له‌سه‌رهێل 59
پێنجشه‌ممه‌ 1 ره‌زبه‌ر 2721
سازمانی خه‌باتی کوردستانی ئێران
بەردەوام بوون لەسەر رێبازی سازمانی خەبات و شۆرشى مافخوازانە





















مێژووی جولانەوەی گەلی كورد قۆناغی سەخت و پر لە كەندوكۆسپی بە خۆیەوە بینیوە، قۆناغی ئەوەندە سەخت كە هەموو كەس نەیتوانیوە خۆی لە بەر راگرێ‌. قۆناغی ئەوتۆ كە هەڤاڵ لە سەر هەڤاڵ نەگراوەتەوەو دایك ڕۆڵەی خۆی لە ترسی گیانی جێ‌ هێشتوە.  برسیەتی، نەبوونی، بێ‌ رێ و شوێنی، سەرمای سەخت و گەرمای تاقەت پڕوكێن ئه‌مانه‌و زۆر شتی دیكه‌ لە سەختیە بەردەوامەكانی خەباتی شۆڕشگێڕانەی نەتەوەی كورد بوون و تا سه‌ركوتن به‌رده‌وام  دەبێ و هەتا مافه‌كانمان دابین دەبێ، هەر دەمێنین و ئەو قۆناغانە مرۆڤی لە خۆبوردوی گەرەكەو تێ‌ چووی زۆریشی دەوێ‌.







سازمانی خەبات ی كوردستانی ئێران وەك یەكێك لە هێزە هەمیشە لە مەیدانەكانی خەباتی مافخوازانە و ئازادیخوازانەی كورد، بەشێكی بەرچاوی مێژووی كاركردی سیاسی و تەشكیلاتی لە گەڵ سەخت ترین كەندوكۆسپەكان  بەرەو ڕووبووە، ئەو كەندوكۆسپانەی كە بە هەموو كەس تەحمول نەكراو زۆركەس لە به‌ری دەرچوون ومەیدانیان چۆڵ كرد. بەڵێ‌ قۆناغی ئەوەندە سەخت و مەترسیدار كە بوون و مانەوەی سازمانی خەباتی خستبوه‌ مەترسیه‌وه‌، قۆناغی ئەوتۆ كە نەدەتواندرا پێشمه‌رگه‌ی شەهیدی دەستی تیرۆریستانی تاریك پەرەستی رژێمی ئێران لە كوردستانی ئازاددا بە دەستی خۆمان بنێژین و تەنانەت پرسەو ماتەمی بۆ بگێرین.




قۆناغی ئەوتۆ، كەسی شەهید و منداڵی ساوای شه‌هیدان، لە بەر نەبوونی و نەداری، نەتواندرا داشداری بكرێن و چاودێری بكرێن. ئەی كە بە ئازارە بیرهێنانەوەی ئەو ڕۆژە سەختانە. ئا له‌و كاته‌ حه‌سته‌مانه‌دا بەداخەوە هێندێك ئاگاداری پیلانی دوژمن بوون و لە مەعامەلەدا بوون  لە سەر خۆێنی هەڤاڵانیان، تەنیا لە بەر ئەوە خۆیان خۆش  بژین. ئەوانەی چاویان لە ڕابردوو خوێن و فیداكاری و گیانبازی هەڤاڵەكانیان پۆشی و ئاگادار پیلانی دوژمن بوون و هاوكاری دوژمن بوون، بەڵێ‌  قۆناغێك كە لە بنكەكان نانی تێدا نەبوو لە عەنباردا خواردەمەنی وجودی نەبوو. قۆناغێك كە پێداویستیەكان و شتە بە كەڵكەكان هەرزان فرۆش دەكرا بۆ دابین كردنی خواردنی ڕۆژانە. ئەو كاتانەی كەمترین وسەرەتایی ترین پێداویستی ژیان دەست هاوڕێبازانی سازمانی خەبات نەدەكەوت، بەڵام رێبوارانی دڵسۆزی رێبازی شەهیدان وەك كێو لە بەرانبەر سەختیەكاندا خۆیان راگرت و بەردەوام بوون تا سازمانی خەبات بەردەوام بێ‌ لە كاروانی شۆڕشگێڕانەو نیشتمانیانەی. 




لێرەدا جێگەی خۆیەتی درودی بێ‌ پایان بنێرین بۆ رۆحی پاك و بێگەردی شەهیدانی سوورخەڵات و سڵاو و درود بۆ گیانی پاكی مامۆستا سەید جەلال حوسەینی رێبەر و دامەزرێنەری سازمانی خەبات كە هەموو تەمەنی خۆی تەرخان كرد بۆ گەیشتنی گەلی كورد بە ئازادی و بەردەوام بوو لە خەباتی كۆڵنەدەرانە لە بەرانبەر دەسەڵاتی دیكتاتۆری ئاخوندەكان لە ئێران و هه‌روه‌ها درود بنێرین بۆ ئه‌و كه‌سانه‌ی مقاومه‌تیان كرد و وه‌ك كێو له‌ به‌رانبه‌ر سه‌ختیه‌كاندا وێستانه‌وه‌و توانیان له‌ هه‌موو قۆناغه‌ سه‌خته‌كاندا پێداگر بن له‌ سه‌ر رێبازی كوردایه‌تی و سازمانیان.




بێگومان بەشێكی زۆر لەو قۆناغە سەخت و تاقەت پڕوكێنانە، بوونە دەرسی گەورە بۆ هەموو هاوباوەڕانی رێبازی سازمانی خەبات و فێری كردین كە لە هیچ هەلومەرجێكدا هەدا نەدەین و هەمیشە دلنیا بین بە سەركەوتنو گەیشتن بە ئامانج. ئەو قۆناغە سەختانە فێری كردین كە پشت ئەستور بین بە گەل و لە پێناو باوەڕی ئازادیخوازی و مافخوازی لەو رێبازەدا بەردەوام بین. ئەو قۆناغە سەختانە فێری كردین كە سازمانی بوون و خەباتی بوون ئەسڵێكی ریشەیین و ئەوانە دەتوانن بەردەوام بن لەو ئەركە پیرۆزەدا كە خەباتیی بوون لە دڵ و دەرونیاندا چەكەرە بكات و لە هیچ هەلومەرجێكدا لە ئامانجی ئازادیخوازی و سازمانی بوون لانەدەن و شانازی بكەن بەوەی كە رێبواری رێبازی شەهیدە سەربەرزەكانن و رێبازی تەشكیلاتێكن كە لە بەرانبەر ستەمگەرترین و ملهورترین دوژمناندا وێستاوەو ملی بۆ هیچ خۆسەپێنێك دانەنەواندوە.




جێگەی خۆشیە لە چەند مانگی داهاتودا كۆنگرەی شەشەمی سازمانی خەبات دەبەسترێ‌ و لە گەڵ هومێدواربوون بەوەی ئەو كۆنگرە ئاڵوگۆری باش و بەرچاوی لێ‌ بكەوێتەوە. به‌ بۆچونی من گرینگە لە گەڵ پێداگرتنەوە لە سەر خەباتی نیشتمانی و نەتەوەیی لە كوردستان، هاوكات بریاری بەردەوام بوون لە تێكۆشان بۆ ڕوخانی رژیمی ئاخوندی ئێران ببێتە خاڵ و دروشمە سەرەكیەكانی كۆنگرە. لە گەڵ ئەو خاڵە بنەرەتیانەشدا زۆر گرینگە سازمانی خەبات مێحوەری یەكێكی دیكە لە ئەسڵەكانی كۆنگرە بێت.




ئاشكرایە سیستەمی تەشكیلاتی سازمانی خەبات بەشێوەیەكی دیموكراتیكەو هەڵبژاردن و هەلبژێردران و راوێژكردن تێدا ئەسڵێكی ریشەیی و نەگۆڕن و دیاری كردنی بەرپرسان تەنها بە رێگەی هەڵبژاردن دەبێ و بنەما بۆ هەڵبژاردنەكانیش دڵسۆزی و لێبڕای و بەئەزموونیە و بەرپرسایەتی لە سازمانی خەبات هیچ جۆرە ئیمتیازێكی تایبەت لە خۆ ناگرێ و لە ماوەی رابردوشدا هەروا بووە. زۆرجار وەرگرتنی بەرپرسایەتی لە ژێر فشاری گشتی ئەندامانی كۆنگرە و داواكاری ئەواندا قەبووڵ كراوە. لە كۆنگرەی 5 پێنجەمدا لە سەر داوای ئەندامە دیارەكانی سازمان و ژمارەیەك لە ئەندامانی بەشداری كۆنگرەی شەشەم كاك بابەشێخ حوسەینی ناچار كرا بەرپرسایەتی یەكەمی سازمان وەرگرێ‌ چونكە بەرێزیان بریاریان ئەوە بوو وەك ئەندامی كۆمیتەی ناوەندی درێژە بە كار بدەن و كەسانی دیكە بێنە پیش بۆ كاری بەرێوەبەریی سازماندا. بێگومان ئەو شێوە هەڵبژاردن و كاركردنە لە سازمانی خەبات و لە كۆنگرەكاندا، نیشان لە بوونی دیموكراسی و بوونی متمانە و بەدیی كردنی دڵسۆزی و رابردووی پاكی ئەندامانە بۆ وەرگرتنی پۆستە گرینگەگان و بەتایبەت سكرتێری گشتی.  بێگومان بەرپرسایەتی یەكەم لە سازمانی خەباتدا ئەركێكی قورسەو وێڕای نەبوونی هیچ جۆره‌ئیمتیازێكی تایبەت هاوكات پێویستی بە خۆراگری و لێبڕان و سەبرێكی زۆر هەیە. 




جێگەی خۆیەتی هەموو هۆگرانی رێبازی سازمان قەدری كارو ماندوو بوونی بەرپرسانی سازمان لە رابردوودا بزانین و هاوباوەرانی سازمان بەردەوام بن لە سەر پەیرەو كردنی هەڵبژاردن و پرەنسیبەكانی دیموكراسی و زیاتر چەسپاندنی ئەو چەمكانە.




لەگەڵ ئەو خاڵە گرینگانەی ئیشارەیان پێدرا، پێویست پەنجە بخەینە سەر راستیەك كە ئێمە وەك ئەندامی سازمانی خەبات وەك پێویست لە راپەراندنی كارو ئەركە تەشكیلاتیەكان چالاك نه‌بوین، بەو هیوایەم لە داهاتووداو بەتایبەت كۆنگرەی داهاتوو، زیاتر خۆ لە سەر دۆزینەوەی میكانیزمەكانی وەگەرخستن و كاراكردنی بەدەنەی سازمانی خەبات ماندوو بكەین، وە خۆ بە دروشم و بەرنامە و گۆرینی شیعاراتەوە خەریك نەكەین.  بەرنامەی سازمانی خەبات كه‌ ئیستا لەسەری دەرواو خۆی پێ پێناسە دەكا، بەرنامەیەكی ئەمرۆیی و نەتەوەیی و نیشتمانیە و تەنیا پێویستی بە گەیاندن و چەسپاندنیەتی لە نێو كۆمەڵانی خەڵكی كوردستاندا و ئەوەش پێویستی بە هەڵسوران و چالاكی تێكڕای ئەندام و دۆست و لایەنگرانی سازمانی خەبات هەیە. بۆیە پێداگری لەسەر ئەو خاڵە دەكەمەوە كە ئێمە بە چالاكی و هەڵسوڕان دەتوانین سازمانی خەبات بۆ پێشەوە بەرین نەك دروشم گۆڕین و خۆ خەریك كردن بە قسە و كاری بێ كەڵك و لاوەكیەوە.




هۆی سەرەكی پێشكەوتن و بەرەوپێشچوون چالاكی و هەڵسوران و بوونی هزر و ئەنگیزەی شۆرشگێڕانە و سازمانیانەی بەرپرسان و ئەندامانی سازمانی خەباتە، بۆ ئەوەی لەو دۆخە و داهاتوودا بتوانین خزمەتی شایان و پێویست بە بزوتنەوەی مافخوازانەی نەتەوەكەمان بكەین.




بە هیوای سەركەوتن بۆ كۆنگرەی شەشەمی سازمانی خەبات و بەرەوپێشچوونی شۆرشی رەوای گەلەكەمان.



ڕێکه‌وت: 2016-12-18 17:53:32
به‌شی ( وتاری سیاسی )







  به‌شی : هه‌واڵی کوردستان   کات : 2021-09-22

باوکی ڕامین حسێن پەناهی کۆچی دوایی کرد

به‌شی : هه‌واڵی کوردستان   رۆژ: 2021-09-16


سەعید ئەفکاری برای نەوید ئەفکاری دەست بەسەر کرا.

به‌شی : هه‌واڵی ئێران   رۆژ: 2021-09-13

دیمانه

سیاسی