له‌سه‌رهێل 90
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
قەیرانی كەم ئاوی لە ئێران

قەیرانی ئاو لە ئێرانی ژێرچەپۆكی رژێمی ئاخوندان، دەسەڵاتداران وەك كارەسات و بومەلەرزە ناوی دێنن و هاوڵاتیانیش لە ناوچە گەرمەسێرەكان لەگەڵی دەستەویەخە بوون، لەلایەن مێدیا نێونەتەوەییەكانەوە گرینگی و سەرنجی زۆری دەدرێتێ.

رۆژنامەی لوسانجلس تایمز لە راپۆرتێكدا سەبارەت بە قەیرانی ئاو لە ئێران نووسی: پەرەسندنی قەیرانی ئاو لە ئێران نائومێدی لە سەرانسەری ئەو وەڵاتە دروست كردوە. خانەوادەكان دەبینن كوڕەكانیان بۆ كاركردن ناچار دێهات بەجێ دێڵن و بۆ شار كۆچ دەكەن.  
بەرهەمی جوتیاری واز لێدێنن. كەسانی پیر و نەخۆش لەبەر گرانی واز لە خزمەتگوزاری تەندروست دێنن چوونكە ئەوندەیان پوڵ نیە دەرمانی نەخۆشیەكانیان بكڕن و زیندوو بمێنن.

ئەو رۆژنامە لە درێژەدا دەنوسێ: جوتیارانی ئێران وەكوو هەندێ شوێنی دیكەی جیهان، بۆ چەندین تووشی وشكەساڵی بوون. بەڵام بەهۆی لاوازی بەرێوەبەری ژینگەیی، زیادەرەوی لە بەكار هێنانی ئاو، زیاد بوونی رێژەی خەڵك و حكومەتێك كە لە باری ئاسایش و ئابووری كێشەی گەورەی هەیە، بوونە هۆی زیادبوونی دەرد و مەینەتی جوتیارانی ئێران. زۆرێكیان نیگەرانی لە دەستدانی مەعیشەت و كارەكانیانن. زەوی جوتیاری كەمتر دەبێتەوە و خەڵكیش خەریكی چۆلكردنی دێهاتەكانن چوونكە لەو هەلومەرجەدا داهاتوویەكی روون بەدیی ناكەن. زۆرێك لە لاوانی گوندەكان ئومێدیان بە داهاتوو نیە و كۆچیان كردوە بۆ شارەكان.

دەسەڵاتدارانی رژێمیش دانیان بەبوونی ئەو قەیرانەدا ناوە. چیت چیان وەزیری وزەی حكومەتی رۆحانی گوتی: هەندێ لە كارناسان لەو باوەڕەدان كە ئێران خەریكی هەڵگرسانی شەڕە لەسەر ئاو.

ناوبراو لە درێژەدا دەڵێ: ئێران ساڵەهایە لەگەڵ قەیران ئاودا دەست و پەنجە لێدەدا. لە زستانی ساڵی رابردووەوە دەزگا پێوەندیدارەكان چەندین جار لە ئەگەری سەرهەڵدانی كێشەی بێ ئاوی لە وەڵاتدا وریایی دەدەن.

یەكێك لە راگەیێنەكانی سپاس پاسدارانیش لە بارەی هەلومەرجی ئاو لە تاران نووسی: زەنگی مەترسی قەیرانی ئاوی خواردنەوە لە تاران لێدراوە، ئەو كەسانەی لە عەمارە و ئاپارتمانەكان لە نۆهەمی سێ بۆ سەرەوە دەژین، ناچارن بۆ بەكارهێنانی ئاوی بۆری "لولە" پۆمپی بەهێز بەكار بێنن بۆ ئەوەی ئاوەكە راكێشێ. دانانی پۆمپی ئاو لە بیناكانی شاری تاران بۆتە هۆی ئەوەی فشاری ئاو كەم بێتەوە، لەو حاڵەشدا ئەوانەی پۆمپ بەكار ناهێنن توشی كێشە بوونەتەوە. هەروەها 350 ملوێن میتری چوارگۆشە ئاوی تاران پاشەڕۆ و پیسایی تێكەل بووەو بۆ بەكارهێنان نابێ.

لە همان كاتدا یەكێك لە مۆرەكانی رژێم لە وەزارەتی وزە سەبارەت دۆخی ئاوی ژێرزەوی گوتی: قەیرانی ئاوی ژێر زەوی كارەساتبارەو لە داهاتوودا ئاسارەكانی دەردەكەوێ. زەنگی مەترسی سەبارەت بە ئاوی ژێر زەوی لێدەراوە.

هۆی سەرەكی تووش بوونی ئێران  بە قەیرانی ئاو هەر وەك لە نووسینەكەی لوسانجلس تایمزدا هاتووە بەرێوەبەری لاوازی ژینگەیی و بێ بەرنامەیی لە بەكارهێنانی ئاو زیادەرەویە و ئەوەش دەگەرێتەوە بۆ سیستەمی دەسەڵاتداری كە لە ئێستادا ئاخوندان جڵەوی ئەو دەسەڵاتەیان بەدەستە.

ئاخوندان لە ماوەی 37 ساڵ دەسەڵاتداریاندا هەر خەریكی بەرنامەی مەترسیداری ناوكەیی و كۆمەڵكوژی و هەناردەكردنی ترۆریزم و دەستێوەردان لە وەڵاتان و ئاژاوەگێڕی و هەناردەكردنی فكری بۆگەنیان بۆ وەڵاتان بوون، بۆیە ئێران و خەڵكەكەی تووشی دەیان قەیرانی جۆراوجۆری مەترسیدار بوون كە قەیرانی ئاو یەك لەو قەیرانانەیەو تا دێ ئەو قەیرانە زیاتر پەرەدەستێنێ و دەسەڵاتداران هیچ بەرنامەیەكیان بۆ چارەسەری نیە.

بێگومان گەورەترین قەیران كە بەرۆكی خەڵكی وەزاڵەهاتووی ئێرانی گرتووە خودی دەسەڵات و سیستەمی ئاخوندانەو هەتا ئەم قەیرانە چارەسەر نەبێ تا دێ قەیران و دیاردەی زیاتر بەرۆكی خەڵك دەگرێ.
ڕێکه‌وت: 2016-10-07 12:10:54
به‌شی ( وتاری سیاسی )





دیمانه

سیاسی