له‌سه‌رهێل 64
سێ‌شه‌مه 4 سه‌رماوه‌ز 2720
سازمانی خه‌باتی کوردستانی ئێران
شه‌هید ناسر نانه‌وا

سه‌روه‌ری گه‌ل: شه‌هید ناسر نانه‌وا


ژیانی کەم ته‌مه‌نی مرۆڤ كه‌س ئاهی لێ نه‌كێشاوه‌ و كه‌س كۆڵی بۆ دانه‌گیراوه‌ و پشتی به‌ كۆڵی خۆیه‌وه‌ نه‌داوه‌. ئه‌و ژیانه‌ كه‌ گیانه‌ كه‌ به‌ هه‌ناسه‌ بڕكه‌ بڕ ده‌كا، به‌ڵام كه‌سی له‌به‌ر نه‌ حه‌ساونەتەوە.
ئه‌و ژیانه‌ كه‌ شه‌و به‌ڵێنی خۆشی له‌ ڕۆژدا ده‌داتێ و ڕۆژ به‌ڵێنی خۆشی له‌ شه‌ودا ده‌دا، شه‌و و ڕۆژ ده‌ستاو ده‌ست به‌ مرۆڤ ده‌كه‌ن و به‌ڵام ئاده‌می خۆش باوه‌ڕ، گوێ بۆ درۆ ده‌گرێ و عار ناگرێ.
ئه‌و ژیانه‌ كه‌ هه‌ر شتێكه‌ دێت و ده‌ڕوا و مرۆڤ به‌و هه‌موو بلیمه‌تیه‌ی وا ده‌زانێ هه‌ر جارێك شتێكه‌، چییه‌ وا له‌و ژیانه‌ بێ گیانه‌و بێ نیشانه‌ نابه‌زێ؟
له‌سه‌ر یه‌كپێ ده‌وه‌ستێ و ناته‌زێ و قامكی عیبره‌ت ناگه‌زێ. ئاخ؟ جار ناجاره‌ی شتێكی لێ دیاره‌، كه‌ زۆری لێبیزاره‌. هه‌ر چه‌ند ژیان بێتام و بێ ئاكامه‌، ژان و ده‌رمانه‌ و ده‌رمانیش جۆرێك ژانه‌، به‌ڵام شتێك هه‌یه‌ له‌ ژیاندا كه‌ نه‌خواردنه‌ و نه‌ خواردنه‌وه‌ و نه‌ به‌رگی جوانه‌ و خۆ له‌ گه‌رما و سه‌رما شاردنه‌وه‌یه‌، نه‌ حه‌سانه‌وه‌ و نه‌ ڕۆژ و شه‌وه‌. شتێكه‌ كه‌ ته‌نیا دڵ ده‌یناسێ و پێی دڵنیایه‌ و مه‌نزڵگای له‌ دڵدایه‌. ئه‌و شته‌ خۆشه‌ویستیه‌، خۆشه‌ویستی كه‌سه‌، خۆشه‌ویستی هه‌ڤاڵه‌، خۆشه‌ویستی ئه‌و كه‌سانه‌یه‌ كه‌ به‌ چاو وێنه‌ی لێگرتوون و داونیه‌ به‌ر ته‌له‌فزیۆنی دڵ. په‌یتا په‌یتا وێنه‌یان به‌ به‌ر چاوی دڵدا دێ و دڵ لێی تێر نابێ. ئاخ مرۆڤ چاری ناچارە و شتێكی لێدیاره‌ كه‌ زۆری لێبیزاره‌ كه‌ له‌ هه‌ڤاڵی هه‌ڵ ده‌بڕێ و فیلمی دیمه‌نی خۆشه‌ویستانی لێ ده‌پچڕێ. مردن ئه‌و مردنه‌ی كه‌ قڕ و قه‌په‌ له‌ ژێر زه‌مینێكی كپ دا، نه‌ هه‌ڤاڵه‌ و نه‌ هه‌واڵ، نه‌ باوك و نه‌ دایكه‌ و نه‌ ژن و منداڵ. ئه‌و دڵه‌ی به‌ خۆشه‌ویستی خۆشه‌ویستان گه‌ش ده‌بێته‌وه‌ و له‌ خۆشی وان هه‌ڵده‌په‌ڕێ، له‌ پێكه‌وتووه‌. ئه‌و چاوه‌ی كه‌ به‌ دیمه‌نی خۆشه‌ویستان گه‌ش ده‌بوه‌و ئاوی فرمێسكی شادی لێبڕاوه‌ و سیس بووه‌ و به‌ یه‌كدا نوساوه‌ ته‌نیا خۆشه‌ویستی دیتنی هه‌ڤاڵان و خۆشه‌ویستانه‌ كه‌ ئینسان به‌ ژیانی بێتام و بێ ڕه‌نگ و بۆی جیهان، ڕازی ده‌بێ و به‌ ژیانی تیكراری، خۆی ده‌خه‌ڵەتێنێ و چاو له‌ ناڕه‌وایی ژیان ده‌قونجێنێ. جا تا دڵ ته‌ڕ و تازه‌ و شلك بێ و ژه‌نگی ڕۆژگاری پڕ ته‌م و مژ لێی نه‌دابێ ڕوناكترو پاكتره‌ و وێنه‌ی خۆشه‌ویستانی تێدا بێ په‌ڵەیه‌ و له‌ هه‌ڵگرتنیان دا بێ هه‌ڵه‌یه‌. ژیانی لاو پڕه‌ له‌ موحیبه‌ت و دڵسۆزی و پاكی و چاكی. دنیا كه‌ به‌ موحه‌به‌ته‌وه‌ خۆش و ئاوه‌دانه‌، موحه‌به‌تی لاوانی و گه‌نج هه‌وێنی ژیانی جیهانه‌، بۆیه‌ مردنی لاوان ئه‌وەنده‌ به‌ژانه‌، ئه‌وه‌ی كه‌ له‌ باری موحه‌به‌تی لاوان پڕده‌كاته‌وه‌، شتێكه‌ كه‌ لاوان له‌ به‌ر چاوان ڕاده‌گرێ و یادیان له‌ دڵان ڕاده‌گرێ. مه‌رگی به‌ شه‌هاده‌ت، شه‌هاده‌ت مەرگێكه‌ له‌ ژیان و له‌ هه‌موو مردنان پاكترە، مه‌رگ نییه‌و ژیانه‌ و شه‌هید له‌ باره‌گای خودا میوانه‌، گۆڕی چاكی نیشتمانه‌، په‌رژینی گه‌ڕانگه‌ری هه‌ڵاڵه‌ی، له‌ خوێندا شه‌ڵاڵه‌ كه‌ به‌ پۆل ڕاده‌وه‌ستن و چاوی پڕ له‌ ئاویان له‌ گۆڕی شه‌هید ده‌بڕن. پۆل پۆل لاوان ده‌چنه‌ دیداریان، خۆزگه‌یان پێ ده‌خوازن، یادیان سروه‌ی به‌ر به‌یانه‌ بۆ دڵانی سیس و خه‌مگین. ده‌ژین له‌ دڵان نامرن ئه‌وانه‌، وا له‌ دڵی میلله‌تا ده‌ژین. به‌ڵێ مه‌رگی به‌ شه‌هاده‌ته‌ كه‌ لە بەری دوری له‌ دڵی شه‌هید و خۆشه‌ویستانیدا پڕ ده‌كاته‌وه‌ و بێزاری له‌ مه‌رگ لاده‌با. ئه‌مجاره‌ باسی هه‌ڤاڵێكی خۆشه‌ویست ده‌كه‌ین كه‌ ژیانی لاوی گۆڕیه‌وه‌ به‌ شه‌هاده‌ت و به‌ مه‌رگی پڕ له‌ شانازی له‌ ڕێی ڕزگاری گه‌ل و نیشتماندا.
باسی كاك ناسر نانه‌وا ئه‌و لاوه‌ی كه‌ به‌ شلكه‌ لاوی به‌رگی شه‌ره‌ف و خه‌ڵاتی شۆڕشگێری كرده‌ به‌ری و هاته‌ ناو ڕیزی پێشمه‌رگایه‌تییه‌وه‌.
ناسر نانه‌وا كوڕی كاك شه‌ریف له‌ ساڵی (١٣٤٥)دا له‌ شاری بانه‌ له‌ بنه‌ماڵیه‌كی هه‌ژار و زه‌حمه‌تكێش چاوی به‌ كوردستان هه‌ڵێنا. كاك ناسر نانه‌وا دوای ٧ساڵی چووه‌ مه‌دره‌سه‌ و له‌ شاری بانه‌ تا ده‌ورانی ڕاهنمایی ده‌رسی خوێند. كاك ناسر كه‌ شۆڕشی گه‌لانی ئێران دژی ڕژێمی پاشایه‌تی ده‌ستی پێكرد مێر منداڵێكی ١٣ساڵ بوو. كه‌ ڕژێمی خومەینی هاته‌ سه‌ركار و ددانی له‌ خه‌ڵكی كوردستان چیڕکرده‌وه‌و هێرشی بۆ سه‌ر خه‌ڵكی كوردستان هێنا و خه‌ڵكی كوردستان دیفاعیان له‌ خۆیان و نیشتمان كرد، شەهید ناسر هیچ دیمه‌نێكی له‌ دیمه‌نی پێشمه‌رگه‌ی كوردستان پێ جوانتر و هیچ ئه‌ركێكی له‌ ئه‌ركی شۆڕش و پێشمه‌رگایه‌تی پێ پیرۆزتر نه‌بوو. زۆر جار ده‌هاته‌ ناو پێشمه‌رگه‌وه‌و چاوی دڵی خۆی به‌ دیمه‌نیان ڕوون ده‌كرده‌وه‌. شه‌هید ناسر جوێ له‌ كاری خوێندن یارمه‌تی باوكی ده‌دا له‌ په‌یدا كردنی بژێوی ژیاندا. په‌یوه‌ندی سیاسی له‌ گه‌ڵ پێشمه‌رگه‌ی سازمانی خه‌بات ده‌گرت و كاتێك له‌ ماڵی خۆیان بوو دڵی هه‌ر له‌ لای پێشمەرگە‌ بوو. له‌ ١٣٦٥/٦/١دا هاته‌ ناو ڕیزی پێشمه‌رگایه‌تیه‌وه‌ و دوای ڕاهێنان و بارهێنان چووە ناو هێزی شه‌هید ئارام له‌ مه‌ڵبه‌ندی ٣ دا . شه‌هید ناسر گه‌نجێكی وریا وبه‌ هێز و توانا وبه‌ جه‌رگ بوو. له‌ گه‌رانه‌ سیاسی ونیزامیه‌كانی سالانی ٦٥ و ٦٦ و ٦٧دا بەشدار بوو و زۆر به‌ قاره‌مانی و له‌ خۆ بوردویه‌وه‌، له‌گه‌ڵ هه‌ڤاڵان لە زه‌ربه‌تدان له‌ دوژمن دا به‌شداری ده‌كرد. شه‌هید ناسر لاوێكی بێ ده‌نگ و دڵ ئاوه‌دان و ده‌ست هه‌ڵێن بوو هیوای دوا ڕۆژی سازمانی خەبات ی کوردستانی ئێران بوو. له‌ شه‌ڕی به‌ ناو بانگی تاژه‌بان دا، كه‌ شه‌وی ٢٥ی خه‌رمانان له‌ نێوان پێشمه‌رگه‌كانی سازمانی خه‌بات و هێزی جاش و پاسداردا ڕویدا وێرای پێشمه‌رگه‌ هه‌ره‌ ئازاكان هێرشی برده‌ سه‌ر سه‌نگه‌ره‌كانی دوژمن و هه‌ڵیان كه‌ندن. له‌ ڕۆژی ٥ی ڕه‌زبه‌ری ساڵی ١٣٦٧دا له‌ شه‌ڕی به‌ناو بانگی سه‌دبارو پشتی نجنێ و سیوچ و مه‌نیجه‌ڵاندا كه‌ زیاتر له‌ ٣٥٠٠ جاش و پاسدار له‌ هه‌موو لایه‌كه‌وه‌ به‌ كاتیۆشاو تۆپی ١٠٥ و تۆپی ١٠٦و ئه‌نواعی خۆمپاره‌ هاوێژ هێرشیان ده‌بردە سه‌ر پێشمه‌رگه‌كانی سازمانی خه‌بات، شه‌هید ناسر له‌و ده‌سته‌ پێشمه‌رگه‌یه‌ بوو كه‌ هێرشیان ده‌برده‌ سه‌ر دژمن و له‌ پشت ماڵی سه‌دبار چه‌ند جار هێرشی دوژمنیان تێك شكاند. به‌ڵام به‌ داخی گرانه‌وه‌ دوای ماوه‌یه‌ك شه‌ڕ و زه‌ربه‌ت دان لە پۆلی هێرش به‌ری دوژمن، شه‌هید ناسر پێكرا و گیانی به‌رزی فڕی بۆ كۆڕی شه‌هیدانی ڕێگای ڕزگاری کوردستان و به‌هه‌شتی شه‌هیدان. ته‌رمی پیرۆزی برایەوە شاری بانە و لە گۆڕستانی سڵێمان بەگ بەخاک سپێردرا.
هەزاران سڵاو لە ڕۆحی پاکی شەهیدان

ڕێکه‌وت: 2020-10-01 23:41:05






شه‌هیدانی ڕێگای خه‌باتی کوردایه‌تی

هه‌موو جارێک پۆلێک له‌ شه‌یدانتان پێ‌ده‌ناسێین