له‌سه‌رهێل 70
شه‌ممه‌ 27 خه‌رمانان 2721
سازمانی خه‌باتی کوردستانی ئێران
رژێمی ئێران و پەتای مەوادی هۆشبەر لە نێو ژناندا!

دیاردەی ماڵوێرانكەری خووداربوون بە مەوادی هۆشبەر و بڵاوبوونەوەی بەتایبەت لە نێو ژناندا، یەكێكە لە خاڵە رەشەكانی كارنامەی رژێمی خۆسەپێنی ئێران.

ئەگەر تا دوێنێ ژنانی تووشبوو بە زۆری لە ناوچە هەژارنشینەكان و لە پەراوێزی شارە گەورەكان دەژیان، ئێستا ئەو بەڵایە تێكڕای گەڕەكەكانی شارەكان و كۆمەڵگەی گرتۆتەوە، بەشێوەیەك كە حەتا ساڵۆن و باشگا وەرزشیەكانی تایبەت بە ژنانیش بووەتە شوێنی كڕین و فرۆشتنی ئەو مەوادانە.

بۆ پشتراست كردنەوەی ئەو قسه  ئەوە بەسە كە هەواڵدەری حكومەتی ئیرنا 1ی پووشپەڕی 1395 لە زمانی شەهیندوخت مولاوێردی جێگری ئاخوند رۆحانی بۆ كاروباری ژنان و خانەوادەوه بڵاوی كردەوە  كە: ئەورۆ باسی خووداربوون و گیرۆدەبوونی ژنان شێوەیەكی نوێی بەخۆیەوە گرتووە، لە ناوچە  هەژارەكان و پەراوێزی شارەكانەوە بۆ ئاستێكی زیاتر و بەربڵاوتر لە كۆمەڵگا حەتا ناوەندەكانی وەرزش و ئارایشگاكانی ژنانیش پەرەی سەندوە، هەر چەند رێژەكە كەمەو جێی بایەخ و سەرەنج نیە بەڵام لە باری كۆمەلایەتی و فەرهەنگیەوە ناكرێ بە هاسانی چاوپۆشی لێ بكرێ.

ئەم كارەساتە بە جۆرێكە كە داوێنی كۆرپەی ژنانی موعتادیشی گرتووەو بەشێوەیێكە كە لە ئێراندا رۆژانە زیاتر لە 200 منداڵی موعتاد لەدایك دەبن.

ماڵپەڕی حكومەتی "صدای ایران" 19ی گەلاوێژی 95 لە زاری یەكێك لە مۆرەكانی رژێم بەناوی فاتیمە دانشوەرەوە بڵاوی كردەوە كە: وەزیر فەرمانی دا كە ئەو منداڵانەی دایكیان موعتادەو ئەوانیش خوودارن بەدواداچوونیان بۆ بكرێ. لە دوای ئەو بەدواداچوونانە تەنیا لە 5 نەخۆشخانە 150 منداڵ لەدایك بوون كە خووداربوون بە مەوادی هۆشبەر.

لە پێوەند بە دۆخی ئەو كۆرپانەی گیرۆدەبوون، رۆژنامەی حكومەتی "همشهری" 14ی پووشپەری 95 نووسی: ئەگەر ژنانی موعتاد بە 200 هەزار كەس بەراورد بكەین، حەتا ئەگەر كەمتر لە یەك لە سەر چواریان كارتۆن خەو بن و پێوەندی مەترسیداری جیاجیاو بەردەوامیان هەبێ، لە كۆتایی دا بەردەوام دووگیان بن و هەركام لەوانە سێ منداڵی ببێ لە داهاتوویەكی نزیكدا لەگەڵ 300 هەزار منداڵی موعتاددا بەرەوڕوو دەبین.

دیاپێدانانی دەسەڵاتدارانی رژێم بە پەرەسەندنی بێ وێنەی خوودارو گیرۆدەبوون لە نێو ئافرەتاندا:

رەوتی پەرەسەندنی خووداربوون و بەكارهێنانی مەوادی هۆشبەر لە ئێراندا بە رێژەیەكە كە دەسەڵاتدارانی رژێم كە خۆیان لە هۆكانی بڵاوبوونەوەو پەرەسەندنی ئەو مەواده لە نێو لاوان و ژناندان، لە ئاكامەكەی ترساون و ئێعترافی پێ دەكەن.

لەو نێوەدا خووداربوون و كارتۆن خەویی تەنیا رێگەیەكە كە رژێمی گەندەڵ و دژە ژنی ئاخوندان بۆ ژنانیان بە كراوەیی هێشتۆتەوە:

هەواڵدەری حكومەتی ئیسنا 17ی خەرمانی 95 لە زاری جێگری سەركردەی ستادی بەرنگاری لەگەڵ مەوادی هۆشبەر نووسی: هەموومان دەزانین و دیانیپێدا دەنێین كە رۆژێ پیاوەكان روویان لەم دیاردە شوومە دەكرد، بەڵام ئێستا ئەم نەخۆشیە كۆڵەكەی ماڵ و خانەوادە یانی ژنان و منداڵەكان گیرۆدەی بوون.

هەواڵدەری ئیرنا 1ی پووشپەڕی 1395 لە زمان شەهیندوخت مەولاوێردی جێگری ئاخوند رۆحانی بۆ كاروباری ژنان و خانەوادە بەو شێوە دەنووسێ: ئێستا پەرەسەندن و بەرزبوونەوەی رێژەی خووداربوون بە مەوادی هۆشبەر لە نێو ژنان زووتر لە پیاوان روودەدا و كاردانەوەی خووداربوونی ژنێك لە كۆمەڵگە و زیانەكانی ناراستەوخۆ دەیان جار زیاترە لە تووش بوونی پیاو.

ناوبراو لە درێژەدا سەبارەت بەوەی كە زیاتر لە 63 لەسەدی حەشیمەتی موعتادان لە خێزاندارەكان پێكدێ، دەڵێ: ئامارەكانی تایبەت بە پەرەسەندنی تووشبووان بە مەوادی هۆشبەری پیشەسازی لە نێو توێژی خوێندەوار ئەوەمان پێ دەڵێ كە 9 لەسەدی كوڕان و 11 لەسەدی كچانی خوێندكار لە زانستگا دەوڵەتیەكان روویان لە بەكارهێنانی حەب و دەرمانەكانی تێكەڵ بە مەوادی هۆشبەر كردوە. هەروەها توێژینەوەكان دەرخەری ئەوەن كە 50 لەسەدی ژنانی موعتاد لە تەمەنی 15 بۆ 19 ساڵ، روو لە بەكارهێنانی ئەو مەوادە دەكەن.

هەواڵدەری تەنسیمی سەربە سپای پاسداران 27ی پووشپەری 1395 بابەتێكی لەژێر ناوی "خووداربوونی ژنانی دووكەڵ كێش لە چاوی خانەوادە" بڵاوكردەوە كە لە زمانی عەلی رەبیعی وەزیری كار و خۆشگوزەرانی كابینەی رۆحانی سەبارەت بە پەرەسەندنی ئەو نەخۆشیە لە نێو ژناندا دەنووسێ: لەمرۆدا رێژەی خووداربوونی ژنان لەچاو پیاوان لە 4 لەسەدەوە بۆ 10لەسەد زیادی كردوە.

هەواڵدەری حكومەتی خوێندكاران ناسراو بە ئیسنا 6ی پووشپەری 1395 لە زاری بەرێوەبەری شۆرای هاوئاهەنگی بەرنگاربوونەوەی مەوادی هۆشبەر لە پارێزگا ئیسفەهان نوسی: بەكارهێنانی مەوادی هۆشبەر لە نێو خوێندكاران لە 4 بۆ 6 لەسەد زیادی كردوە، بەكارهێنانی مەوادی هۆشبەری پیشەسازی لە كچانی خوێندكار 2.5 زیاترە لە كوڕان.

ئەو مۆرەی رژێم لە درێژەدا ئیعتراف بەوە دەكا كە: لە ئێستادا 1 لەسەدی قوتابیەكانی وەڵات خوودارو گیرۆدەی ئەو مەوادە بوون، وە تەنیا لە شاری ئیسفەهان لە حەوتوویەكدا 3 منداڵی موعتاد لەدایك دەبێ، هەر 2.5 دەقە كەسێك لە ئێران تووشی مەوادی هۆشبەر دەبێ، وە لە ئێراندا هەر سێ سەعات كەسێكی 30 بۆ 35 ساڵە بەهۆی زیادەرەوی لە بەكارهێنانی مەوادی هۆشبەر دەمرێ.

هەواڵدەری فارس كە سەربە سپای پاسدارانە 24ی گەلاوێژی 1395 لە زاری جێگری بەرێوەبەری گشتی ناوەندی بەرنگاربوونەوە لەگەڵ مەوادی هۆشبەر نوسی: بەداخەوە لەمرۆدا لە شارە گەورەكان حەشیش و كۆكائین بۆ هێندێ لە ژنان و كچانی دەسترۆیشتوو بۆتە جۆرێك لە رێ و شوێنی ژیان و هەرئەو شێوە بەكارهێنانە هەڵەیە بۆتە سەرەتایەك بۆ تووشبوون و خووداربوونى هەمیشەيى، هاوكات  لە هەندێ كاتدا بۆ دابەشكردن و گواستنەوەی ئەو مەوادەش ژنان بەكار دێنن.

رادیۆ فەردا 15ی خەزەڵوەری 94 لە زمان جێگری رۆحانی بۆ كاروباری ژنان و خانەوادە راپۆرتی دا: "خووداربوون بەشێوەی مامناوەند" لە نێو كچاندا بۆ 13 ساڵ دابەزیوەو ئەو بابەتە  گرینگترین كۆسپی وەڵاتە لە كاروباری ژنان  و خانەوادەدا.

ترس و دڵەڕاوكێی رژێم لە بڵاوكردنەوەی ئاماری دروستی موعتادانی وەڵات:

بەپێی ئامارە فەرمیەكان كە لەلایەن رژێمەوە بڵاوكراوەتەوە، ئاماری موعتادان یەك ملوێن و سێ سەد هەزار كەسە كە لەو رێژەیە 10 لەسەدی  ژنان پێكى دێنن. بەڵام پەرەسەندنی تووشبوونی ژنان لەم ساڵانەی دوایی دا ئەوندە بەرچاوە كە سەرانی رژێم ترسیان لە دەرئەنجامە كۆمەڵایەتیەكانی هەیە هەر بۆیە هەوڵی پەردەپۆش كردنی دەدەن و ئاماری ناراست لەو بارەوە بڵاودەكەنەوە.

سالاری مورادی ئەندامی كومسیۆنی كۆمەڵایەتی مەجلیسی رژێم لە لێدوانێكدا بۆ هەواڵدەری جامی جەم 14ی بەفرانباری 1393 ئاشكرای كرد: دەزگاو ناوەندە جۆراوجۆرەكان كە بە جۆرێك لەگەڵ دیاردەی خوورداربوون بەرەوڕوو بوون و بە شێوەی راستەوخۆ و ناراستەوخۆ بەرپرس بوون لە بەرەوڕووبوونەوەی ئەو قەیران و هەوڵی چارەسەر كردنی دەدەن، بە هۆی جیاوازى وەك " دروست نەبوونی بشێوی و ترس لە كۆمەڵگە" لە وتنی ئاماری دروست و راست خۆدەبوێرن.

رادیۆ دۆیچەوێلەی ئاڵمان لە وتارێكدا لە ژێرناوی " پەردەپۆشيی بە ئاماری ناتەبا" رایگەیاند: بەرپرسانی كۆماری ئیسلامی بەردەوام هەوڵدەدەن بە بڵاوكردنەوەی ئاماری ناراست و ناتەبا ئەسڵی ماڵوێرانیەكە رەد كەنەوە. بۆ نمونە سەرۆكی ناوەندی هاوئاهەنگی بەرنگاربوونەوە لەگەڵ مەوادی هۆشبەری پارێزگای ئەردەبێڵ، ژمارەی موعتادانی ئەو پارێزگایەی 3لەسەدی تێكڕای حەشیمەت راگەیاندوە، بەڵام رۆئیا ئەحمەدیان بەرێوەبەری گشتی رێكخراوی بێهزیستی ئەو ئوستانە گوتوویەتی كە موعتادان تەنیا 1/5 لەسەدی حەشیمەتی پارێزگای ئەردەبێڵ پێكدێنن. بەسەرنجدان بەو ناتەباییانە، سەیر نیە وەزیری ناوخۆی كۆماری ئیسلامیش دیاردەی خووداربوون بە كێشەیەكی بچووك ناو ببات.

رۆژنامەی ئینتخاب 24ی بەفرانباری 1390 لە زمانی داریوشی قەنبەری، ئەندامی كومسیۆنی كۆمەڵایەتی مەجلیسی رژێم نووسی: ئێمە دووهەمین وەڵاتی بەكارهێنەری مەوادی هۆشبەر لە جیهانین، ئەوە قەیرانێكی مەترسیدارە بۆ وەڵاتەكەمان. یەكێك لە كێشەكانی وەڵات لەبارەی دیاردەی مەوادی هۆشبەر، ئەو ئامارانەیە كە بەرپرسان بڵاوی دەكەنەوەو ئاماری دروست و راست بڵاوناكەنەوە. لە یەك ملوێن و نیو تا 7 ملوێن جیاوازی زۆرە.

ماڵپەڕی حكومەتی عەسری ئێران 6ی پووشپەری 1395 لە زمانی عەلی هاشمی سەرۆكی كۆمیتەی سەربەخۆی بەرنگاربوونەوەی مەوادی هۆشبەری كۆری لێكدانەوەی قازانجەكانی رژێم نووسی: ساڵی 1366 لە حەشیمەتێكی 50 ملوێنی، دوو ملوێن موعتادمان هەبوو. ئەو ئامارە لە ساڵی 1383 لە 68 ملوێن كەس، بۆ دوو ملوێن و 500 هەزار موعتاد و یەك ملوێن و 260 هەزار كەس كه بۆ خۆخڵافاندن و حەزو خۆشی  بەكاریان هێناوە، بەرز بوویەوە، كه بەگشتی دەكاتە 3 ملوێن و 760 هەزار بەكارهێنەر. ئەمە ئامارێك بوو كە پێش ساڵی 1385 بڵاو دەكرایەوە، بەڵام ئەو ئامارە لەلایەن دەوڵەتەوە یەكجێ  بۆ 750 هەزار و 800 هەزار كەس لە حەشیمەتی 70 ملوێنی كەم كرایەوە. هەر لەم ساڵانەدا بوو كە كەم كردنەوەی ئامارەكان كاردانەوەی لە سەر  چالاكیەكانی ناوەند هەبوو. ئاخرین ئامارێك كە لە بارەی موعتادانەوە بڵاوكرایەوە لە ساڵی 1390دا بوو كە لە نێو حەشیمەتێكی 75 ملوێنی، یەك ملوێن و 330 هەزار موعتاد راگەیندرا. بەداخەوە ئاماری ناراست سەبارەت بە تووشبووانی مەوادی هۆشبەر كۆسپی لە بەردەم بەرنگاربوونەوەی ئەو دیاردەدا دروست كرد.

 

دیانپێدانانی دەسەڵاتدارانی رژێم بە ئاماری گیرۆدەبووان:

پەرەسندنی تووشبوون بە مەوادی هۆشبەر لە ژێر سایەی دەسەڵاتی فاشیزمی مەزهەبی دا یەكێكی دیكەیە لە دەستكەوتەكانی ئەو رژێمە. پەتاى خووداربوون لە ژنان، لاوان و قوتابیان و منداڵانی وەڵاتدا وەها پەرەی ساندووە كە رادیۆ ئاڵمان 20ی جۆزەردانی 1395 گوتی: لە رۆژدا 3 بۆ 4 مندالی خوودار بە مەوادی هۆشبەر لە تاران لە دایك دەبن.

بە سەرنجێك لەسەر چاپەمەنیەكانی رژێمدا دەتوانين به گۆشەیەك لەو راستیەی كه لە كۆمەڵگەی ئێران دەگوزەرێ ئاشنا بین:

رۆژنامەی حكومەتی ئیلنا 12ی پووشپەری ئەوساڵ لە زمانی یەكێك لە دەسەڵاتدارانی رژێم بەناوی مورتەزا عاسمیەوە نووسی: ئەورۆ ئاماری تووشبووانی وەڵات سەرسووڕهێنەرە، فرۆشتنی مەوادی هۆشبەر و گیرۆدەبوونی بەهۆی بێكاری لە پەرەسەندندایە. ئاماری دروستی موعتادانی ئێمە 3 ملوێن كەس نیە، بەڵكوو زیاترە لە 5 ملوێن و 800 هەزار كەس.

ماڵپەڕی خەبەریی عەسری ئێران یەكی رەشەمەی 1391 لە زمانی یەكێك لە كارناسانی باری كۆمەڵایەتی نووسی: بەپێی ئەو لێكۆڵینەوانەی لە كۆمەڵگەدا كراوە بۆ بەدەست هێنانی ئاماری دروست دەبێ ئامارە فەرمیەكان دوو ئەوندە بكەین. بەو پێیەی دەڵەن دوو ملوێن موعتاد بوونی هەیە دەتوانم بڵێم لە وەڵاتی ئێمەدا چوار ملوێن كەس موعتادە. ئەگەر ستانداردی خانەوادەیەك چوار كەس یانی ژن و پیاو دوو منداڵ لەبەرچاو بگرین، یانی 16 ملوێن كەس راستەخۆ گیرۆدەی ئەو دیاردەیەن. بەو پێیە 8 ملوێن لەو ئامارە منداڵن. ئەگەر نەڵەین لەو هەشت ملوێنە هەمویان موعتادن لانی كەمی سێ ملوێن كەسیان تووشبوون. ئەوە تەنیا رێگەیەكە بۆ بەدەست هێنانی ئاماری مندڵانی موعتاد له وەڵات.

هەواڵدەری حكومەتی مێهر 2ی رەشەمەی 1394لە زاری ئەندامێكی مەجلیسی رژێمەوە نووسی: بەپێی راپۆرتەكان تەمەنی تووشبوون بە مەوادی هۆشبەر بۆ 13 ساڵی دابەزیوە.

ئەو ئەندامەی مەجلیس لە درێژەدا گوتی: بەپێی ئەو ئامارانەی ناوەندی بەرەنگاربوونەوەی مەوادی هۆشبەر، بڵاوی كردوەتەوە 1 لەسەدی قوتابیانی وەڵات گیرۆدەبوون و ژمارەیان دەكاتە 130 هەزار قوتابی، بەڵام بەرپرسانی ئیدارەی فێركردن و بارهێنان ئەو ئامارەیان قەبووڵ نیە. 130 هەزار قوتابی موعتاد تەنیا ئەوانەن كه بەبەردەوامی مەواد بەكار دێنن و بەتەواوی گیرۆدەبوون. بەڵام سەبارەت بەو قوتابیانەی بۆ خۆخڵافاندن و خۆشی ئەو مەوادە بەكار دێنن ئامارێك لەبەر دەستدا نیە، دەنا ئەو ژمارەیە لەوە زۆر زیاترە.

هەواڵدەری حكومەتی ئیرنا 7ی بەفرانباری 1392 لە زاری رەسوڵی خزری نوێنەری رژێم لە مەجلیس نووسی: لە ئێستادا چوار ملوێن كەس گیرۆدەی مەوادی هۆشبەر بوون وە دەبێ ئەو مەسەلەیەش لەبەرچاو بگرین كە ئەو ژمارە خێزاندارن و ئەو خانەوادانەش بەهۆی ئەو دیاردەوە لەبەر یەك هەڵوەشاون یان خەریكە هەڵدەوەشێن و دەبنە هۆی خەسارى ئابووری و رۆحی.

هەواڵدەری تەنسیم ی سەربە سپای پاسداران 3ی رەزبەری 1395 لە زمانی یەكێك لە بەرپرسانی رژێمەوە بەناوی محەمەد رەزا ئیبراهیمی نووسی: دابەزینی تەمەنی گیرۆدەبوون لە پاریزگای فارس كە لە ئێستا 14 بۆ 16 ساڵەو تەنیا لەو پارێزگایە 120 بۆ 150 هەزار كەسی تووشبوو تۆمار كراوە، بەڵام ئاماری دروست لەوە زیاترەو لەو رێژەیە 3 بۆ 3هەزار 500 موعتادی تۆخ و تەزریقی لە ئاستی شیرازدا بوونی هەیە، بەڵام ئەو ئامارە لەگەڵ ئاماری ئەو مەوعتادانەی لە ناوەندەكانی ئێمە لە ژێر چارەسەردان جیاوازی هەیە.

ماڵپەری پارسینە 19ی گەلاوێژی 1393 لە زمانی رەسوڵ زەرگرپوور، پارێزگاری ئیسفەهان نووسی: لە كاتێكدا ئاماری ژنانی موعتادی وەڵات 16 لەسەدە، لە ئوستانی ئیسفەهان ئەو ئامارە دوو ئەوندەیە.

ئەو سەرچاوە لە درێژەدا دەنووسێ: ئەگەر حەشیمەتی ئیسفەهان بە 5 ملوێن بخەمڵێنین 95 هەزار كەس لەو پارێزگایە گیرۆدەی مەوادی هۆشبەرن و لەو رێژە موعتادە 8500 كەسیان ژنن. هەروا درێژە دەدا: ئەو ئامارە ئەو كەسانە دەگرێتەوە كە بەپێی پێناسەی موعتاد ئەگەر مەواد بەكار نەهێنن تووشی خوماری دەبن و بۆ ئەوەی سەرخۆش بن بەردەوام رێژەی بەكارهێنانەكەیان زیادتر دەكەن و دەبێ بەردەوام بەكاری بێنن.

ئەم دۆخە لە كاتێكدایە كە زۆرجار ئەوە ئاشكرا كراوە  كە باندەكانی قاچاخ لەناوخۆی ئێران لە ژێر سێبەری دەسەڵاتدارانی سەرەكی و سپای پاسداران دان و بۆ ئەوان كار دەكەن . لەمرۆدا بەرهەمهێنان و دابەشكردنی مەوادی هۆشبەر بۆتە تجارەتێكی بەسوود، وە وەها لەگەڵ قازانجەكانی سپای پاسداران و وەزارەتی ئیتلاعاتدا گرێى خواردووە كە تەنیا بە لەناوچوون و روخانی رژێمی ئاخوندی كۆتایی پێ دێ.
ڕێکه‌وت: 2016-10-13 10:39:11
به‌شی ( وتاری کۆمه‌ڵایه‌تی )





دیمانه

سیاسی