له‌سه‌رهێل 73
شه‌ممه‌ 27 خه‌رمانان 2721
سازمانی خه‌باتی کوردستانی ئێران
یادی سەروەر و شەهیدی گەل شەهید كاك عەلی چەمەن گولی

 


بابەشێخ حسێنی 


كاك عەلی چەمەن گولی یەكێك لەو تێكۆشەرانەی رێگەی رزگاری و ئازادی گەل و نیشتمان و یەكێك لە كادرە دڵسۆزەكانی ریبازی سازمانی خەبات بوو كە گیان و ژیانی خۆی لە پێناو ئازادی گەل و نیشتماندا فیداكردو بووە سەرمەشقێكی دیار بۆ شاری سەقزی خۆڕاگرو سەربەرز و هەروەها بووە تاجی سەری هۆزو، گوڵی هەمیشە گەشاوەی رێبازی ئازادیخوازیی و سازمانی خەبات.


كاك عەلی ژیان و گیانی خۆی لەپێناو رزگاركردنی چەند پێشمەرگە لە ناو شاری سەقز خستە مەترسیەوەو هەر لە دوای رزگار كردنی ئەو پێشمەرگانە بە ناچاری ژیانی پێشمەرگایەتی ئاشكرای گرتە بەر .


لە ماوەی پێشمەرگایەتیدا  دڵسۆزیی و لێهاتوویی خۆی لە مەیدانی كاری شۆڕشگێڕانە نیشاندا.


ئەو كاتەی بنكەكانی سازمانی خەبات لە ناچەی گمۆ لە (سەراومیراوای) كوردستانی عێراق بوو،كاك عەلی وەك كادری بەشی كۆمەڵایەتی و كادرێكی چالاك ئەركەكانی سازمانی خەبات ی بەڕێوە دەبرد. 


بێگومان جیاواز لە بەڕێوەبردنی ئەركە پێسپێردراوەكانی، شەهید عەلی لە رێنوێنی و هاندانی پێشمەرگەكانی سازمانی خەبات بۆ دڵسۆزی و لێبڕاوی لە پێناو ئازادی گەل ونیشتمان و سازمانی خەبات دەوری بەرچاوی هەبوو.جێگەی سەرنج بوو كە هەمیشە كۆڕو مەجلیسی كاك عەلی پڕبوو لە باسی شۆڕشگێری و لە گەل ئەوەشدا باس و بەسەر هاتی خۆش و گێڕانەوەی پەندی جۆراوجۆر كە هەمیشە پێشمەرگەكانی دەهێنایە سەر پێكەنین و دڵخۆشی دەكردن.


جێگەی داخە كە ئەو تێكۆشەرە خۆ نەویستە نەیتوانی زیاتر خزمەت بە گەل و نیشتمان و سازمانی خەبات بكات و زیاترلە گەشەكردن و گەیشتنی بە پلەی بەرزی بەرپرسایەتی دڵسۆزیەكانی بە جێ‌ بهێنایە.


شەهید عەلی چەمەن گوڵی لە ساڵی 1333 دا لە بنەماڵەیەكی كورد پەروەر لە شاری سەقز لە دایك بوو. لە شەش ساڵیدا رروی كردە قوتابخانە و خوێندنی سەرەتایی تەواو كرد و  پاشان  نەیتوانی درێژە بە خوێندن بدا، دوای خوێندن لە گەڵ باوكی خەریكی كار وكاسپی بوو. 


 شەهید عەلی چەمەن گوڵی لە كاری شۆڕشدا بێ پشوودان خەریك بوو ،  دڵخۆشی بە رێبازی شۆڕش بوو و خەمی كوردستان گەورەترین خەمی بوو، سازمانی خەبات ی بە رێی راستی گەلی كورد زانی و لە بەهاری 1364 دا هاتە ناو سازمانی خەباتەوە و زۆر بە دڵسۆزییەوە ئەركی پێشمەرگایەتی بە ئەنجام دەگەیاند.


 زۆر بە داخەوە لە رۆژی 31/گەلاوێژ/1364 لە كاتێكدا كە شەهید عەلی چەمەن گوڵی بە ماشینی(لەندەروێر) لە بەڕێ كردنی چەند كەس لە پێشمەرگەكانی سازمان لە بەرانبەر (سووركێو) گەڕاوە، مینێكی داندراو لە لایەن خۆفرۆشان لە ژێر ماشێنی شەهید عەلی چەمەن گوڵی تەقێتەوە و كاك عەلی شەهید دەبێ. كاك عەلی ژیانی بێ ماوەی ئەم جیهانەی بە سەربەرزی  دوایی هێنا. بەڵام خۆفرۆشان بە سەر لەنگی درێژە بە ژیان دەدەن و بە بەدناوی سەر دەنێنەوە وسزای دواڕۆژ چاوەڕوانیانە و رۆژێك دێت بەرەو دەوزەخی كوردستان بەڕێ دەكرێن.


تەرمی شەهید عەلی چەمەن گوڵی لە گۆڕستانی میراوای كوردستانی عێراق و لە نزیك بنكەی سەركردایەتی ئەو كاتی سازمانی خەبات بە خاك سپێردرا.


هەزاران سڵاو لە گیانی پاكی شەهیدی كاك عەلی چەمەن گولی


ئازادو ئاوەدان بێ‌ كوردستان 


بڕوخی ڕژیمی ملهوڕی ئاخوندی


 
ڕێکه‌وت: 2018-09-13 15:19:14
به‌شی ( شه‌هیدان )





دیمانه

سیاسی