له‌سه‌رهێل 133
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
هێرشەكانی خامنەیی بۆ سەر ئەمریكا بەكام مەبەست!

 

 
رۆژی چوارشەممە رێكەوتی 10ی خەرمانانی 1395، خامنەیی رێبەری رژێمی ئێران لە كاتی بەسەركردنەوەی بەرهەمەكانی وەزارەتی بەرگری رژێم كە لە شوێنی وتاردانی ناوبراودا رێكخرابوو، وەك هەمیشە هێرشی كردە سەر ئەمریكاو سیاسیەتی هەر دوو حیزبی ئەو وەڵاتەی دایەبەر پلار و بە ئەنجامدەری جینایەتی جۆراوجۆر تۆمەتباری كردن و گوتی لەگەڵ هیچ دەوڵەتێكی ئەمریكا ناكرێ بە رێگەی وتووێژ بە رێكەوتن بگەی. ناوبراو هەروەها رۆژی 3ی خەرمانان لە كاتی چاوپێكەوتنی لەگەڵ سەرۆك كۆمار و كابینەی حكومەتەكەی، ئەمریكای بە بێ بەڵێن و حیساب ناراست لە مەسەلەی رێكەوتنی ئەتۆمی تاوانبار كرد و گووتی: ناكرێ باوەڕ بە بەڵێنی هیچكام لە دەوڵەتەكانی ئەمریكا بكەین. هەر لە قسەكانی رۆژی چوارشەممەی دا ئیشارەی بەوە كرد كە دەبێ توانای بەرگری و هێرش بردن زیاد بكەین و ئەوەشی بە مافی بێ ئەم لاو ئەولای رژێم زانی و گووتی: دەبێ تواناو هێزی دیفاعی بەرەوسەر بەرین بۆ ئەوەی دەسەڵاتە خۆسەپێنەكان هەست بە مەترسی بكەن
  خامنەیی ئەوە یەكەم جاری نیە كە بەو جۆرە هێرش دەكاتە سەر ئەمریكا و هەرچی تاوانە دەیخاتە پاڵ ئەو وەڵاتە، بێ شك لە وتنی ئەو قسانەدا مەبەستی زۆری هەن كە بەشێكی روو لە ئەمریكایە و بەشێكی زۆریشی روو لە ناوخۆی دەسەڵاتەكەیەتی كە لە ئێستادا كێشە ناوخۆییەكانی ئەو رژێمە لە هەر كاتێكی دیكە بەرچاوترە.

روونە كە رژێمی ئێران لە ژێر فشاری ئابووری دا ملی بە رێكەوتنی ناوكەیی دا، بەڵام لە خوێندنەوە بۆ ئەنجامی رێكەوتنەكە تووشی هەڵە بوون چوونكە پێ یان وابوو گەر مل بە كۆمەڵگەی جیهانی و بەتایبەت ئەمریكا بدەن بۆ راگرتن و كۆكردنەوەی پیتاندن و بەرنامە ئەتۆمیە مەترسیدارەكانیان، ئەوە هەر زوو ئەمریكا رێگە بەو رژێمە دەدا كە دەستی بە بازاری ئەو وەڵاتە و سات و سەودا بە دولار بگات. بەڵام لەوە غافڵ بوون كە رێكەوتنی ئەتۆمی لە ئەمریكاش نەیاری زۆری هەیە وە ئەگەر ئەوان سەركەوتوو نەبن لە راگرتنی دانوستانەكان بۆ رێكەوتن ئەوا دەتوانن لە دوای رێكەوتن بەربەستی زۆر بخەنە بەردەم رژێم و رێگە بە دەوڵەتی ئەمریكا نەدەن هەموو ئیمتیازێك بە رژێمی ئێران بدا.

هاوكات خامنەیی ئەگەر چی بە رواڵەت رازی بە رێكەوتن نەبوو بەڵام بە كردەوە دەستو پێوەندەكانی ئەوبوون تا كۆتایی رێكەوتنەكە بەشداریی دانوستانەكانیان كرد، لێرەدا خامنەیی سەرەتا دەیویست كە بە رێكەوتنەكە و دەستكەوتی ئابووری، خۆی بە پاڵەوان لای خەڵك نیشان بداو بە خەڵكی بگەێنێ كە لەبەر مشووری بۆ وەزعی خەڵك ئەو هەنگاوەی ناوە. بەڵام ئەوندەی رێگەی بۆ خۆدەرباز كردن لە ئەنجامی خراپی رێكەوتنەكە هێشتبۆوە كە ئەگەر بە دڵی ئەوان دەرنەچوو ئەوە دەستەچەورەكەی خۆی بەسەر تاقمی هاشمی و رۆحانی دا بسڕێ و بڵێ كە ئەوە لەبەر ئەوان ملی بە رێكەوتنەكە دا بەڵام قسەكانی ئەو راست دەرچوو كە ئەمریكا درۆزنەو بۆ ئەوە نابێ لەگەڵی رێبكەوین.

ئێستا وەزعی رژێم روونە كە كەوتۆتە سەر دوو رێیانیەك كە یان دەبێ بەتەواوی رێكەوتنەكە جێ بەجێ بكات و رازی بێ بەوندە ئیمتیازەی ئەمریكا و هاوپەیمانەكانی و تا دێ لە مەسەلە سیاسیەكانی دیكەشدا پاشەكشە بكات كە ئەم رێگە چارەنووسێكی نادیار چاوەرێی رژێم دەكا. یان ئەوەی لە رێكەوتن پاشگەز ببنەوەو دەست بكەنەوە بە درێژەدان بە بەرنامەی ناوكەیی، كە ئەم رێگەش دەرئەنجامی زۆر خراپی بۆ رژێم لێ دەكەوێتەوەو چارەنووسێكی مەترسیدار چاوەرێی رژێم دەكا.

لەلایەكی دیكە خامنەیی لە ناوخۆی رژێمەكەیشی دا تووشی رەقیبێكی سەرسەختی وەكوو رەفسەنجانی و رۆحانی هاتووە كە لە مەسەلە سیاسیەكان دا بەردەوام كوتكیان لەسەریەتی و بەتەواوی هەوڵی سنووردار كردنی دەسەڵاتەكانی خامنەیی دەدەن و لە گرتنەبەری هەركام لەو دوو رێگەیەی سەرەوە ئەوە تاقمی رەفسەنجانی رۆحانی قسەی خۆیان دەبێ كە بێ گوومان قسەی وان لە ئێستادا بە دڵی خامنەیی نابێ.

لە كاتێكدا خامنەیی لە رێكەوتنی ناوكەیی دا سەری بێ كڵاو ماتەوەو پەشیمانە لە ئەنجامەكانی ئەو رێكەوتنە كە خەڵكی ئێران بە دەست دەیان دیاردە و قەیرانی ئابووری و كۆمەڵایەتیەوە دەناڵێنن و هۆی ئەو كێشانەش بۆ خراپی لە بەرێوەبەری و گەندەڵی و بێ بەرنامەیی دەسەڵاتداران دەگێرنەوەو بە تەواوی بێزار بوون لە سیاسەتەكانی ئەو رژێمە. هەر لەو كاتەدا كە خەڵكی ئێران بە وەها قۆناغێكدا تێدەپەڕن، رژێم جەبهەیەكی دوور و درێژی شەڕی لە ناوچەكەدا كردۆتەوە كە لە لوبنان و سوریە دەست پێ دەكا تا یەمەن درێژەی هەیە كە ئەو شەڕەش بە داهاتو سەرمایەی خەڵكی ئێران بەرێوەدەچێ كە شەڕەكانیش هیچ ئەنجام و نەتیجەیەكیان بۆ باری ژیان و گوزەرانی خەڵك نیە، بەڵكوو بە بەردەوام بوون لە سەر ئەو شەڕانە خەڵكی ئێران دەبێ چاوەڕێی دۆخی لەوە خراپتریش بكەن.

وەك لە قسەكانی رێبەری رژێمدا دیارە ناوبراو لەگەڵ ئەوەی دیهەوێ درێژە بە رێكەوتنەكە بدات بەڵام هاوكات لەوە غافڵ نەبێ كە بەشی دیفاعی و بەرگریان بەهێز بكەن، هاوكات بە خەڵكی ئێران بڵێ كە هۆی ئەو وەزعەی ئێستا رۆحانی و رەفسەنجانین كە رێكەوتنیان كردو هیچ دەستكەوتێكیان نەبوو.
ڕێکه‌وت: 2016-09-03 12:31:05
به‌شی ( وتاری سیاسی )





دیمانه

سیاسی