هەشتەمین كۆبوونەوەی ناوەندی هاوكاریی حیزبەكانی كوردستانی ئێران بەرێوەچوو

رۆژی سێ شەممە 8/7/2018 بەرانبەر بە 16ی گەلاوێژی 1397 لە بارەگای ناوەندی سازمانی خەبات ی كوردستانی ئێران بە ئامادەبوونی نوێنەرانی سەرجەم لایەنە پێكهێنەرەكانی ناوەندی هاوكاریی حیزبەكانی كوردستانی ئێران پێكهاتوو لە : كۆمەڵەی شۆڕشگێری زەحمەتكێشانی كوردستانی ئێران، حیزبی دیموكراتی كوردستان، حیزبی دیموكراتی كوردستانی ئێران ، كۆمەڵەی زەحمەتكێشانی كوردستان و سازمانی خەبات ی كوردستانی ئێران هەشتەمین كۆبوونەوەی ناوەند بەرێوەچوو. 

كۆبوونەوەكە بە وتەێكی بەخێرهاتن و راپۆرتی كار و هەڵسوورانی ئەو ماوەیەی پێشووی ناوەندی هاوكاریی لە لایەن سەیید كامیل نورانی فەرد بەرپرسی دەورەیی ناوەندی هاوكاریی دەستی پێكرد و لە لایەن نوێنەرانی هێزە سیاسیەكانەوە، كاری ئەو ماوەیەی ناوەند خرایە بەر تێروانین و لە پێداچوونەوە بە كارەكان خەت و بەرنامەی كاری داهاتوو دارێژرا و چەند خالیك بۆ باشتر كردنی كارەكان پەسەند كران. 

لەبرَگەێكی تری دەستووری كاری كۆبوونەوە بۆنە و پێشهاتە سیاسیەكانی رۆژەڤی ئێران و كوردستان خرایە بەرباس و لەم بەشەدا لایەنەكان بە وردی بابەتی خۆپێشاندانەكانی شارەكانی ئێران و دۆخی قەیراناویی ئابووری ئێران و سیاسەتی ئەمریكا لە ئاست رژیمی ئێران و كاریگەرییەكانی ئەو دۆخە نوێیە لە سەر بزووتنەوەی رزگاریخوازانەی گەلی كورد لە كوردستانی ئیرانیان هەڵسەنگاند و بە پشت بەستن بە گووتاری رووخان كە گووتاری ناوەندی هاوكاریی حیزبەكانە لەسەر نەمان و رۆیشتنی سیستەمی كۆماری ئیسلامی ئێران پێداگریی كرایەوە و هەموو پرۆژە بەرنامە و بەدیل سازییەكانی تر بۆ ئەو گووتارە چ لە دەرەوە و چ لە ناوخو رەد كرانەوە و پشتیوانی لە ویستی گۆڕانی بنەڕەتی و هاوخەباتی لەگەڵ نارازییان و خۆپیشاندەرانی سەرانسەری ئێران بە ئەركی ناوەندی هاوكاریی زاندرا. لە درێژەی ئەو باسە پرۆژەی كۆدار و پەژاك كە لەماوەی پێشوو بلاویان كردەوە بە پرۆژەێكی ناواقعی و ناتەبا لەگەڵ روحی جوڵانەوەی گەلی كورد و هاوتەریب لەگەڵ بەرژوەندییەكانی سیستەمی كۆماری ئیسلامی ئێران خوێندنەوەی بۆ كرا. 

هەر لەو پێوەندەدا بە خوێندنەوەی دروستی دۆخ و هەل ومەرجی كوردستان شرۆڤەی ئەرك و بەرنامەی كاری كوردستان و جولانەوەكەی كرا و ئامادەیی و یەكریزی جوڵانەوەی گەلەكەمان وەبیر هێندرایەوە. 

لەدرێژەی ئالوگۆری بیرورا و قسە كردن لە سەر كارەكانی داهاتووی ناوەند رۆژی 28ی گەلاوێژ كە ساڵوەگەری دەركردنی فەرمانی جیهادی خومەینی دژی گەلی كورد بوو ، وە ك رۆژی خۆراگری نەتەوەیی و یەكێك لە لاپەرە پر شەرمەزارییەكانی دیكتاتۆریەتی تاران و پڕ سەروەرییەكانی مێژووی خۆراگری گەلەكەمان پێداگری لەسەر كرایەوە و هێندێك بەرنامە بۆ یادكردنەوەی ئەو بۆنەیە خرایە دەستووری كاری داهاتووی ناوەندی هاوكارییەوە. 

هەر لەو كۆبوونەوەیەدا چەندین تەوەر و باسی گرینگ و جێی بایەخی لایەنەكان قسەی لەسەر كرا و پێداگری لەسەر ئەسلی بە یەكەوە كاركردن و لێك تیگەیشتن و سازانی گشتی كرایەوە و لە كەشیكی دۆستانە كۆتایی بە هەشتەمین كۆبوونەوەی ناوەندی هاوكاریی حیزبەكانی كوردستانی ئێران هێندرا.