له‌سه‌رهێل 95
شه‌ممه‌ 27 خه‌رمانان 2721
سازمانی خه‌باتی کوردستانی ئێران
بولبولەكەی ماڵی خامنەیی!

لەم رۆژانەدا داستانی حاجی سەعیدی تووسی قورئان خوێنی تایبەت و بولبولەكەی ماڵی خامنەیی، تەواوی وەڵات و فەزای مەجازی تەنیوە.
ئەو قورئان خوێنە ناسراوەی كە ئێستا چەندين كەس بەهۆی فەسادی ئەخلاقی و داوێن پیسی داوایان لەسەری هەیە، بەڵام...
چەند رۆژێك لەوەپێش ئێژەیی وتەبێژی دەزگای قەزایی رژێم، هاتە قسەو وتی: زۆر مەچنە نێو ئەو مەسەلەوەو لەوە زیاتر چیلكە لەو رووداوە (رووداوی دەستدرێژی قورئان خوێنی تایبەتی خامنەیی بۆسەر منداڵ و مێرمنداڵان) مەوەشێنن! دوای ئەوە گوتی: ئاشكرا كردنی هەندێ مەسەلە زیاتر بە زیانی داواكارە (یانی قوربانی دەستدرێژی).
رۆژنامەی حكومەتی كەیهان 3ی خەزەڵوەر لە ژمارەی ئێوارەی خۆیدا لە سەردێری لاپەڕەی یەكەمدا نووسی: بڕیاری قەدەغەكردنی بەدواداچون بۆ قورئان خوێنی بەناوبانگ دەرچوو!
سێ شەممە 4ی خەزەڵوەری 1395 سەرۆكی قازیەكانی خامنەیی، ئاخوند لاریجانی بە فەرمانی خامنەیی دەركەوت و بەجۆرێك كەوتە هەڕەشە كردن كە ئێتر كەس لەسەر ئەو قسانەو كارەكانی قورئانخوێنی بەناوبانگی رژێم قسەو باس نەكا.
پێم وانەبێ لەو وەڵاتەدا كەسێك مابێ مەسەلەی قورئانخوێنەكەی خامنەیی نەبیستبێ. ئەو كردەوە پڕلە شوورەیی و ئابروچوونانەی كە ئەگەر تەنیا یەك لەو كردەوانە لە تاكێكی دیكەی كۆمەڵگە رووی بدایە، بە خراپترین شێوە سزا دەدرا و دەكوژرا، بەڵام كاتێ تاوانبار یەكێك لە كرێگرتەكانی دەسەڵاتداران بێ، مەسەلەكە بەتەواوی پێچەوانە دەبێتەوەو بەجۆرێك قسەكردن لەو بارەوە بەتاوان حیساب دەكرێ زیندان چاوەرێی دەكا.
لەو بارەوە ئیشارە بە قسەكانی سادقی لاریجانی سەرۆكی تاوانباری دەزگای دادوەری رژێم دەكەین كە دەرخەری زۆر شتە.
لاریجانی بەبێ ئەوەی ناوی تووسی بێنێ دەڵێ: لە كاتێكدا ملوێنان پەروەندە لە دەزگای قەزایی دا بەدواداچوونی بۆ دەكرێ دەبینین یەك پەروەندەیان كردۆتە باسی گشتی و راگەیەنەكان.
مەبەستی لە یەك پەروەندە، هەر ئەو پەروەندە گڵاوەی حاجی سەعیدی تووسیە. یانی لە نێو ئەو هەموو پەروەندە هاتوون و تەنیا ئەو یەكەتان ئاشكرا كردوە!
لە درێژەی قسەكانی دا لەبەر ئاكامە نەگەتیڤە كۆمەلایەتیەكانی ئەو گەندەكاریەی كە لە نێو ماڵی خامنەیی رووی داوە، دەڵێ: قسەی ناراست دەكەن و درۆ دەخە پاڵ رێبەری و سەرۆكی دەزگای قەزایی وەڵات و دەڵێن سەرۆكی دەزگای قەزایی پەروەندەكەی بەستووە!
دەیهەوێ بڵێ من تەنیا سەبارەت بە داوێن پیسی تووسی، بڕیاری قەدەغەكردنی بەدواداچوونم داوە بەڵام چوونكە داواكاری دیكەی لەسەرە، ئەوانی دیكەی هێشتا بە داواكراو حیساب دەكرێ!
بەڵام گرینگترین بەشی قسەكانی ئێژەیی جێگر و وتەبێژی دەزگای قەزایی ئەوەیە كە لە پێشدا كۆتایی بە مەسەلەكە هێناوەو وتوویەتی: بە لەبەرچاوگرتنی كێشەی شاهیدەكان، ئەو پەروەندە داهاتوویەكی نیە و لە كۆتایی دا بێ پێچ و پەنا هەڕەشە لە داواكار و قوربانیەكانی ئەو دەستدرێژیانە دەكا و دەڵێ: ئەو راگەیاندنانەی لە ناوخۆی وەلات هەواڵی لەو چەشنە بڵاو دەكەنەوە (یانی هەواڵی گەندەكاری بولبولەكەی خامنەیی بڵاودەكەنەوە) وەك بەشداری تاوان، وەك تاوانبار داوا دەكرێن و لێپێچینەوەیان لەگەڵ دەكرێ.
دەڵێن لە سیستەمە دیكتاتۆر و دژە گەلیەكان، قاوون و رێسا كەرەستەیەكە بۆ پاراستن و دابین كردنی ئاسایشی چینی دەسەڵاتدار و سەپاندنی دەسەڵاتی ئەوان بەسەر چینەكانی دیكەدا. ئەو پێناسە دروست ساڵەهایە لە ئێرانی ژێر دەسەڵاتی ویلایەتی فەقیەدا رووی داوە.
لەم ساڵانەدا زۆر كەس بە تاوانی هاوشێوەی قورئانخوێنەكەی ماڵی خامنەیی، بە بێ بەزەییانەترین شێوە كوژران بەڵام بۆ ئەمە بڕیاری قەدەغە كردنی بەدواداچوون دەردەچێ.
ئەمە ئەو سیستەمە بێ سیستەمەیە كە هەرچی زووە دەبێ لە ناوبچێ.
ڕێکه‌وت: 2016-10-27 08:24:06
به‌شی ( وتاری کۆمه‌ڵایه‌تی )





دیمانه

سیاسی