له‌سه‌رهێل 63
شه‌ممه‌ 27 خه‌رمانان 2721
سازمانی خه‌باتی کوردستانی ئێران
كوشتارى كۆڵبەران له پێچ و هەورازەكانی كوردستاندا!

كەم رۆژ هەیە هەواڵی كوژرانی كۆڵبەرێكی كورد لە ناوچە سنووریەكان، لەلایەن هێزە سەركوتگەرەكانی رژێمی ئێرانەوە، بڵاو نەكرێتەوە.

دیارە تا ئێستا زۆر كەم لە سەر هۆی ئەم جینایەتانەی رژێم درحەق بە كۆڵبەرانی كورد دەنووسرێ، بەڵكوو تەنیا لە هەواڵێكی چەند دێریِدا ئیشارەی پێ بكرێ. 

كۆڵبەرانی كورد یەكێك لە رەنج دیتووترین و چەوساوەترین چینی كۆمەڵگەی كوردستان و ئێرانن، لەبەر ئەوەی نیشتەجێی ناوچە سنووریەكانن و لە ناوچەكانیاندا كەسابەت و كار و پیشەیەكی بەرچاوی تێدا نیە و لەو بارەوە لەلایەن دەسەڵاتدارانەوە پشتگوێ خراوە. ئەگەر چی جوتیاری و بەخێوكردنی مەڕەوماڵات لەو ناوچانەدا مێژوویەكی هەیە بەڵام لە ئێستادا بەهۆی كەمتەرخەمی و پشتگوێ خستنی بەروبوومی ناوچەكە، وەڵامدەری پێداویستی ژیانی خەڵك نیە. هەروەها لەبەر ئەوەی خەڵك لە هەژاریدا دەژین و جوێ لە جەستە كەرەستەیەكی دیكەیان بۆ سەرمایەگوزاری دابین كردنی بژیوی ژیانی خێزانەكانیان نیە. و جوێ لە ئەم بەراوبەر كردنی كەل و پەلی سەرسنوور هیچ كارێكی دیكە لە ناوچەكەدا نیە، ناچار شان دەدەنەبەر باری قورس و گرانی كۆڵبەری.

ئەگەر تاوێ راوەستی سەیری عارەقی نێوچاوانی ئەو مرۆڤە پاك و بەغیرەتانە بكەی، سەرتاپای مرۆڤ دەبێتە شانازی كە لەگەڵ هەموو ئەو دەردانەی رژێم و هێزە سەركوتگەرەكانی بۆ خەڵكی كوردستان و بەتایبەت ناوچە سنووریەكان دروستی كردوە، بەڵام دیسان ئامادە نین مل بە سیاسەتە چەپەڵ و نگریسەكانی ئەو رژێمە بكەن و كۆڵبەری و كاری سەخت و گران و كەوتنەبەر دەسترێژی هێزە داگیركەرەكانی رژێمیان، لە مل دان بە هێزە سەركەوتگەرەكانی پێ ئاسانترە.

پاكانەی هێزەكانی رژێم بۆ كوشتنی كۆڵبەران، بۆ كەم كردنەوەو رێ گریە لە هێنانی كەل و پەلی قاچاخ و قەدەغەیە.

لەو بارەوە رۆژنامەی هەمشەهری رژێم لە وتارێكدا 14ی خەزەڵوەری 1395 نووسی: ژمارەی كۆڵبەرانی ئێران لە ساڵی (1393) نزیك بە 37 هەزار كەس بووە.

هەر دوای ئەوە دەنووسێ قاچاخی كەل و پەل لە ئێران لە ماوەی سێ دەیەی رابردوو تا ساڵی 1393 نزیك بە 16 بەرابەر زیادی كردوەز بەپێی وتەی حەبیبوڵا حەقیقی سەرۆكی ناوەندی بەرنگاری قاچاخی كەل و پەل و زێر و دراو، لە ساڵی 1392 رێژەی قاچاخ لە ئێران 20 ملیارد دۆڵار خەمڵێندراوە كە دەكاتە دوو ئەوندەی بودجەی ئاوەدان كردنەوەی وەڵات.

ئێستا بە لێكی بدەینەوە كە لەو 20 ملیارد دۆلارە چەندی لەلایەن كۆڵبەرانەوە هاوردەی ئێران كراوە؟

هەر رۆژنامەی هەمشەهری نووسیویەتی: لەو ساڵە دا (1392) یەك ملیارد و 300 ملوێن دۆلار كەلوپەلی قاچاخ لە 10 خاڵی سنووریەوە لەلایەن كۆڵبەرانەوە بە قاچاخ هاوردە كراوە.

بەو پێ یە بێ هەر كۆڵبەرێك لە ساڵدا زیاتر لە 35 ملوێن دۆلار كەل و پەلی بە قاچاخ هاوردەی ئێران كردوە!

ئەگەر كۆڵبەران هەموو رۆژەكانی ساڵ (365) كار بكەن، كە بەو شێوە نیەو لە زستاندا بەفر و باران و سەرما رێگە بە هاتووچۆ نادا. هەر تاكێكیان رۆژانە بایی 116 هەزار كەل و پەل هاوردە دەكەن!

ئەگەر چاوێك لەو كۆڵە بكەین كە ئەو كۆڵبەرانە بە كۆڵیانەوەیە و لە وێنە و فیلمەكانیشدا هەیەو تەلفزیۆنەكانی رژێمیش بڵاویان دەكاتەوە، دەردەكەوێ كە ئەو كۆڵبەرانە زێر كۆڵكێش ناكەن!

ئەوەی ئەو كۆڵبەرانە دەیگوازنەوە پێكدێ لە سیگار، مەشروب، كەل و پەڵی ناوماڵ و برقی و ئەو كەرەستانەن كە لە بازارەكانی تاران و شارە گەورەكاندا نمونەیان زۆرە. كە وایە ئامار و رەقەم لێكدانی رژێم ساختەیەو دوورە لە راستی.

لێرەدا ئەو پرسیارە زەق دەبێتەوە، كە وایە داستان چیە؟ بۆچی بە بەرنامە هاوڵاتیەكی كورد كە لەو پەڕی هەژاری و نەداری رادەگیرێ و لەكاتێكدا شان دەداتە بەر كاری تاقەت پڕوكێنی كۆڵبەری دەكرێتە ئامانجی دەسترێژ و دەكوژرێ؟

لەلایەكی دیكە دام و دەزگاكانی ئاخوندان دەڵێن تەنیا 5 لەسەدی ئابووری قاچاخی ئێران لەلایەن كۆڵبەرانەوە دەگوازرێتەوە (هەر چەند ئەوەش درۆی زەقی تێدایەو ئەو رێژەیە كەمتر لە 1 لەسەدە)و مابەقی گواستنەوەی كەلوپەلی قاچاخ لەلایەن دامودەزگاكانی رژێمەوە دەگوازرێتەوەو هیچ حیساب و لێپرسینەوەیەكیان لەگەڵ ناكرێ.

نەتیجەی ئەم باسە ئەوەیە كە جینایەتی رژێم لە حاست كۆڵبەرانی كورد یەكێكی دیكەیە لە جینایەتەكانی وەك ئێعدامی بەكۆمەڵی رۆژانەی خەلكی ئێران و كوردستان بۆ چاوترسێن كردنی جەماوەری وەزاڵەهاتوو. كوشتنی كۆڵبەران بەرنامە و سیاسەتێكی شوومی رژێمە كە وەك باقی سیاسەتەكانی دیكەی مەگەر بە روخانی یەكجارەكی رژێم كۆتایی پێ بێ.
ڕێکه‌وت: 2016-10-20 11:10:53
به‌شی ( وتاری کۆمه‌ڵایه‌تی )





دیمانه

سیاسی