له‌سه‌رهێل 94
دووشه‌مه‌‌ 27 گوڵان 2721
سازمانی خه‌باتی کوردستانی ئێران
هەواڵەكان تایبەت بە كوردستان و ئێران

دوو بەندكراوی كورد بۆ گرتووخانەی ورمێ گوازرانەوە

خەباتمێدیا: بەپێی هەواڵەكان، دوو هاووڵاتیی خەڵکی شنۆ کە چوار مانگ لەوەپێش دەستگیربوون، بۆ دووهەمین جار بۆ زیندانی ورمێ بەڕێ کرانەوە.

بەپێ هەواڵی ماڵەپەڕی هەنگاو، کەماڵ مەسرووری و جەماڵ مەسرووری کە دوو هاوڵاتی کوردی خەڵکی شنۆن، بۆ جاری دووهەم لەلایەن هێز و ناوەندە سەركوتگەرەكانی رژێمی تارانەوە، گوازراونەتەوە بۆ زیندانی ورمێ.

بەپێی هەواڵ، سەرەڕای ئەوەی كەماڵ بەهۆی ئەشکەنجەوە شان و پشتی ئازاری پێگەیشتووەو پێویستی بە چارەسەریی پزیشکی هەیە، ڕوانەی زیندانی ورمێ کراوەتەوە. کەماڵ و جەماڵ مەسرووری لە دانیشتوانی گوندی قرەسەقل سەر بە شاری شنۆن و پاش تێکهەڵچوونی پێشمەرگەو هێزە داگیركەرەكانی رژێم لەو گوندە دەستگیر كرابوون.

ئەم دوو هاووڵاتییە پاش دەستبەسەرکران بۆ زیندانی ورمێ گوازرابوونەوە و دواتر گەڕێندرابوونەتەوە زیندانی شنۆ و بە بارمتەی 500 ملیۆنی ئازاد کرابوون. بەڵام لە دوای ماوەیەك دیسانەوە بانگ دەكرێنەوەو دەیانبەن بۆ زیندانی ورمێ.

به‌ندكراوێکی كورد له به‌ندیخانه‌ی ره‌جایی شار له‌ژێر فشاردایه

خەباتمێدیا: به‌پێی هەواڵەكان رۆژی یەكشەممە 25ی رەزبەر، بێهنام زادە ئیبراهیم له‌لایه‌ن به‌رپرسانی هێزی سەركوتگەرەكانی به‌ندیخانه‌ی ره‌جایی شاره‌وه‌ كه‌وتوه‌ته‌ به‌ر لێكۆڵینه‌وه‌ و ده‌ستیان به‌سه‌ر كه‌ل و په‌ل‌ و نووسراوه‌كانی ناوبراودا گرتووە.

به‌پێی هەواڵی ماڵپەڕی  “ماف نیوز”  به‌ بیانووی ناردن بۆ ده‌رمانگا له‌ به‌ندی دارئه‌لقورئانه‌وه‌ بۆ سالۆنی ١٢ی به‌ندكراوانی سیاسی_ئمنییه‌تی له‌ به‌ندی ٤ راگوێزراوه‌ و هاوكات ده‌ستیان به‌سه‌ر هه‌موو كه‌ل و په‌ل و نووسراوه‌كانیدا گرتووه‌.

ئه‌م بندكراوه‌ سیاسییه‌ پێشتر له‌ جۆزه‌ردانی ئه‌مساڵدا نامه‌یه‌كی بۆ سكرتێری گشتیی رێكخراوی جیهانیی كار، “گای رایدێر” و هه‌موو رێكخراوه‌ جیهانییه‌كانی كرێكاری نوسیبوو و تێیدا گوتبووی كه‌ تاوانی ئه‌و به‌رگری له‌ مافه‌كانی كرێكاران، مافه‌كانی منداڵان و به‌رگری له‌ كه‌رامه‌تی مرۆڤه‌كانه‌ و سه‌ره‌ڕای هه‌موو ئه‌و كێشانه‌ی بۆ بنه‌ماڵه‌كه‌ی پێشهاتووه‌، له‌ پرۆسه‌یه‌كی نوێدا حوكمی حه‌وت ساڵ و ١٠ مانگ زیندانی بەسەردا سەپاوە.

بێهنام جاری سێهه‌م له‌ ٢٢ی جۆزه‌ردانی ساڵی ١٣٨٩ ده‌ستبه‌سه‌ر كرا و ٤ مانگ له‌ ژووری تاكه‌كه‌سیی به‌ندیخانه‌ی ئێویندا له‌ژێر فشار و لێكۆڵینه‌وه‌دا بوو پاشان بۆ به‌ندی ٣٥٠ی ئه‌و به‌ندیخانه‌ گوازرایەوە. لقی ١٥ دادگای رژێم به‌ سه‌رۆكایه‌تیی قازی سه‌ڵواتی له‌ دادگایه‌كی فەرمایشی و به‌ بێ ئاماده‌بوونی پارێزه‌ر بێهنام ئیبراهیم زاده‌ی به‌ ٢٠ ساڵ مەحكوم كرد كه‌ پاشتر له‌ دادگای پێداچوونه‌وه‌دا ئەو حوكمە بۆ ٥ ساڵ كه‌م كرایه‌وه‌.

بێهنام له‌ كاتی هێرشی گاردی به‌ندیخانه‌ی ئێڤین بۆ به‌ندی ٣٥٠ كه‌ به ”‌پێنج شه‌ممه‌ی ره‌ش” ناوبانگی ده‌ركرد، كه‌وته‌ به‌ر لێدان و بۆ ماوه‌ی ١٥ رۆژیش راگوێزرا بۆ ژووری تاكه‌كه‌سیی به‌ندی ٣٤٠. ناوبراو له‌ بانه‌مه‌ڕی ١٣٩٣دا بۆ ژوری تاكه‌كه‌سیی به‌ندی ٢٠٩ راگوێزرا و پاشان به‌ شێوه‌یه‌كی نایاسایی بۆ به‌ندیخانه‌ی ره‌جایی شاری كه‌ره‌ج گوازرایەوەو له‌م به‌ندیخانه‌یه‌شدا به‌رده‌وام به‌نده‌كه‌ی دەگۆڕن.

شایانی باسە له‌ ١٠ی پووشپه‌ڕی ساڵی ١٣٩٤دا دادگای پێداچوونه‌وه‌ی رژێم لە تاران، بێهنام ئیبراهیم زاده‌ی به‌ ٧ ساڵ و ١٠ مانگ و ١٥ رۆژ زیندان و دانی ٤٥٠ هه‌زار تمه‌ن مەحكوم كرد.

پەلەكردنی لە بەرێوەبەری حوكمی ئێعدام

خەباتمێدیا: دەزگای قەزایی رژێمی جینایەتكاری ئێران دەیهەوێ پەلە لە بەرێوەبەری حوكمی ئێعدامی زیندانیان بكات.

بەپێی هەواڵەكان لە گرتووخانەكانی گەوهەردەشت و قەزڵحەسار، باس لەوە كراوە كە بەرنامەی بەرێوەبردنی بەپەلەی حوكمی سێدارەی بەندییەكان لە بەردەستی دەزگای دەزگای قەزایی و هێزەكانی ئیتلاعات دایە.

ئەو قسەو باسە بەندییەكان و خانەوادەكانیانی تووشی نیگەرانی كردوە.

لە مانگی محەرەمدا بە بەندییەكانیان راگەیاندبوو كە لەو مانگەدا كەس ئێعدام ناكرێ بەڵام هێزە جینایەتكارەكانی رژێم رۆژی دووشەممە 26ی ڕەزبەر 8 بۆ 17 كەس لە زیندانیەكانیان بۆ زیندانی تاكەكەسی گواستووەتەوەو ئەگەری لەسێدارەدانیان لەو مانگەدا زۆرە.

گرانی شتومەك لە ئێران تادێ زیادتر دەبێ

خەباتمێدیا: بەپێی دوایین ڕاپۆرتی بانکی ناوەندی رژێم لە مانگی ڕەزبەردا نرخی شیرەمەنی و هێلکە، برنج و دانەوێڵەکان، میوە و سەوزییەکان، گۆشتی سوور و گۆشتی مریشک، قەند و شەکەر و چای و ڕۆن بە بەراورد لەگەڵ مانگی ڕەزبەری ساڵی پێشتر بەرزتر بۆتەوە.

لەم ڕاپۆرتەدا هاتووە لە حەوتووی سێهەمی مانگی ڕەزبەری ئەمساڵدانرخی شیرەمەنییەکان ٥/٣%، هێلکە ٩/١٣%، برنج ٧/٥١%، دانەوێڵەکان ٥/٢٣%، میوە ١/٣%، گۆشتی سوور ١/٩%، گۆشتی مریشک ٦%، قەند و شەکەر ١/٤٥%، چای ٥/١٦% و ڕۆن ٦/٦% بە بەراورد لەگەڵ ساڵی ڕابردوو زیادیان کردووە.

ئەگەرچی هەندێک لە بەرپرسانی رژێمی ئێران  هەوڵ دەدەن پرسی گرانی بە دۆخی جیهانی بازاڕ ببەستنەوە، بەڵام وەک کارناسانی ئابووری دەڵێن پرسی گرانی زیاتر لەوەیکە پرسە جیهانییەکان كاریگەری لەسەربێ، سیاسەتە نێوخۆییەکان كاریگەری لەسەر دادەنێ‌.

بەڕای ئابووریناسان یەکێک لە گرینگترین هۆکارەکانی دیاردەی گرانی بریتییە لە ڕێژەی زۆری نەخدینەیی کە بە وتەی بانکی ناوەندی رژێم لە مانگی گەلاوێژدا ١٠٩٩ هەزار میلیارد تمەن بووە؛ بەڵام سەرنجڕاکێش ئەوەیە کە هەندێک لە بەرپرسانی رژێم ئەم کەمایەسییە وەک خاڵی بەهێز دەبینن!

هەر لەمبارەوە د. مەنسوور ڕەزایی، پسپۆڕی بەشی خواردەمەنییەکان و مامۆستای زانستگای بەناو بێهێشتی لە وتووێژێکدا سەبارەت بە ڕەوشی برسیەتی لە ئێران بە هەواڵدەری ئەو زانستگایەی وتووە: هەنووکە ٥٠ میلیۆن کەس لە ئێران خواردنی گونجاو ناخۆن.
ڕێکه‌وت: 2016-10-18 12:32:01
به‌شی ( هه‌واڵی کوردستان )





دیمانه

سیاسی