فەرمانی جیهاد لە ٢٨ی گەلاوێژ، به‌ڵگه‌یه‌کی ئاشکرای دژایه‌تیکردنی گه‌لی کورد
جەماوەری تێکۆشه‌ری کوردستان !
گهلانی ئازادیخواز و سته‌م دیده‌ی ئێران!
گهلانی ئێران له شۆڕشی سه‌رتاسه‌ری ١٣٥٧ دا توانیان کۆتایی به ده‌سه‌ڵاتی دەیان ساڵەی ڕژیمی پاشایەتی له ئێراندا بێنن. بە ڕوخانی دیکتاتۆری پاشایەتی،ئامانجیان گۆڕانی دەسەڵات و سستمێکی نوێی فه‌رمانڕه‌وایی بوو که ماف و ئازادیه فه‌ردی، نه‌ته‌وه‌یی و ئازادی بیروباوەڕ ده‌سته‌به‌ربکات.
لە دوای ڕووخانی ڕژێمی شاو هاتنە سه‌ر دەسەڵاتی خومه‌‌ینی و دارو ده‌سته‌که‌ی، زوو ده‌رکه‌وت که ئه‌م داروده‌سته نامۆ بە ئازادی و دێموکراسیە،تەنیا نیازیان قۆرغ کردنی به‌رهه‌می شۆڕشه‌‌و ئامادە نین مافەکانی گەلانی ئێران بسەلمێنن بەڵکو ئامانجیانە درێژه بە سته‌م و دیکتاتۆری بدەن. بە هاتنە سەر دەسەڵاتی خومەینی و ئاخوندە دواکەوتووەکان،هەر زوو ئازادی و دیموکراسی له حاست خه‌ڵکی ئێران و کوردستان به‌ته‌واوی پێشێلکرا.
دەستپێکردنی ستەم لە بەرانبەر خەڵکی کوردستان له کاتێک دا بوو که نوێنه‌رانی کورد هه‌وڵیان دەدا له‌ڕێگه‌ی ووت ووێژ و ئاشتی، چاره‌سه‌ری کێشه‌کان له‌گه‌ڵ ڕژیمی تازه دا بکه‌ن وخەڵکی کوردستان هومێدواربوون دەسەڵاتی نوێ، ددان به مافه‌کانی کورد و باقی گهلانی تر له ئێران دا بنێ و وڵات لە شه‌ڕ و نائارامی به‌دووربگرێ ، به‌ڵام به پێچه‌وانه‌ی ویست و داخوازیه‌‌‌کانی گه‌لی کورد له کوردستانی ئێران ، له ٢٨ی گه‌لاوێژی ١٣٥٨ دا، خومەینی، فتوایه‌کی ناڕه‌وا و دژمنکارانه‌ی دژ به خه‌ڵکی تێکۆشه‌ری کوردڕاگەیاند و فه‌رمانی له‌شکرکێشی هێزه‌کانی بۆ سه‌ر کوردستان ده‌رکرد.
ئه‌م فتوایه، ڕووی ڕەشی ئه‌م ڕژیمه‌ی بۆ هه‌موو ئازادیخوازانی ئێران و گه‌لی کورد ده‌رخست و بوه سه‌ره‌تایەکی نوێ لە ستەمکاری و جینایەتکاری و لە بەرانبەریشیدا، سه‌رهه‌ڵدانی شۆڕشێکی نوێ دژ به نیزامێکی دیکتاتۆر و سته‌مگه‌ر و زاڵم له ئێراندا. گه‌لی کورد ٢٨ی گه‌لاوێژی کرده رۆژی خۆراگری نەتەوەیی دژ بە زوڵم و زۆرداری و قۆناغێکی نوێ له دیفاع لە نیشتمان و خۆڕاگری له کوردستان دا.
ئه‌م ده‌سه‌ڵاته پاش تێپه‌ڕبوونی نزیک به نیو سه‌ده به‌سه‌ر فتوای خومەینی بۆ جیهاد دژ بە خەڵكی مافخوازی كورد و لەشكركێشیی بۆسه‌ر کوردستان بەردەوامە لە گرتن و کوشتن و لەسێدارەدان و ئێعدام و هەڵاواردنی سیستماتێکی گهلانی ئێران به‌گشتی و گەلی کورد و بزووتنەوە ڕەواکەی لە کوردستانی ئێران به‌تایبه‌تی. لە ٤٦ ساڵی ڕابردوودا بە سەدان ژن و منداڵ و گەنج و پیری کورد لەزۆربەی شار و دێهاتەکانی کوردستان بوونە قوربانی و شەهید کران. جینایەتی کەم وێنەی وەکوو جینۆساید و کوشتاری بەکۆمەڵ لە، قارنە، قەڵاتان، سەراۆقامیش، وسووکەند و... هتد، تیرباران و ئیعدامی بەکۆمەڵی خەڵکی بێ تاوان لە سنە، سەقز، پاوە، مەهاباد و زۆر شار و ناوچەی کوردستان و سەپاندنی ئابڵوقەی هەمە لایەنە لەسەر گەلی کورد و زۆر تاوانی قێزەونی نامرۆڤانەی دیکە، بوونە هۆی ئەوەی کورد و کوردستانیان بەگشتی زیانی زۆری رۆحی، گیانی و مادیان لێ بکەوێ.
خەلخاڵی جینایەتکار و حاکمی شەرعی خومەینی،لە کوردستاندا دەستی بە کۆمەڵکوژ و ڕەشەکوژی لاوان و کەسانی بێتاوانی کورد کرد و سه‌دان جینایه‌تی دژه ئینسانی ئه‌نجامدا.
لەماوەی هێرشی هێزە بەکرێگیراوەکان بۆ کوردستان و لەو قۆناغە سەختە دا پێشمەرگەکانی سازمانی خەبات بەڕیبەرایەتی مامۆستا سەیید جەلالی حوسەینی، سینگیان کردە قەڵغانی گەلەکەیان و بەگژ سپای پۆشتە و پەرداغی خومەینیدا چوون و خۆڕاگری و قارەمانی کەم وێنەیان بە تێکشاندی هێزی گاردی جاویدان (سپای قودس) تۆمارکرد. لەدوای ئەو جەنگە کەم وێنەیە خومەینی ناچاربوو لە رادیۆ تاران بڵێ "خەڵکی کوردستان من دەنگی ئێوەم بیست" و سەر لەنوێ ناچاربوو بانگەشەی فریوکارانەی دیالۆگ و چارەسەری ئاشتیانە بەرز بکاتەوە، بەڵام خومەینی و دەسەڵات داران هیچ کات باوەڕیان بە ئاشتی نەبوە و جیاواز لە دژایەتی ئاشتی و پەیڕەوکردنی ستەم و سەرکوت، بەهۆی سیاسەتی هەڵە و چەوتی و بەرێوەبەریی ناکارامە و گەندەڵی ئیداریو بە فیرۆدانی داهات و سەرمایەی گشتی و تەرخان کردنی سەرمایەی گەلانی ئێران بۆ پشتیوانی لە ترۆریزم، کاری ئاژاوەگێڕانە و دەستێوەردان لەوەڵاتان، هەوڵدان بۆ وەدەست هێنانی چەکی ناوکەیی، پەرەپێدانی بەرنامەی مووشەکی و دامەزرانی ئورگانی جیاجیای سەرکوتگەر، دەیان قەیرانی کۆمەڵایەتی و ئابووری خولقاندووەو ژیان و گوزەرانی خەڵکی ئێرانی، قورس و حەستەم کردوە.
دەستێوەردانی رژیمی ئێران له کاروباری ناوخۆی وڵاتانی ناوچه‌که، بووە هۆی سەرهەڵدانی جەنگی ماڵ وێرانکەر کە نزیکترین جەنگیان شەڕ لە گەڵ ئیسرائیل بوو کە زیان و شکستی که‌م وێنه‌‌ی تووش دەسەڵاتی ئاخوندەكان کردو زیانی زۆری بۆ خەڵکی ئێران بە دواوە بوو.ئه‌م ڕژیمه له باری سیاسی و دیپلۆماسیەوە لەلایەن کۆمەڵگەی نێونەتەوەییەوە تەریک و گۆشەگیرکراوەو بە هه‌ڕه‌شه‌یه‌کی جدی بۆ سه‌ر ئاشتی و دیموکراسی چاوی لێ ده‌کرێ. لەوەها کاتێکدا کە رژیم هەموو هەوڵێک بۆ مانەوەو پەنا بۆ هەر ئامرازێک بۆ درێژکردنەوەی تەمەنی پر لەتاوانکاری خۆی دەدا، کۆمەڵانی خەڵک بە رووبەرووبوونەوە و نارەزایەتی بەرین و راپەرینی جیددی جەماوەریی لەبەرانبەر ئەو دەسەڵاتە دیکتاتۆرەدا خۆڕاگری دەکەن و گه‌یاندویانەتە لێواری دارووخان و لەبەر یەک هەڵوەشانەوە.لە ٢٨ی گەلاوێژدا نەتەوەکەمان و بزوتنەوەکەی و سازمانی خەبات، لە مقاومەت و خۆڕاگری لەبەرانبەر دەسەڵاتی ئاخوندی و ڕوخانی یەکجاری ئه‌و ڕژیمه و کۆتایی هێنان بە چەوسانەوەی نەتەوەیی و هێنانەدیی دێموکراسی و ئازادی لەخەبات و تێکۆشان بەردەوام دەبێ.
لە ساڵرۆژی فەرمانی جیهادی خومەینی جارێکی دیکە نەفرین بۆ خومەینی و هاوباوەرەکانی و هاوکات سڵاو و درود بۆ گیانی پاکی هەموو ئەو شەهیدانە دەنێرین کە بەخوێنی خۆیان سەنەدی حەقانیەتی بزوتنەوەی مافخوازانەی کوردیان مۆر کرد و بوونە سەرمەشق و چۆڵەچرای رێی رزگاری کوردستان.
سەرکەوێ خەباتی نەتەوەیی و نیشتمانی گەلی کورد
بڕوخێ ڕژیمی نه‌گریس و دیکتاتۆری ئاخوندی
سازمانی خه‌باتی کوردستانی ئێران
کومیته‌ی ناوه‌ندی
۲۸ی گەلاوێژ ١٤٠٤
