ نەبووەو نیە و هەر لەو بزوتنەوەدا مەزهەبیەكانیش (یارسان و مەزهەبی و...) دەوریان هەبووەو لە ماوەی 37 ساڵی رابردوودا لە دژایەتی رژێمی ئێران كە خۆی بە رژێمێكی ئیسلامی پێناسە دەكا، هاوشان لەگەڵ چەپەكان خزمەتیان كردوەو ئەو قسانەش كە دەكرێ سرینەوەی دەور و نەقشی ئەوانە لە ماوەدا.

لەراستیدا مەسەلەكە ئەوەیە كە بزوتنەوەی كوردستان پێكهاتووە لە رەنگ و فكری جۆراوجۆری وەك سێكۆلار، نەتەوەیی و نیشتمانی و مەزهەبی، و بە حوكمی ئەوەی هەموو ئەمانە پێكەوە هاوچارەنووسن، باشترین رێگە هەزمی یەكتر و پێكەوە هەڵكردن و خولقاندنی فەزایەكی دیموكراتیكە بۆ ئەوەی لە سەرخستنی خەباتی نەتەوەی كورد لە رۆژهەڵاتی كوردستاندا هەماهەنگی و پێكەوە كاركردنیان هەبێ.

لە بنەڕەت دا بزوتنەوەی رزگاریخوازی كوردستان پێناسەكی نەتەوەیی و ئازادیخوازی هەیەو سێكۆلاریزم و دین و مەزهەب باگراوندی حیزب و سازمانەكانی بەشدار لەو بزوتنەوەدان. لەو بروایەدام مرۆڤی ئازادئەندێش خۆ بەدوور دەگرێ لە پاوانخوازی و ئەوەی خزمەت و سەركەوتنی بزوتنەوەی كوردایەتی مەبەست بێ  مەسەلەی نەتەوەیی دەخاتە پێش مەسەلەی فكری و ئیدئۆلۆژی و مەزهەب و دینیەكان.  بۆ ئەوەی كۆتایی بەو حەساسیەتانە بێنین گونجاندن و پەیرەوی كردنی ئیدئۆلۆژی "نەتەوەیی و نیشتمانی" كە دیموكراسی بنەمایەكی  نەگۆری بێ، دەتوانێ‌ تێكڕای پێكهاتە فكریەكانی كوردستان خۆی تێدا ببیننەوە و نامۆیی لێ نەكەن و بەشداری زیاتر و بەرچاوتری تێدا بكەن.

 
ڕێکه‌وت: 2016-08-13 19:08:18
به‌شی ( وتاری سیاسی )





دیمانه

سیاسی