له‌سه‌رهێل 107
یه‌کشه‌ممه‌ 4 ره‌زبه‌ر 2721
سازمانی خه‌باتی کوردستانی ئێران
درۆكانی رۆحانی و رسوايى خامنەیی!

قسەكانی رۆحانی لە ئەراك و خومەین لەگەڵ كاردانەوەو هێرشی بەربڵاوی تاقمی بەرامبەر بەرەوڕوو بوو. ئەم سەردانانە بۆ چیە؟ وە بۆچی وەها كاردانەوە گەلێكی بەدوادا هات؟

ئەو قسانەی رۆحانی لە ئەراك و رۆژی دوایی لە خومەین، بەتایبەت ئەو خاڵانەی سەبارەت بە بەرجام و هەلومەرجی ئابووری گوتی، ئایا بەراستی درۆ بوو؟

بە سەرنجێك لەسەر قسەكانی رۆحانی و بەراوردیان لەگەڵ دۆخەكە، وەڵامی ئەو پرسیارە روون دەبێتەوە. بۆ وێنە رۆحانی سەبارەت بە بەرجام گوتی: بەرجام سەركەوتنی سیاسی نیزامە. بەڵام سەیری قسەی وەزیرەكانی خۆی بكەن. بۆ وێنە زەریف لە سەردانی ئەم دواییەی بۆ ئەمریكا گوتی: ئەمریكا هیچ هەوڵێكی بۆ جێبەجێ كردنی بەڵێنەكانی نەداوە. هەروەها رۆحانی 17ی جۆزەردانی 1394 چارەسەری هەموو كێشەكانی رژێمی پێوەند دا بە جێبەجێ كردنی بەرجامەوە، لە كێشەی ژینگە تا هەلی كار، هەتا ئاوی خواردنەوەی خەڵك. بەڵام ئێستا لە ئەراك ئابڵوقەكانی بە باخی سێو و هەرمێ وێنا كرد كە چەندین ساڵی دەوێ تا دێتە بەر.

یان سەبارەت بە ئابڵوقەی بانكەكانی رژێم گوتی، بەهۆی بەرجامەوە دەرگای بانكە جیهانیەكان بە ڕووماندا دەكرێتەوە. بەڵام رۆژی 21 ڕەزبەرتەیب نیا وەزیری ئابووری رژێم لە ئەمریكا، گوتبووی: تا ئێستا ئەمریكا پێبەندی بەڵێنەكانی خۆی نیە كە بەپێی رێكەوتنی بەرجام بەڵێنی دابوو و واشینگتۆن دەبێ بۆ گەرانەوەی ئێران بۆ سیستەمی ماڵی نێودەوڵەتی هەنگاو هەڵگرێ.

سەیر ئەوەیە كە درۆكانی پێشووی رۆحانی لەگەڵ قسەكانی ئێستای یەكناگرێ و زوو ئاشكرا دەبێ. بۆ وێنە رۆژی 27ی جۆزەردانی 92 كاتێ‌ رۆحانە هاتەسەر كار، لەبارەی چارەسەری كێشەی بێكاری گوتی: هێوادارم شاهیدی ئەوە بین هەر یەكەم ساڵ، چارەسەری قەیرانی بێكاری لاوان یەكەم دەسكەوتمان بێ و هەر رۆژێ رەقەمی بێكاری بگاتە تاك رەقەمی جەژنێكی بچەك دەگرین. بەڵام لە مانگەكانی كۆتایی ئاخر ساڵی سەرۆك كۆماریەكەی، لە ئەراك گوتی: ئەورۆ كێشەی سەرەكی خانەوادەكانی ئێمە بێكاری جیلی لاو بەتایبەت خوێندەوارەكانە. دوو رۆژ دوای ئەوەش گوتی ئێمە توانای چارەسەری كێشەی بێكاریمان نیە.

بەڵام بەراستی رۆحانی بەو بەڵێن و درۆیان توانای ئەوەی هەیە هەم خەڵك فریو بداو هەم پێشی باندی رەقیب بكەوێ؟

لە وەڵامدا دەبێ بڵەین مەگەر دەكرێ خەڵكێك كە تادێ برسیتر دەكرێن و بەتەواوی هەست بە هەژاری دەكەن، فریوی درۆكانی رۆحانی بخۆن. رۆحانی بە تەڵەكە بازی دەتوانێ هەزار قسە بكە بەڵام ئایا تۆزێك لە رەنج و برسیەتی ئەو خەڵكەی قەرارە فریو بخۆن كەم دەبێتەوە؟

بەڵام باندی رەقیب. بەهۆی ئەو لێكترازان و درزەی لە پێكهاتەی ئەو رژێمەدا هەیە، مەجال نادا جەوهەری درۆكانی رۆحانی وشكەوە بێ. بۆ وێنە رۆژێ بە سەر قسەكانی ئەراك تێپەڕ نەبوو كە رۆژنامە و ماڵپەڕەكانی باندی رەقیب پڕ بوون لە ئاشكرا كردنی درۆكانی رۆحانی.

بۆ وێنە سەبارەت بە بەرجام و باخی سێو و هەرمێ ماڵپەڕی حكومەتی رەجایی نیوز رۆژی 3ی خەزەڵوەری 1395 نووسی: رۆحانی ژێری تێكڕای نمامەكانی ئەراكی، بتوون (چیمەنتۆ) كرد. لە درێژەدا دەنووسێ: لە دوای داخرانی بەرنامەی ناوكەیی و وەدیی نەهاتنی بەڵێنەكانی بۆ لابردنی ئابڵوقەكان رۆحانی بە خەڵك دەڵێ: كەمی خۆراگرن، بەرەبەیان نزیكە، بەڵام دەبێ بە رۆحانی بگوترێ: راوەستە تا بەیانی دەسەڵاتەكەت تەواو دەبێ. 

خاڵێكی دیكە ئەوەیە كە رۆحانی هەم لە ئەراك و هەم لە خومەین، لە مەسەلەی بەرجام دا پێی خامنەیی هێنایە مەیدان. وە بە روونی گوتی: بە رێنوێنی خامنەیی بوو كە ئاڵای بەرجامیان هەڵدا. لەبەر ئەوەی دەزانێ‌ لەو دۆخە داخراوەی رژێمدا خامنەیی ناچارە پشتیوانی لە بەرجام بكات. وەك ئەو دۆخەی خامنەیی ناچار كرد بەپێچەوانەی ویستی خۆی، ساڵی 92 كەوێتە سەر چۆك و بچێتە پێی مێزی وتووێژ. بۆیە رۆحانی پشت ئەستوورە بەوە لەبەرامبەر هێرشەكانی باندی رەقیب و دەزانێ‌ خامنەیی ناچارە پشتیوانی لێ بكات لە مەسەلەی بەرجامدا.

روون و ئاشكرایە كە خامنەیی بۆ پێشگیری لە داروخانی هێزەكانی لەلایەك رێكەوتنی بەرجام دەكاو لەلایەكی دیكە دەڵێ باوەری بە ئەمریكا نیە. بەڵام وا دیارە سیاسەتی بانێك و دوو هەوا، خامنەیی بەتەواوی رسوا كردوە.

 
ڕێکه‌وت: 2016-10-26 11:25:38
به‌شی ( وتاری سیاسی )





دیمانه

سیاسی