له‌سه‌رهێل 135
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
خانەوادە و كێشە كۆمەڵایەتیەكان لە روانگەی رێبەری رژێمی ئێرانەوە!





رۆژی سێ شەممە 13ی خەرمانان، خامنەیی رێبەری رژێمی ئاخوندان لە رێگەی ماڵپەڕی تایبەتی خۆیەوە فەرمانێكی چەند خاڵی راگەیاند كە كۆی خاڵەكان دەرخەری سیاسەتی ناوبراوە سەبارەت بە "خانەوادە" و بەتایبەت دەوری ژنان لە كۆمەڵگەی ئێراندا. ئەم فەرمانەی خامنەیی كە بەپێی وتەی خۆیان بە راوێژ لەگەڵ ئەنجومەنی پارێزگاری لە بەرژەوەندیەكانی رژێم پەسەند كراوە، بۆ دەسەڵاتداران و دەزگاكانی رژێم نێردراوە كە بكەوێتە باری جێ بەجێ كردنەوە. رێبەری رژێم لە یەكێك لەو خاڵانەدا تیشك دەخاتە سەر پێگەی ژن لە ماڵدا، كە خۆی لە "هاوژینی، دایكایەتی و ماڵداری" دا دەبینێتەوەو چالاكیە ئابوریەكان بەتەواوی دەهێڵێتەوە بۆ پیاوان و روولە سەرانی رژێمەكەی دەكا و دەڵێ: لە گەورەیی و كەرامەتی هاوژین، دەوری دایكانە و ماڵداری بۆ ژنان و لە دەوری باوكایەتی و ئابووری بۆ پیاوان پشتیوانی بكەن. لە بەشێكی ئەو فەرمانەی رێبەری رژێمدا ئیشارە بە پەرەسەندنی تەڵاق كراوەو دەزگاكانی رژێمەكەی راسپاردوە كە هۆی پەرەسەندنی ئەو دیاردەیە بدۆزنەوەو كار بۆ چارەسەری بكەن، بەڵام هەر خۆی پێشنیار دەكا كە بەر بە بڵاوبوونەوەی هەندێ بەرنامەی تەلەفزیونی تێكدەری بنەماكانی خانەوادە ، بەرنامەی نەرمی دژمنان بۆ لەبەریەك هەوەشانی خانەوادە، بەربەرەكانێی ئەشرافیەت و ژیانی ئاغاواتی و پەیرەوكردنی فەرهەنگی رۆژئاوایی بگرن. وە هەلێكی لەبار بۆ جێ بەجێ كردنی پەیوەندە ئیسلامیەكانی ژن و پیاو لە كۆمەڵگە، بە چاولێكەری لە بەرنامە ئیسلامیەكان و پەرەپێدانی رێ و شوێنی ئیسلامی/ ئێرانی برەخسێنن!. هاوكات تەئكید لە سەر ئەوە دەكاتەوە كە خانەوادەكان كار بۆ منداڵی زۆر بكەن و ئەوە بكرێتە بەرنامەیەكی گشتی و چاودێری سەلامەتی خانەوادە بەتایبەت بۆ منداڵ بوون بكرێت و ئاسان كاری بۆ ئەو ژنانەی كە سەرپەرەستی خانەوادەن بكرێت كە شوو بكەنەوە. خامنەیی وەلی فەقیهی رژێم لە كاتێكدا فەرمانێكی لەو جۆرە دەدا كە كۆمەڵگەی ئێران بە دەست دەیان كێشە و دەرد و دیاردەی كۆمەڵایەتیەوە دەناڵێنێ و خەڵكی ئێرانیش سیاسەتەكانی خودی رژێم بە هۆی سەرهەڵدانی ئەو هەموو خەسارە كۆمەڵایەتیە دەزانن و رۆژ لە دوای رۆژ زیاتر پەرە دەستێنن، وە دەسەڵاتدارانی رژێم هیچ پلان و بەرنامەیەكی ئوتۆیان نیە بۆ چارەسەری دیاردە كۆمەڵایەتیەكان. رژێمی ئاخوندی هەر لە سەرەتای دامەزرانیەوە تا ئێستا كاری بۆ ئەوە كردوە بە ناوی جۆراوجۆرەوە ژنان لە چوارچێوەی ماڵدا بێڵنەوەو رێگە بە چالاكی ژنان نەدەن بەشداری لە مەسەلە كۆمەڵایەتی و سیاسی و ئابووریەكان دا بكەن بۆیە هەر چەند ساڵ جارێكی رێبەری رژێم بە كۆمەڵێك فتواو فەرمانی نالۆژیكی هانی دەزگاكانی ژێر فەرمانی دەدا بەربە بەشداری ژنان لەو مەسەلانەدا بگرن. بەڵام وەك كۆمەڵناسان ئیشارەی پێدەدەن ژنانی ئێران لەو پێستە سونەتیە دەرچوون و لە ئێستادا بەرزترین پلەكانی خوێندن تەواو دەكەن و جۆرێك لە یاخیبوونیان پێوەدیارەو هەوڵ دەدەن بۆ لادانی ئەو بەربەستە سیاسی و دینیانەی دەخرێتەبەردەمیان. لەلایەكی دیكە خامنەیی بە ئانقەست پەرەسەندنی تەلاق دەبەستێتەوە بە فەرهەنگی رۆژئاوایی و بەرنامەی تەلەفزیۆنی، مەبەست لەم كارەش دەگەرێتەوە بۆ ئەوەی ناوبراو هەوڵدەدا خەڵك بەلارێدا بەرێ لە ناسینی هۆی سەرەكی كێشەكانی كۆمەڵگەو یەك لەوان تەلاق، چوونكە لەلایەك ژنان هەوڵ بۆ بەشداری لە كۆی پرسە كۆمەڵایەتی و ئابووریەكان دەدەن و حەز بە وابەستەیی بە پیاوان ناكەن و هەوڵی ژیانێكی مساوات لەگەڵ پیاوان دەدەن، هاوكات مەسەلەی بێكاری كێشەی دابین كردنی بژیو وە كەل و پەلی ژیان هۆی سەرەكی پەرەسەندنی تەلاق و هەڵوەشانی خانەوادەن. لە كاتێكی وادا لاوان توانای دابین كردنی پێداویستی هاوسەرگیری و بەرێوەبەری خانەوادەیان نیە چۆن دەتوانن خانەوادە پێكەوەنێن و ببنە خاوەن منداڵێكی زۆر وەك ئەوەی رێبەری رژێم داوای دەكا؟. بەڵێ واقیعی كۆمەڵگەی ئێران ئەورۆكە ئەوەیە كە تەڵاق لە هاوسەرگیری زیاترە، ئەوەش دەگەرێتەوە بۆ بێ بەرنامەیی بۆ نەبوونی هەلی كار بۆ لاوانی ئەو وەڵاتەو پەرەسەندنی بێكاری، گرانی و هەڵاوسانی ئابووری. ئەوەی كە خامنەیی فەرمان دەدا بە دامودەزاگاكانی رژێم پەرە بە بەرنامە ئیسلامیەكان بدەن! بەشێكی بۆ ئەوە دەگەرێتەوە كە بەهۆی ئەو كێشانەی لەسەرەوە باس كران مەسەلەی زەواج و هاوسەرگیری رەسمی و بەجێ هێنانی دابونەریتەكان قورساییەكی زۆری لای خەڵك دروست كردوە، بۆیە لەئێستادا مەسەلەی هاوسەرگیری سپی (ازدواج سپید یان سفید) لە ئێراندا پەرەسەندوەو ئەو جۆرە هاوسەرگیریەش بەپێی بەرنامەكانی رژێم بە ناشەرعی دەزانرێ و لە ئەگەری گشتگیر بوونی دا دەبێتە مەترسیەك بۆ سیاسەتەكانی تایبەت بە خانەوادەی رژێم. كۆتا قسە ئەوەیە خامنەیی بەم جۆرە فەرمانانە نیشان دەدا كە رژێمەكەی لاواز و بێ توانایە لە چارسەری كێشە كۆمەڵایەتیەكان و ترسێكی زۆریشی لە پەرەسەندنی زیاتری ئەو دیاردانە هەیەو بەو جۆرە فەرمانانە هەوڵی بەلارێدا بردنی خەڵك دەداو هەوڵ دەدا ئەوە بڵێ كە ئەو كێشانەی ئەورۆكە داوێنی خەڵكیان گرتووە پیلانی رۆژئاواییەكانەو بە گەرانەوە بۆ بنەما ئیسلامیەكانی ئاخوندان، ئێران دەبێتە شامی شەریف! لەلایەكی دیكە ئەوە بە دەسەڵاتداران دەڵێ كە بەشداری ژنان لە كۆی پرسەكانی كۆمەڵگە مەترسی لەسەر بەرنامە پەیرەوكراوەكانی ئەوان دروست دەكا. هەروەها بە پێویستی دەزانێ‌ پەیوەندە كۆمەڵایەتیەكان بەتایبەت "هاوسەرگیری" لە سەر ئەو بنەمایانەی كە ئەوان مۆركی دینی پێوەدەنێن رێكبخرێت.

 




ڕێکه‌وت: 2016-09-05 22:48:25
به‌شی ( وتاری سیاسی )





دیمانه

سیاسی